މިޞުރު ސަރުކާރުން ރާއްޖެއަށް ކަނޑައެޅުއްވި އާ ސަފީރު މިސްޓަރ މަޙްމޫދު ހިޝާމް މުޙަންމަދު އަސްރާން، އެމަނިކުފާނުގެ ސަފީރުކަމުގެ ފަތްކޮޅު، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް މިއަދު އަރުވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ރަސްމިއްޔާތުގައި، ފަތްކޮޅު އެރުއްވުމަށްފަހު، މިޞުރުގެ އާ ސަފީރާ ރައީސުލްޖުމްހޫރިއްޔާ ބައްދަލުކުރައްވައި، އެމަނިކުފާނަށް ތަހުނިޔާ ވިދާޅުވިއެވެ. އަދި ރާއްޖެއާއި މިޞުރާ ދެޤައުމުގެ ދެމެދު އޮތް ޒަމާންވީ ގާތް ގުޅުމާއި، މިގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން ވާހަކަފުޅު ދެއްކެވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިޞުރު ސަރުކާރުން ރާއްޖޭގެ ތަޢުލީމީ ދާއިރާއަށް ވަރަށް ގިނަ ފުރުޞަތުތަކެއް ދެއްވަމުން ގެންދަވާކަން ފާހަގަކުރައްވަމުން، މިވޭތުވެދިޔަ އަހަރުތަކުގެ ތެރޭގައި އަލްއަޒްޙަރު ޔުނިވަރސިޓީއިން ވަރަށް ގިނަ އަދަދެއްގެ ދިވެހި ކުދިން މަތީ ތަޢުލީމު ޙާސިލުކޮށްފައިވާ ކަމުގައި ވިދާޅުވިއެވެ. އަދި މިޞުރު ސަރުކާރުން ރާއްޖެއަށް އެކި ރޮނގުރޮނގުން ދެއްވާ ތަޢުލީމީ ފުރުޞަތުތަކަށްޓަކައި ރަޢީސުލްޖުމްހޫރިއްޔާ، މިޞުރު ސަރުކާރަށް ޝުކުރު އަދާކުރެއްވިއެވެ.
