بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
އަނގޮޅިތީމު ކައުންސިލްގެ ރައީސް އަދި ކައުންސިލަރުން، ޑަބްލިޔު.ޑީ.ސީ. މެންބަރުން، އަލިފުށީ ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުންފުނިތަކުގެ ވެރިން، ރަށުގެ މުއައްސަސާތަކުގެ ވެރިން، ރަށުގެ ލޮބުވެތި ރައްޔިތުން، އަދި މި ޖަލްސާ އަޑުއައްސަވަމުން، ބައްލަވަމުން ގެންދަވާ ރާއްޖޭގެ ލޮބުވެތި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދު މި ރަށަށް އަޅުގަނޑުމެންނަށް އާދެވުމުން، ތިޔަބޭފުޅުން ވިދާޅުވި ހޫނު މަރުޙަބާއަށް އަޅުގަނޑުގެ ހިތުގެ އެންމެ ފުންމިނުން ވަރަށް ބޮޑަށް ޝުކުރު ދަންނަވަން.
އާދެ، ރަށުގެ ތަރައްޤީއަށް ކުރަންހުރި ކަންކަން ވަރަށް އިސްކަންދީގެން، މި އަހަރު ތެރޭގައި ކޮށްދީ، ނިންމައިދިނުމަކީ އަޅުގަނޑުގެ ނިންމުން އަދި އެކަން ކުރަން އަޅުގަނޑު ގަސްދުކޮށްފައިވާ ގޮތްކަން ތިޔަބޭފުޅުންނަށް ވަރަށް ސާފުކޮށް ދަންނަވާލަން ބޭނުންވެގެން މި ރަށަށް މިއައީ. މިދިޔަ އަހަރުގެ ތެރޭގައި ގިނަ ކަންތައްތަކެއް ނުކުރެވޭ. ސަބަބަކީ ރާއްޖޭގެ އިޤްތިޞާދު އަޅުގަނޑުމެންނާ ސަރުކާރު ހަވާލުވިއިރުގައި އޮތް ޙާލަތުގެ ގޮތުން. އޭރުގައި އޮތީ ވަރަށްވެސް ބޮޑު ދަރަންޏަކުން އަޅުގަނޑުމެން އަރައިގަންނަންޖެހޭ ޙާލަތުގައި. ޤައުމުގެ ބޭރުގެ ދަރަނިތައް ދައްކަން ޤައުމު ނުކުޅެދޭ ޙާލަތަކަށް ގޮސް، ޑިފޯލްޓްވެ، ބަނގުރޫޓުވާ ޙާލަތަށް އިޤްތިޞާދު ގޮސްފައި އޮތުމުގެ ސަބަބުން އަޅުގަނޑުމެން ޖެހުނީ، ޤައުމުގެ އިޤްތިޞާދު ހަމަމަގަށް އަޅުވަން.
ހަމަ އެއާއެކީގައި، އަޅުގަނޑުމެންނަށް ފާސްކޮށްފައި، އޭރުގެ ސަރުކާރުން، އޭރުގެ ފިނޭންސް މިނިސްޓަރ މަޖިލީހަށް ހުށަހަޅުއްވައިގެން، އޭރުގައި އޮތް މަޖިލީހުން ފާސްކުރި ބަޖެޓަކީ، މި ރަށުގެ ތަރައްޤީ ފަދަ އެހެން ރަށްތަކުގެ ތަރައްޤީގެ މަޝްރޫޢުތައްވެސް ހިންގޭނެފަދަ ގޮތަކަށް ފާސްކުރި ބަޖެޓަކަށް ނުވާތީ، އެކަން އަޅުގަނޑު ވަރަށްގިނަފަހަރު ދައްކައިފިން. މާގިނަ ކަންކަމެއް ނުވި. އަޅުގަނޑުމެން ބޭނުންވަނީ، އެކަމުން އަރައިގަނެގެން ރައްޔިތުންނަށް އަޅުގަނޑު ވީ ވަޢުދުތައް ފުއްދަން ކަމަށްވާތީ، އަޅުގަނޑު ރައްޔިތުންގެ މަޖިލީހުގެ އިންތިޚާބުގެ ދުވަސްވަރު ރައްޔިތުންނަށް ދެންނެވީ، އެކަމަށް ބަދަލެއް ގެނެސްދެއްވާށޭ. ސަރުކާރުން ބޭނުންވާގޮތަށް މަޖިލީހުން ބަޖެޓް ފާސްކޮށްދީ، ރައްޔިތުންނަށް އަޅުގަނޑު ވީ ވަޢުދުތައް ފުއްދޭގޮތަށް ކަންކަން ރައްޔިތުން ފަހިކޮށްދެއްވާށޭ. ރައްޔިތުން ވަރަށް އިތުބާރު ކުރައްވާފައި އަޅުގަނޑަށް އެކަން ކޮށްދެއްވެވީ. މި އަތޮޅުގެވެސް ހުރިހާ ދާއިރާތަކަކަށް ސަރުކާރުގެ މެންބަރުން ހޮއްވަވައި ދެއްވި. ނަތީޖާއަކީ މިއަދު އަޅުގަނޑުމެންނަށް ކަންކަން ކުރެވޭގޮތަށް މަގުފަހިވެފައި އޮތުން.
