بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ދެއްވަދޫ ކައުންސިލްގެ ނައިބު ރައީސް އަދި ކައުންސިލަރުން، ޑަބްލިޔު.ޑީ.ސީ. މެންބަރުން، ދެއްވަދޫގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުންފުނިތަކުގެ ވެރިން، އަދި ވަކިން ޚާއްޞަކޮށް، ދެއްވަދޫގެ ލޮބުވެތި ރައްޔިތުން، އަދި މި ޖަލްސާ ބައްލަވަމުން، އަޑުއައްސަވަމުން ގެންދަވާ ދިވެހި ލޮބުވެތި ހުރިހާ ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދު މި ރަށަށް އާދެވުމުން، މި ރަށުގެ ލޮބުވެތި ރައްޔިތުން ނުކުމެވަޑައިގެން، ވިދާޅުވި ވަރަށް ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން ވަރަށް ބޮޑަށް ޝުކުރު ދަންނަވަން.
އާދެ، އަޅުގަނޑާ ވަރަށް ގާތް ރަށެއް. ވަރަށް ގިނަ ރަޙްމަތްތެރިން ނިސްބަތްވާ ރަށެއް. ވަރަށް ގިނަ ދުވަހު އެކުގައި، އެކި ގޮތްގޮތުން އުޅެފައިވާ، އުޅެމުންދާ ރަޙުމަތްތެރިން ތަކެއް ނިސްބަތްވާ ރަށެއް. އެހެންވީމާ، އެކަމަށްޓަކައި ވެސް ވަރަށް ޚާއްޞަ އުފަލެއްވޭ. ވަރަށް ތަޢުލީމީ ރަށެއް. ވަރަށް ގިނަ ދަރިންތަކެއް، ޤައުމަށް ޚިދުމަތްކުރުމަށް އުފައްދާފައިވާ ރަށެއް. ތަޢުލީމީ ގޮތުން، އެކި ދާއިރާތަކުން ކިޔަވާފައިވާ ދަރިންތަކެއް އުފައްދާފައިވާ ރަށެއް. ވަރަށް ފަޚުރުވެރި މާޒީއެއް އޮތް، ވަރަށް ހީވާގި ޚިދުމަތްތަކެއް ކުރަމުންދާ، ވަރަށް މަސައްކަތްތެރި އާބާދީއެއް ނިސްބަތްވާ ރަށެއް. އެހެންވީމާ، އެކަމަކީ އަޅުގަނޑު ހިތުން ވަރަށް މުނާސަބަތު ގޮތެއްގައި ފާހަގަކުރަންޖެހޭ ކަމެއް.
އާދެ، މި ރަށުގެ ތަރައްޤީއަށްޓަކައި ތިޔަ ލޮބުވެތި ރައްޔިތުން ތިޔަ އެދިވަޑައިގަންނަވާ ކަންކަމަކީ، މިގޮތުން ބަލާއިރު ވެސް، މި ރަށުގެ ހުރިހާ ރައްޔިތުންގެ އުއްމީދުތަކާ ސީދާ ގުޅިފައިވާ ކަންތައްތައް. އަދި އެ ކަންކަން ސަރުކާރުގެ ފަރާތުން ފުރިހަމަ ކޮށްދިނުމުން، ތިޔަބޭފުޅުންގެ ތިޔަ ހީވާގިކަމާއި، ހިންމަތްތެރިކަމާއި، މަސައްކަތްތެރިކަމުގެ ސަބަބުން، އޭގެ ފުރިހަމަ ނަތީޖާ ތިޔަބޭފުޅުންގެ ޢާއިލާތަކަށް، ދަރިންނަށް، ދަރިންގެ މުސްތަޤްބަލަށް ލިބިގެންދާނެކަން އަޅުގަނޑަށް ހަމަ ޔަގީން.
