بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ގާފަރު ކައުންސިލްގެ ރައީސާއި، ކައުންސިލަރުންނާއި، ޑަބްލިޔޫ.ޑީ.ސީ. މެންބަރުންނާއި، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޑައިގެން ތިއްބެވި މި ރަށުގެ ލޮބުވެތި އެންމެހައި ރައްޔިތުން، ވަޒީރުން، ކުންފުނިތަކުގެ ވެރިން، އެންމެހައި ހާޒިރީން، އަދި މި ޖަލްސާ، ދުރާއިގާތުން ބައްލަވާ އަދި އަޑު އައްސަވާ ލޮބުވެތި ހުރިހާ ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، ވަރަށް ހޫނުގަދަ ވަގުތެއްގައިވެސް މި ރަށަށް އާދެވުމުން، ތިޔަބޭފުޅުން ވަޑައިގެން ވަރަށް ހޫނު މަރުޙަބާއެއް ވިދާޅުވި ކަމަށްޓަކައި ލޮބުވެތި ހުރިހާ ރައްޔިތުންނަށް ފަށްފަށުން ޝުކުރު ދަންނަވަން. ވަރަށް ބޮޑަށް ޝުކުރިއްޔާ.
އާދެ، އަޅުގަނޑު ވަރަށް އުފާކުރަން، މި ރަށަށް އަނެއްކާވެސް އާދެވުމުން. އާދެ، ކުރިންވެސް އެކި ފަހަރުމަތިން އާދެވުނު. ރިޔާސީ އިންތިޚާބުގައިވެސް އަދި އޭގެ ފަހުންވެސް. އެހެންނަމަވެސް، އަޅުގަނޑު މަގާމާ ހަވާލުވެގެން، ކުރިން އިންތިޚާބު ތެރޭގައިވީ ވަޢުދުތައް ފުއްދުމުގައި މިދިޔަ އަހަރެއްހާ ދުވަހުގެ ތެރޭގައި، އަޅުގަނޑުމެން މި ތަންފީޒުކުރަން ލިބިފައި އޮތް، ކުރީ ސަރުކާރުން ފާސްކޮށްފައި އޮތް ބަޖެޓުގެ ތެރޭގައި ޖާގަ ނެތުމުގެ ސަބަބުން، މި ރަށުގައިވެސް ގިނަ ކަންތައްތައް އަޅުގަނޑު ބޭނުންވާ ސްޕީޑުގައި ނެތް ގެންދެވިފައެއް.
އެހެންނަމަވެސް، އަޅުގަނޑު ދޭ ޔަގީންކަމަކީ، މިހާރު އަޅުގަނޑުމެންގެ މަޖިލީހުން، އާދެ، މި އަންނަ އަހަރަށް ފާސްކޮށްފައި މިއޮތް ބަޖެޓު ބައްޓަންކޮށްފައި މިއޮތީ، މި ރަށުގައިވެސް ކުރިއަށް ގެންދަން ހުރި ތަރައްޤީގެ މަޝްރޫޢުތައް، އަޅުގަނޑު ވަޢުދުވެފައި ހުރި ތަރައްޤީގެ މަޝްރޫޢުތައް އިރާދަކުރެއްވިއްޔާ ގެންދެވޭ ގޮތަށް.
އާދެ، އިރާދަކުރެއްވިއްޔާ އެގޮތުން ކައުންސިލްގެ ބައްދަލުވުމުގައިވެސް ފާހަގަކުރެއްވި އަދި ޢިއްޒަތްތެރި މެންބަރުވެސް ފާހަގަކުރެއްވި ކަންތައްތައް އަދި އަޅުގަނޑު ރިޔާސީ އިންތިޚާބުގައިވެސް ކެމްޕެއިންގައި ފާހަގަކުރި، ވަޢުދުވެފައި ހުރި ކަންކަން، މި އަންނަ އަހަރުގެ ތެރޭގައި ހިނގާނެ.