އެހެންވީމާ، މިހާރު އަޅުގަނޑުމެން މި ފާސްކޮށްފައި އޮތް ބަޖެޓާ އެކީގައި އަދި މިދިޔަ އަހަރުގެ ތެރޭގައި ކުރީ ސަރުކާރުން އަޅުގަނޑުމެންނަށް ވާރުތަވި ބޮޑެތި އިޤްތިޞާދީ މައްސަލަތައް ރަނގަޅުކުރަމުން، ހަމަމަގަށް އަޅުވަމުން އައިސް، މިހާރު އިރާދަކުރެއްވީތީ އަޅުގަނޑުމެންނަށް އާ މަޝްރޫޢުތައް ފެށުމަށާއި، މިހިރަ އިމާރާތް ގޮތަށް ރަށްރަށުގައި އިމާރާތް ކުރަން ފަށައި، އެ ސަރުކާރުގެ ދުވަސްވަރު ހުއްޓިފައި ހުރި މަޝްރޫޢުތައް އަލުން ފަށައިގެން ގޮސް ނިންމާލުމަށް ވަނީ މަގުފަހިވެފައި. އާދެ، އިރާދަކުރެއްވިއްޔާ މި މަހުން ފެށިގެން ކުރިއަށް އޮތް މަސްތަކުގެ ދުވަސްތަކަކީ، މި އަހަރުގެ ތެރޭގައި މި ރަށުގެ ތަރައްޤީއަށްޓަކައި އިރާދަކުރެއްވިއްޔާ އަޅުގަނޑުމެން ކަންތައްތައް ކުރާނެ ދުވަސްތައް.
ދެންމެ ކައުންސިލްގެ ރައީސް އަދި ދާއިރާގެ ޢިއްޒަތްތެރި މަޖިލިސް މެންބަރުވެސް ފާހަގަކުރެއްވި ފަދައިން، އަދި ކައުންސިލާއި މުއައްސަސާތަކުގެ ވެރިންނާ އެކީގައި އަޅުގަނޑުމެން ބޭއްވި ބައްދަލުވުމުގައި، އެ ބޭފުޅުންވެސް ފާހަގަކުރެއްވި ފަދައިން، މި ރަށުގައި އެބަހުރި ވަރަށްގިނަ މަސައްކަތްތަކެއް މިގޮތުން ކުރަން ޖެހިފައި. އަދި މިދިޔަ ސަރުކާރުގެ ދުވަސްވަރު ފެށި، އޭރުގައި ހުއްޓިފައި ހުރި މަސައްކަތްތައް. ޚާއްޞަ ގޮތެއްގައި ފެނާއި ނަރުދަމާގެ މަސައްކަތަކީ މިދިޔަ ސަރުކާރުން ގިނަ މަސައްކަތްތައް ކުރިގޮތް ވަރަށް ރަނގަޅަށް ރަމްޒުކޮށްދޭ މަސައްކަތެއް. އެއް ކުންފުންޏަކަށް، ވަރަށްގިނަ ރަށްތަކުގައި ފެނާއި ނަރުދަމާގެ މަސައްކަތް ނިންމަން މިދިޔަ ސަރުކާރުން ދިން. އެ ކުންފުންޏާ ހަވާލުކުރި އެއްރަށް މި ރަށްވެސް މިއީ. ވަކި ހިސާބަކަށް ގޮސް ނުނިމި ހުއްޓާލާފައި ގޮސްފައި ވަނީ. ވަރަށްގިނަ ރަށްތަކުގައި، މި އަތޮޅާއި އަދި ވަރަށްގިނަ އެހެން އަތޮޅުތަކުގައި ހަމަ
އެ ކުންފުންޏަށް ހުރިހާ މަސައްކަތެއް ދީފައިވަނީ. މިހާރު މި ދެންނެވި މިދިޔަ އަހަރު ތެރޭގައި އެކަންކަން ނުވި ސަބަބުތައް އަޅުގަނޑު މި ދަންނަވާލީ. ޙައްލު ނުކުރެވުނު ސަބަބު. އެހެންނަމަވެސް، މިހާރު ޙައްލުކުރެވޭ ހިސާބުގައި މިތިބީ. މިހާރު މަސައްކަތްތަކެއް އަޅުގަނޑުމެން ފަށައިފިން، މި ދެންނެވި ހުރިހާ ރަށެއްގައި ހުރި ހުރިހާ ފެނާއި ނަރުދަމާގެ މި ދެންނެވި ކުންފުންޏާ ހަވާލުކޮށްފައި ހުރި މަސައްކަތްތަކުން އަޅުގަނޑުމެންނަށް އަރައިގަނެވޭނެ ގޮތްތަކެއް ހެދުމަށް. އަޅުގަނޑުމެން އިރާދަކުރެއްވިއްޔާ ވަރަށް އަވަހަށް މި ރަށުގެ ފެނާއި ނަރުދަމާގެ މަސައްކަތްވެސް ފަށާނަން. މި އަތޮޅުގައި ހަމަ އެ ކުންފުންޏާ ހަވާލުކޮށްފައި އެބަހުރި. އެހެން ރަށްރަށުގެވެސް ފެނާއި ނަރުދަމާގެ މަސައްކަތް ނުނިމި އެބަހުރި.
