بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
މާމެންދޫ ކައުންސިލްގެ ރައީސް އަދި ކައުންސިލަރުން، ޑަބްލިޔު.ޑީ.ސީ.ގެ މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުންނާއި، ކުންފުނިތަކުގެ ވެރިން، ވަކިން ޚާއްޞަކޮށް، މި ރަށުގެ ލޮބުވެތި އަޚުންނާއި އުޚުތުން، އަދި މި ޖަލްސާ ބައްލަވަމުން ގެންދަވާ އަދި އަޑުއައްސަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، މިއަދުގެ ވަރަށް ހަވީރުގެ ވަގުތެއްގައި އަޅުގަނޑުމެންނަށް މި ރަށަށް އާދެވުނީ. ތިޔަ ލޮބުވެތި ހުރިހާ ރައްޔިތުން ނުކުމެވަޑައިގެން ވިދާޅުވި ހޫނު މަރުޙަބާއަށްޓަކައި އަޅުގަނޑުގެ ހިތުގެ އެންމެ ފުންމިނުން ވަރަށް ބޮޑަށް ޝުކުރު ދަންނަވަން.
އާދެ، މި ރަށަށް އަޅުގަނޑަށް އެކިފަހަރު، އެކި ހައިސިއްޔަތުން އާދެވިފައިވޭ. އަޅުގަނޑާ ވަރަށް ގާތް ރަށެއް ގޮތުގައި އިޙްސާސް ކުރެވޭ. ހައުސިންގ މިނިސްޓަރަކަށް ހުރިއިރުގައި ކުރަންޖެހުނު މަސައްކަތްތަކުގައިވެސް، އޭގެތެރެއިން، ސުނާމީގައި ގެދޮރު ގެއްލުނު މީހުންނަށް، ގެދޮރު ނުލިބި ލަސްވެފައި އޮތް މައްސަލަ ޙައްލުކުރުމުގައި ވަރަށް ގިނަ ވަގުތުތައް ހޭދަކުރަން، މި އަތޮޅުގެ ހަތަރު ރަށެއްގައި އުޅުނިން. އޭގެތެރެއިން، އެއް ރަށް މިއީ. އާދެ، އެ ކަންތައްތަކާއި އަދިވެސް އެކި ކަންކަމުގައި އާދެވި، ވަރަށް ގާތް ރަށެއް.
ކުރީ ސަފުން ފެންނަ ބޭފުޅުންގެ ތެރެއިންވެސް، ރަށުގެ އިސްރަށްވެހިންގެ ތެރެއިންވެސް، އަމިއްލަގޮތުން އަޅުގަނޑާ ވަރަށް ގާތް ބޭފުޅެއް، ޝަކީބްބެ. އަޅުގަނޑުގެ ބައްޕަގެ ވަރަށް ގާތް އަޚެއް. އަޅުގަނޑު ވަރަށް ކުޑައިރު، އުމުރުން ގާތްގަނޑަކަށް ބާރަވަރަކަށް އަހަރުން ފެށިގެން ދަންނަ، އަޅުގަނޑާ ވަރަށް ގާތް ބޭފުޅެއް. ވަރަށް ޚިދުމަތްތެރި އިސްރަށްވެއްސެއް. އަދި ދެންވެސް މި ތަނުގައި، އަޅުގަނޑުމެންގެ ކުރިމަތީގައި އެފަދަ ބޭފުޅުން ތިއްބެވީ. އެހެންވީމާ، އަޅުގަނޑަށް ވަރަށް ޚާއްޞަވޭ، މި ރަށަށް އައިސް މި ވަގުތު ހޭދަކުރަން. ވަރަށް އުފާކުރަން، މި ރަށުގައި މިރޭ މަޑުކޮށްލަން ތިޔަބޭފުޅުން ފުރުޞަތު ދެއްވީތީ.
އާދެ، މި ރަށުގެ ތަރައްޤީއަށްޓަކައި ކުރަންހުރި ކަންކަމަކީ، އަޅުގަނޑުމެންގެ ތަރައްޤީގެ ސިޔާސަތުގައި ހަމަ އެހެން ރަށްތައް ފަދައިން، އެއްވެސް ތަފާތުކުރުމެއްނެތި، އިސްކަންދޭނެ ކަންތައްތައް.
މިދިޔަ ސަރުކާރުގެ ޒަމާނުގައި އަދި ކުރީގެ، އޭގެ ކުރީގެ ސަރުކާރުން ފެށިގެންވެސް ފެށި، އެކި ގޮތްގޮތުން ހުއްޓިގެންގޮސް ނުނިމި، އޭގެ ސަބަބުން ރައްޔިތުންނަށް އެތައް ތަކުލީފެއް އުފުލަންޖެހިފައި ހުރި ކަންކަން އެބަހުރި. ދެންމެ ކައުންސިލްގެ ރައީސް އަދި ޢިއްޒަތްތެރި މެންބަރު އެ ފާހަގަކުރެއްވީ އެކަންކަން. އަދި އޭގެ ކުރިން ބޭއްވުނު ކައުންސިލްގެ ބައްދަލުވުމުގައި ވަރަށް ތަފްޞީލުކޮށްވެސް އެ ބޭފުޅުން ފާހަގަކުރެއްވި އެ ކަންތައްތައް.
