ރާއްޖެއާއި އިންޑިއާއާ ދެޤައުމުގެ ދެމެދުގައި އޮތް ގުޅުން، މިހާރަށްވުރެ ބޮޑަށް ބަދަހިކުރެއްވުމަށް އިންޑިއާގެ އާ ބޮޑުވަޒީރު ނަރެންދުރަ މޯދީ ބޭނުންފުޅުވާ ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، އިންޑިއާގެ އާ ބޮޑުވަޒީރު ނަރެންދުރަ މޯދީ، ބޮޑުވަޒީރު ކަމުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް، އިންޑިއާއަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށްފަހު، މިއަދު ހަވީރު ރާއްޖެ ވަޑައިގެން، ޚަބަރުފަތުރާ ވަސީލަތްތަކާ އިބްރާހީމް ނާޞިރު އިންޓަރނޭޝަނަލް އެއަރޕޯޓްގައި ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، މި ރަސްމިއްޔާތުގެ ކަންތައްތައް ދިޔައީ ވަރަށް ފުރިހަމައަށް އަދި ވަރަށް ރަނގަޅަށް ކަމުގައި ވިދާޅުވިއެވެ. އަދި އިންޑިއާ ސަރުކާރުން ރާއްޖެއާ ދޭތެރޭގައި ވަރަށް ބޮޑަށް ކަމޭހިއްތަވައިގެން، މިދަތުރުފުޅުގެ ކަންތައްތައް ވަރަށް ރަނގަޅަށް ކޮށްދެއްވާފައިވާކަން ފާހަގަކުރެއްވިއެވެ.
ރައީސުލްޖުމްހޫރިއްޔާ، އިންޑިއާގެ ބޮޑުވަޒީރާ މިއަދު ބައްދަލުކުރައްވައި، މައިގަނޑު ގޮތެއްގައި ދެއްކެވި ވާހަކަފުޅުތަކުގެ މައްޗަށްވެސް ރައީސުލްޖުމްހޫރިއްޔާ ބައްލަވައިލެއްވިއެވެ. މިރޮނގުން ވާހަކަފުޅު ދައްކަވަމުން، އިންޑިއާގައި ނިމިގެން މިދިޔަ ކޮންގްރެސް ސަރުކާރާއެކު ރާއްޖެއިން ކޮށްފައިވާ މުޢާމަލާތުތައް، އެގޮތަށް ކުރިއަށް ގެންގޮސްދެއްވާނެ ކަމުގެ ޔަޤީންކަން، ބޮޑުވަޒީރު ދެއްވި ކަމުގައި ރައީސުލްޖުމްހޫރިއްޔާ ވިދާޅުވިއެވެ. މީގެއިތުރުން، މިސަރަޙައްދުގެ ކަނޑުގެ ސަލާމަތާއި ރައްކާތެރިކަމާ ބެހޭގޮތުންނާއި، ސާކްގެ ޙަރަކާތްތައް، ބައިނަލްއަޤްވާމީ ފެންވަރެއްގައި ވަރަށް ބާރަށް ކުރިއަށް ގެންދެވުމާ ބެހޭގޮތުންވެސް މަޝްވަރާ ކުރެއްވި ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އަންނަ އަހަރަކީ ރާއްޖޭގެ މިނިވަންކަމުގެ ރަން ޔޫބީލް ފާހަގަކުރާ އަހަރު ކަމަށްވާތީ، މި މުނާސަބަތާ ގުޅިގެން ރާއްޖެއަށް ދަތުރުފުޅެއް ކުރެއްވުމަށް އެދިވަޑައިގެން، އިންޑިއާގެ ބޮޑުވަޒީރަށް ދަޢުވަތު ދެއްވި ކަމުގައި ވިދާޅުވިއެވެ. އަދި މިދަތުރުފުޅުގައި، ސްރީލަންކާގެ ރައީސް މަހިންދަ ރާޖަޕަކްސެއާ ބައްދަލުކުރައްވައި، ރާއްޖެއަށް ދަތުރުފުޅެއް ކުރެއްވުމަށް އެމަނިކުފާނަށް އަރުވާފައިވާ ދަޢުވަތު ތަކުރާރު ކުރެއްވި ކަމަށާއި، އެދަތުރުފުޅު ކުރައްވާނެ ކަމުގެ ޔަޤީންކަން، ރައީސް ރާޖަޕަކްސެ ދެއްވި ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އިންޑިއާއަށް މިކުރެއްވި ދަތުރުފުޅުގައި، އިންޑިއާގައި މިހާރު ވެރިކަން ކުރަމުންމިދާ ބާރަތިޔާ ޖަނަތާ ޕާޓީ، ބީ.ޖޭ.ޕީ.ގެ އިސްބޭފުޅުންނާ ބައްދަލުކުރައްވައި، އެ ޕާޓީއާއި ޕީ.ޕީ.އެމް.އާ ދެމެދު ގާތް ގުޅުމެއް އުފެއްދުމާ ގުޅޭގޮތުން މަޝްވަރާ ކުރެއްވި ކަމުގައި ވިދާޅުވިއެވެ. އަދި ބީ.ޖޭ.ޕީ.ގެ އިސްބޭފުޅުންގެ ވަފްދެއް ރާއްޖެއަށް ޒިޔާރަތް ކުރެއްވުމަށް ދަޢުވަތު ދެއްވި ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