އެހެންވީމާ، މި ހުރިހާ ރަށްތަކެއް ހިމެނޭހެން މި މައްސަލަ ދިމާވެފައި ހުރި ހުރިހާ ރަށެއްގައި، މި ދެންނެވި ފެނާއި ނަރުދަމާގެ މަސައްކަތްތައް ދާދި އަވަހަށް މި މައްސަލަ ޙައްލުކޮށް، އަޅުގަނޑުމެން ސަރުކާރުގެ ފުރިހަމަ ބާރު، ކޮންޓްރޯލް އޮންނަގޮތަށް ފެނާއި ނަރުދަމާގެ މަސައްކަތްތައް އިރާދަކުރެއްވިއްޔާ ނިންމައިދޭނެ ކަމުގެ ޔަޤީންކަން މި ދަތުރުގައި ދޭން އަޅުގަނޑު މިއައީ. އިރާދަކުރެއްވިއްޔާ އެކަން ހިނގާނެ އެގޮތަށް. ފިނޭންސް މިނިސްޓަރވެސް އެބަ އިންނެވި. ކޮންސްޓްރަކްޝަން މިނިސްޓަރ އެބަ އިންނެވި. މި ބޭފުޅުން މިހާރުވަނީ އެކަމާ ގުޅޭ ކަންތައްތައް ފަށްޓަވާފައި. މި ދަތުރުގައި، ކަމާގުޅޭ ހުރިހާ ވަޒީރުން އަޅުގަނޑު އެބަ ބައިވެރިކުރަން.
ރަށެއްގެ ތަރައްޤީގައި ޢާންމުކޮށް ކުރާ ހުރިހާ މަސައްކަތެއް ކުރާނެ. އަދި ބައެއް ވަޒީރުން ނެތް މިތަނުގައި. މިތަނުގައި ނެތް ބައެއް ވަޒީރުންނާ ގުޅޭ މަސައްކަތްތައްވެސް ރަށްރަށުގައި ހިނގާނެ. އެހެންނަމަވެސް، އެންމެ ގިނަ މަސައްކަތްތައް ކޮންމެ ރަށެއްގައިވެސް ހިނގާ ދާއިރާތަކާ ގުޅޭ ވަޒީރުން އަޅުގަނޑު މި ދަތުރުގައި މި ބައިވެރިކުރާ ސަބަބަކީ، އަޅުގަނޑު ބޭނުން، ވަރަށް އަވަހަށް ކަންތައްތައް، މަސައްކަތްތައް ހިނގައިގަންނަން. ކައުންސިލާއި ރަށުގެ އެހެން މުއައްސަސާތަކާ ވަޒީރުންނާ ދިމާވެ، ވާހަކަ ދެކެވިގެން މައްސަލަތައް ޙައްލުކުރެވި، އަވަހަށް ކުރިއަށް ދެވޭނެގޮތް، ނަތީޖާއާ ހަމަޔަށް ދެވޭނެގޮތް، ކުޑަ ވަގުތުކޮޅެއްގެ ތެރޭގައި ވާން. ވަރަށްގިނަ ފަހަރަށް ސަރުކާރުގެ ނިޒާމުތެރޭ މި އޮންނަނީ ސިޓީބިޓީ ބަދަލުކުރުން. ބިޔުރޮކްރެސީގެ ތެރޭގައި ތާށިވަނީ. މި ސަރުކާރަކު ވާގޮތެއް ނޫން ހަމައެކަނި. ރާއްޖޭގައި އެކަނި ވާގޮތެއްވެސް ނޫން މިއީ. ހަމަ ޢާންމުކޮށް އޮންނަ ގޮތް.