އާދެ، އެގޮތުން އެންމެ ބޮޑުވެފައި މި އޮތް އެއް މައްސަލައަކީ، ނަރުދަމާ ނުނިމިގެން މިދާ މައްސަލަ. އަޅުގަނޑުގެ މި ދަތުރުގެ އެއް ބޭނުމަކީ، މިހެންހުރި ކަންކަމުގައި ތިޔަބޭފުޅުންނަށް ޔަގީންކަން ދިނުން. މި ނަރުދަމާގެ މައްސަލައަށް މި ދިމާވެފައި މިއޮތް، މި މަޝްރޫޢު ނުނިމިގެން ގޮސްފައި މިއޮތް މައްސަލަ އެކީގައި ޙައްލުކޮށްދީ، އެ މަސައްކަތް ކުރެވޭނެގޮތް އަޅުގަނޑު ހަމަޖައްސައިދީ، ލަސްތަކެއްނުވެ އަލުން ފަށައިދީ، އިރާދަކުރެއްވިއްޔާ ބާރު ސްޕީޑްގައި ގެންގޮސް ނިންމައިދޭނަން. އެ ޔަގީންކަން ދެން.
އެ މަސައްކަތް ހަމަ ނިމޭތަނުން މަގު ހެދުމުގެ މަސައްކަތް އިރާދަކުރެއްވިއްޔާ ފަށައިދޭނަން. އެވެސް ސޮއިކޮށްފައި އޮތް މަޝްރޫޢެއް. އެހެންނަމަވެސް، ކޮންމެގޮތެއްވިޔަސް މަގު ހެދުން ފެށޭނީ ނަރުދަމާ ނިމިގެން ކަމުގައިވާތީ، މި ދެންނެވި ގޮތަށް ނަރުދަމާ އަވަހަށް ނިންމައިދީ، ދެން ނިމޭތަނުން މަގުގެ މަސައްކަތް ހަމަ އެ ސްޕީޑްގައި ފަށައިދީ، ނިންމައިދޭނަން. އެ ޔަގީންކަންވެސް ދެން.
އާދެ، ގިރާ ސަރަޙައްދުގެ މައްސަލައަކީ، އިންތިހާއަށް ބޮޑުވެފައި އޮތް މައްސަލައެއް. ކައުންސިލުން އެ ހުށަހެޅުއްވި ގޮތް އަޅުގަނޑަށް ވަރަށް ކަމުދޭ. ދާއިމީ ރަނގަޅު ޕްލޭނެއް ހެދެންދެންވެސް، މިހާރުވެސް ވަގުތީ ޙައްލެއް ގެންނަންޖެހޭ ކަމެއް ކަމުގައިވާތީ، ކައުންސިލާ ގުޅިގެން ކުރިއަށް މިއޮތް ދުވަސްތަކުގައި ކޮންސްޓްރަކްޝަން މިނިސްޓްރީން މަސައްކަތްތަކެއް ކުރައްވާނެ. ކޮށްގެން، ކައުންސިލްގެވެސް އެހީތެރިކަމާއެކީގައި، ކައުންސިލްގައި ހުރި ހިލައިގެ ބޭނުންކޮށްގެން، ވަގުތީ ޙައްލެއް ގެނައުމުގެ މަސައްކަތް، ކޮންސްޓްރަކްޝަން މިނިސްޓަރު ކައުންސިލާ ގުޅިގެން ފަށްޓަވާނެ. އެހެންވީމާ، އަޅުގަނޑު މި އުންމީދުކުރަނީ، އެކަމުގައި ތިޔަބޭފުޅުންނާ އެކުގައި މަސައްކަތްކޮށް، ވަގުތީ ޙައްލެއް ގެނެސްދެވޭނެ ކަމަށް. ގެނެސްދޭނަން އިރާދަކުރެއްވިއްޔާ. ހަމަ ގެނައުމާއެކީގައި ދާއިމީގޮތެއްގައި އެ މައްސަލައަށް އެންމެ ރަނގަޅު ޙައްލެއް ގެނައުމުގައިވެސް ސަރުކާރުން ފުރިހަމަ އެއްބާރުލުން ދީ، ހުރިހާ ކަމެއް ފަހިކޮށްދީ، އެކަން ކޮށްދޭނެ ވާހަކަ އަޅުގަނޑު ދަންނަވަން.
އާދެ، ނަރުދަމާއާއި، މަގުގެ މައްސަލައާއި، ގިރާ ސަރަޙައްދުގެ މައްސަލައަކީ، ޙަޤީޤަތުގައި ގިނަ ދުވަސްތަކެއް ވެގެންގޮސް، ނުނިމި ހުރުމުގެ ސަބަބުންނާއި، އަދި އެކަމުގެ ސަބަބުން ލިބޭ އުނދަގުލާހެދި، މި ރަށުގެ ރައްޔިތުންނަށް އެންމެ ބޮޑެތި މައްސަލަތައް ދިމާވާ، އުނދަގޫތައް ދިމާވާ މައްސަލަތައް. އެހެންވީމާ، މިކަންކަމަށް އެ ދޭންވާ ސަމާލުކަން އެންމެ ބޮޑަށް ދީގެން، އިރާދަކުރެއްވިއްޔާ މި ދެންނެވި ގޮތަށް ކޮށްދޭނަން. ދެން އެއާއެކީގައި ދެންހުރި މައްސަލަތަކަށްވެސް ޙައްލު ގެނައުމުގެ ކަންކަން ކުރިއަށް ގެންދާނަން.
އާދެ، އަޅުގަނޑު ވަރަށްގިނަފަހަރު މިހާރު ބައްދަލުވުންތަކުގައި ދަންނަވަމުން ގެންދަން، މި އަހަރަށް މި ފާސްކުރި ބަޖެޓް ތަންފީޒު ކުރުމުގައި އަދި ޕްލޭން ކޮށްފައި އޮތްގޮތް، ތަރުތީބު. އޭގެތެރެއިން އެންމެ އިސްކަމެއް ދޭ ކަމަކީ ގެދޮރުގެ މައްސަލަ ޙައްލުކުރުން. ދެން އެއާއެކީގައި، ރަށްރަށުގައި ތަޢުލީމީ ދާއިރާއަށް ކުރަންހުރި ކަންކަން ކުރުމާއި، ޞިއްޙީ ދާއިރާ ތަރައްޤީ ކުރުން.
