ނަރެންދުރަ މޯދީ، އިންޑިޔާގެ ބޮޑުވަޒީރުކަމުގެ ހުވާ ކުރެއްވުމަށް ބާއްވަވާ ރަސްމިއްޔާތުގައި ބައިވެރިވެވަޑައިގަތުމަށް އިންޑިޔާ ސަރުކާރުން އެރުވި ދަޢުވަތު ގަބޫލުފުޅު ކުރައްވައި، އެ ރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، މިއަދު ހެނދުނު އިންޑިޔާއަށް ފުރާވަޑައިގެންފިއެވެ. މި ދަތުރުފުޅުގައި ރައީސުލްޖުމްހޫރިއްޔާ ފުރާވަޑައިގަތީ، މި ދަތުރުފުޅަށް އިންޑިޔާ ސަރުކާރުން ހަމަޖައްސަވައިދެއްވާފައިވާ ޚާއްޞަ މަތިންދާބޯޓެއްގައެވެ.
ނަރެންދުރަ މޯދީ، ހުވާ ކުރެއްވުމުގެ ރަސްމިއްޔާތު އޮންނާނީ، އިންޑިޔާގެ ރައީސްގެ ރަސްމީ ގަނޑުވަރު ރާސްތުރަޕަތީ ބަވަންގައި މިއަދު ހަވީރެވެ.
ރައީސުލްޖުމްހޫރިއްޔާގެ މި ދަތުރުފުޅުގައި، އިންޑިޔާގެ ރައީސާއި އަދި އާ ބޮޑުވަޒީރާ ބައްދަލުކުރެއްވުމަށްވެސް ވަނީ ހަމަޖެހިފައެވެ.
މި ދަތުރުފުޅުގައި ރައީސުލްޖުމްހޫރިއްޔާ ފުރާވަޑައިގަތުމުގެ ކުރިން، ޚަބަރުފަތުރާ ވަސީލަތްތަކާ ބައްދަލުކުރައްވައި ވާހަކަފުޅު ދައްކަވަމުން، އިންޑިޔާއާއި ރާއްޖެއާ ދެޤައުމުގެ ދެމެދުގައި މާދަމާ ބޭއްވުމަށް ހަމަޖެހިފައިވާ ރަސްމީ ވާހަކަތަކުގައި، އިންޑިޔާއާއި ރާއްޖެއާއި ދެމެދުގައި އޮތް ގުޅުން ދެމެހެއްޓުމުގެ ތެރެއިން، އިންޑިޔާގެ އެކިއެކި އިންވެސްޓަރުން ރާއްޖޭގައި ކުރުމަށް ހުށަހަޅާފައިހުރި އިންވެސްޓްމަންޓްތަކާ ބެހޭގޮތުންނާއި، ދިވެހި ދައުލަތަށް އިންޑިޔާގެ ފަރާތުން ބޭނުންވާ ކަންތައްތަކާ ބެހޭގޮތުން މަޝްވަރާ ކުރައްވާނެ ކަމުގައި ވިދާޅުވިއެވެ.
ރައީސުލްޖުމްހޫރިއްޔާ، އިންޑިޔާއަށް މިކުރައްވާ ދަތުރުފުޅު ނިންމަވާލެއްވުމަށްފަހު، މާދަމާރޭ އޮންނަ އޭ.އެފް.ސީ. ޗެލެންޖް ކަޕުގައި ރާއްޖެ ބައްދަލުކުރާ ސެމީ ފައިނަލް މެޗް ފެށުމުގެ ކުރިން ރާއްޖެ ވަޑައިގަންނަވާނެއެވެ.
