ދިވެހިރާއްޖެއަކީ އިޤްތިޞާދީ ގޮތުން ކުރިއަރާފައިވާ ޤައުމަކަށް ހެއްދެވުމަށްޓަކައި ސަރުކާރުން އަޅާ ކޮންމެ ފިޔަވަޅެއް އަދި ހިންގާ ކޮންމެ މަޝްރޫޢެއް ނުވަތަ ޙަރަކާތެއް ހިންގާނީ، އެކަމުގެ ސަބަބުން ޤައުމުގެ މިނިވަންކަމަށާއި އިސްތިޤްލާލަށް އެއްވެސް ބުރުލެއް ނާރާނެ ގޮތަށްކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރާއްޖޭގެ 49 ވަނަ މިނިވަންދުވަހުގެ މުނާސަބަތުގައި، މިރޭ ޖުމްހޫރީ މައިދާނުގައި ބޭއްވެވި ޚާއްޞަ ރަސްމިއްޔާތުގައި ދިވެހި ޤައުމާ މުޚާތަބު ކުރައްވައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، މިއަދު ޤައުމަށް އަންނަ ޙަމަލާތަކުގެ ބަޑިބޭހަކީ، އިޤްތިޞާދީ ގޮތުން ދަތިކުރުމާއި، ރައްޔިތުން ފަޤީރުކަމުގެ ތެރެއަށް އެއްލާލުންކަމުގައި ވިދާޅުވިއެވެ. އަދި އިޤްތިޞާދީ ގޮތުން ޤައުމު ނިކަމެތިކުރުމަށް މަސައްކަތްކުރުމަކީ، މިނިވަންކަން ނަގާލުމަށް ކުރެވޭ މަސައްކަތެއްކަމުގައިވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ރާއްޖޭގެ އިޤްތިޞާދު އިތުރަށް ފުޅާކޮށް ހަރުދަނާކުރުމަށްޓަކައި، ރާއްޖޭގައި ޚާއްޞަ އިޤްތިޞާދީ ސަރަޙައްދުތަކެއް ނުވަތަ ސްޕެޝަލް އިކޮނޮމިކް ޒޯންތަކެއް ޤާއިމުކުރުމަކީ، ސަރުކާރުގެ އިޤްތިޞާދީ ތަޞައްވުރުގެ ވަރަށް މުހިންމު އަމާޒެއްކަމުގައި ވިދާޅުވިއެވެ. އަދި، މިކަމާބެހޭ ބިލު ޤާނޫނަކަށް ވެގެން އައުމުން، ބޭރުގެ އިންވެސްޓަރުންގެ އިތުބާރު ލިބި، ރާއްޖެ އަންނަ އިންވެސްޓްމަންޓްތައް އިތުރުވެގެންދާނެކަމުގައި ވިދާޅުވިއެވެ. މިއާއެކު، ވަޒީފާގެ ފުރުޞަތުތައް އިތުރުވެ، ރާއްޖޭގެ އިޤްތިޞާދު، ފަތުރުވެރިކަމަށް ބިނާވެފައި އޮތްއޮތުން ކުޑަކުރެވި، ރާއްޖޭގައި ވިޔަފާރިއާއި ޞިނާޢީ ޙަރަކާތްތައް ފުޅާވެގެންދިއުމުގެ އިތުރުން، ރާއްޖޭގެ އުފެއްދުންތެރިކަން އެތައް ގުނައަކަށް އިތުރުވެ، ރާއްޖޭގައި ދައުރުވާ ބޭރު ފައިސާގެ މިންވަރު އިތުރުވެގެންދާނެކަމުގައިވެސް އެމަނިކުފާނު ފާހަގަކުރެއްވިއެވެ.
ސްޕެޝަލް އިކޮނޮމިކް ޒޯނުގެ ޤާނޫނު އައުމާއެކު ރާއްޖޭގެ އިޤްތިޞާދު އިތުރަށް ފުޅާކޮށް ހަރުދަނާކުރުމަށްޓަކައި ސަރުކާރުން ރާއްވަވާފައިވާ ތަރައްޤީގެ މަޝްރޫޢުތަކުގެ މައްޗަށް އެމަނިކުފާނުގެ ވާހަކަފުޅުގައި އަލިއަޅުއްވާލެއްވިއެވެ. މިގޮތުން، އިހަވަންދިއްޕޮޅު އިންޓަރގްރޭޓެޑް ޑިވެލޮޕްމަންޓް ޕްރޮޖެކްޓް ނުވަތަ އައިހެވަން މަޝްރޫޢަކީ، ރާއްޖޭގެ އުތުރުގެ ސަރަޙައްދަށް ބޮޑު ތަރައްޤީއެއް ގެނެސް، އުތުރުގެ ރައްޔިތުންނަށް ވަޒީފާގެ ފުރުޞަތުތައް އިތުރުކޮށްދީ ރައްޔިތުންގެ ތަނަވަސްކަން އިތުރުކޮށްދޭނެ، އުތުރުގެ ތަނަވަސްކަމުގެ މައި ދޮރޯށިކަމުގައި ރައީސުލްޖުމްހޫރިއްޔާ ބަޔާންކުރެއްވިއެވެ.