އެގޮތުން އަޅުގަނޑު އެންމެ މުހިންމު ކަމަކަށް މަސްވެރިކަމުގެ މިހާ މުހިންމު ރަށަކަށްވާއިރުގައި ބަނދަރުގެ ދަތިކަން، ބަނދަރު ބޮޑުކުރަންޖެހުމާއި، އަދި ބަނދަރުގެ މަރާމާތުތަކެއްވެސް ހުރުމާއެކު، އަޅުގަނޑު މިއަދުގެ މީޓިންގގައި، ކައުންސިލްގެ ބައްދަލުވުމުގައި ދެންނެވިން، ކައުންސިލާއި މިނިސްޓްރީއާ އެކީގައި މަޝްވަރާ ކުރައްވައިގެން މެދު އަދި ދުރުރާސްތާއަށްވެސް އެކަށީގެންވާ ކަހަލަ ޑިޒައިނެއް ހައްދަވަން. އެއީ، ކުޑަކުޑަ ބަދަލެއް އަނެއްކާވެސް ގެނެސްގެން، މާގިނަ ދުވަހަކަށް ފުދޭވަރެއް ނުވާނެ. ބޭރު ތޮށްޓަށް ގެންނަ ބަދަލެއް، ނޫނީވިއްޔާ އެހެން ކުޑަ ބަދަލަކަށްވުރެ، ތަންކޮޅެއް ފުޅާމިނެއްގައި ބޮޑަށް ވިސްނަވާވަޑައިގެން، ރަނގަޅު ބަނދަރެއް މި ރަށުގެ އިޤްތިޞާދު ކުރިއެރުވުމަށްޓަކައި އެގޮތަށް ޑިޒައިން ހައްދަވައި ނިންމެވީމާ، ދެން އަޅުގަނޑުމެން އިރާދަކުރެއްވިއްޔާ ސަރުކާރުގެ ޕީ.އެސް.އައި.ޕީ. މަޝްރޫޢުތަކުގެ ތެރޭގައި، ތަރުތީބުކޮށްގެން މި ރަށަށް އިސްކަންދީގެން، އިރާދަކުރެއްވިއްޔާ ވަރަށް އަވަހަށް، މި އަންނަ އަހަރުގެ ތެރޭގައި ޢަމަލީގޮތުން، މި ދެންނެވި ގޮތަށް ތިޔަބޭފުޅުން އެކަން ކޮށް ނިންމެވީމަ، އަޅުގަނޑުމެން މި ރަށުގެ ބަނދަރުގެ މަސައްކަތް، އަޅުގަނޑު ވަޢުދުވީ ގޮތަށް ހަދައިދޭނަން. އަޅުގަނޑު ވަޢުދުވީ، ރަށުގެ ރައްޔިތުން އެދިވަޑައިގަންނަވާ ގޮތަށް ބަނދަރު ހަދައިދޭނެ ކަމަށް. އެހެންވީމާ، އެ ވަޢުދު ފުއްދުމުގެ ޢަމަލީ މަސައްކަތް އިރާދަކުރެއްވިއްޔާ މި އަންނަ އަހަރު ފަށާނަން. އެ ޔަގީންކަން ދެން.
ޞިއްޙީ މަރުކަޒުގެ ހާލަތު. ޞިއްޙީ މަރުކަޒުގެ ފެންވަރު ހުރިހާ ގޮތަކުން ފެންވަރު ރަނގަޅު ކުރުމަކީވެސް، އަޅުގަނޑު ވީ ވަޢުދެއް. އެ ވަޢުދާއި އަދި ސްކޫލް ބޮޑުކޮށް، ސްކޫލްގެ ޖާގަ އިތުރުކުރުމަށްވެސް ވަޢުދުވިން. މި ހުރިހާ ކަމެއް އެއީ، ޑޮކިއުމެންޓް ކުރެވިފައި، އަޅުގަނޑުމެން ކުރިއަށް ގެންދަން ނިންމާފައި ހުރި ކަންކަން. އެ ކަންތައްވެސް މި އަންނަ އަހަރުގެ ޕީ.އެސް.އައި.ޕީ.ގެ ނިއު ޕޮލިސީ އިނީޝިއޭޓިވް، ނޫނީވިއްޔާ އަލަށް ފަށާ މަޝްރޫޢުތަކުގެ ތެރޭގައި، އެންމެ އިސްކަން މިދެނީ ގެދޮރު ބިނާކުރުމަށް. ދެން ތަޢުލީމީ ދާއިރާގެ މަޝްރޫޢުތައް ކުރިއަށް ގެންދިޔުމަށާއި، ޞިއްޙީ ދާއިރާގެ މަޝްރޫޢުތައް ކުރިއަށް ގެންދަން. އެހެންވީމާ، މި ރަށުގައިވެސް ޞިއްޙީ ދާއިރާއިން އަދި ތަޢުލީމީ ދާއިރާއިން މުހިންމު މަސައްކަތްތަކެއް ކުރަން އެބައޮތް ޖެހިފައި. އެހެންވީމާ، މި ދެންނެވި ދެ މަޝްރޫޢުވެސް އިރާދަކުރެއްވިއްޔާ މި އަންނަ އަހަރު ހިނގާނެ. އަދި އިރާދަކުރެއްވިއްޔާ ބަލާނީ ޢަމަލީގޮތުން ނިންމުމަކާ ހަމައަށްވެސް ގެންދަން.
