އިންޑިއާ ސަރުކާރަށް ދެއްވެންހުރި ހުރިހާ އެއްބާރުލެއްވުމެއް، ދިވެހި ސަރުކާރުން ދެއްވާނެ ކަމުގެ ޔަޤީންކަން، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، އިންޑިއާގެ އާ ބޮޑުވަޒީރު ނަރެންދުރަ މޯދީއަށް ދެއްވައިފިއެވެ. މި ޔަޤީންކަން ރައީސުލްޖުމްހޫރިއްޔާ، އިންޑިއާގެ ބޮޑުވަޒީރަށް ދެއްވީ، މިއަދު އެމަނިކުފާނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ބޮޑުވަޒީރުގެ ރަސްމީ ގެކޮޅު، ހައިދަރުއާބާދު ހައުސްގައި މިއަދު ހެނދުނު އޮތް މިބައްދަލުކުރެއްވުމުގައި، އިންޑިއާގެ އާ ބޮޑުވަޒީރު ނަރެންދުރަ މޯދީއަށް ރައީސުލްޖުމްހޫރިއްޔާ ވަރަށް ހޫނު ތަހުނިޔާއެއް ވިދާޅުވިއެވެ. އަދި ހުވާކުރެއްވުމުގެ ރަސްމިއްޔާތަށް ދަޢުވަތު ދެއްވިކަމީ، ލިބިވަޑައިގެންނެވި ޚާއްޞަ އުފަލެއް ކަމަށް ވިދާޅުވެ، އެކަމަށްޓަކައި ބޮޑުވަޒީރު މޯދީއަށް ރައީސުލްޖުމްހޫރިއްޔާއަށް ޝުކުރު އަދާކުރެއްވިއެވެ.
ރާއްޖެއާއި އިންޑިއާއާ ދެޤައުމުގެ ދެމެދުގައި ޒަމާނުއްސުރެ އުފެދިފައިވާ ގުޅުމުގެ މައްޗަށް ބައްލަވައިލައްވަމުން، ބޮޑުވަޒީރު މޯދީގެ ޒަޢާމަތުގައި، މި ގުޅުން އިތުރަށް ދަމަހައްޓަވާނެ ކަމަށް ޔަޤީން ކުރައްވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. ރައީސުލްޖުމްހޫރިއްޔާގެ ވާހަކަފުޅުގައި، ބައިނަލްއަޤްވާމީ މައިދާނުގައި، އިންޑިއާއިން އަދާކުރާ ލީޑަރޝިޕް، ރާއްޖެއިން ބަލައިގަންނަ ކަމުގައިވެސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އަންނަ އަހަރަކީ ރާއްޖޭގެ މިނިވަންކަމަށް 50 އަހަރު ފުރޭ އަހަރުކަން ފާހަގަކުރައްވަމުން، އިންޑިއާއަކީ އެންމެ ފުރަތަމަވެސް ރާއްޖެއާ ޚާރިޖީ ގުޅުން ބަދަހިކުރި ޤައުމު ކަމުގައި ވިދާޅުވިއެވެ. އަދި އިންޑިއާ ސަރުކާރުގެ ފަރާތުން މިއަދާ ހަމައަށްވެސް ރާއްޖެއަށް ދެއްވަމުން ގެންދަވާފައިވާ އެއްބާރުލެއްވުން، ރައީސުލްޖުމްހޫރިއްޔާ ފާހަގަކުރައްވައި، އިންޑިއާ ސަރުކާރަށް ޝުކުރު އަދާކުރެއްވިއެވެ.
ބޮޑުވަޒީރު މޯދީގެ ވާހަކަފުޅުގައި، އިންޑިއާއާއި ރާއްޖެއާ ދެޤައުމުގެ ދެމެދުގައި، މިވޭތުވެދިޔަ އަހަރުތަކުގެ ތެރޭގައި، ޚާއްޞަކޮށް، ރައީސް މައުމޫންގެ ޒަޢާމަތުގައި އުފެދިފައިވާ ގާތް ގުޅުން ފާހަގަކުރެއްވިއެވެ. އަދި މިގުޅުން، ކުރިއަށް އޮތް ތާނގައި އިޢާދަކުރެވިގެންދާނެ ކަމަށް ދެކެވަޑައިގަންނަވާ ކަމުގައިވެސް ވިދާޅުވިއެވެ.
މިބައްދަލުކުރެއްވުމުގައި، ސާކްގެ މުހިންމުކަމުގެ މައްޗަށްވެސް ދެބޭފުޅުން ވާހަކަފުޅު ދެއްކެވިއެވެ. މިރޮނގުން ރައީސުލްޖުމްހޫރިއްޔާ ވާހަކަފުޅު ދައްކަވަމުން، ބޮޑުވަޒީރު މޯދީ ހުވާކުރެއްވުމުގެ ރަސްމިއްޔާތަށް، ސާކްގެ ހުރިހާ ޤައުމުތަކުގެ އިސްވެރިންނަށް ދަޢުވަތު ދެއްވިކަން އެއީ، ބޮޑުވަޒީރު މޯދީ، ސާކްގެ ކަންތައްތަކަށް ދެއްވާ އަހަންމިއްޔަތު ވަރަށް ބޮޑަށް ފާހަގަވެގެންދާ ކަމެއް ކަމަށް ދެކެވަޑައިގަންނަވާ ކަމުގައި ވިދާޅުވިއެވެ. ޚާއްޞަކޮށް، ޕާކިސްތާނުގެ ބޮޑުވަޒީރު ނަވާޒް ޝަރީފަށް ދަޢުވަތު ދެއްވިކަމީ، ސާކް ޤައުމުތަކުގެ ދޭދޭގުޅުން އިތުރަށް ހަރުދަނާ ކުރެއްވުމަށް މޯދީގެ ސަރުކާރުން އިސްކަން ދެއްވާނެ ކަމުގެ ހެޔޮ ފާލެއް ކަމަށް ރައީސުލްޖުމްހޫރިއްޔާ ވިދާޅުވިއެވެ. ބައިނަލްއަޤްވާމީ މުޖްތަމަޢުގައި އިންޑިއާއިން ދީފައިވާ ޚާއްޞަ މަޤާމުގެ ސަބަބުން ސާކް ޤައުމުތަކަށް ރަނގަޅު އަސަރެއް ކުރާނެކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.