މީގެއިތުރުން، އައްޑޫ ސިޓީ ޒަމާނީ ސިޓީއެއްގެ ގޮތުގައި ތަރައްޤީކޮށް، އެ ސިޓީގައި ވިޔަފާރިއާއި، އިޤްތިޞާދީ ޙަރަކާތްތައް އިތުރުކުރުމަށްޓަކައި ގަން އިންޓަރނޭޝަނަލް އެއަރޕޯޓާއި، ހިތަދޫ ސަރަޙައްދީ ބަނދަރުގެ ފެންވަރުމަތިކޮށް، އެތަނުގައި އިޤްތިޞާދީ ހަރަކާތްތައް އިތުރުކޮށް އެތަންތަން ހިންގުން ހަރުދަނާކުރުމަކީ، ސަރުކާރުގެ ވަރަށް މުހިންމު އަމާޒެއްކަމުގައި ރައީސުލްޖުމްހޫރިއްޔާ ވިދާޅުވިއެވެ. ރައީސުލްޖުމްހޫރިއްޔާ އިތުރަށް ދެއްކެވި ވާހަކަފުޅުގައި، އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީ ކުރުމުގެ މަޝްރޫޢެއް މިހާރު ފަށާފައިވާއިރު، ސަރަޙައްދީ ވައިގެ ބަނދަރުތައް ތަރައްޤީކޮށް، އިތުރު ވައިގެ ބަނދަރުތަކެއް ޤާއިމުކުރުމުގެ މަސައްކަތްވެސް ދަނީ ކުރެވެމުންކަމުގައި ވިދާޅުވިއެވެ.
ޒުވާނުންނާއި މުޖުތަމަޢުގެ އެންމެހައި ފަރުދުންގެ ހަމަޖެހުމަށްޓަކައި ޒުވާނުންނަށް ފަހި މުޖުތަމަޢެއް ބިނާކުރުމުގެގޮތުން ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށްވެސް ރައީސުލްޖުމްހުރިއްޔާގެ ވާހަކަފުޅުގައި ބައްލަވައިލެއްވިއެވެ. މިގޮތުން، ހުޅުމާލޭގައި ބިނާކުރުމަށް ހަމަޖެހިފައިވާ ޔޫތުސިޓީ ވެގެންދާނީ، ޒުވާނުންނަށް ވަޒީފާގެ ފުރުޞަތުތަކާއި، މުނިފޫހިފިލުވުމާއި އުނގެނުމުގެ ފުރުޞަތު ތަނަވަސްކޮށްދޭނެ ނާރެހަކަށް ކަމުގައި ބަޔާންކުރެއްވިއެވެ.
ރާއްޖޭގެ ފަތުރުވެރިކަން ބޮއިކޮޓް ކުރުމަށާއި، ރާއްޖޭގެ މަސްވެރިން ބާނާ މަސް، ގަންނަ ފަރާތްތަކުގެ ހިތްތަކުގައި ޝައްކު އުފައްދައި މަސްވެރިކަން ހަލާކުކުރުމަށް ވަކިފަރާތްތަކަކުން ކުރަމުން ގެންދާ މަސައްކަތްތައް ރައީސުލްޖުމްހޫރިއްޔާގެ ވާހަކަފުޅުގައި ކުށްވެރިކުރެއްވިއެވެ. މިރޮނގުން ވާހަކަފުޅު ދައްކަވަމުން، ދިވެހި ރައްޔިތުން ފަޤީރުކުރުމަށް ކުރާ ހުރިހާ މަސައްކަތެއް ބަލިކޮށް، ޞުލްޙަވެރި ޒުވާން ޖީލެއް ބިނާކޮށް، ދިވެހިންނަށް ތަނަވަސްކަން ހޯދައިދިނުމުގައި މި ސަރުކާރު ކުރިއަށްދާނެކަމުގެ ޔަޤީންކަން ރައީސުލްޖުމްހޫރިއްޔާ ދިވެހި ރައްޔިތުންނަށް ދެއްވެވިއެވެ.