އާދެ، މިއަދު މި ރަށަށް އައިސް ކައުންސިލާ އެކީގައި ވަގުތުކޮޅެއް ހޭދަކުރިން. އެ ބައްދަލުވުމުގައި ކައުންސިލްގެ ފަރާތުން އަދި ޢިއްޒަތްތެރި މަޖިލިސް މެންބަރު ވެސް، ވަރަށް ގިނަ ވާހަކަފުޅުތައް ފާހަގަކުރެއްވި. އަދި ދެންމެ މި ޕޯޑިއަމުގައި ވެސް އެ ބޭފުޅުން، އޭގެ ބައެއް ކަންކަން ހިއްސާކުރެއްވި. މިއީ ވަރަށް މުހިންމު ކަންތައްތަކެއް. އެކި ގޮތްގޮތުން ބަލާއިރުގައި، ވަރަށް މުހިންމު ސަމާލުކަމެއް ދީގެން ޙައްލުކުރަން ޖެހިފައިވާ ގިނަ ކަންތައްތަކެއް.
މިސާލަކަށް ދަންނަވަންޏާ، ރަށްގިރުމުގެ މި ބޮޑު މައްސަލައާއި، ބަނދަރާއި، ކުނިކޮށީގެ މައްސަލަ، އެކުއެކީގައި ހައްލުވާނެ ގޮތެއް ހޯދުމަށް އަޅުގަނޑު ހަމަ ގަބޫލުކުރަން، އެއީ އެންމެ ރަނގަޅު ގޮތްކަން މަސައްކަތްކުރަން. މި އަހަރުގެ ބަޖެޓުގެ ތެރެއިން މިކަމުގައި ރަނގަޅު ހައްލެއް ގެނެސްދިނުމަށް އަޅުގަނޑު މަސައްކަތްކުރާނެކަން، ތިޔަބޭފުޅުންނަށް ޔަގީންކަމާއެކީގައި ދަންނަވަން.
އާދެ، އެހެންވީމާ، ކައުންސިލުގެ ފަރާތުން ކޮންސްޓްރަކްޝަން މިނިސްޓްރީއާ ގުޅިވަޑައިގެން، މި ތިން މައްސަލަ އެކުގައި ހައްލުވާނެ ކަހަލަ ވަށާޖެހޭ ހައްލަކަށް ވަޑައިގަންނަވަން ދަންނަވަން. މިހާރު ފެށި، ހުއްޓިފައިވާ މަސައްކަތާއެކު، ދެން ފެށިގެންދާއިރު، އަދި މުޅި މައްސަލަ، ރަށްގިރުމުގެ މައްސަލައާ އެކު، ބަނދަރުގެ ޖާގަ އިތުރުކުރުމަށް، ބަނދަރުގެ ދަތިކަން ހައްލުކުރުމާ ގުޅިގެންދާ ގޮތަށް، ބިމަށް އިތުރު ޖާގަ އިތުރުކުރެވި، ކުނިކޮށީގެ މައްސަލައަށްވެސް ހައްލު އަންނަކަހަލަ ހައްލެއް ސަރުކާރުން ގެނެސްދިނުމަށް ދޭންޖެހޭ ހުރިހާ އެއްބާރުލުމެއް ދޭނެކަމަށް އަޅުގަނޑު ދަންނަވަން.
އާދެ، އެކަން ހައްލުވެގެންދިއުމުން ތިޔަބޭފުޅުންނަށް މަސްވެރިކަމަށް، އަދި ޖުމުލަކޮށް ހަމަ ރަށުގެ ހުރިހާ ރައްޔިތުންނަށް ވެސް ވަރަށް ބޮޑު ލުއިފަސޭހަކަމެއް ލިބިވަޑައިގަންނަވާނެ. މަސްވެރިކަމަކީ މި ރަށުގެ ވަރަށް ގިނަ ރައްޔިތުން ޝާމިލުވާ އިންޑަސްޓްރީއެއް. އަދި މި އަތޮޅުގައި ވެސް ވަރަށް ގިނަ ރައްޔިތުންގެ ދިރިއުޅުމާ ގުޅިފައިވާ އެންމެ ބޮޑު އިންޑަސްޓްރީ. އަޅުގަނޑުމެން މި މަސައްކަތް ކުރަނީ މަސްވެރިންނަށް ދިމާވެފައިވާ ދަތިތަކާއި އަދި މަސްވެރިންގެ އުއްމީދުތަކާ ގުޅޭގޮތަށް، ސަރުކާރުން ކަންކަން ފަހިކޮށްދޭން.