އެހެންވީމާ، އަޅުގަނޑު ބޭނުންވީ، ރަށްރަށަށް ދާއިރުގައި، އެކަންކަމާ ގުޅޭ ބޭފުޅުންނާ އެކީގައި ގޮސް ކަންކަން ޙައްލުކޮށް، ކަންކަން ހިނގާނެގޮތް ހަދަން. އެހެންވީމާ، އިރާދަކުރެއްވިއްޔާ ފެނާއި ނަރުދަމާގެ މަސައްކަތް ހަމަ އެގޮތުން ހިނގާނެ.
ބަނދަރު މައްސަލަވެސް ހަމަ އެހެން. ބަނދަރުގެ މަސައްކަތްވެސް ވަކި ހިސާބަކުން ގޮސް ނުނިމި، އެންމެފަހުން ނެރުފައިކަށިވެސް އަނެއްކާ ހަދަންޖެހޭ ހިސާބަށް ދާގޮތަށް މިއޮތީ. އަދި ޖެޓީއެއްގެ މަސައްކަތް ކުރުންވެސް. މިހެންގޮސް އެބަހުރި ވަރަށްގިނަ ކަންތައްތައް ކުރަން. ބަނދަރާ ގުޅޭގޮތުންވެސް ކުރަންހުރި ކަންކަން އެބަހުރި. މޫދަށްއެރޭ ސަރަޙައްދެއްވެސް ހިމެނޭގޮތަށް ހަދަންވެސް އަޅުގަނޑު ވަޢުދުވިން.
އެހެންވީމާ، އަޅުގަނޑު މިއަދު ދެންނެވިން، ކޮންސްޓްރަކްޝަން މިނިސްޓަރަށް. އަޅުގަނޑުމެން ދެން މި މަސައްކަތް ކުރާއިރުގައި، އަޅުގަނޑު ވަޢުދުވީ ގޮތަށް، ބަނދަރުގެ މައްސަލަ، މަސައްކަތް އެކީގައި ނިމިގެން ދާގޮތަށް ކުރިއަށް ގެންދަވާށޭ. އަދި ގެންދަވާއިރުގައި، މޫދަށް އެރޭ ސަރަޙައްދުގެ މައްސަލަވެސް އޭގެތެރެއިން ޙައްލުވާގޮތަށް، ޖެޓީވެސް ހެދިގެންދާގޮތަށް، ފުލް ކޮންސެޕްޓް އެގޮތަށް ފަރުމާވެގެން އެގޮތަށް އެކަން ކޮށްދެއްވަން.
އާދެ، ސްކޫލް އަދި ހެލްތު ސެންޓަރ. ޞިއްޙީ ދާއިރާ، ތަޢުލީމީ ދާއިރާ، ކޮންމެ ރަށެއްގައިވެސް ވަރަށް ބޮޑަށް ނިގްލެކްޓް ކުރެވިފައި، އަޅައިނުލެވިފައި މިދިޔަ ދައުރުގެ ތެރޭގައި ގޮސްފައި އޮތީ. މި އަހަރުގެ ބަޖެޓުގެ ތެރޭގައި ވަރަށް އިސްކަމެއް ދެން، މި ދެ ދާއިރާ ރަނގަޅުކުރަން. މި ރަށުގައިވެސް އެބަހުރި ސްކޫލްގައި ކަންތައްތަކެއް ކުރަން. ފެށިފައި ހުރި ދެ ކްލާސްރޫމެއްގެ މަސައްކަތްވެސް އަދި އިތުރަށް ހޯދަން ބޭނުންވާ ވަސީލަތްތައްވެސް އެބަހުރި. ކޮމްޕިއުޓަރ ލެބް ޤާއިމުކުރުން، ސްޓާފްރޫމް، މަލްޓި ޕަރޕަސް ހޯލު ހެދުން ފަދަ ކަންތައްތައް. އެކަންކަން އިރާދަކުރެއްވިއްޔާ މި ރަށަށް އަޅުގަނޑުމެން ކޮށްދޭނަން. އަދި ޞިއްޙީ މަރުކަޒުގެވެސް ތިޔަބޭފުޅުން ތިޔަ ބޭނުންވާގޮތަށް މައްސަލަ ޙައްލުކޮށްދޭނަން.