އާދެ، މި ރަށުގެ ޞިއްޙީ މަރުކަޒުގެ ފެންވަރު ރަނގަޅުކުރުމަށްޓަކައި ލެބޯރެޓަރީއަށް ބޭނުންވާ ވަސީލަތްތައް ގާއިމުކޮށް، އަދިވެސް އެހެން ވަސީލަތްތައް، ތަކެއްޗާއި ހިއުމަން ރިސޯސަސް، މި ހުރިހާ ކަމެއް ފުރިހަމަކޮށްދިނުމާ އެކީގައި، ލެބޯރެޓަރީއާ އެކީގައި ޞިއްޙީ މަރުކަޒުގެ ފެންވަރު ރަނގަޅުކޮށް، 24 ގަޑިއިރު ހިންގޭ ތަނަކަށް ބަދަލުކުރުމަށްޓަކައި ކުރަންޖެހޭ މަސައްކަތްތައް ކޮށްދޭނަން. އެކަން އަޅުގަނޑުމެން ހާސިލުކޮށްދޭނަން. ހަމަ އެއާއެކީގައި، ސްކޫލަށް މަލްޓިޕަރޕަސް ހޯލެއް އިތުރުކޮށްދިނުމުގެ މަސައްކަތް، މި އަހަރު ތެރޭގައި ފަށައިދޭނަން.
އާދެ، ގެދޮރުގެ ވާހަކަ އަޅުގަނޑު ތަންކޮޅެއް ފަހުން ދައްކާނަން.
އާދެ، ޒުވާނުންނަށް ބޭނުންވާ ކަންކަމަކީ، ބަޖެޓުގެ ތެރޭގައި، މި އަހަރު މި ތަންފީޒުކުރުމަށް ކަނޑައަޅާފައި ހުރި މަޝްރޫޢުތަކުގެ ތެރޭގައި، ވަރަށް މުހިންމު ދާއިރާއެއް. މި ރަށް ފަދައިން، ވަރަށް ގިނަ ރަށްތަކުގައި އަޅުގަނޑުމެން ކުރިއަށް ގެންދާނަން، ޒުވާނުންގެ މަރުކަޒުތަކުގައި، ވަސީލަތްތައް ހަމަކުރެވިފައި ހުންނަ މަރުކަޒުތަކެއް ގާއިމުކޮށްދިނުމަށް. އެކި ރަށްތަކުގައި، އެކި ނީޑްސް ހުރީ ކުޅިވަރުތަކަށް. އެގޮތުން، މި ރަށުގައި ވޮލީ ކޯޓުގެ މަސައްކަތް އަލުން ފަށައި، ނިންމައިދިނުމާ އެކީގައި، ފުޓްސަލް ދަނޑު، ކުރީގެ ދަނޑުގެ މަރާމާތުގެ މަސައްކަތް ކުރުމާއި، ފުޓްބޯޅަ ދަނޑުގައި ޓަރފް އެޅުމާއި، މިހެންގޮސް ކަންތައްތައް އެބަހުރި ކުރަން.
އެހެންވީމާ، ޖުމްލަކޮށް މި ރަށުގެ ކުޅިވަރާއި، ޒުވާނުންގެ ދުޅަހެޔޮކަމާ ގުޅިފައިވާ މި ދެންނެވި ކަންކަން ހިމެނޭހެން، ރަށަށް ބޭނުންވާ ކަންތައްތައް އިރާދަކުރެއްވިއްޔާ މި އަހަރު ތެރޭގައި، ކަމާބެހޭ ވުޒާރާ މެދުވެރިކޮށް ފަށްޓައިދީ، އަޅުގަނޑު ކުރިއަށް ގެންގޮސްދޭނަން.
އާދެ، ބަނދަރުގެ ވާހަކަ. އަޅުގަނޑު ހަނދާން އެބަހުރި، އެންމެ ފުރަތަމަކޮޅުގައި، އޭރުގައި ވަޒީރެއްގެ ގޮތުގައި ހުރިއިރުގައި ކުރަންޖެހުނު އެއް މަސައްކަތަކީ، މި ރަށުގެ ބަނދަރަށް ކޮންމެވެސް ކަހަލަ ޙައްލެއް ގެނައުން. ވަރަށް އުފާކުރަން، މިދިޔަ އަހަރުތަކުގެ ތެރޭގައި އިރާދަކުރެއްވީތީ މިވަރަށް ތަރައްޤީވެފައި އޮތީމަ. ދެންވެސް ރަށުގެ ކުރިއެރުމާއެކީގައި، ކޮންމެ ރަށަކަށްވެސް، އޭގެ ޒާތުގައި ބޭނުންޖެހޭ ކަމެއް، އެ ހެދިފައި އޮންނަ ބަނދަރަށް އިތުރު ތަރައްޤީ ގެނައުން. އިތުރު ތަރައްޤީ ގެނައުމަކީ ރަށަށް އިޤްތިޞާދީ ގޮތުންވެސް، އަދި އަރައި ފޭބުމާ، ހުރިހާ ގޮތަކުންވެސް ބޭނުންކަމެއް.
އެހެންވީމާ، ބޭރު ތޮށްޓަށް ކުރެވިދާނެ ކަންކަން ބަލައި، ގެނެވިދާނެ އެންމެ ރަނގަޅު ޙައްލެއް، ޓެކްނިކަލީ، ވަކިން ފާލަމެއް ގޮތަށް ހަދައިގެން ކަމުގައިވަންޏާ އެގޮތަށް. ކޮންމެވެސް ރަނގަޅު ޙައްލެއް ގެނެސްދީ، މި ބަނދަރު ބޭނުންކުރުމަށް އޮންނަ ޖާގަ އިތުރުކުރުމަށްޓަކައި ރަނގަޅު ޙައްލުތަކެއް އަޅުގަނޑުމެން އިރާދަކުރެއްވިއްޔާ ގެނެސްދޭނަން. އެކަންވެސް ހަމަ ޔަގީންކަމާއެކީގައި ދަންނަވަން.
