ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ އަރިހަށް، ދުބާއީ ޕޯޓްސް ވަރލްޑް (ޑީޕީ ވަރލްޑް)ގެ ޗެއަރމަން، ސުލްތާން އަޙުމަދު ބިން ސުލެޔަމް، މިއަދު އިޙްތިރާމުގެ ޒިޔާރަތެއް ކުރައްވައިފިއެވެ.
މިއަދު މެންދުރުކުރީގައި ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމުގައި، ޑީޕީ ވަރލްޑުގެ ފަރާތުން ދުބާއީއާއި ދުނިޔޭގެ އެކިކަންކޮޅުތަކުގައި ހިނގަމުންދާ ތަރައްޤީގެ މަޝްރޫޢުތަކާބެހޭ މަޢުލޫމާތު އެކުންފުނީގެ ޗެއަރމަން، ރައީސުލްޖުމްހޫރިއްޔާއާ ހިއްޞާކުރެއްވިއެވެ. އަދި، ސަރުކާރުން ހިންގެވުމަށް ހަމަޖެހިފައިވާ ތަރައްޤީގެ ބޮޑެތި މަޝްރޫޢުތައް ހިންގުމަށްޓަކައި، ޑީޕީ ވަރލްޑުގެ ތަޖުރިބާއިން ދިވެހި ސަރުކާރަށް އެހީތެރިކަން ހޯއްދެވިދާނެ ގޮތްތަކާބެހޭގޮތުންވެސް މަޝްވަރާކުރެއްވިއެވެ.
މި ބައްދަލުކުރެއްވުމުގައި، ރައީސުލްޖުމްހޫރިއްޔާގެ އޮފީހުގެ މިނިސްޓަރ ޢަބްދުﷲ އަމީނާއި، މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ޞަޢީދު ބައިވެރިވެވަޑައިގެންނެވިއެވެ.