އާދެ، ޞިއްޙީ މަރުކަޒާ ބެހޭގޮތުން ދަންނަވާލަން ބޭނުން، އަޅުގަނޑުމެން ވަރަށް އިސްކަމެއް އެބަދެން. ޞިއްޙީ މަރުކަޒުތަކުގައި ހުންނަ އިކްއިޕްމަންޓްސްތައް ހިންގޭނެ ގޮތަށް، ނުހުއްޓި. މާނަޔަކީ އޭގައި ބޭނުންވާ ރީއެޖެންސީވެސް އަދި ވަސީލަތްތައްވެސް ހުސްނުވެ ބަރާބަރަށް ލިބޭނެގޮތަށް ކަންތައްތައް ރާވަން. މިހާރު އަޅުގަނޑުމެން ވަރަށްބޮޑު މަސައްކަތްތަކެއް ފަށާފައި މިވަނީ އެންމެ ކޮލިޓީ ބޭސް ޕްރޮކިއޮ ކުރުމަށް. ބަލްކްކޮށް ގެނެސް، އަގުހެޔޮކޮށް އެންމެ ރަނގަޅު ފެންވަރުގެ ބޭސް، ރާއްޖޭގެ ރައްޔިތުންނަށް ލިބޭގޮތަށް.
ހަމަ އެގޮތަށް، ރަށްރަށުގައި ޞިއްޙީ މަރުކަޒުތަކާއި، ހޮސްޕިޓަލްތަކުގައި ހުންނަ ވަސީލަތްތަކާއި، އިކްއިޕްމަންޓްސްތަކަކީވެސް ދުނިޔޭގެ އެންމެ ރަނގަޅު ބްރޭންޑްތަކުގެ ވަސީލަތްތަކަށް ހެދުމަށްވެސް އަޅުގަނޑު އޮންނާނީ ނިންމާފައި. އެއީވެސް ހަމަ ބަލްކް ޕްރޮކިއުމަންޓްގެ ތެރެއިން އެކީގައި ގިނަ ޢަދަދެއްގެ ރަށްރަށަށް ވާވަރަށް ގަނެގެން ގެނެސް ހަރުކޮށް، އޭގެ ރީއެޖެންސީއަށް ބޭނުންވާ ވަސީލަތްތައް، ހިންގުމަށް ބޭނުންވާނެ ތަކެއްޗަކީވެސް ފަސޭހައިން ލިބޭނެ ތަކެތި، އެކަހަލަ ބްރޭންޑްތައް ގެނައިމަ. އެގޮތަށް އެކަން ކުރަން އޮންނާނީ ނިންމާފައި.
ގިނަފަހަރަށް މިވާގޮތަކީ، މިފަދަ ރަށްރަށުގައި މި ހުންނަ ބްރޭންޑްތަކަކީ، އޭގެ ސްޕެއަރވިޔަސް، އަދި އެއަށް ބޭނުންވާ ވަސީލަތްތައްވެސް މާފަސޭހައިން ނުލިބޭގޮތަށް ހުންނަ ތަކެތި. އެހެންވީމާ، އެކަން އަބަދު ރަނގަޅު ކުރަން ވެއްޖިއްޔާ ހިނގާ ޚަރަދު ވަރަށްބޮޑު. އެހެންވީމާ، އެއްފަހަރުން ތަންކޮޅެއް ބޮޑު ޚަރަދެއް ހިނގިޔަސް، ކުރިއަށް އޮތް ތަނަށް، މެއިންޓެނަންސަށް ބަލާއިރުގައި މާބޮޑުތަނުން ސޭވްވާނެ. އަދި ކޮލިޓީއަށް ބަލާއިރުގައިވެސް މާބޮޑަށް ރައްޔިތުންނަށް ރަނގަޅު ޚިދުމަތެއް ދެވޭ، ކޮލިޓީ މެޝިނަރީ، ކޮލިޓީ ބްރޭންޑްތައް ގެނެވުނީމަ.
އެހެންވީމާ، އެންމެ ކޮލިޓީ ބޭސް ގެންނަން އަޅުގަނޑުމެން ނިންމިގޮތަށް، ހެލްތު ސެންޓަރތަކާއި ހޮސްޕިޓަލްތަކުގައި ހުންނަންޖެހޭ އެންމެ ކޮލިޓީ މެޝިނަރީޒްތައް ހަރުކޮށްދިނުމަށްވެސް އަޅުގަނޑުމެން މިވަނީ ނިންމާފައި. އަދި ގިނަ ޢަދަދަކަށް ގެނެސް ހަރުކުރުމަށް. ރާއްޖޭގެ ހަމަ ހުރިހާ ސަރަޙައްދެއްގައި.
