ދައުލަތުން، ރައްޔިތުންގެ ފައިސާއިން އެހާބޮޑު ހޭދައެއް ކުރައްވައިގެން ކުރެވޭ މަސައްކަތްތަކުގެ ބޭނުން ފުރިހަމައަށް ހިއްޕެވުމަށް، ކައުންސިލުތަކުގެ މެންބަރުންނަށާއި ރައްޔިތުންނަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިލްތިމާސް ކުރައްވައިފިއެވެ. ރައީސުލްޖުމްހޫރިއްޔާ މިކަމަށް އިލްތިމާސް ކުރެއްވީ، މާލެއަތޮޅު ތުލުސްދޫގެ ބިން ހިއްކުމުގެ މަޝްރޫޢު ރަސްމީކޮށް ފަށްޓަވައި ދެއްވުމަށް މިއަދު ތުލުސްދޫގައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ބިން ހިއްކުމުގެ މަޝްރޫޢު ފަށްޓަވައި ދެއްވުމަށްފަހު، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ތުލުސްދޫ ބިން ހިއްކުމުގެ މަޝްރޫޢު ނިމިގެންދާއިރު އުފެދިގެން އެދަނީ ރައުސްމާލެއް ކަމަށާއި، މި މަޝްރޫޢު ނިމޭއިރު ރައްޔިތުންގެ އުންމީދުތަކެއްވެސް ހުންނާނެ ކަމުގައި ވިދާޅުވިއެވެ. އަދި ތުލުސްދޫ ރައްޔިތުންގެ އުންމީދު ވެގެންދާނީ، ތުލުސްދުއަށް އިތުރު ކުރިއެރުން ގެނެސްދޭނެ މަސައްކަތްތަކެއް ތުލުސްދޫގައި ފެށިގެންދިޔުންކަން ރައީސުލްޖުމްހޫރިއްޔާ ފާހަގަކުރެއްވިއެވެ. މި ރޮނގުން ވާހަކަފުޅު ދައްކަވަމުން، އެއްކަމަކީ، ތުލުސްދޫގައި ދިރިއުޅެން މިހާރު ދަތިވެފައިވާ ފަރާތްތަކަށް އުޅެވޭނެ ގޮތް ހަމަޖެހިގެން ދިޔުން ކަމަށާއި، އަނެއް ކަމަކީ ތުލުސްދުއަކީ، ދަތުރުވެރިން ދަތުރުކުރާ މަގުގައި އޮންނަ ރަށަކަށްވާތީ، އޭގެ ބޭނުން ފުރިހަމައަށް ހިފުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ސަރުކާރުގެ މަސައްކަތް ބިނާވެފައިވަނީ އިޤްތީޞާދު ވަރުގަދަކޮށް، ކުރިއަށް ގެންދިޔުމުގެ މައްޗަށްކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރައްވަމުން، އިޤްތިޞާދީގޮތުން ރާއްޖެއަށް ކުރިއެރުން ގެންނަ 5 އަހަރަށް އިރާދަކުރެއްވިއްޔާ، މި 5 އަހަރު ވެގެންދާނެ ކަމަށް ވިދާޅުވިއެވެ. އަދި މިކުރެވޭ މަސައްކަތްތަކަކީ، ދައުލަތުން ރައްޔިތުންނަށް ތަނަވަސްކަން ގެނެސްދިނުމަށް ކުރެވޭ މަސައްކަތްތަކެއް ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. މިރޮނގުން ވާހަކަފުޅު ދައްކަވަމުން، އިޤްތިޞާދީ ގޮތުން ކުރެވެންހުރި ގިނަ މަސައްކަތްތަކަކީ، ބިން ހިއްކައިގެން ކުރެވެންހުރި މަސައްކަތްތައްކަން ރައީސުލްޖުމްހޫރިއްޔާ ފާހަގަކުރައްވަމުން، ހުޅުމާލޭ މަޝްރޫޢަށް އިޝާރާތް ކުރެއްވިއެވެ. ހުޅުމާލޭގައި މިހާރު ތިރީސްހާހަށްވުރެ ގިނަ ޢަދަދެއްގެ މީހުން ދިރިއުޅެމުންދާއިރު، ހުޅުމާލޭގައި ދިރިއުޅޭ މީހުންނަށް ވަޒީފާގެ ފުރުޞަތުތައް ތަނަވަސްވެ، އިޤްތިޞާދީ މަސައްކަތްތައް ތަނަވަސްވެގެން ދާންޖެހޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި މި މަޤްޞަދު ޙާޞިލު ކުރެއްވުމަށްޓަކައި، އިރާދަކުރެއްވިއްޔާ ހުޅުމާލޭގެ ބިން ހިއްކުމުގެ މަޝްރޫޢު މިއަހަރުގެ ތެރޭގައި ފެށިގެންދާނެކަން ރައީސުލްޖުމްހޫރިއްޔާ ހާމަކުރެއްވިއެވެ. ހަމައެއާއެކު، ހުޅުމާލޭ މަޝްރޫޢު ނިމިގެންދާއިރު، ސަރުކާރުގެ ބޭނުންފުޅަކަށްވާނީ، އަތޮޅުތެރޭގެ އާބާދީ މަދު އުންމީދެއް ނެތް ރަށްރަށުގެ ޒުވާނުން އިރާދަކުރެއްވިއްޔާ ހުޅުމާލެއަށް ބަދަލުވެގެންދިޔުން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ސަރުކާރުން ހިންގަވާ އެކިއެކި މަޝްރޫޢުތަކުގައި ކޮރަޕްޝަންގެ މައްސަލަތަކެއް ހުރިކަމަށް ތުހުމަތު ކުރެއްވޭނަމަ، އެންޓި-ކޮރަޕްޝަން ކޮމިޝަނުން އެކަން ބައްލަވަންޖެހޭނެ ކަމަށާއި، އެކަމަށް ސަރުކާރުން މަރުޙަބާ ވިދާޅުވެ އެއްބާރުލެއްވުން ދެއްވާނެ ކަމުގައި ވިދާޅުވިއެވެ. އެހެންނަމަވެސް، އެތައް ސަތޭކަ މިލިއަނެއްގެ ޕްރޮޖެކްޓުތަކެއް ހިފެހެއްޓިގެން ދިޔައިމާ، އަދި އެ މަޝްރޫޢުތައް ކުރިއަށް ގެންދިޔުމަށް ހުއްދަ ނުދެއްވާ ލަސްވާ ކަމަށްވަންޏާ، ސަރުކާރަށްވެސް ގެއްލުންތަކެއްވާ ކަމަށާއި އެއީ، ރައްޔިތުންނަށް ޚިދުމަތް ދިނުމުގައިވެސް ދަތިތައް ކުރިމަތިވާ ކަމެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. މި ރޮނގުން ވާހަކަފުޅު ދައްކަވަމުން، މިފަދަ މަޝްރޫޢުތައް ހިފަހައްޓަވާއިރު، އެ ކޮމިޝަނުން ވަކި މުއްދަތުތަކެއް ކަނޑައަޅުއްވައި، އެ މުއްދަތެއްގެ ތެރޭގައި އެ ތަޙުޤީޤުތައް ކުރައްވައި ނިންމަވައި މަސައްކަތް ކުރިއަށް ގެންދެވޭނެ ޖާގަ ދެއްވަންޖެހޭ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. އަދި ރައްޔިތުންގެ މަޖިލީހުގެ ތެރެއިން ރައްޔިތުންނާ ގުޅުންހުރި ކަންކަމަށް އެއްބާރުލެއްވުން ދެއްވަންޖެހޭ ކަމުގައި ފާހަގަކުރައްވަމުން، ރައްޔިތުންނާ ގުޅުންހުރި ބިލްތަކަށް ހުރަސް އަޅުއްވާނަމަ، އޭގެ ގެއްލުން ލިބިގެންދާނީ، ހަމަ ރައްޔިތުންނަށްކަން ރައީސުލްޖުމްހޫރިއްޔާ ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ތުލުސްދޫ ބިންހިއްކުމުގެ މަސައްކަތް ނިމުމާ އެކުއެކީ، ރަށުގެ ބޭރު ތޮށިލުމުގެ މަސައްކަތް ކުރިއަށް ގެންދަވައި، ނަރުދަމާއާއި އެހެނިހެން ތަރައްޤީގެ މަޝްރޫޢުތައް ކުރިއަށް ގެންދަވާނެ ކަމުގައި ވިދާޅުވިއެވެ. އަދި ރަށްރަށުގެ ތަރައްޤީއަށް ކުރެވޭ މަސައްކަތްތަކުގައި ސިޔާސީ ފިކުރަށް ނުބައްލަވައި، ސަރުކާރަށް އެއްބާރުލެއްވުން ދެއްވުމަށް ރައީސުލްޖުމްހޫރިއްޔާ ވިދާޅުވަމުން ގެންދަވާ ވާހަކަފުޅު، ތުލުސްދޫގައި ތަކުރާރު ކުރެއްވިއެވެ.