އެހެންވީމާ، އެ ދެ މަޝްރޫޢުވެސް އިރާދަކުރެއްވިއްޔާ ކުރިއަށް ގެންދާނަން. އަދި އެއާއެކީގައި، އައިސް ޕްލާންޓް އަޅުގަނޑު ވަޢުދުވިން، އައިސް ޕްލާންޓްގެ ކެޕޭސިޓީ ތިޔަބޭފުޅުން އެދިވަޑައިގަންނަވާ ގޮތަށް މިހާރަށްވުރެ ބޮޑުކޮށްދޭން. ކޮންމެގޮތެއްވިޔަސް އެހެރީ މިހާރު ވަކި ކެޕޭސިޓީއަކަށް ހެދިފައި. އަޅުގަނޑު ދަންނަވާލަން ބޭނުންވަނީ، އިރާދަކުރެއްވިއްޔާ ވީ ވަޢުދެއްވިއްޔާ އަޅުގަނޑު ފުއްދާނަމޭ. އެހެން ނަމަވެސް، މި އަންނަ އަހަރަށް އެހެންނަމަވެސް އަޅުގަނޑުމެން ބޮޑަށް އިސްކަން މިދެނީ، މިވަރަށްވެސް އައިސް ޕްލާންޓް ނެތް ތަންތާނގައި ފުރަތަމަ އައިސްޕްލާންޓް ހެދޭތޯ. އެކަމަށް މިހާރު ބޭރުގެ ބައެއް ފަންޑިންގއާއި އަދި ސަރުކާރުގެ ބަޖެޓުން މި އަންނަ އަހަރަށް ތާވަލުކޮށްފައި އެވަނީ. އެހެންނަމަވެސް، ވަޢުދު ފުއްދާނަން.
އެހެންވީމާ، މި ދައުރުގެ ތެރޭގައި، މާލަސްތަކެއް ނުވެ، އަޅުގަނޑު ވަޢުދުވީ ގޮތަށް، ދެގުނައަށް، ތިޔަބޭފުޅުން ބޭނުންފުޅުވާ ގޮތަށް އައިސް ޕްލާންޓްވެސް ބޮޑުކުރުން އެއީ، އަޅުގަނޑު ކުރާނެކަމެއް. އެކަމުގައި ތިޔަބޭފުޅުންނަށް އަޅުގަނޑު ކޮމްފަރޓް ދެން. ޔަގީންކަން ދެން. އަދި ދެންހުރި ދާއިރާތަކުންވެސް، ކުޅިވަރުގެ ދާއިރާތަކުންވެސް އެބަހުރި ވަރަށް ގިނަ މަޝްރޫޢުތައް ކުރިއަށް ގެންދަންވެފައި. އަދި ކުނި މެނޭޖް ކުރުމުގެ ދާއިރާއިންވެސް.