އެހެންވީމާ، އެ ސިޔާސަތުގެ ދަށުން މި ރަށަށްވެސް މައްސަލަ ޙައްލުވެގެންދާނެ. އަދި ހަމަ އެއާއެކީގައި، މި ދެންނެވި ގޮތަށް، ސްކޫލް އިމާރާތުގެ މަލްޓި ޕަރޕަސް ހޯލު ޕްރޮޖެކްޓްވިޔަސް، އަދި ކްލާސްރޫމް އަދި ކޮމްޕިއުޓަރ ލެބް ކަމުގައިވިޔަސް، ސްޓާފްރޫމް ކަމުގައިވިޔަސް، އެކަންކަން އަޅުގަނޑުމެން އިރާދަކުރެއްވިއްޔާ ޙައްލުކޮށްދޭނަން.
އާދެ، ފެނާއި ނަރުދަމާ ނުނިމިއެއް މަގެއް ނުއެއްހެދޭނެ. އަޅުގަނޑު ރިޔާސީ އިންތިޚާބުގައި ވަޢުދުވިން މަގުހަދަން. ދެން މަގުހަދަން ފެށޭނީ، ކޮންމެގޮތެއްވިޔަސް، މަގުގެ އަޑީގައި ހުންނަންޖެހޭ ބައި ނިމުނީމަ. އެހެންވީމާ، ފެނާއި ނަރުދަމާގެ މަސައްކަތް، ކުރިން މި ދެންނެވި ގޮތަށް ނިންމާލާފައި، އަޅުގަނޑު ވަޢުދުވީގޮތަށް، މަގު ހެދުމުގެ މަސައްކަތް ކޮށްދޭނެ ކަމަށް ދަންނަވާލަން.
އާދެ، ޒުވާނުންނަށް ބޭނުންވާ އަދި އަންހެން ބޭފުޅުންނަށްވެސް ވަރަށް ބޭނުންވާ، ވަރަށް މުހިންމު ކަމެއް، ދުޅަހެޔޮ ޞިއްޙަތުގައި ތިބުމަށް ކުޅިވަރު ކުޅުމަކީ. ޒުވާނުންނަށް ބޭނުންވާ ކުޅިވަރު ވަސީލަތްތައް ޤާއިމުކޮށްދިނުމަކީވެސް މި އަހަރުގެ ބަޖެޓް ތެރެއިން އަޅުގަނޑުމެން ވަރަށް ބޮޑަށް އިސްކަންދޭ ކަމެއް. މިގޮތަށް އެބަހުރި ހަމަ ގިނަ ރަށްތަކެއްގައި، ފުޓްސަލް ދަނޑުވިޔަސް، ފުޓްބޯޅަ ދަނޑު ކަމުގައިވިޔަސް، ވޮލީކޯޓު ކަމުގައިވިޔަސް، ނުނިމި، ނޫނީވިއްޔާ ފަށާފައި ހުއްޓިފައި ހުރި، ނޫނީވިއްޔާ މަރާމާތު ކުރަން. މި އަހަރުގެ ތެރޭގައި އެކަހަލަ ގިނަ ކަންކަންވެސް ކުރިއަށް ގެންދާނަން.
އަދި ހަމަ އެއާއެކީގައި، އަލަށް ފަށާ މަޝްރޫޢުތައްވެސް ފެށޭނެ. އަދި ޔޫތު ސެންޓަރަށް ބޭނުންވާ ތަކެތި ހަމަކުރުމާއި، ޔޫތު ސެންޓަރު އަޅަން ބޭނުންވާ ރަށްތަކުގައި އެޅުމާ، މިއީވެސް އަޅުގަނޑުމެން ހަމަ ތަރުތީބެއްގެ ތެރެއިން މި އަހަރާއި މި އަންނަ އަހަރުގެ ތެރެއަށް ބަހާލައިގެން، ދެ އަހަރު ހިންގާ ކަންކަން. އަންހެން ބޭފުޅުން ވަރަށް ގިނައިން މިހާރު ކުޅުއްވާ ކުޅިވަރެއް، ހޭންޑްބޯލްއަކީ. މި އަތޮޅުގައިވެސް ވަރަށް ފޯރިގަދަކޮށް ކުޅުއްވާ ކުޅިވަރެއް. އެހެންވީމާ، ޖުމްލަކޮށް މި އަތޮޅަށް އަދި ޚާއްޞަކޮށް، މި ރަށަށް ހަމަ އަޅުގަނޑު ދަންނަވަން ބޭނުންވާ ވާހަކައަކީ، އަންހެން ބޭފުޅުން ބޭނުންވެލައްވާ ގޮތަށް ހޭންޑްބޯލް ކޯޓު އަޅައިދޭނެ ވާހަކަ.
