ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލް އަޙްމަދު، ސީ-އެމްބިއުލަންސްގެ ޚިދުމަތް މިއަދު އިފްތިތާޙް ކޮށްދެއްވައިފިއެވެ. މި ޚިދުމަތް އިފްތިތާޙް ކޮށްދެއްވުމަށް މިއަދު ރަސްމީ ފާލަމުގައި އޮތް ރަސްމިއްޔާތުގައި، ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި، މިއަދު ތަޢާރުފުވެގެންދިޔަ ޚިދުމަތަކީ، ރާއްޖޭގެ އެކި ސަރަޙައްދުތަކުގައި ދިރިއުޅޭ ރައްޔިތުންގެ ފުރާނަ ސަލާމަތްކުރުމަށާއި، އަދި ލަސްނުވެ ޢާންމު ރައްޔިތުންނަށް ފަރުވާ ފޯރުވައިދިނުމުގެ ޚިދުމަތް ހަރުދަނާ ކުރެއްވުމަށްޓަކައި ފެށްޓެވި ޚިދުމަތެއް ކަމުގައި ވިދާޅުވިއެވެ. އަދި މިއީ، ސަރުކާރުގެ އެންމެ މުހިންމު އެއް ވަޢުދު ފުއްދުމަށްޓަކައި އެޅިގެންދާ ފިޔަވަޅެއްކަންވެސް ރައީސުލްޖުމްހޫރިއްޔާގެ ނައިބު ފާހަގަކުރެއްވިއެވެ.
މިއަދު މި ޚިދުމަތް ތަޢާރުފުވެގެންދިޔުމާއެކީގައި ޞިއްޙީ ނިޒާމުގެ ތެރޭގައި އެންމެ ބޮޑަށް ދިމާވެފައިވާ އެއް މައްސަލަކަމަށްވާ، ރާއްޖޭގެ އެކި ހިސާބުތަކުން ބަލިމީހުންނަށް ލިބެންޖެހޭ ފަރުވާ ފޯރުކޮށްދިނުމުގައި ދިމާވާ ދަތިތައް ޙައްލުވެ، ވަގުތުން ފަރުވާ ފޯރުވައިދިނުމުގެ ނިޒާމެއް ރާއްޖޭގެ ތާރީޚުގައި ފުރަތަމަ ފަހަރަށް ޤާއިމުވެގެންދިޔައީ ކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ. އަދި މި ޚިދުމަތް ތަޢާރުފުވެގެންދިޔުމުން، ބަލިމީހާއަށް އެކަށީގެންވާ ފަރުވާ ލިބިދިނުމަށްޓަކައި ދާނޭ ދިމާއެއް ނޭނގި ހޭދަވާ ވަގުތު ކުޑަވެގެންދާނެކަމާއި، މާލެއަށް ބަލިމީހުން ގެނައުމަށް މިހާރު ދިމާވާ މައްސަލަ ޙައްލުވެ، ރާއްޖޭގެ ޞިއްޙީ ނިޒާމުގެ ތެރޭގައި މިހާރު ކުރެވެމުންދާ ޚަރަދު މި ޚިދުމަތުގެ ސަބަބުން ވަރަށް ބޮޑުތަން ކުޑަވެގެންދާނެކަން ރައީސުލްޖުމްހޫރިއްޔާގެ ނައިބު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، މި ޚިދުމަތް ތަޢާރުފުވެގެންދިޔުމާއެކު ސަރުކާރުގެ އުންމީދަކީ، މިއަހަރު ނިމެންވާއިރަށް އެންމެ ލަސްވެގެންވެސް މުޅި ރާއްޖެއަށް މި ޚިދުމަތް ތަޢާރުފުކުރެއްވޭނެ ގޮތަކަށް ކަންތައްތައް ހަމަޖެއްސެވުން ކަމުގައި ވިދާޅުވިއެވެ. އަދި ރާއްޖޭގެ އެއްވެސް ރަށެއްގެ ރައްޔިތަކު މަޙްރޫމް ނުވާނޭ އުސޫލެއްގެ މަތިން، މިއަހަރު ނިމެންވާއިރަށް އިރާދަކުރެއްވިއްޔާ 26 ލޯންޗާއެކު މުޅި ރާއްޖެއަށް މި ޚިދުމަތް ތަޢާރުފު ކުރެއްވުން ކަމުގައިވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ރާއްޖޭގެ ޞިއްޙީ ނިޒާމު ހަރުދަނާ ކުރެއްވުމަށް ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށްވެސް ބައްލަވާލެއްވިއެވެ. އަދި ޞިއްޙީ ނިޒާމު ކޮޅަށް ޖެހުމަށް ކުރެއްވި މަސައްކަތްތަކުގެ ނަތީޖާ މިއަދު ފެންނަމުން އެބަދާ ކަމަށާއި، އިރާދަކުރެއްވިއްޔާ ރާއްޖޭގެ ރައްޔިތުން ހިތްހަމަޖެހޭ މިންވަރަށް ލަސްތަކެއްނުވެ، މި ޚިދުމަތް ދެއްވޭނެ ކަމުގެ ޔަޤީންކަން އެބައޮތް ކަމުގައި އެމަނިކުފާނު ވިދާޅުވިއެވެ.