އާދެ، އެހެންވީމާ، މިހިރަ ހުރިހާ ކަންކަމުގައި އަޅުގަނޑުމެން އެއްވެސް ފަރުވާކުޑަކުރުމެއްނެތި، ސަމާލުކަންދީގެން ކުރިއަށް ގެންދިޔުމަކީ، އެއީ އަޅުގަނޑު ކުރާނެ ކަމެއްކަން، އަޅުގަނޑުމެންގެ މަސައްކަތުގައި އޮތްގޮތްކަން، އަޅުގަނޑު ޖުމްލަގޮތެއްގައި ކޮންމެ ރަށެއްގައިވެސް މިދޭ ޔަގީންކަމަކީ. އެއީ، މި ނިމިގެންދިޔަ އަހަރު ދުވަހުގެ ތެރޭގައި، އަޅުގަނޑުމެން ވަރަށް އުނދަގުލުގައި މި ދެންނެވީ، ބަޖެޓު އޮތްގޮތުން، ވަރަށް އުނދަގުލުން މަޝްރޫޢުތަކެއް ނިންމިން ކޮންމެވެސްވަރަކަށް. ބައެއް ރަށްރަށުގައި ހުންނާނެ ނިމިފައި. އެހެންނަމަވެސް، ގިނަ ކަންތައްތައް އެހެރީ އަދި އަޅުގަނޑުމެން ބޭނުންވާ ކަހަލަ ގޮތަކަށް ނުކުރެވި. އެހެންވީމާ، މި ފެށޭ އަހަރަކީ، އިރާދަކުރެއްވިއްޔާ އެކަން ބަދަލުވެ، ޢަމަލީގޮތުން ކަންކަން ނިންމޭނެ އަހަރަކަށް ވާނެ.
އާދެ، އަދި ހަމަ އެއާއެކީގައި، އަޅުގަނޑު ފާހަގަކޮށްލަން ބޭނުން، މަސްވެރި ރަށަކަށްވާތީއާ އެކީގައި ބައެއް ކަންކަން. އާދެ، މަސްވެރިކަމަކީ، ރާއްޖޭގެ އިޤްތިޞާދުގެ އެންމެ މުހިންމު އެއް ޞިނާޢަތު. އަޅުގަނޑުމެން ދިވެހިންނަށްވީތީ، ދިވެހިންކަމުގެ ފަޚުރުވެރި ޞިނާޢަތަކީ ޒަމާނުއްސުރެ ހިސްޓޯރިކަލީ މަސްވެރިކަން. އެހެންވީމާ، މި ސަރުކާރުން ވަރަށް އިސްކަމެއް ދޭ ކަމެއް، މި ޞިނާޢަތަށް ކުރިއެރުން ގެނެސްދިނުން. މަސްވެރިންގެ އަޑުއަހައިގެން ކަންތައްތައް ރަނގަޅުކުރަން މަސައްކަތް ކުރުން. ތެދެއް، އަޅުގަނޑު އެކަން ހާމަވެސް ކުރަމުން މިއައީ.
އަޅުގަނޑުމެންނާ ހަވާލުވިއިރުގައި ވަރަށް ހާލުގައި މި އިންޑަސްޓްރީ އޮތީ. އެތައް ސަތޭކަ މިލިއަނެއް ދޭންއޮތް. ދުއިސައްތަ ފަންސާހެއްހާ މިލިއަން ބެކްލޮގް އޮތް. އެ ފައިސާވެސް އަޅުގަނޑުމެން ދީ، އަދި ލަހުންވިޔަސް ފައިސާ ދީ، މިއަދާ ހަމައަށް މި އައިއިރުގައި އެއްހާސް މިލިއަނަށްވުރެ ގިނަ ރުފިޔާ، ތެލުގެ ސަބްސިޑީގެ އަގާ އެކީގައި ހިމަނައިގެން، ލަހުންވިޔަސް ދެވިފައި މިވަނީ. ދީފިން. އެކަމަކު އެއީއެއް ނޫން އަޅުގަނޑު ވަޢުދުވީ ގޮތަކީއެއް. އަޅުގަނޑު ދެންނެވިން، އަޅުގަނޑުގެ ވަޢުދަކީ، އިރާދަކުރެއްވިއްޔާ ދެ ދުވަސް. 48 ގަޑިއިރުގެ ތެރޭގައި ފައިސާ ދިނުމޭ. އެހެންނަމަވެސް، އަޅުގަނޑުމެންނާ ހަވާލުވިއިރު އޮތް ހާލަތުން، ވެރިކަން ފެށިގެން ދެވަނަ ދުވަހު އެކަން ކުރުމަކީ ކުރެވޭނެ ކަމަކަށް ނުވާނެ. މާނައަކީ، ވަގުތުތަކެއް ނަގައޭ އެ ހިސާބަށް ދާން. އަޅުގަނޑުމެން ފުރަތަމަ ކުރަންޖެހުނީ މިފްކޯ އޮތް ހާލަތުން އެތަން ރިފޯރމް ކުރުމަށްޓަކައިވެސް މަސައްކަތްތަކެއް ކުރަން. ވަރަށް ގިނަ މަސައްކަތް ކުރަން އަދިވެސްޖެހޭ. އިދާރީގޮތުންވެސް ތަނުގެ ތަރުތީބުތައް އޮތީ ރަނގަޅަކަށް ނޫން.