އާދެ، ވިޒިޓަރ ސެންޓަރެއް ހުރުން ވަރަށް މުހިންމު މި ރަށުގައި. އެހެންނަމަވެސް، މިދިޔަ ސަރުކާރުން ފަށައި ހަމަ މިދިޔަ ސަރުކާރުގައި ވަކި ހިސާބަކުން ކައުންސިލްގެ ރައީސް ވިދާޅުވީ ހުއްޓުނުގޮތަށޭ މިހިރީ. މި ރަށުގެ ތާރީޚަށް ބެލިކަމުގައިވިޔަސް އަދި ޖުމްލަކޮށް ޓޫރިޒަމް ޕްރޮމޯޝަނަށް ބެލިކަމުގައިވިޔަސް ވަރަށް މުހިންމު މަޤްޞަދެއް ހާސިލުވާނެ މިކަން ނިންމާލީމަ. އަޅުގަނޑު ފިނޭންސް މިނިސްޓަރަށް ދެންނެވިން، މިކަމާ ބެހޭ މަޢުލޫމާތު، ކައުންސިލާ މަޝްވަރާ ކުރައްވައިގެން ހޯއްދަވައިގެން، ކުރިއަށް އޮތް ތަނުގައި، ކޮންމެގޮތެއްވިޔަސް މި އަހަރު ބަޖެޓް ކުރެވިފައި އޮތް ކަމެއް ނޫން މިއީކީއެއް މިކަން ކުރަން.
އެހެންވީމާ، ދެންމެ މި ދެންނެވި ކަންކަމަށް އަޅުގަނޑު އިސްކަންދޭނީ ކޮންމެގޮތެއްވިޔަސް، އެކަންކަން ނިންމާލާފައި، މިކަމަށްވެސް އަޅުގަނޑުމެން އެޓެންޑްވާނަން. މިކަމަށްވެސް އިރާދަކުރެއްވިއްޔާ ކުރިއަށް އޮތް ތާނގައި، ކުރިން ދެންނެވި މަޝްރޫޢުތައް ނިންމާފައި މިކަމާވެސް އުޅޭނެ ވާހަކަ ދަންނަވާލަން.
އާދެ، ޖުމްލަކޮށް އަޅުގަނޑުމެން ހަމަ މި ހުރިހާ ކަމެއް މި ދަންނަވާލީ. އެހެންވީމާ، މި އަހަރުގެ ތެރޭގައި ކުރިއަށް މިއޮތް ދުވަސްތަކުގައި ތިޔަބޭފުޅުންނަށް ހަމަ ފެނިވަޑައިގަންނަވާނެ، އަޅުގަނޑުމެން ފިނޭންސް މިނިސްޓްރީން ގެޒެޓް ކުރަމުންދާނެ، ޓެންޑަރ ކުރަމުންދާނެ، އެކި މަޝްރޫޢުތަކަށް ކޮންޓްރެކްޓަރުން ހޯދުމަށް. އަދި ސަރުކާރުގެ އެކި ކުންފުނިތަކާ މަޝްރޫޢުތައް ހަވާލުކުރަމުންދާނެ. ކައުންސިލާ މަޝްވަރާ ކުރަންޖެހޭ ކަންކަމުގައި، ރައްޔިތުންގެ ޚިޔާލު ހޯދަންޖެހޭ ކަންކަމުގައި، އެކަންވެސް ހިނގަމުންދާ ތަން ފެނިވަޑައިގަންނަވާނެ، ކުރިއަށް އޮތް ދުވަސްތަކުގައި.
އަދި ހަމަ އެއާއެކީގައި، ރައްޔިތުން ވަރަށް ބޮޑަށް ޝާމިލުވާ މަސައްކަތެއްވެސް ހުރިހާ ރަށެއްގައި ހިނގަމުންދާނެ ކަމެއް އެބައޮތް. އެއީ، މުޅި ރާއްޖޭގެ ތަރައްޤީގެ މާސްޓަރ ޕްލޭން ހެދުން. 20 އަހަރު ދުވަހަށް، ކުރިއަށް އޮތް 20 އަހަރު ދުވަހަށް ތިޔަބޭފުޅުން މި ރަށާއި މުޅި ރާއްޖެ އޮންނަން ބޭނުންވާގޮތް، ރައްޔިތުންގެ ކިބައިން އޮޅުންފިލުވައިގެން ޕްލޭން ހެދުމުގެ މަސައްކަތް. އެކަން އަޅުގަނޑު އިފްތިތާޙުކުރީ މިދިޔަ ނޮވެންބަރު މަހުގެ ފަހުކޮޅު، އެއް އަހަރު ދުވަހުގެ ތެރޭގައި ނިންމަން.
