ރާއްޖޭގައި މިއޮތް ހަމަޖެހުން، ސިޔާސީ އެކިއެކި ބޭނުންތައް ފުއްދުމަށްޓަކައި ނަގައިނުލުމަށް ރާއްޖޭގެ ރައްޔިތުންނަށާއި، ރާއްޖޭގައި ޙަރަކާތްތެރިވާ ސިޔާސީ ޕާޓީތަކަށާއި، ސިޔާސީ ވެރިންނަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިލްތިމާސް ކުރައްވައިފިއެވެ. ރައީސުލްޖުމްހޫރިއްޔާ މިކަމަށް އިލްތިމާސް ކުރެއްވީ ރާއްޖޭގެ 49 ވަނަ މިނިވަންދުވަހުގެ މުނާސަބަތުގައި، މިރޭ ޖުމްހޫރީ މައިދާނުގައި ބޭއްވެވި ދިދަ ނެގުމުގެ ރަސްމިއްޔާތުގައި ދިވެހި ޤައުމާ މުޚާޠަބު ކުރައްވައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، މިއަދު މިނިވަންކަމުގެ އުފާ ޙާޞިލު ކުރަމުންދާއިރު، ޤައުމުގައި މިވަނީ އަމަންއަމާންކަން ޤާއިމުކުރެވިފައި ކަމުގައި ފާހަގަކުރައްވަމުން، މާތްﷲގެ ހެޔޮ ރަޙްމަތްފުޅާއެކު، ރާއްޖެ ދަތުރުކުރަމުން މިދަނީ، ތަރައްޤީގެ އާ އުދަރެހަކަށް ކަމުގައި ވިދާޅުވިއެވެ. އަދި، ސިޔާސީ އިދިކޮޅު ފަރާތްތަކުން ގަސްދުގައި ހަމަޖެހުން ނަގާލުމަށް މަސައްކަތް ކުރަނީ މުޖުތަމަޢުގައި ނުތަނަވަސްކަމުގެ އުދާސް އުފައްދައިގެންކަމަށާއި، ސިޔާސީ ބޭނުމުގައި އުފަންކުރުވާ އުދާސްކަން މިނިވަންކަމަށް އަސަރުފޯރާ ހިސާބަށް ގެންގޮސްފައިވާތަން ދިވެހި ތާރީޚުގައި ފެނިގެން ގޮސްފައިވާކަމުގައި ވިދާޅުވިއެވެ. އަދި ޤައުމު ހަމަޖެހުމުގެ ނޭވާއެއްލަމުންދާ މިދަނޑިވަޅުގައި، ޤައުމު ހަލަބޮލި ކަމުގެ ތެރެއަށް ސޮއްސާލުމަށް އެމަނިކުފާނުގެ ސަރުކާރުން ފުރުޞަތު ނުދެއްވާނެކަމުގައި ވިދާޅުވިއެވެ.
" ރައްޔިތުންގެ ރުހުމާއި ލޯބި ހޯދުމުގައި ކާމިޔާބީ ޙާޞިލު ނުވުމަކީ، ޤައުމު ނަފްރަތާއި ޙަސަދައިގެ ފުންވަޅުގަނޑަށް ވައްޓާލަންޖެހޭ ސަބަބެއްކަމަކަށް އަޅުގަނޑު ގަބޫލެއް ނުކުރަން." ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖެއަށް ފުރިހަމަ މިނިވަންކަން ލިބުނީ، ބޮޑެތި ޤުރްބާނީތަކެއްވެގެން ކަމުގައި ފާހަގަކުރައްވަމުން، ދިވެހި ޤައުމުގެ މިނިވަންކަމާއި ސިޔާދަތު ދެމެހެއްޓެވުމަށް މަސައްކަތްޕުޅު ކުރެއްވި ޤައުމީ އަބްޠާލުންނާއި، ދިވެހިރާއްޖެ އެކިދުވަސްވަރު ބޭރުގެ އިސްތިޢުމާރުގެ އަތްދަށުން ސަލާމަތްކޮށްދެއްވުމަށް، ޤައުމީ ބަޠަލުން ކުރެއްވި މަތިވެރި ޖިހާދުގެ މަތިންވެސް ހަނދާންކޮށް، ދިވެހި ސަރުކާރާއި ރައްޔިތުންގެ ނަމުގައި އެބޭފުޅުންނަށް ޙައްޤުވެގެންވާ ޝުކުރާއި ތަޢުރީފު އަދާކުރެއްވިއެވެ.