އާދެ، ކުނި މެނޭޖްކުރުން. ކުނި މެނޭޖްކުރުމަށް ކައުންސިލުން ވަރަށް ގިނަ މަސައްކަތްތަކެއް ފަށާފައިވޭ. އެކަމަށް ބޭނުންވާ އެހީތެރިކަން، މާލީގޮތުން ބޭނުންވާ އެހީތެރިކަން، އަދި އެހެން ވަސީލަތްތަކުގެ ގޮތުން ބޭނުންވާ އެހީތެރިކަންވެސް އިރާދަކުރެއްވިއްޔާ ފޯރުކޮށްދޭނަން. ސަބަބަކީ، އަޅުގަނޑު ކަނޑައަޅާފައި އޮތް އެންމެ މުހިންމު އެއް ސިޔާސަތެއް އެއީ، މި އަހަރު ތެރޭގައި، 2025 ނިމެންވާއިރަށް، މި އަހަރު ނިމުމުގެ ކުރިން، މުޅި ރާއްޖޭގެ ހުރިހާ ރަށެއްގައި އެ މައްސަލަ ޙައްލުކުރުން. އެހެންވީމާ، އެއީ ވަރަށް ބޮޑު އެމްބިޝަނެއް. އެހެންނަމަވެސް، އިރާދަކުރެއްވިއްޔާ އެޗީވްކުރާނެ ޓާގެޓެއް.
އެހެންވީމާ، އޭގެތެރެއިން މި ރަށަށް ބޭނުންވަނީ މާލީގޮތުން ބޭނުންވާ އެހީތެރިކަން، ކަންތައްތައް ކައުންސިލުން ކުރުމަށް. އަދި ވަސީލަތުގެ ގޮތުން ދެން މަދުވާ ކަންކަން ފުރިހަމަކުރުމަށް. އެހެންވީމާ، އެއީ މި ރަށުގައިވެސް ޙައްލުވެގެންދާނެ ކަމެއް ކަމާއި، ޖުމްލަގޮތެއްގައި ހުރިހާ ރަށެއްގައިވެސް ޙައްލުކުރާނެ ކަމެއް ކަމުގައިވާތީ، އެކަން އަޅުގަނޑު ފާހަގަކޮށްލަން.
އާދެ، މިކަންކަމާއެކީގައި، އަޅުގަނޑު ހަމަ ދަންނަވާލަން ބޭނުން، ގެދޮރުގެ ވާހަކަ. އާދެ، ރާއްޖޭގެ އެންމެ ގިނަ ރައްޔިތުންނަށް، އެންމެ ގިނަ ރައްޔިތުންނަށް، ހަމަ އެންމެ މުހިންމީ ގެދޮރުގެ މައްސަލައަށް ޙައްލެއް އައުން. ބޯހިޔާވަހިކަމެއް ރަނގަޅުގޮތުގައި ލިބިގެންދިޔުން. އެއީ، އަޅުގަނޑަށް ހަމަ ޔަގީންކަމެއް ކަމުގައިވާތީ، އެންމެ މުހިންމު ސިޔާސަތެއްގެ ގޮތުގައި މެނިފެސްޓޯގައިވެސް އެކަން ކަނޑައެޅީ. އަދި އަޅުގަނޑުމެން މި އަހަރަށް މި ފާސްކުރި ބަޖެޓުގައިވެސް އެންމެ މުހިންމު ކަމެއްގެ ގޮތުގައި އެކަން ކަނޑައެޅީ.
މި އަހަރުގެ ބަޖެޓުގެ ތެރެއިން، ގެދޮރުވެރިކަމަށް އެކި ކަންކަން އެބަ ފަހިކޮށްދެން. އެއްކަމަކީ، މި ރަށް ފަދައިން ހަމަ ރާއްޖޭގެ ކޮންމެ ރަށެއްގައިވެސް ކުރިއަށް ގެންދެވޭނެ ފުރުޞަތެއް. އެއީ، އަޅުގަނޑުމެން ފަށާފައި މިއޮތް ފުރުޞަތު މިހާރު ހުޅުވާލާފައިވާނީ. ތިޔަބޭފުޅުންނަށްވެސް ހަމަ އެއަށް އެޕްލައި ކުރެއްވޭނެ. 5 ޕަސެންޓް އިންޓްރެސްޓްގައި. އެއީ، އިސްލާމިކް ފައިނޭންސް. 5 ޕަސެންޓް އިންޓްރެސްޓްގެ ހައުސިންގ ލޯން ސްކީމެއް. ބޭންކުތަކުން އާންމުކޮށް ދިހަ، ބާރަ ޕަސެންޓުގައި ލިބޭނީ. އަދި އިކުއިޓީ ބަހައްޓަންޖެހި، ވަރަށް އަގުބޮޑުވާނެ ހައުސިންގ ލޯނު. އެހެންވީމާ، ސަރުކާރުން އަޅުގަނޑުމެން މެނިފެސްޓޯ ކަނޑައަޅައިގެން މި ފެށީ 5 ޕަސެންޓުގައި، އިކުއިޓީ ބަހައްޓަން ނުޖެހޭ، ވަރަށް ލުއި ލޯނު ސްކީމެއް. އެ ލޯނު މިރަށުގެ ރައްޔިތުންނަށްވެސް ނެންގެވޭނެ. ނަންގަވައިގެން ތިޔަބޭފުޅުންގެ އަމިއްލަ ގޯތީގައި، އަމިއްލަފުޅަށް ބޭނުންވާ ޑިޒައިނަކަށް، އެ ލޯނުގެ ބޭނުންކޮށްގެން، ގެ ބިނާކުރެވޭނެ. އެއީ، އޭގެ ބޭނުމަކީ. އެހެންވީމާ، އެ ފުރުޞަތު މިރަށުގެ ރައްޔިތުންނަށްވެސް އެބައޮތް، މިހާރު އެޕްލައި ކުރައްވައިގެން. މި އަހަރުގެ ބަޖެޓުގެ ތެރޭގައި، އަދި ކުރިއަށް އަންނަ ކޮންމެ އަހަރެއްގެ ބަޖެޓުގެ ތެރޭގައިވެސް އެއްހާސް މިލިއަން ރުފިޔާ، އެއް ބިލިއަން ރުފިޔާ ކަނޑައެޅިފައި އެވަނީ މި ލޯނު ސްކީމަށް. އަދި ރިވޯލްވް ކުރެވޭ ފަންޑުގެ ތެރެއިން، ޙަޤީޤަތުގައި ދެ ބިލިއަނަށްވުރެ ގިނަ ރުފިޔާގެ ލޯނު، އޭގެތެރެއިން މި އަހަރު ދޫކުރާނެ. އެހެންވީމާ، އެއީ، މި ރަށް ހިމެނޭގޮތަށް މުޅި ރާއްޖޭގެ ހުރިހާ ރަށެއް. ފަޅުކޮށް ހުރި ގޯތިތަކުގައި ނޫނީވިއްޔާ، ފަޅުނޫނަސް ތިޔަބޭފުޅުންގެ އަމިއްލަ ގޯތީގައި، ގެ އެޅުމަށްޓަކައި އެ ލޯނު ނެންގެވޭނެ. 5 ޕަސެންޓް އިންޓްރެސްޓް. އިކުއިޓީއެއް ބަހަށްޓާކަށް ނުޖެހޭނެ. ވަރަށް ލުއި ޓާރމްސްތަކެއް ހުންނާނީ.
އެހެންވީމާ، ތިޔަބޭފުޅުންނަށް އެފޯޑު ކުރެވޭނެ. އަތްފޯރާފަށުގެ ލޯނު ސްކީމެއް މިއީ. އަނެއްކާ އިސްލާމިކް ފައިނޭންސް މޮޑެލްގެ ލޯނު ސްކީމެއް. ދީނުގައި ހުއްދަ ނޫން އެއްވެސް ކަމެއް އެއްވެސްވަރަކަށް ނުހިމެނޭނެ. އެހެންވީމާ، މި ލޯނު ސްކީމުގެ ބޭނުން ހިއްޕަވާ. ރާއްޖޭގެ ހުރިހާ ރައްޔިތުންނަށްވެސް އަޅުގަނޑު މި ދަންނަވާލަނީ، މިއީ، ރަނުގެ ފުރުޞަތެކޭ ތިޔަބޭފުޅުންގެ ގޯތީގައި ގެދޮރު ބިނާކުރެއްވުމަށް، އަމިއްލައަށް ގެއެއް އެޅުއްވުމަށް، މި ލޯނު ނެންގެވުމަށް. ކޮންމެ އަހަރެއްގެ ބަޖެޓުން އެއްހާސް މިލިއަން ރުފިޔާ އިތުރަށް، ކޮންމެ އަހަރަކު އިތުރުކުރެވޭނެ. އަދި އެއީ، ރިވޯލްވް ކުރެވޭ ފަންޑަކަށްވާތީ، އިފެކްޓިވްލީ މޯރ ދެން ދެ ބިލިއަން. ދެ ބިލިއަނަށްވުރެ ގިނަ ރުފިޔާގެ ލޯނު، ކޮންމެ އަހަރަކު އިތުރަށް ދޫކުރެވޭނެއޭ. ހުރިހާ ބޭންކުތަކާއެކީގައި އަޅުގަނޑުމެން ސޮއިކޮށްފައި އެއޮތީ މިހާރު. ރާއްޖޭގައި ހުރި މައިގަނޑު ހުރިހާ ބޭންކުތަކާ އެކީގައި ސޮއިކޮށްފައި އެއޮތީ މިހާރު.
އެހެންވީމާ، މިއީ ފަށާފައި އޮތް ސްކީމެއް. އަޅުގަނޑުމެންނަށް އެހާބޮޑަށް މާކެޓް ނުކުރެވޭތީކަންނޭނގެ، ރައްޔިތުންނަށް އެހާބޮޑަށް ސާފުނުވަނީ. އެހެންނަމަވެސް، އަޅުގަނޑު އުންމީދުކުރަން، މިރެއަށްފަހު ރާއްޖޭގެ ހުރިހާ ރައްޔިތުންނަށް ވަރަށް ސާފުވެވަޑައިގަންނަވާނެ ކަމަށް. ތިޔަބޭފުޅުންގެ އަމިއްލަ ގޯތީގައި ގެ އަޅުއްވަން، މި ލޯނު ސްކީމުގެ ބޭނުން ހިއްޕެވޭނެ. ދެން އެކި ދާއިރާތަކުގައި، މި ދެންނެވީ ރާއްޖޭގެ އެކި ރަށްތަކަށް އެކި ބޭންޑްތަކަށް މި ލޯނުގެ އަދަދު ތަފާތުވާނެ. އެ ތަފްޞީލު އަޅުގަނޑު މިރޭ ކޮންމެހެން ދޭކަށްނޫން. މައިގަނޑު ގޮތެއްގައި، މި ލޯނު ނެންގެވޭނެކަމާއި، އިސްލާމިކް ފައިނޭންސް ލޯނު ސްކީމެއްކަމާއި، 5 ޕަސެންޓް އިންޓްރެސްޓް ކަމާއި، މި ހުރިހާ ވާހަކައެއް މި ދަންނަވާލީ.
