ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، އިންޑިއާގައި މިހާރު ވެރިކަންކުރާ ބާރަތިޔަ ޖަނަތާ ޕާޓީ، ބީ.ޖޭ.ޕީ.ގެ އިސްބޭފުޅުންނާ މިއަދު ބައްދަލުކުރައްވައިފިއެވެ.
ރައީސުލްޖުމްހޫރިއްޔާ ދިއްލީގައި ހުންނަވާ ހޮޓެލްގައި އޮތް މިބައްދަލުކުރެއްވުމުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިއަދު ހެނދުނު އެމަނިކުފާނު އިންޑިއާގެ އާ ބޮޑުވަޒީރު ނަރެންދުރަ މޯދީއާ ބައްދަލުކުރައްވައި، މައިގަނޑު ގޮތެއްގައި ދެއްކެވި ވާހަކަފުޅުތަކުގެ މައްޗަށް ބައްލަވައިލެއްވިއެވެ. އަދި އިންޑިއާ ސަރުކާރާ އެކީގައި، ދިވެހި ސަރުކާރުން ވަރަށް ގާތް ގުޅުމެއް ބާއްވާނެ ކަމުގެ ޔަޤީންކަން، އެބޭފުޅުންނަށް ރައީސުލްޖުމްހޫރިއްޔާ ދެއްވިއެވެ. މީގެއިތުރުން، ސާކް ޤައުމުތަކުގެ ގުޅުން އިތުރަށް ހަރުދަނާކުރުމާ ބެހޭގޮތުންވެސް އެ ޕާޓީގެ އިސްބޭފުޅުންނާ ރައީސުލްޖުމްހޫރިއްޔާ މަޝްވަރާ ކުރެއްވިއެވެ. އަދި ބޮޑުވަޒީރު މޯދީ ހުވާކުރެއްވުމުގެ ރަސްމިއްޔާތަށް ދަޢުވަތު ދެއްވި ކަމަށްޓަކައި ޝުކުރު އަދާކުރައްވަމުން، ސާކް ޤައުމުތަކުގެ ވެރިން، ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމުގެ ސަބަބުން ޤައުމުތަކުގެ ގުޅުން އިތުރަށް ހަރުދަނާވެގެންދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މި ސަރަޙައްދުގައި ހިމެނޭ ކުދި ޤައުމުތަކަށް ދިމާވާ އެކިއެކި ކާރިސާތަކާއި އަދި ބައެއްކަހަލަ ޙާލަތްތަކުގައި ދިމާވާ ކަންކަމުގައި އެކި ޤައުމުތަކަށް އެހީތެރިވެދިނުމުގައި، އިންޑިއާގެ ދައުރުގެ މުހިންމުކަން ފާހަގަކުރެއްވިއެވެ. އަދި މިހާތަނަށް ރާއްޖެއަށް ދިމާވެފައިވާ އެކިކަންކަމުގައި، އިންޑިއާ ސަރުކާރުން ވެދެއްވާފައިވާ އެހީތެރިކަމާއި އެއްބާރުލެއްވުންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.
މިބައްދަލުކުރެއްވުމުގައި، ބާރަތިޔަ ޖަނަތާ ޕާޓީ، ބީ.ޖޭ.ޕީ.ގެ އިސްބޭފުޅުން ދެއްކެވި ވާހަކަފުޅުގައި، އިންޑިއާއިން މަސައްކަތް ކުރާނީ، އެހެން ޤައުމުތަކާއެކު ގުޅުން ބަދަހިކުރުމަށް ކަމުގައި ވިދާޅުވިއެވެ. އަދި ރާއްޖެއާއި އިންޑިއާއާ ދެމެދު އުފެދިފައިވާ ޒަމާންވީ ގާތް ގުޅުމުގެ މައްޗަށް، އެބޭފުޅުންގެ ވާހަކަފުޅުގައި ބައްލަވައިލެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އިންޑިއާގެ ވެރިކަމުގައި ކުރިން ބީ.ޖޭ.ޕީ އޮތްއިރު، އޭރުގެ ބޮޑުވަޒީރު ވާޖްޕާއީ ގެންގުޅުއްވި ސިޔާސަތުތަކުގެ މައްޗަށް ބައްލަވައިލައްވައި، އެސިޔާސަތުތަކަށް ތާއީދު ކުރެއްވިއެވެ. އަދި އެ ސިޔާސަތުތަކުގެ ސަބަބުން ސަރަޙައްދުގެ ޤައުމުތަކަށް އެކަމުގެ ހެޔޮ އަސަރު ކުރިކަން، ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.