އެހެންވީމާ، އެކަހަލަ ވަރަށްގިނަ ކަންކަން ކުރުމާ އެކީގައި، މި އިންޑަސްޓްރީ ކުރިއެރުމަށްޓަކައި ހަމައަކަށް އަޅުވަން އަޅުގަނޑުމެން ވަރަށް ފަރުވާތެރިކަމާއެކީ މިއަދާ ހަމައަށް މިއައީ. އެހެންވީމާ، އެއީ ޙަޤީޤަތުގައި، މިއަދާ ހަމައަށް އައުމުގައި އަޅުގަނޑުމެންނަށް ފައިސާދެވުނު ނަމަވެސް، އަޅުގަނޑު ވީ ވަޢުދު ފުއްދުމުގެ ޢަމަލީ މަސައްކަތް އަދި ނުފެށި އޮތް ސަބަބަކީ. ފިޝަރީޒް މިނިސްޓަރ މިތާ އެބަ އިންނެވި. އަދި އިންޑަސްޓްރީގެ އިސް ބޭފުޅުން މިނިސްޓަރާ ގުޅިވަޑައިގެން އަޅުގަނޑުމެން ސަރުކާރުން މި ގެންދަނީ، ވީހާވެސް ރަނގަޅަކަށް މި ކަންކަން ކުރެވޭތޯ. އާދެ، މިގޮތުން ހުރި ޗެލެންޖަސްތައް ވަރަށް ގިނަ. އެހެންނަމަވެސް، އަޅުގަނޑުމެން މި އިންޑަސްޓްރީ ނަގައި ކޮޅަށްޖަހައި، ފުޅާކުރުމަށްޓަކައި ޕްލޭންތައް މިހިރީ ތިޔަބޭފުޅުންގެ އަޑުއަހައިގެން ކުރިއަށްގެންދަން ނިންމާފައި.
އާދެ، އަޅުގަނޑު ދަންނަވާލަން ބޭނުން، ވަރަށް ގިނަ މަސައްކަތްތައް މިގޮތުން ކުރެވިފައި ހުރުމާ އެކީގައި، މިއަދުގެ ހާލަތު. މިއަދު މިވަގުތުގެ ހާލަތު. މިއަދު އެންމެފަހުން މިދިޔަ 14 ދުވަހުގެ ތެރޭގައި ގާތްގަނޑަކަށް 38 މިލިއަން ރުފިޔާގެ ފައިސާ، ޕެންޑިންގގައި ހުރި މަސްވެރިންނަށް ދޭން. އެ 38 މިލިއަން ރުފިޔާ، މިއަދު ދާދި ދެންމެއަކު ވަނީ، މަސްވެރިންގެ އޮޑިވެރިންނަށް ޖަމާކޮށްދެވިފައި. އެއީ، ބީ.އެމް.އެލް.ގައި އެކައުންޓް ހުރި 196 ބޭފުޅަކަށް، 32.4 މިލިއަން ރުފިޔާ. އަދި އެމް.އައި.ބީ.ގައި އެކައުންޓް ހުރި 20 އޮޑިވެރިއަކަށް، 5.6 މިލިއަން. 38 މިލިއަން ރުފިޔާ އެއީ، މިހާތަނަށް މިދިޔަ ދެ ހަފްތާގެ ތެރޭގައި ދޭންހުރި ފައިސާ.
