މަދަރުސާއިން ހޯދާ އެންމެ މުހިންމު އެއް ތަރުބިއްޔަތަކީ ނުވަތަ ތަޖުރިބާއަކީ، ވާދަވެރިކަމާއި، މޮޅުވާން އަދި ހަމައެއާއެކު ބަލިވާން އެނގުން ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ހުވަދު އަތޮޅު ތިނަދޫގައި މިއަދު ނިމުނު "މަކިޓާ ޖޫނިއަރ އެތްލެޓިކްސް ޗެމްޕިއަންޝިޕް" ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ބަލިވާން އެނގުމަކީ ނާކާމިޔާބީގައި ހިތްވަރު ގަދަކުރުން ކަމުގައި އެމަނިކުފާނު ވިދާޅުވިއެވެ.
އެމަނިކުފާނު ދެއްކެވި ވާހަކަފުޅުގައި، ކުޅިވަރުގެ ހަރަކާތްތަކާއި، ކުޅިވަރުގެ ތެރެއިން އުފެދޭ އެކުވެރިކަމާއި އެކަމުން ލިބޭ ތަޖުރިބާ، އެއީ މަދަރުސާތަކުގައި ހިންގާ ތަޢުލީމީ ނުވަތަ ކިޔެވުމުގެ ކަންކަމާ އެއްވަރަށް މުހިންމު ކަންކަން ކަމުގައި ވިދާޅުވިއެވެ. އަދި ކޮންމެ މީހަކުވެސް މީހަކަށްވަނީ، ހަމައެކަނި އެއްކަމެއް އެނގުނީމާ ނޫންކަމަށާއި، އެހެންކަމުން މަދަރުސާއިން ހޯދަންޖެހޭ ހަމައެކަނި ތަރުބިއްޔަތަކީ، ފޮތުން ހޯދާ ތަރުބިއްޔަތެއް ނޫން ކަމުގައި އެމަނިކުފާނު ވިދާޅުވިއެވެ.
މަކިޓާ ޖޫނިއަރ އެތްލެޓިކްސް ޗެމްޕިއަންޝިޕަކީ، އައްޑޫ ސިޓީއާއި، ފުވައްމުލަކާއި، ހުވަދުއަތޮޅުގެ ސްކޫލްތަކަށް ހުޅުވާލައިގެން މި މަހުގެ 21ން 24އަށް ބޭއްވި އެތްލެޓިކްސް މުބާރާތެކެވެ. މި މުބާރާތުގައި މި ސަރަޙައްދުގެ 13 ސްކޫލަކުން 356 ދަރިވަރުން ބައިވެރިވެފައިވެއެވެ. މި މުބާރާތް ނިންމުމުގެ ރަސްމިއްޔާތުގައި، މި މުބާރާތުން ވަނަވަނައަށް އައި ދަރިވަރުންނަށް އިނާމު ދެއްވިއެވެ.