އެގޮތުން އެންމެ ފުރަތަމަ، އެންމެ އިސްކަމެއްގެ ގޮތުގައި އަޅުގަނޑު ހަމަ ދަންނަވައިލާނީ، އަޅުގަނޑު ވީ އެންމެ މުހިންމު އެއް ވަޢުދު، 48 ގަޑިއިރުތެރޭގައި ފައިސާ ދިނުން. އެކަން އިރާދަކުރެއްވީތީ، މިދިޔަ މަސްވެރިންގެ ދުވަހުން ފެށިގެން އެ ދަނީ ކުރިއަށް. އެއްވެސް މެދުކެނޑުމެއް ނެތި، ހަމަ ބަރާބަރަށް އެބަ ފައިސާ ދެން. އަދި ކުރިއަށް އޮތް ތާނގައި، ދެން ހުރި ކަންކަން ވެސް ހަމަ މަސްވެރިންގެ ކަންބޮޑުވުންތަކާއި، އަދި މަސްވެރިންގެ ޚިޔާލާއެކު، އަޅުގަނޑުމެން ދާނީ ފުރިހަމަކުރަމުން. ވަރަށް ގިނަ މަސައްކަތްތަކެއް އެބަ ފަށަން، ބޭރުގެ އެހީތެރިކަން ހޯދައިގެންނާއި، އަޅުގަނޑުމެންގެ ސަރުކާރުގެ ބަޖެޓުގެ ތެރެއިން މަސްވެރި ޞިނާޢަތް ފުޅާކޮށް، މަސްވެރިންނަށް އެ އިންޑަސްޓްރީގައި ކުރިއަށްދިއުމަށް، މަގުފަހިކޮށްދިނުމަށް. އަދި އިތުރު ފަރާތްތައް ވެސް މި އިންޑަސްޓްރީއަށް ވަނުމަށް ހިތްވަރު ލިބޭނެ ގޮތަށް އަޅުގަނޑުމެން ބޭނުންވަނީ މި އިންޑަސްޓްރީ ކުރިއަރުވަން.
ޙަޤީޤަތުގައި މަސްވެރިކަމުގެ ޞިނާޢަތަކީ، އަޅުގަނޑުމެންގެ އަތްމަތީގައި އޮތް ޞިނާޢަތެއް. ބޭރުގައި، ދުނިޔޭގެ އެހެން ތަންތާނގައި ހިނގާ އެކި ކަހަލަ ނުރައްކާތެރި ކަންކަމާއި، ހާދިސާތަކާ، ސީދާ އެހާ ބޮޑަށް ގުޅިފައި ނެތް، އަޅުގަނޑުމެންގެ އަތްމަތީގައި، އަޅުގަނޑުމެންނަށް ކުރިއެރުވެން އޮތް މުހިންމު އަޅުގަނޑުމެންގެ ލޭނާރު. އަޅުގަނޑުމެންނަށް ރަނގަޅަށް މަސައްކަތް ކުރެވިއްޖިއްޔާ، އެންމެ ބޮޑު އާމްދަނީއެއް، ޖީ.ޑީ.ޕީ.ގެ ނިސްބަތުން އެތެރެކުރެވޭނެ، ރައްޔިތުންނަށް މުއްސަނދިކަން ލިބޭނެ ޞިނާޢަތަކަށް ހެދެން އޮތީ ވެސް މަސްވެރިކަން. އެހެންވީމާ، އެ ވިސްނުމުގައި ސަރުކާރުން މަސްވެރިންނާ އެކީގައި މި ދަނީ މަސައްކަތްކުރަމުން. ކުރިއަށް އޮތް ތާނގައި އެ ކަންތައް އެއަށްވުރެ ވެސް ރަނގަޅުކުރާނަން.