އެހެންވީމާ، ބެކްލޮގް ނިމުނީ. އިރާދަކުރެއްވިއްޔާ ދެނެއް ބެކްލޮގެއް ނާންނާނެ. އަޅުގަނޑުމެން ވަރަށް ގިނަ ދުވަހުގެ މަސައްކަތުން، އިއްޔެ ވާނީ، ވަރަށް މުހިންމު އެރޭންޖްމަންޓެއް ހަދާފައި. އެގްރިމެންޓެއް ހަދާފައި. އެއީ، ފިނޭންސް މިނިސްޓްރީއާއި، މިފްކޯއާއި، ބޭންކް އޮފް މޯލްޑިވްސްއާއި، ތިންބައި މީހުންގެ އެގްރިމެންޓެއްގައި އިއްޔެ ސޮއިކޮށްފައި. އިންތިޒާމުތަކެއް ހަމަޖައްސައިފިން. އެ އިންތިޒާމުތަކުގެ ނަތީޖާއަކީ، މާދަމާއިން ފެށިގެން، ބީ.އެމް.އެލް.ގައި އެކައުންޓެއް އޮވެއްޖެނަމަ، ކޮންމެ މަސްދޯންޏަކަށް، އެ ދޯންޏަކުން މަސްކިރާތާ 48 ގަޑިއިރުގެ ތެރޭގައި ފައިސާ ޖަމާކޮށްދިނުން.
އެހެންވީމާ، އިރާދަކުރެއްވިއްޔާ މާދަމާއިން ފެށިގެން، މަސްވެރިންނަށް އަޅުގަނޑުވީ ވަޢުދު ފުއްދެމުންދާނެ. ބީ.އެމް.އެލް.ގައި އެކައުންޓް އޮތް މަސްދޯންޏަކަށްވިއްޔާ، އެ ދޯންޏަކުން މަސްކިރާތާ، 48 ގަޑިއިރުގެ ތެރޭގައި، އެ ދޯނީގެ އެކައުންޓަށް ފައިސާ ޖަމާވަމުންދާނެ، މާދަމާއިން ފެށިގެން އިރާދަކުރެއްވިއްޔާ 48 ގަޑިއިރުގެ ތެރޭގައި. ދެން އެމް.އައި.ބީ.ގައި އެކައުންޓް ހުރި ފަރާތްތަކަށް އަދި އިތުރު ގޮތްތަކެއް ހޯދަންޖެހޭ.
އެހެންވީމާ، އެކަންތައް އިރާދަކުރެއްވިއްޔާ، އެ ހަމަޖެހިގެން ދިޔައީ. މިކަމުގައި ބީ.އެމް.އެލް.ގެ ފަރާތުން ދެއްވި އެއްބާރުލުން އަޅުގަނޑު ވަރަށް ބޮޑަށް ފާހަގަކުރަން. ބޭންކް އޮފް މޯލްޑިވްސްއިން، ރައްޔިތުންގެ ބޭންކެއްކަން ޙަޤީޤަތުގައިވެސް، ޙަޤީޤީ މާނައިގައި ސާބިތުކޮށްދެމުން އެ ވަޑައިގަންނަވަނީ.
ހަމައެއާއެކީގައި، ތެޔޮ ލިބުމުގައިވެސް އެބަހުރި ދަތިތަކެއް. އަޅުގަނޑުމެން ވާނީ މިދިޔަ ނޮވެންބަރު މަހުގެ ކުރީކޮޅު ޕްރޮގްރާމެއް އިޢުލާނުކޮށްފައި. އެސް.ޓީ.އޯ. ރޭޓުގައި ތެޔޮ ލިބޭނެ އިންތިޒާމު، އަތޮޅުތެރެއިން ކޮންމެވެސް އެއްތަނެއްގައި، ކޮންމެ އަތޮޅެއްގައިވެސް ގާއިމުކުރުމުގެ ވަޢުދު ފުއްދުމުގެ ޕްރޮގްރާމް. އެއީ، އަޅުގަނޑުގެ ވަޢުދެއް. އެހެންނަމަވެސް، އެ ވަޢުދަކީ އެ ދުވަހު އެ އިޢުލާނުކުރި ގޮތަށް މި އަންނަ އަހަރުގެ ތެރެއަށް ބަހާލެވިގެން، ކޮންމެ މަހަކުވެސް ކޮންމެވެސް އަތޮޅެއްގައި އެސް.ޓީ.އޯ.ގެ ސްޓޭޝަން ހެދި، އެ ތަނުން ޚިދުމަތްދޭން ފެށޭނީ. އެހެންވީމާ، އެގޮތަށްގޮސް 2025 ނިމޭއިރުގައި، ވަޢުދުވީ ގޮތަށް، މުޅި ރާއްޖޭގައި، ކޮންމެ އަތޮޅެއްގައި އެސް.ޓީ.އޯ. ރޭޓުގައި ތެޔޮ ލިބޭނެ.