ސާކްގެ ކުރިމަގާ ބެހޭގޮތުން ބޮޑުވަޒީރު މޯދީ ވާހަކަފުޅު ދައްކަވަމުން، ދޭދޭ ޤައުމުތަކުގެ މެދުގައި ހުރި މައްސަލަތަކަށްވުރެ، މިވަގުތު އިސްކަންދޭންޖެހެނީ، މި ސަރަޙައްދުގައި ބާރުހުރި ޖަމާޢަތަކަށް ސާކް ހެދުމުގެ މުހިންމުކަމުގެ މައްޗަށް ކަމުގައި ވިދާޅުވިއެވެ. ހަމައެހެންމެ، ޞިނާޢީ ދާއިރާތަކުގެ މަސައްކަތްތައް އިތުރަށް ފުޅާކޮށް، ޚާއްޞަ ގޮތެއްގައި، ދެމެހެއްޓެނިވި ހަކަތައިގެ ދާއިރާއާއި، ޖައްވު ހޫނުވުމާ ގުޅިގެން، ތިމާވެށްޓަށް ކުރާ ނޭދެވޭ އަސަރުތައްފަދަ މައްސަލަތަކުގައި، ސާކުން އިސްނަގައިގެން، އެކަންކަން ބައިނަލްއަޤްވާމީ މައިދާނުގެ ސަމާލުކަމަށް ގެނެސް، ބައިނަލްއަޤްވާމީ މުޖްތަމަޢުގައި ނަން ހިނގާ ޖަމާޢަތަކަށް ސާކް ހެދުމުގެ މުހިންމުކަމުގެ މައްޗަށްވެސް ރައީސުލްޖުމްހޫރިއްޔާއާއި ބޮޑުވަޒީރު މޯދީ ވާހަކަފުޅު ދެއްކެވިއެވެ.
ބޮޑުވަޒީރު ނަރެންދުރަ މޯދީގެ ވާހަކަފުޅުގައި، ރާއްޖޭގެ ކިޔަވާ ކުދިންނަށް އެކި ދާއިރާތަކުން އިންޑިއާގައި މަތީ ތަޢުލީމް ޙާޞިލު ކުރުމުގެ އިތުރު ފުރްޞަތުތައް ފަހިކޮށްދެއްވާނެ ކަމުގެ ޔަޤީންކަން، ރައީސުލްޖުމްހޫރިއްޔާއަށް ދެއްވިއެވެ. އަދި ރާއްޖެއަށް ޒިޔާރަތްކުރާ އިންޑިއާގެ ފަތުރުވެރިންގެ ޢަދަދު، އެއްދުވަހުން އަނެއް ދުވަހަށް އިތުރުވަމުންދާ ކަމަށް ވިދާޅުވެ، އިންޑިއާގެ ބައެއް ސަރަޙައްދުތަކުގައި، ޚާއްޞަކޮށް، ކެރެލާ، ގުޖްރާތުފަދަ ސަރަޙައްދުތަކުގައި، ރާއްޖޭގެ ފަތުރުވެރިކަން އިޝްތިހާރު ކުރުމުގެ މަސައްކަތް، ފުޅާ ދާއިރާގައި ކުރުމުގެ މުހިންމު ކަމުގެ މައްޗަށް ބައްލަވައިލެއްވިއެވެ. އަދި އެގޮތުން ކުރައްވާ މަސައްކަތަށް ފުރިހަމަ އެއްބާރުލެއްވުން ދެއްވާނެ ކަމުގެ ޔަޤީންކަންވެސް، ބޮޑުވަޒީރު މޯދީ ރައީސުލްޖުމްހޫރިއްޔާއަށް ދެއްވިއެވެ.
މިބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި މިނިސްޓަރ އޮފް ފޮރިން އެފެއާޒް ދުންޔާ މައުމޫނާއި، ރައީސުލްޖުމްހޫރިއްޔާގެ އޮފީހުގެ މިނިސްޓަރ މުޙަންމަދު ޙުސައިން ޝަރީފާއި، ޢަބްދުﷲ އަމީނާއި، އިންޑިއާގައި ހުންނަވާ ރާއްޖޭގެ ހައިކޮމިޝަނަރ މުޙަންމަދު ނަޞީރާއި، ރައީސުލްޖުމްހޫރިއްޔާގެ އޮފީހުގެ ސްޕޯކްސް ޕަރސަން އިބްރާހީމް މުޢާޒު ޢަލީ ބައިވެރިވެވަޑައިގެންނެވިއެވެ. އިންޑިއާގެ ބޮޑުވަޒީރުގެ އަރިހުގައި ބައިވެރިވެވަޑައިގަތީ، އެކްސްޓަރނަލް އެފެއާޒް މިނިސްޓަރ ސުޝްމާ ސުވަރާޖާއި، ފޮރިން ސެކްރެޓަރީ ސުޖާތާ ސިންގ އަދި ރާއްޖޭގައި ހުންނަވާ އިންޑިއާ ސަފީރު ރަޖީވް ސަހާރޭ ބައިވެރިވެވަޑައިގެންނެވިއެވެ.
