ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، މުލަކަތޮޅުގެ ތިން ރަށަކަށް މިއަދު ވަޑައިގެން އެރަށްރަށުގެ ރައްޔިތުންނާއި ބައްދަލުކުރައްވައިފިއެވެ. މިގޮތުން ރައީސުލްޖުމްހޫރިއްޔާ ވަޑައިގެންފައިވަނީ މުލަކަތޮޅު ދިއްގަރަށާއި، މަޑުއްވަރީގެ އިތުރުން އެއަތޮޅު މުއްޔަށެވެ.
މިތިން ރަށަށް ރައީސުލްޖުމްހޫރިއްޔާ ވަޑައިގެން، އެރަށްރަށުގެ ޢާންމު ޙާލަތު އޮޅުންފިލުއްވައި، ރައްޔިތުންނަށް ދަތިވެފައިވާ ކަންތައްތަކަކީ ކޮބައިތޯ ބެއްލެވިއެވެ.
މި ރަށްރަށުގެ ރައްޔިތުންނާ ބައްދަލުކުރައްވައި، މައިގަނޑު ގޮތެއްގައި ރައީސުލްޖުމްހޫރިއްޔާ ވާހަކަފުޅު ދެއްކެވީ، އެ ރަށްރަށުގައި ހިންގެވުމަށް ސަރުކާރުން ނިންމަވާފައިވާ އެކިއެކި މަޝްރޫޢުތަކުގެ މައްޗަށެވެ. އަދި ރައްޔިތުންނަށް އެންމެ ބޮޑަށް ބޭނުންވެފައިވާ ކަންތައްތައް ފުރިހަމަކޮށްދެއްވުމަށްޓަކައި އެމަނިކުފާނަށް ކޮށްދެއްވެން ހުރި ހުރިހާ މަސައްކަތެއް ކޮށްދެއްވަމުން ގެންދަވާނެކަން، ރައްޔިތުންނަށް ޔަޤީންކޮށް އެރުއްވިއެވެ.
މީގެއިތުރަށް، ތަރައްޤީގެ މަޝްރޫޢުތައް ކުރިއަށް ގެންދިމުގައި ރައްޔިތުންގެ އެއްބާރުލުމާއި، މުޖުތަމަޢުގައި އަމަންއަމާންކަމާއި ޞުލްޙަ މަސަލަސްކަން ޤާއިމުވެފައި އޮތުމުގެ މުހިންމުކަމުގެ މައްޗަށްވެސް އެމަނިކުފާނުގެ ވާހަކަފުޅުގައި އަލިއަޅުއްވައިލެއްވިއެވެ.
ރައީސުލްޖުމްހޫރިއްޔާ މުލަކައަތޮޅު ދިއްގަރަށާއި، މަޑުއްވަރި އަދި މުއްޔަށް ވަޑައިގަތުމުން، އެމަނިކުފާނާއި އެމަނިކުފާނުގެ އަރިހުގައި ވަޑައިގެންނެވި ބޭފުޅުންނަށް ވިދާޅުވި ހޫނު މަރުހަބާއަށްޓަކައި، އެ ރަށްރަށުގެ ރައްޔިތުންނަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ.