އެހެންނަމަވެސް، އިތުރު މަސައްކަތްތަކެއް އަޅުގަނޑުމެން ހަމައެއާއެކީގައިވެސް މިއައީ ކުރަމުން. އެގޮތުން މާދަމާއިން ފެށިގެން، އެސް.ޓީ.އޯ.ގެ ނުވަތަ ފިއުލް ސަޕްލައި މޯލްޑިވްސް، އެފް.އެސް.އެމް.ގެ ސައިޓްތަކުން، މި ދަންނަވާ ހަތަރު ސައިޓުން އެސް.ޓީ.އޯ. ރޭޓުގައި މަސްވެރިންނަށް ތެޔޮ ލިބޭނެ، މި ދަންނަވާ ތާވަލުގެ ކުރިންވެސް. މާދަމާއިން ފެށިގެން ހިންމަފުށި، ކޫއްޑޫ، ފެލިވަރު އަދި އައްޑޫސިޓީ ހުޅުމީދޫ. މި ހަތަރު ރަށުން އެސް.ޓީ.އޯ. ނޫނީ ފިއުލް ސަޕްލައި މޯލްޑިވްސްގެ ސައިޓްތަކުން، މާދަމާއިން ފެށިގެން، އެސް.ޓީ.އޯ. ރޭޓުގައި ތެޔޮ ލިބޭނެ މަސްވެރިންނަށް.
އަދި އޭގެ އިތުރަށްވެސް، ކޫއްޑޫއާއި ފެލިވަރުގައި ހުރި މިފްކޯގެ ވެސެލްސްތަކުންވެސް އެސް.ޓީ.އޯ. ރޭޓުގައި ތެޔޮ ވިއްކުމުގެ އިންތިޒާމު ހަމަޖެއްސުމަށް އެސް.ޓީ.އޯ.އިން ދަނީ މަސައްކަތްތައް ކުރަމުންކަން އަޅުގަނޑު ދަންނަވާލަން ބޭނުން. އެކަންވެސް ކާމިޔާބު ވެއްޖެނަމަ، އިރާދަކުރެއްވިއްޔާ މިފްކޯގެ ވެސަލްސްތަކުންވެސް ކޫއްޑޫއާއި ފެލިވަރުގައި، އެސް.ޓީ.އޯ. ރޭޓުގައި ތެޔޮ ލިބޭނެ. އަދި އޭގެ އިތުރަށްވެސް، އަޅުގަނޑުމެން މި ބަލަނީ، އެކި ސަރަޙައްދުތަކުގައި މި ކަނޑައެޅިފައިވާ ޕްލޭންގެ ތެރެއިންވެސް ބައެއް ބަދަލުތައް ގެނެސް، ސްޓްރެޓިޖިކަލީ އިސްކަންދޭންވާ ތަންތަނަށް ވިސްނައިގެން، މިސާލަކަށް، ހުވަދުއަތޮޅުން މާލެއަށް ދަތުރުކުރުމުގައި، މެދުތެރެއިން މ. އަތޮޅާ ހިސާބުން، އަދި އުތުރުގައިވެސް އެގޮތަށް ޑިސްޓެންސް ބަލައިގެން ދެބައިކުޅައެއްބައި ހިސާބުން އެސް.ޓީ.އޯ. ރޭޓުގައި ތެޔޮ ލިބުން އަވަސްކުރަން. އެހެންވީމާ، މިކަހަލަ މަސައްކަތްތަކެއްވެސް ކުރަން އެބަ. ދާދިފަހުން، އަޅުގަނޑާ ކެޔޮޅުންވެސް ބައްދަލުކުރެއްވި. އާދެ، އަޅުގަނޑުމެން މަސައްކަތް މި ކުރަނީ، މަސްވެރިންގެ އަޑުއަހައިގެން، މަސްވެރިން އެދިވަޑައިގަންނަވާ ގޮތަށް ކަންތައްތައް ކުރެވޭތޯ.