ރާއްޖޭގެ ޞިއްޙީ ނިޒާމުގައި މަސައްކަތް ކުރައްވާ ފަރާތްތަކުން ރާއްޖޭގެ ރައްޔިތުންނަށް އެހީތެރވެދެއްވަންޖެހޭ ކަމަށް ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި ފާހަގަކުރެއްވިއެވެ. އަދި ރައްޔިތުންނަށް މިއަދު އެންމެ ބޮޑަށް ޚިދުމަތް ބޭނުންވެފައިވާ ދާއިރާއަކީ، ޞިއްޙީ ޚިދުމަތުގެ ދާއިރާކަން ރާއްޖޭގައި ޞިއްޙީ ނިޒާމު ހިންގަވަން މިއަދު ތިއްބެވި ބޭފުޅުންނަށް އެނގިވަޑައިގަންނަވަންޖެހޭ ކަމުގައި ވިދާޅުވިއެވެ. "މި ދާއިރާއަށް ބޭނުންވާ ޞިއްޙީ ސާމާނު ގެނެވިދާނެ. ޑޮކްޓަރުން ގެނެވިދާނެ. ސަރުކާރުން އޮނިގަނޑު ތަޢާރުފުކުރެވިދާނެ. އެމްބިއުލަންސް ލޯންޗް ކުރެވިދާނެ. އެކަމަކު އެއަށްވުރެ މުހިންމު ކަމަކީ، ޚިދުމަތުގައި ތިއްބެވި ބޭފުޅުން، މިތަންތަން މެނޭޖުކުރައްވަން ތިއްބެވި ބޭފުޅުން، މިތަންތަން ހިންގަވަން ތިއްބެވި ބޭފުޅުން ޚާލިޞް ހިތަކާއެކީގައި މި މަސައްކަތް ކުރެއްވުމަށް ތެދުވެވަޑައިގަތުން." ރައީސުލްޖުމްހޫރިއްޔާގެ ނައިބު ވިދާޅުވިއެވެ.
މި ރޮނގުން ވާހަކަފުޅު ދައްކަވަމުން، މިއިން ކޮންމެ މަސައްކަތަކީ، ތަކުރާރުކޮށް އެދިގެން، ތަކުރާރުކޮށް އިލްތިމާސްކޮށްގެން، ތަކުރާރުކޮށް ސިޓީތައް ގޮސްގެން ޚިދުމަތް ކުރައްވަން ތިއްބެވި ބޭފުޅުން ތެދުވެވަޑައިގަންނަވަންޖެހޭ ކަމެއްކަމަށްވާނަމަ، ރައްޔިތުންނަށް ދެވޭ ޚިދުމަތުގެ ފެންވަރު ރަނގަޅު ނުވާނެ ކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ. އަދި މިއަދު ރާއްޖޭގެ އެކި ހިސާބުތަކުގައި ކަންކަން ހިންގަވަން ތިއްބެވި ބޭފުޅުން، ސިޔާސީ އެކި ފިކުރުގެ ތެރޭގައި ގެނބިގެންގޮސް، މި ޚިދުމަތަށް ބުރޫއަރާ ފެންވަރަށް އެބައެއްގެ ސިޔާސީ ފިކުރާއި ވިސްނުން ތަޣައްޔަރުވެއްޖެކަމަށްވާނަމަ، ރާއްޖޭގެ ޞިއްޙީ ނިޒާމަށް ސީ-އެމްބިއުލަންސާއި، ޑޮކްޓަރުންގެ އޮނިގަނޑު ތަޢާރުފު ކުރި ކަމުގައިވިޔަސް، މި ޚިދުމަތް ރައްޔިތުންނާ ހަމައަށް ފޯރުކޮށްދިނުމުގައި ރައްޔިތުން ދެކެން ބޭނުންވާ ފެންވަރަށް ޚިދުމަތް އައުމުގައި ދަތިތަކެއް ހުންނާނެ ކަމުގައިވެސް ރައީސުލްޖުމްހޫރިއްޔާގެ ނައިބު ވިދާޅުވިއެވެ.
މި ރަސްމިއްޔާތުގައި، ސީ-އެމްބިއުލަންސްގެ ޚިދުމަތް ތަޢާރުފު ކުރެއްވުމުގެ ގޮތުން މެޑިކަލް އިކުއިޕްމަންޓްސް ކިޓް، ކުޑަހުވަދޫ ސީ-އެމްބިއުލަންސް ލޯންޗްގެ ކެޕްޓަން މުޙަންމަދު ޒަކަރިއްޔާއާ ހަވާލުކޮށްދެއްވީ، ރައީސުލްޖުމްހޫރިއްޔާގެ ނައިބު ޑޮކްޓަރ މުޙަންމަދު ޖަމީލު އަޙްމަދެވެ. އަދި މި ޚިދުމަތް ތަޢާރުފު ކުރެއްވުމާ ގުޅިގެން، އެކަމަށް ޚާއްޞަ ކުރެވިފައިވާ ލޯންޗެއްގައި ބަލިމީހަކު މާލެ ގެންނަ މަންޒަރު ދައްކައިދޭ ޑެމޮންސްޓްރޭޝަނެއްވެސް ހުށަހެޅިއެވެ.
ސީ-އެމްބިއުލަންސް ލޯންޗްގެ ޚިދުމަތް އިފްތިތާޙް ކޮށްދެއްވުމަށްފަހު، އެ ޚިދުމަތަށް ޚާއްޞަ ކުރެވިފައިވާ ލޯންޗް ރައީސުލްޖުމްހޫރިއްޔާގެ ނައިބު ބައްލަވާލެއްވިއެވެ.