ހަމައެއާއެކުގައި، ދެންހުރި ކަންކަން ވެސް އަޅުގަނޑު ފާހަގަކޮށްލާނަން. މި އަހަރުގެ ބަޖެޓުގެ ތެރެއިން އެންމެ އިސްކަމެއްދޭ ކަންކަމުގެ ތެރޭގައި، ޞިއްޙީ ދާއިރާއަށް ރަނގަޅު ކުރިއެރުން ގެނެސްދިނުން ހިމެނޭ. އަދި ތަޢުލީމީ ދާއިރާއަށް ރަނގަޅު ކަންތައްތައް ރަށްރަށުގައި ފުރިހަމަކޮށްދިނުން ހިމަނާފައި ވާނެ. މި ރަށުގައި ޞިއްޙީ މަރުކަޒުގައި، އިތުރު ފެސިލިޓީތައް ޤާއިމުކުރުމަކީ އަޅުގަނޑު ހަމަ ދަންނަވާލަން ބޭނުންވަނީ، އަޅުގަނޑުމެން ކުރާނެ ކަމެއް. ކުޑަކުދިންގެ ޑޮކްޓަރެއް ހޯދައިދިނުން، އެކްސްރޭ ޚިދުމަތް ލިބިދިނުން، މިފަދަ ހުރިހާ ކަމެއް އިރާދަކުރެއްވިއްޔާ ކޮށްދޭނަން. ސްކޫލަށް މަލްޓިޕާރޕަސް ހޯލެއް ވެސް ހަމަޖައްސައިދިނުމަކީ، އަޅުގަނޑު އިރާދަކުރެއްވިއްޔާ ކޮށްދޭނެ ކަމެއް.
އާދެ، ޒުވާނުންނަށް، އަންހެން ބޭފުޅުންނަށް، ފިރިހެން ބޭފުޅުންނަށް، ޖުމުލަކޮށް، ރަށުގެ ހުރިހާ ރައްޔިތުންނަށް ވެސް، ދުޅަހެޔޮ ޞިއްޙަތެއްގައި ތިބުމަށްޓަކައި، ކުޅިވަރުގެ ވަސީލަތްތަކަކީ ވަރަށް މުހިންމު ކަމެއް. މި އަހަރުގެ ބަޖެޓުގެ ތެރެއިން، އެގޮތުން އެކި ރަށްރަށުގައި އެކި ރިކްއެސްޓް މި އަންނަނީ. އެ ކަންކަމަށް އަޅުގަނޑުމެން ކޭޓަރކޮށްދޭނަން. މި ރަށުގައި އަންހެން ބޭފުޅުން އެދިވަޑައިގަންނަވާ ވޮލީކޯޓެއް އަޅައިދިނުމަށް. އަދި އޭގެއިތުރަށް މިހާރު ދަނޑުގައި ސަބްބޭސް ހެދިގެންދިޔައިމާ، ޓަރފް އެޅުމާ އެކީގައި، ދަނޑު ނިންމައިދިނުމާއި، ކުޅިވަރާ ގުޅިފައިވާ މިފަދަ ކަންކަން އަޅުގަނޑުމެން ހަމަޖައްސައިދޭނެކަމަށް އަޅުގަނޑު ދަންނަވާލަން.
އާދެ، އެސް.ޓީ.އޯ.ގެ ސީ.އެސް.އާރު.ގެ ދަށުން އައުޓްޑޯރ ޖިމެއް ޤާއިމުކުރުމަށް އެސް.ޓީ.އޯ.އިން ވަނީ މަސައްކަތްތަކެއް ފަށާފައި. އެހެންވީމާ، އެ މަސައްކަތް ނިމުމުން މި ރަށުގައި އައުޓްޑޯރ ޖިމް ޤާއިމުވެފައި ހުންނާނެ. އެކަން އިރާދަކުރެއްވިއްޔާ މާލަސްތަކެއް ނުވެ ހަމަޖެހިގެންދާނެ.
އާދެ، އައިސް ޕްލާންޓް ހުއްޓިފައި ހުންނަތާ ތިން އަހަރު. އައިސް ޕްލާންޓް މަރާމާތުކުރުން ކުރިއަށްދާނެ. ނަމަވެސް، އޭގެއިތުރަށް، އިތުރު އާ އައިސް ޕްލާންޓެއް މި ރަށަށް ގެނެސް، އޮޕަރޭޓުކުރުމަށް ފިޝަރީޒް މިނިސްޓްރީން މިހާރު އެ ވަނީ މަސައްކަތް ފަށާފައި. އިރާދަކުރެއްވިއްޔާ އާ އައިސް ޕްލާންޓެއް ބަހައްޓައިގެން އެ ޚިދުމަތް ތިޔަބޭފުޅުންނަށް ފޯރުކޮށްދޭނަން.