އެހެންވީމާ، ވަރަށް އަވަހަށް މި ރަށަށްވެސް ކައުންސިލް މެދުވެރިކޮށް އަދި މުއައްސަސާތައް މެދުވެރިކޮށް ރައްޔިތުން ގާތަށް އަންނާނެ ޕްލޭނިންގ މިނިސްޓްރީގެ ފަރާތުން. އަޅުގަނޑު އެދެނީ، މި ރަށުގެ ތަރައްޤީ އަދި ޖުމްލަކޮށް މުޅި ރާއްޖޭގެ ތަރައްޤީ ކުރިއަށް އޮތް 20 އަހަރު ދުވަހަށް އޮންނަން ބޭނުންވާގޮތް ތިޔަބޭފުޅުން ނިންމަވައިދެއްވަން. ޚިޔާލު ދެއްވަން. އަދި އެގޮތުން ހެދޭ ޕްލޭނަކީ، އެކަމަށް އަޅުގަނޑުމެން ޚާއްޞަކޮށް ޤާނޫނެއް ހަދާނެ ޕްލޭނެއް. އަޅުގަނޑު ވަޢުދުވީ ގޮތަށް. އޭރުން ކުރިއަށް އޮތް 20 އަހަރު ދުވަހަށް ތިޔަބޭފުޅުން ނިންމެވިގޮތަށް ރާއްޖެ ތަރައްޤީވާނެކަން ޔަޤީންވާނީ. ސިޔާސީގޮތުން އަންނަ އެކިކަހަލަ ބަދަލުތަކުން ރައްޔިތުން ނިންމިގޮތް ބަދަލުނުވެ، ތަރައްޤީވެގެންދިޔުން އެއީ، އަޅުގަނޑު ހިތުން ރައްޔިތުންވެސް އެންމެ އެދޭނެ ގޮތަކަށް ވާނެ.
އެހެންވީމާ، ރައްޔިތުން ގާތުން ކަންކަން އޮޅުންފިލުވައިގެން، ރައްޔިތުން ބޭނުންވާ މިޞްރާބަށް ރަށްރަށުގެ ތަރައްޤީ ގެންދިޔުމަކީ، އިރާދަކުރެއްވިއްޔާ ކުރިއަށް އޮތް ދުވަސްތަކުގައި ޢަމަލީގޮތުން ރައްޔިތުންނަށް ފެނިގެންދާނެ، ތަޖުރިބާ ކުރާނެ ކަންތައްތައް. އެކަންކަމުގައި ރައްޔިތުންގެ ފުރިހަމަ އެއްބާރުލުން ދެއްވުމަކީ، އަޅުގަނޑު އެދޭގޮތް އަދި ޔަޤީންވެސް ކުރާގޮތް. އަޅުގަނޑު މަސައްކަތް ކުރަން ބޭނުންވަނީ، އަބަދުވެސް ރައްޔިތުން ގާތަށް އައިސް، ރައްޔިތުން ބޭނުންވާގޮތް ރައްޔިތުން ގާތުން އޮޅުންފިލުވައިގެން، ރައްޔިތުން ބޭނުންވާ އަމާޒަށް ވާސިލުވުމަށް.
އިރާދަކުރެއްވިއްޔާ އެގޮތުގެ މަތިން ކަންކަން ކުރިއަށް އޮތް ތާނގައި ހަމަ ބާރު ސްޕީޑްގައި ދާނެކަމުގެ ފުރިހަމަ ޔަޤީންކަން ތިޔަބޭފުޅުންނަށް އަރުވަމުން، އަޅުގަނޑު ވަކިވެލާނަން.
ތިޔަ ބަހައްޓަވާ ގާތްކަމަށްޓަކައި އަދިވެސް އެއްފަހަރު ފަށްފަށުން ޝުކުރު ދަންނަވަން. އިރާދަކުރެއްވިއްޔާ މި ރަށަށް ކުރިއަށް އޮތް ތާނގައި ދެން އަޅުގަނޑު އަންނާނީ، ދެންމެ މި ލިސްޓްކޮށްލި ކަންކަން ނިންމާލާފައި، އެކަމުގެ އުފާފާޅުކުރަން. އަދިވެސް އެއްފަހަރު، ވަރަށް ބޮޑަށް ޝުކުރު ދަންނަވަން.
އަޅުގަނޑުގެ ދުޢާއަކީ، اللهُ سُبْحَانَهُ وَتَعَالَى އަޅުގަނޑުމެން މިކުރާ މަސައްކަތްތަކުގައި ބަރަކާތް މިންވަރުކުރެއްވުން. ކާމިޔާބީ މިންވަރު ކުރެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.