"ރާއްޖެ ފުރިހަމަ މިނިވަން ދައުލަތަކަށްވީ، ރާއްޖޭގެ މައްޗަށް އިސްތިޢުމާރީ ނުފޫޒު ހިންގަމުން ގެންދިޔަ ބޭރުގެ ބާރުތަކާ ހަނގުރާމަކޮށްގެނެއް ނޫން. އެހެން ނަމަވެސް، މާތްﷲގެ ހެޔޮ ރަޙްމަތްފުޅާއި، އެކަލާނގެ އިރާދަފުޅުން ރާއްޖެއަށް ފުރިހަމަ މިނިވަންކަން ލިބުނީ، ބޮޑެތި ޤުރްބާނީތަކެއްވެގެން." ރައީސުލްޖުމްހޫރިއްޔާ ވިދާޅުވިއެވެ.
ސަރުކާރުގެ އެންމެ އިސް މަސްއޫލިއްޔަތަކީ އަދި ވާޖިބަކީ، މާތްވެގެންވާ އިސްލާމްދީން ޙިމާޔަތްކުރުމާއެކު، ރާއްޖޭގެ މިނިވަންކަން ދެމެހެއްޓުން ކަމުގައި ބަޔާންކުރައްވަމުން، މިނިވަންކަން ދެމެހެއްޓުމުގެ އަސާސަކީ މުޖުތަމަޢުގެ ހަމަޖެހުމާއި ފުދުންތެރިކަންކަމުގައި ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. އަދި ސަރުކާރުގެ ޢަޒުމަކީ، ދިވެހި މުޖުތަމަޢަކީ ޞުލްޙަވެރި ޒުވާން، ތަޢުލީމީ، ތަހުޒީބު މުޖުތަމަޢަކަށް ހެދުންކަމުގައި ވިދާޅުވިއެވެ.
މިނިވަންދުވަހުގެ މުނާސަބަތުގައި، ދިވެހި ޤައުމާ މުޚާޠަބު ކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ދައުލަތަކަށް ފުރިހަމަ މިނިވަންކަން ލިބުމަކީ، އެ ދައުލަތުގެ ރައްޔިތުންނަށް ލިބޭނޭ އެންމެބޮޑު ހިތްހަމަޖެހުންކަމުގައި ވިދާޅުވެ، ފަލަސްޠީނުގެ ލޮބުވެތި ރައްޔިތުން، މިނިވަންކަމަށްޓަކައި ކުރަމުންދާ މަތިވެރި ޖިހާދުގެ މައްޗަށްވެސް އަލިއަޅުއްވައިލެއްވިއެވެ. މިރޮނގުން، އިޒުރޭލުން ފަލަސްޠީނުގެ ނިކަމެތި ރައްޔިތުންނަށް ދެމުންދާ އަނިޔާތަކާއި ޙަމަލާތަކުގައި، ވަރަށްގިނަ ޢަދަދެއްގެ ކުޑަކުދިންނާއި ޒުވާނުން މަރައި، ހިންގަމުންގެންދާ ލާއިންސާނީ ޢަމަލުތައް، ސަރުކާރުން ވަރަށް ބޮޑަށް ކުށްވެރިކުރައްވާ ކަމަށާއި، އަދި ފަލަސްޠީނުގެ މައްސަލަ ޙައްލުކުރުމަށްޓަކައި ދުނިޔޭގެ ބާރުގަދަ ޤައުމުތަކުން އިސްނަގައިގެން، އ.ދގެ އެހީތެރިކަމާއެކީގައި، އަވަސް މަސައްކަތްތަކެއްކޮށް، ޔަހޫދީން، ތަކުރާރުކޮށް ފަލަސްޠީނަށް ދެމުން ގެންދާ ޢުދުވާނުތަކަށް ހުއްޓުމެއް ގެންނަންޖެހޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