އާދެ، ތަންކޮޅެއް ދުރުގައި ވަކިން އޮންނާތީ، ސީ އެމްބިއުލަންސްގެ ޚިދުމަތަކީ ތަންކޮޅެއް ދަތިކަމެއް މި ރަށަށް. ދެން ޖުމްލަކޮށް ރާއްޖޭގައި ވެސް ޖިއޮގްރަފިކަލީ އެކަހެރިކޮށް ހުންނަ ރަށްތަކަށް، އެ ޑިސްޓެންސް، ޓްރެވަލް ޑިސްޓެންސްގެ ސަބަބުން، އަދި އަޅުގަނޑުމެންގެ ފްލީޓް އެހާ ބޮޑުނޫންވީމާ ދަތިތަކެއް އެބަހުރި. އަޅުގަނޑު ސީދާ މިއަދު މިތާ އިޢުލާނު ނުކުރި ނަމަވެސް، ތިޔަ ބޭފުޅުންގެ ކޮންސަރން އަޅުގަނޑަށް ވިސްނޭ.
އެހެންވީމާ، ޖުމުލަކޮށް މުޅި ރާއްޖެއަށް، މި ސީ އެމްބިއުލަންސްގެ ޚިދުމަތް އިތުރަށް ފުޅާކުރުމަށް އަޅުގަނޑުމެން މަސައްކަތްކުރާނަން. މި ރަށް ގޮތަށް ހަމަ އެބަހުރި، ރާއްޖޭގެ އެކި ކަންކޮޅުގައި މި ދެންނެވި ގޮތަށް، އަޅުގަނޑުމެންގެ މިހާރުގެ ޚިދުމަތް އިތުރަށް ވަރުގަދަކުރަންޖެހޭ، ފޯރުކޮށްދޭންޖެހޭ، ދާންޖެހޭ ޑިސްޓެންސްގެ ގޮތުން، އިތުރު ސީ އެމްބިއުލަންސްތައް އިތުރުކުރަންޖެހޭ ދިމަދިމާ. އެހެންވީމާ، މުޅި ރާއްޖެއަށް މި މައްސަލަ ހައްލުކުރުމުގެ މަސައްކަތްތަކެއް އަޅުގަނޑުމެން ފަށާނަން.
އޭގެ ނަތީޖާއަކަށް ވާނީ، އިރާދަކުރެއްވިއްޔާ ހަމަ މި ރަށުން ވެސް ބޭނުންވާ ގޮތަށް، މި ރަށަށް އެކަމަށް ޚާއްޞަ ސީ އެމްބިއުލަންސް ހަމަޖެހިގެން ދިއުން. އެހެންވީމާ، ސީދާ މިއަދު އަޅުގަނޑު އެކަން ހަމަޖައްސާނެ ވާހަކަ ނުދެންނެވިޔަސް، މުޅި ރާއްޖެއަށް މިކަމުގައި ޝާމިލުވާ ރަނގަޅު ހައްލެއް ގެނައުމުގައި، އަޅުގަނޑުމެން މަސައްކަތްތަކެއް ކުރަން މިހާރު އޮތީ ފަށާފައިކަން ދަންނަވައިލާނަން. އިރާދަކުރެއްވިއްޔާ، އެކަމުގައި ވެސް ރަނގަޅު ގޮތްތަކެއް ވާނެކަމަށް ބެއްލެވުން އެދެން.
އާދެ، އަޅުގަނޑު ހަމަ މި ހުރިހާ ކަމެއް މި ދަންނަވާލީ. ދެން އަދިވެސް މި ރަށުގެ ތަރައްޤީއަށް ބޭނުންވާ ގިނަ ކަންކަން، މި ތަނުގެ ކައުންސިލުގެ ފަރާތުން ވެސް އަދި ޢިއްޒަތްތެރި މަޖިލީސް މެންބަރުވެސް ފާހަގަކުރެއްވި. އިރާދަކުރެއްވިއްޔާ، މި ރަށާއި މި އަތޮޅުގެ ތަރައްޤީއަށް އަޅުގަނޑު ހަމަ ކެމްޕެއިންގެ ތެރޭގައި ވެފައި ހުރި ވަޢުދުތައް ފުއްދައިދިނުމުގައި، ވަރަށް ސަމާލުކަން ދޭނަން.
