މިއަހަރުގެ ޤައުމީ ކުޑަކުދިންގެ ދުވަހާ ގުޅިގެން، ކުޑަކުދިންގެ ޙައްޤުތައް ރައްކާތެރިކުރުމުގެ ގޮތުން ހޭލުންތެރިކަން އިތުރުކުރުމަށްޓަކައި މިނިސްޓްރީ އޮފް ލޯ އެންޑް ޖެންޑަރ އާއި ޔުނިސެފް ގުޅިގެން ހިންގުމަށް ހަމަޖެހިފައިވާ "އަހަން" ކެމްޕެއިން ލޯންޗްކުރުމުގެ ރަސްމިއްޔާތުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި އެމަނިކުފާނުގެ އަނބިކަނބަލުން އަލްފާޟިލާ ފާޠިމަތު އިބްރާހީމް ބައިވެރިވެވަޑައިގެންފިއެވެ.
މިއަދު ހެނދުނު ހޮޓެލް ޖެންގައި ބޭއްވުނު މިރަސްމިއްޔާތުގައި، "އަހަން" ކެމްޕެއިން ރަސްމީގޮތުން އިފްތިތާޙުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން އަލްފާޟިލާ ފާޠިމަތު އިބްރާހީމްއެވެ.
މިރަސްމިޔާތުގައި، ކުޑަކުދިންގެ ޙައްޤުތައް ރައްކާތެރިކުރުމަށާއި ކުރިއެރުވުމަށް ރައީސުލްޖުމްހޫރިއްޔާގެ އަނބިކަބަލުން ކުރައްވަމުން ގެންދަވާ މަސައްކަތްޕުޅުތަކުގެ އަގުވަޒަންކޮށް، އެކަމަނާއަށް ހަނދާނީ ފިލައެއް އެރުއްވުން އޮތެވެ. މިފިލާ އެކަމަނާއާއި ޙަވާލުކޮށްދެއްވީ، ޔުނިސެފްގެ ޕްރޮގްރާމް ސްޕެޝަލިސްޓް އަލްފާޟިލް މުޙައްމަދު ނައީމެވެ.
