ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލު އަޙްމަދު، ހުވަދުއަތޮޅު އުތުރުބުރީގެ ބައެއް ރަށްރަށަށް ކުރެއްވި ދަތުރުފުޅެއް ނިންމަވާލެއްވުމަށްފަހު، ހޮނުހިރުދުވަހުގެ ރޭ މާލެވަޑައިގެންފިއެވެ. އެމަނިކުފާނުގެ މި ދަތުރުފުޅުގައި، ހުވަދުއަތޮޅު އުތުރުބުރީ މާމެންދުއަށާއި، ކަނޑުހުޅުދުއަށާއި، ދާންދުއަށާއި، ނިލަންދުއަށް ވަޑައިގެން އެރަށްރަށުގެ ރައްޔިތުންނާ ބައްދަލުކުރެއްވިއެވެ. އަދި، އެރަށްރަށުގައި ހިންގަމުންދާ ތަރައްޤީގެ މަޝްރޫޢުތަށް، ވަކިން ޚާއްޞަކޮށް، ރައްޔިތުންނަށް ލިބިދޭ ޞިއްޙީ ޚިދުމަތްތަކުގެ ފެންވަރު ރަނގަޅު ކުރުމާބެހޭގޮތުން ކަމާބެހޭ މުއައްސަސާތަކުގެ މެދުގައި މަޝްވަރާ ކުރެއްވިއެވެ.