މި ދަތުރުގައި އަޅުގަނޑަކަށް ހުރިހާ ރަށަކަށް ނުދެވޭ. އަޅުގަނޑު މި ފަހަރު މި އިސްކަންދިނީ، ކުރިން އަޅުގަނޑު ކުރި ދަތުރުގައި ނުދެވި ހުރި ހުރިހާ ރަށަކަށް، މި ދަތުރުގައި ދާން. ރައްޔިތުންނާ ބައްދަލުކުރަން، ދެވިފައި ނުވާ ހުރިހާ ރަށަކަށް ދާން.
އެހެންވީމާ، އަޅުގަނޑަށް ބައެއް ރަށްތަކުން ކުޑަކޮށް ކަންބޮޑުވުން ހިއްސާކުރެއްވި އެކަމުގައި. އަޅުގަނޑު ދޭން ބޭނުންވާ ޔަގީންކަމަކީ، ހަމަ އެ ރަށްރަށުގެ ރައްޔިތުންނަށް ވެސް މާލަސްތަކެއް ނުވެ، އެ ބޭފުޅުންގެ ގާތަށްވެސް އަޅުގަނޑު ދާނަންކަން. އެ ރަށްރަށުގައި އަޅުގަނޑު ފަށައި، ނިންމަން ވަޢުދުވެފައި ހުރި މަޝްރޫޢުތަކާ ގުޅުވައިގެން، ވީހާވެސް އުފާވެރި ހަފުލާއެއް ބޭއްވޭކަހަލަ ގޮތަކަށް، ރައްޔިތުންނާ އެކީގައި އުފާވެރި ވަގުތުކޮޅެއް ހޭދަކޮށްލެވޭ ކަހަލަ ގޮތަކަށް ދާން ބޭނުންވާތީ، ކުޑަކޮށް ލަސްކޮށްލަނީ. އަޅުގަނޑު ހަނދާން އެބަހުރި، ހަމަ ހުރިހާ ރަށަކަށް ވެސް ވެފައިހުރި ވަޢުދުތައް. މި ރަށަށް ވެސް ސިޓީ ހޮޓަލެއް އަޅައިދިނުމަށް ވަޢުދުވެފައި ވާނެ. އެކަން ފީޒިބަލް ވާނެ ގޮތަކަށް ދޮގެއްތޯ އެކަން ކުރަންވާނީ. އެހެންވީމާ، ތިޔަބޭފުޅުން ތިޔަ ޚިޔާލުކުރައްވައި، އަދި ވަރަށް ފުރިހަމައަށް މިތާނގައި މިއަދު ތަމްސީލުކުރެއްވި ޚިޔާލު ވެސް އަޅުގަނޑު ވަރަށް އުފަލާއެކީ ބަލައިގަންނަން.
އެހެންވީމާ، އުއްމީދު ކުރައްވަންވީ ވީހާވެސް ޕޮޒިޓިވްކޮށް، ރަނގަޅަށް. އަޅުގަނޑުމެންގެ ރައްޔިތުން އެދޭ ގޮތަށް މަސައްކަތްކުރަން އަޅުގަނޑު އަބަދުވެސް ބޭނުންވަނީ. ރައްޔިތުންގެ ގާތަށް މި އަންނަނީ ވެސް އެ ބޭނުމުގައި. ތިޔަބޭފުޅުން ބޭނުންވާ ކަންކަން އަޑުއަހަން އަޅުގަނޑު ބޭނުން. މާ ދުރުގައި މާލޭގައި ހުރެގެން ސިޓީބިޓީގެ ތެރެއިން، ނިޒާމުގެ ތެރެއިން، ބިއުރޮކްރަސީގެ ތެރެއިން، އެ ފިލްޓަރވެގެން އަންނަ ގޮތަކަށް އައުމެއް ނޫން، އަޅުގަނޑު ހަމައެކަނި ބޭނުންވާ ގޮތަކީ. އޭގެއިތުރަށް، ސީދާ ރައްޔިތުން ގާތަށް އައިސް، ކަންކަން އޮޅުންފިލުވައިގެން، ކަންކަން ކުރަން ބޭނުންވަނީ، ރައްޔިތުން ބޭނުންވާ ގޮތަށް ޚިދުމަތްދޭން ބޭނުންވާތީ. އެހެންވީމާ، ރައްޔިތުންގެ ވިންދު ސީދާ އަޅުގަނޑަށް އެނގެން ބޭނުންވާތީ. އެގޮތަކަށް، އެ ވިންދާ އެއްގޮތަށް ކަންކަން ކޮށްދިނުމަށް. އެހެންވީމާ، އުއްމީދީ ގޮތެއްގައި ވިސްނުމަށް އަޅުގަނޑު އެދެން، ބޮޑު މަންޒަރަށް ވެސް.
