ނައިބު ރައީސް ޑޮކްޓަރ މުޙަންމަދު ވަޙީދު، ފުވައްމުލަކަށް މިހާރު ކުރައްވަމުން ގެންދަވާ ދަތުރުފުޅުގައި، ފުވައްމުލަކުގައި މަސްތުވާތަކެއްޗާ ދެކޮޅަށް މަސައްކަތްކުރާ އަމިއްލަ ޖަމްޢިއްޔާއެއް ކަމުގައިވާ "އޯޕަން ހޭންޑް"އާ އިއްޔެ ބައްދަލުކުރައްވައިފިއެވެ. އެ ޖަމްޢިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި، މަސްތުވާތަކެއްޗާ ދެކޮޅަށް މަސައްކަތް ކުރެއްވުމުގައި ސަރުކާރުން ރާއްވަވާފައިވާ ޕްރޮގްރާމްތަކާބެހޭ މަޢުލޫމާތު، ނައިބު ރައީސް އެ ޖަމްޢިއްޔާއަށް ދެއްވިއެވެ. އަދި "އޯޕަން ހޭންޑް"ގެ ފަރާތުން، ފުވައްމުލަކުގައި މަސްތުވާތަކެއްޗާ ދެކޮޅަށް މިހާރު ހިންގަމުން ގެންދާ ޕްރޮގްރާމްތަކާއި، މި ޕްރޮގްރާމްތައް ހިންގުމުގައި ކުރިމަތިވެފައިވާ ދަތިތަކާބެހޭ މަޢުލޫމާތު، އެ ޖަމްޢިއްޔާ މެންބަރުން ނައިބު ރައީސާ ޙިއްޞާ ކުރެއްވިއެވެ.
ނައިބު ރައީސްގެ މި ދަތުރުފުޅުގައި، ފުވައްމުލަކު ހޮސްޕިޓަލަށާއި، ޏ.އަތޮޅު ފެމިލީ އެންޑް ޗިލްޑްރެންސް ސަރވިސް ސެންޓަރަށް އިއްޔެ ޒިޔާރަތް ކުރައްވައި، އެތަންތާނގެ މަސައްކަތްތައް ހިނގަމުންދާ ގޮތާއި އަދި ކުރިމަތިވެފައިވާ ދަތިތަކަކީ ކޮބައިތޯ ބެއްލެވިއެވެ. އަދި ރަށުގެ ޢާންމު ޙާލަތުވެސް ނައިބު ރައީސް ބައްލަވާލެއްވިއެވެ.