ދެވަނަ ގޮތަކީ، މި އަހަރުގެ ބަޖެޓުގެ ތެރެއިން، ހައުސިންގ މަޝްރޫޢު ހިންގުން. އަޅުގަނޑު ކެމްޕެއިން ތެރޭގައި، އެކި ރަށްރަށުގައި ހުންނާނެ ވަޢުދުވެފައި. އެކި އަދަދުތަކަށް ހައުސިންގ ޔުނިޓް އަޅައިދިނުމަށް. އެ މަޝްރޫޢުތައް ޢަމަލީގޮތުން ފެށުމަށް މި އަހަރުގެ ބަޖެޓުގައި 1500 މިލިއަން، 1.5 ބިލިއަން ރުފިޔާ އެއޮތީ ހިމަނާފައި. އަދި ދެން އަންނަ އަހަރުވެސް، ދެން އަންނަ އަހަރުވެސް، އަދި ދެން އަންނަ އަހަރުވެސް. ކޮންމެ އަހަރަކު އިތުރަށް 1.5 ބިލިއަން ހިމަނާނެ. ހައުސިންގ ޔުނިޓުތައް، އެކި ރަށްރަށުގައި އެކިގޮތަށް ބޭނުންވަނީ. ރޯ ހައުސް އަދި ފްލެޓް. އެކި ގޮތްގޮތަށް އެކި ރަށްތަކުން ބޭނުންވަނީ. އަޅުގަނޑު ވަޢުދުވެފައި ހުންނާނެ ކެމްޕައިން ތެރޭގައި، ވަރަށް ގިނަ ރަށްތަކުގައި އެގޮތަށް އަޅައިދޭން. އަދި ވަޢުދު ނުވިޔަސް، މިގޮތަށް ރައްޔިތުންނާ ބައްދަލުވެ، ކައުންސިލްތަކާ ބައްދަލުވެ، ރައްޔިތުން އެދޭ ކަންކަން އަޅުގަނޑާ ޙިއްޞާ ކުރުމުން، އެކަމަށްވެސް ޖާގަދީ، މި ހައުސިންގ މައްސަލަ، މި ގެދޮރުގެ މައްސަލައަށް ޙަޤީޤީ މާނައިގައި ދާއިމީ ޙައްލެއް ގެނެސްދިނުމަށްޓަކައި ބަޖެޓުގައި އެހާ އިސްކަމެއް މިދެނީ.
ރާއްޖޭގެ ކޮންމެ ރައްޔިތަކީ، މި ދައުރު ނިމޭއިރުގައި ހައުސިންގއަށް، ގެދޮރުގެ މައްސަލައަށް، ދާއިމީ ޙައްލެއް ލިބިފައިވާ، އެ ފުރުޞަތު ލިބިފައިވާ ރައްޔިތަކަށް ހެދުން އަޅުގަނޑުގެ އަމާޒަކީ. އޭގެ މާނައަކީ، އަޅުގަނޑުމެން ގެދޮރު އަޅައިދީފައި، ގެއެއް ލިބުން. ނޫނީވިއްޔާ، މި ދެންނެވި ލޯނު ސްކީމްގެ ތެރެއިން އެ ފުރުޞަތު އެ މީހަކަށް ފަހިކޮށްދެވިފައި އޮތުން. އަދި މާލޭ ސަރަޙައްދުގައި ޚާއްޞަ އިތުރު މަޝްރޫޢުތައް އެވަނީ ފެށިފައި. އެގޮތުން، މުޅި ރާއްޖޭގައި މިގޮތަށް ހައުސިންގ މަޝްރޫޢުތައް ހިންގި، އެކްސެސިބިލިޓީ ޓު ހައުސިންގ، ގެދޮރަށް، ފުރަތަމަ ގެޔަށް، އެ މީހާގެ ފުރަތަމަ ބޯހިޔާވަހިކަމަށް ފުރުޞަތު ލިބިފައިވާ ރައްޔިތަކަށް، ކޮންމެ ރައްޔިތަކު ހެދުން. އެއީ، އަޅުގަނޑު ކެމްޕެއިންގައި ވީ ވަޢުދު. އެ ވަޢުދު ފުއްދަން މި މަސައްކަތް މިކުރަނީ. އެކަން އިރާދަކުރެއްވިއްޔާ ފުއްދޭނެ. ފުއްދުމަށް ކޮންމެ އަހަރެއްގެ ބަޖެޓުގައި އެންމެ އިސްކަމެއް މިދެނީ ހަމަ ގެދޮރަށް. މި ރަށުގެ ރައްޔިތުންނަށް މި ފުރުޞަތު އެބައޮތް. އެހެންވީމާ، ތިޔަބޭފުޅުން އެ ލޯނު ސްކީމަށް އެޕްލައި ކުރައްވައިގެން، އަމިއްލަ ގޯތީގައި ގެދޮރު އެޅުމުގެ މަސައްކަތް ފަށްޓަވަންވީ. އަދި މި ރަށުގައި، ކުރިއަށް އޮތް ތަނުގައި އިރާދަކުރެއްވިއްޔާ ބިން ހިއްކި، އިތުރު ޖާގަ ލިބިގެންދާވަރަކުން ހައުސިންގ ޔުނިޓުވެސް އަޅުގަނޑުމެންނަށް އަޅައިދެވޭނެ. އެހެންވީމާ، އެ އުންމީދީ ވާހަކަވެސް ދަންނަވާލަން.