އާދެ، އަޅުގަނޑު މި ހަފުތާގައި މި ފެށި ދަތުރުގައި، މިދިޔަ ރަށްތަކުގެ އިތުރަށް، ކުރިއަށް އޮތް ހަފުތާތަކުގައި ވެސް ރާއްޖޭގެ އެހެން ކަންކޮޅުތަކަށް ދާނަން. މި އަންނަ ހަފުތާގައި ކުޑަ ބްރޭކެއް އަންނާނެ. އެއަށްފަހު، އިރާދަކުރެއްވިއްޔާ ކޮންމެ ހަފުތާއަކުހެން އަޅުގަނޑު ކޮންމެވެސް ދިމާއަކަށް ގޮސް، ރައްޔިތުންނާ ބައްދަލުކުރާނަން. އިރާދަކުރެއްވިއްޔާ ރައްޔިތުން އެދޭގޮތަށް ކަންކަން ކޮށްދިނުމުގައި، މި ސަރުކާރު އޮންނާނީ ސާބިތުކަމާ އެކީގައި، ރައްޔިތުންގެ ފަޅީގައި. ރައްޔިތުންނަށް ޚިދުމަތްކުރުމަށް، ރައްޔިތުން ހޮވާފައި އޮތް ސަރުކާރެއް މިއީ. ރައްޔިތުން ބޭނުންވާ ކަންކަން ރައްޔިތުން ބޭނުންވާ ގޮތަށް ކޮށްދިނުމަށް. މި ނިމިގެންދިޔަ އަހަރުގެ ތެރޭގައި، އަޅުގަނޑުމެން ވަރަށް ގިނަ ވަގުތު ހޭދަކުރަން މި ޖެހުނީ، އަޅުގަނޑުމެންނާ ހަވާލުވިއިރުގައި އޮތް ހާލަތުން އަރައިގަތުމަށް. ތަފްސީލަކަށް ކޮންމެހެން ނުދިޔަސް ހުރިހާ ބޭފުޅުންނަށް އެނގިވަޑައިގަންނަވާނެ، އެއީ، މައިގަނޑު ގޮތެއްގައި އިޤްތިޞާދީ ހާލަތުގެ ވާހަކަކަން.
އެހެންނަމަވެސް، އެކަމުން އަރައިގަނެވި، މިހާރު އަޅުގަނޑުމެންނަށް މި ވަނީ، ކުރިއަށް ދިޔުމުގެ މަރުޙަލާއަށް އާދެވިފައި. އެހެންވީމާ، މި އަހަރަކީ ހަމަ ޙަޤީޤަތުގައި ވެސް ދެންމެ އަޅުގަނޑު މި ދެންނެވި ކަންކަމާއި، އަދި އޭގެ އިތުރަށް ވެސް ދެންހުރި ކަންކަން ކޮށްދިނުމުގައި، ޢަމަލީސިފަ އަންނާނެ އަހަރު އިރާދަކުރެއްވިއްޔާ. އެހެންވީމާ، އެ ޢަޒުމުގައި މަސައްކަތްކުރުމުގައި އަޅުގަނޑުމެން ސާބިތުކަމާއެކީގައި، ރައްޔިތުންނާ އެކީގައި ކުރިއަށްދާނެކަން، ލޮބުވެތި ދިވެހި ހުރިހާ ރައްޔިތުންނަށް ދަންނަވަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތުގައި اللهُ سُبْحَانَهُ وَتَعَالَى ބަރަކާތް މިންވަރު ކުރައްވައި، އަޅުގަނޑުމެންގެ ޤައުމަށް އުފާފާގަތިކަން މިންވަރު ކުރެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.