އާދެ، އަޅުގަނޑުމެން ރައްޔިތުން ބޭނުންވަނީ ތަރައްޤީ. ތަރައްޤީގެ ކަންކަމަކީ، ރައްޔިތުންނަށް ކޮންމެހެން ސަރުކާރުން ކޮށްދޭންޖެހޭނެ ކަމެއް. މި ދެންނެވި ގޮތަށް، ގެދޮރު ބިނާކޮށްދިނުމާއި، ބަނދަރުތަކާއި، މަގުތަކާއި، ސްކޫލުތަކާއި، ހޮސްޕިޓަލް، މިހެންގޮސް ޢުމްރާނީ މިފަދަ ހުރިހާ ތަރައްޤީއެއް ރައްޔިތުންނަށް ގެނެސްދޭންޖެހޭނެ. އަޅުގަނޑުގެ ސިޔާސަތަކީ، ތަރައްޤީ ޔަގީންކޮށްދިނުން. ޙަޤީޤީ މާނައިގައި ތަރައްޤީގެ ނަތީޖާ ނެރެދިނުން. އެ ތަރައްޤީ ގެންނަމުންދާއިރުގައި، ޤައުމުގައި ހަމަޖެހުންވެސް ގާއިމުވެފައި އޮތުން. އޭގެ ފުރިހަމަ މާނައިގައި ހަމަޖެހުން ގާއިމުވެގެން ދިޔުން.
ތިޔަބޭފުޅުންނަށް ފެނިވަޑައިގަންނަވާނެ، މި ނިމިގެންމިދިޔަ ސާދަވަރަކަށް މަސްދުވަހުގެ ތެރޭގައި، ޤައުމުގައި ހަމަޖެހުން އަޅުގަނޑުމެން އޮތީ ގާއިމުކޮށްފައި. ޤައުމުގައެއް ނުހިނގާ، ބަދަލުހިފުމުގެ ރޫޙުގެ އެއްވެސް ކަމެއް. އަޅުގަނޑުމެންނެއް ނުހިންގާނަން، ބަދަލުހިފާކަށް އެއްވެސް ކަމެއް. ސިޔާސީ ވާދަވެރިކަމުގެ ތެރެއިން އެއްބަޔަކަށް އަނިޔާކޮށް، ސިޔާސީ ވިސްނުމުގެ ތެރެއިން ގެންގޮސް ހައްޔަރުކޮށް، ޖަލަށްލައި، އުނދަގޫކޮށް ހެދުމަކީ އަޅުގަނޑު ގަބޫލުކުރާ ކަމެއް ނޫން. އަޅުގަނޑު އެކަމަށް ވަޢުދުވިން، އެކަން އެގޮތަށް ނުހިންގާނެ ކަމަށް. މި ޤައުމުގައި އަޅުގަނޑެއް އިރާދަކުރެއްވިއްޔާ ދުވަހަކުވެސް ސިޔާސީގޮތުން އެއްވެސް މީހަކަށް އަނިޔާއެއް ނުކުރާނަން. ބަދަލުހިފުމެއް ނޯންނާނެ. ޙަޤީޤީ މާނައިގައި މި ޤައުމުގައި ހަމަޖެހުން އޮންނަން އަޅުގަނޑު ބޭނުންވާތީ. އިރާދަކުރެއްވިއްޔާ ކުރިއަށް އޮތް ދުވަސްތަކުގައިވެސް ތަރައްޤީ ގެނެސްދޭ ކަމަށްވަންޏާ، ތަރައްޤީގެ ފުރިހަމަ ނަފާ ރައްޔިތުންނަށް ލިބޭނީ ޤައުމުގައި ސްޓެބިލިޓީ އޮވެގެން. ހަމަޖެހުން އޮވެގެން. ރައްޔިތުންގެ ކިބައިން އަޅުގަނޑު އެދެނީ، މި ހަމަޖެހުމުގައި، ޤައުމު ކުރިއަށް ގެންދިޔުމުގައި ފުރިހަމައަށް އެއްބާރުލުން ދެއްވުމަށް. އަޅުގަނޑުމެން ކޮންމެ މީހަކަށްވެސް މުހިންމީ މި ޤައުމަކީ ހަމަޖެހުން ގާއިމުވެފައި އޮތް ޤައުމަކަށްވާން. އަޅުގަނޑުމެންގެ ޤައުމަށް އޭގެ ޙަޤީޤީ މާނައިގައި ތަރައްޤީ ގެނެސްދެވިގެން ދާނީވެސް މި ހަމަޖެހުމާއެކީގައި. ޙަޤީޤީ މާނައިގައޭ މި ދެންނެވީ، ވަށާޖެހިފައިވާ ތަރައްޤީއެއް އަޅުގަނޑު ބޭނުންވަނީ ޤައުމަށް އަންނަން. އަޅުގަނޑުމެންގެ މި ދެންނެވި ޢުމްރާނީ ތަރައްޤީތަކާއެކީގައި، އަޅުގަނޑުމެންގެ ވިސްނުން ތަރައްޤީވެ، އަޅުގަނޑުމެންގެ އަޚްލާޤު ތަރައްޤީވެ، އަޅުގަނޑުމެންގެ މުޖުތަމަޢުގެ އުޅުންތަކާއި، ގުޅުންތައް ހެޔޮމަގުން ތަރައްޤީވެގެން ގޮސްފައި އޮންނަ، ވަށާޖެހޭ ތަރައްޤީއެއް ހާސިލުވާން. އެހެންވީމާ، މި މަގުން އަޅުގަނޑުމެން ކުރިއަށް ދާއިރުގައި، މި ޤައުމުގައި ހަމަޖެހުން އޮވެގެން ކުރިއަށްދާންޖެހޭނީ. އެއީ، އަޅުގަނޑު ޔަގީންކުރާ ކަމަކީ. އަދި އިރާދަކުރެއްވިޔާ ކުރިއަށް އޮތްތާނގައިވެސް އެކަން އެގޮތުގައި ދާނީ.
އެހެންވީމާ، މި ޤައުމުގައި މިގޮތަށް، އަޅުގަނޑުމެން ރައްޔިތުން އެދޭގޮތަށް، ރައްޔިތުން ގާތަށް އައިސް، ރައްޔިތުން ބޭނުންވާ ކަންކަން އޮޅުންފިލުވައިގެން، ރައްޔިތުން އެދޭ ތަރައްޤީ ރައްޔިތުންނަށް، ޤައުމުގެ ހަމަޖެހުން ގާއިމުކޮށްގެން ގެނެސްދިނުމުގައި، ރައްޔިތުން އަޅުގަނޑާ އެކީގައި އެންމެން އަތުކުރި އޮޅާލައިގެން، ޤައުމީ ވިސްނުމެއްގައި އަދި ފަރުދީ ވިސްނުމެއްގައި މިކަމުގައި އެއްކޮށް ތިއްބެވުމަކީ، އަޅުގަނޑުހިތުން އަޅުގަނޑުމެން ކޮންމެ މީހަކަށް ކޮށްދެވޭ އަދި ޤައުމަށް ކޮށްދެވޭ ވަރަށް މުހިންމު ކަމެއް. މި ޤައުމުގައި ސިޔާސީ ފަރާތްތަކުން އަދި އެނޫންވެސް ބަޔަކަށް މި ހަމަޖެހުން ނަގާލުމަކަށް އަޅުގަނޑު އެހެން ޖާގައެއް ނުދޭނަން. އެއްވެސް ފުރުޞަތެއް އެކަމަކަށް ނުދޭނަން. އެކަމަށް އެއްވެސް ބަޔަކު، އެއްވެސް ކަމެއް ކުރަން މަސައްކަތް ކޮށްފިނަމަ، އަޅުގަނޑު އެކަން ޤައުމީ ވިސްނުމެއްގައި ހުއްޓުވައި، ޤައުމުގެ ހަމަޖެހުން ޔަގީންކުރާނަން. އެ ވާހަކަ އަޅުގަނޑު ވަރަށް ސާބިތުކަމާއެކީގައި މި ދަންނަވާލަނީ.
އެއީ، އަޅުގަނޑު ބޭނުންވަނީ ޙަޤީޤީ މާނައިގައި މި ޤައުމަށް ކުރިއެރުން އަންނަން. އަޅުގަނޑުމެންގެ ދަރިންނަށް އުފާފާގަތި ދުވަސްތަކެއް، ކޮންމެ ދުވަހަކުވެސް އިޙްސާސްވެގެން ދާން. އަޅުގަނޑުމެންގެ ޤައުމުގައި ކުރިއަށް އޮތް ދުވަސްތަކަކީ މިއަދަށްވުރެވެސް އުފާފާގަތި، ހަމަޖެހުން ގާއިމުވެފައި އޮތް، އުފާވެރި ޤައުމަކަށް ވެގެންދާން. މިނިވަންކަން، ކޮންމެ ދުވަހަކު އިޙްސާސްވާ، މިނިވަން ޤައުމެއްކަން އަޅުގަނޑުމެން ފަޚުރުވެރިކަމާއެކީ ޤަބޫލުކުރާ ޤައުމެއްގޮތުގައި މި ޤައުމު ކުރިއަށް ދާން.
އެހެންވީމާ، އަމިއްލަ ފައިމައްޗަށް ތެދުވެ، އަޅުގަނޑުމެންގެ ޤައުމުގެ ކަންކަން ކުރުމަށް އަޅުގަނޑުމެން މަސައްކަތް މި ކުރަނީވެސް. ބޭރުގެ އެއްވެސް ޤައުމަކާ ރުޅިވެރިކަން ނުބާއްވައި، އަޅުގަނޑުމެންނަށް ހެޔޮއެދޭ ކަމުގައިވާނަމަ، އަޅުގަނޑުމެންގެ މިނިވަންކަމާއި ސިޔާދަތު ހިމާޔަތްކޮށްދޭ ކަމުގައިވާނަމަ، އަޅުގަނޑުމެންނަކީވެސް ފަޚުރުވެރި މިނިވަން ޤައުމެއްކަން ޤަބޫލުކުރާނަމަ، ހަމަ ކޮންމެ ބަޔަކާ އެކީގައިވެސް، އަޅުގަނޑުމެންނަށް ފައިދާވާ ކަންކަމުގައި ކުރިއަށްދިޔުމަކީ، އަޅުގަނޑުހިތުން އަޅުގަނޑުމެން ކޮންމެ ރައްޔިތަކުވެސް ބޭނުންވާނެ ގޮތް، އެހެންވީމާ، އެގޮތުގައި އިރާދަކުރެއްވިއްޔާ އަޅުގަނޑުމެން ކުރިއަށްދާނީ.
އަދިވެސް އެއްފަހަރު، މާމެންދޫގެ ލޮބުވެތި ރައްޔިތުންނަށް ފަށްފަށުން ޝުކުރު ދަންނަވަން. ތިޔަބޭފުޅުން ތިޔަ ބަހައްޓަވާ ގާތްކަމާއި، ތިޔަ ބަހައްޓަވާ އޯގާތެރިކަމަށްޓަކައި.
އަޅުގަނޑުގެ ދުޢާއަކީ، މި ރަށުގެ ތަރައްޤީއަށް އަޅުގަނޑުމެން މިކުރާ މަސައްކަތްތަކުގައި ކާމިޔާބީ، اللهُ سُبْحَانَهُ وَتَعَالَى މިންވަރު ކުރެއްވުން. އަދި މުޅި ޤައުމަށްވެސް ތަރައްޤީ ގެނައުމުގައި، ވަށާޖެހޭ ތަރައްޤީއެއް ގެނައުމުގައި، އަޅުގަނޑުމެން މި ކުރާ މަސައްކަތްތައް ކާމިޔާބު ކޮށްދެއްވުން. އަޅުގަނޑުމެންގެ ޤައުމުގައި ހަމަޖެހުން ގާއިމުކުރެވި، މިނިވަން މުސްތަޤިއްލު ޤައުމެއްގެ ގޮތުގައި މި ޤައުމު އަބަދުމެ ލެހެއްޓެވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.