އާދެ، އަޅުގަނޑު ވީ އަނެއް ވަޢުދު، މަސްވެރިންގެ ދަފްތަރެއް ހެދުން. އާދެ، މިއީ ވަރަށް މުހިންމު މަޤްޞަދެއްގައި ކުރާ ކަމެއް. މަސްވެރިންނަށް ވަރަށް ބޮޑު ކަންބޮޑުވުމަކަށް ވަނީ، އެހެން ވަޒީފާތައް އަދާކުރާ މީހުންނަށް އެ އޮންނަ ފުރުޞަތުތައް ނުލިބޭތީ ބޭންކްތަކުން. ވަޒީފާއެއްގެ ގޮތުގައި، އެ އާމްދަނީ ޑިކްލެއަރކޮށްގެން، އޭގެ ފައިދާ ހޯދުމުގެ ފުރުޞަތެއް ނޯވޭ. އެހެންވީމާ، އަޅުގަނޑު ވަޢުދުވީ، ދަފްތަރެއް ގާއިމުކޮށް، އެއީ ޤާނޫނީ ބާރުވެރިކަން އޮތް ދަފްތަރަކަށް ހަދައި، އޭގައި ރަޖިސްޓްރީވާ މަސްވެރިންނަށް ބޭންކްތަކުން ލޯނު ހޯދުމާއި، ފެސިލިޓީތައް ހޯދުމުގެ ފުރުޞަތު ދޭން.
އެހެންވީމާ، މި މަސައްކަތް އަޅުގަނޑުމެން އަހަރުގެ ކުރީކޮޅު ފަށައި، މިއަދާ ހަމައަށް އައިއިރު މިކަމުގައި ވަރަށް ގިނަ މަސްވެރިން ބައިވެރިވެއްޖެ. އަދި ހަމަ ކުރިއަށްދާނެ. ހުޅުވާލެވިފައި އެއޮތީ. ދެން މިކަމަކީ ޤާނޫނުގައި ފުރުޞަތު އޮތް ކަމެއް. ގަވާއިދެއް ހަދަންޖެހޭ. މިހާރު ގަވާއިދުވެސް ހަދައި ނިމި، މި ހަފްތާ ނިމުމުގެ ކުރިން، ބުރާސްފަތި ދުވަހު އިރާދަކުރެއްވިއްޔާ، މަސްވެރިންގެ ދަފްތަރާ ބެހޭ ގަވާއިދު ގެޒެޓް ކުރެވޭނެ. މިހާރު މި ދަފްތަރަށް ރެކޮގްނައިޒް ކުރުމުގެ މަސައްކަތްވެސް މިނިސްޓްރީން ބޭންކްތަކާ ގުޅިގެން ކުރިއަށް އެބަގެންދޭ. ދަފްތަރާބެހޭ ގަވާއިދު ރަޖިސްޓްރީވީމާ، ބޭންކް އޮފް މޯލްޑިވްސްވެސް ރެޑީގައި އޮތީ. ބޭންކް އޮފް މޯލްޑިވްސްގެ އެކި ކަހަލަ ފެސިލިޓީތަކަށް މަސްވެރިންނަށް ފުރުޞަތު ހުޅުވައިލަން. އެމް.އައި.ބީ.އާ އެކީގައިވެސް މަސައްކަތް އެބަ ކުރެވޭ. އެމް.އައި.ބީ.އިންވެސް ފެސިލިޓީތައް މަސްވެރިންނަށް ހޯދުމުގެ ފުރުޞަތު ލިބޭނެ، މި ދަފްތަރުގައި ރަޖިސްޓްރީވެގެން. އަދި އެސް.ޓީ.އޯ.އިންވެސް، އެސް.ޓީ.އޯ.ގެ އެކި ކަހަލަ ސްކީމްތަކުންވެސް ފުރުޞަތު ލިބިގެންދޭ މަސްވެރިންނަށް، މި ދަފްތަރުގައި ރަޖިސްޓްރީވީމަ. އެހެންވީމާ، މި ބުރާސްފަތި ދުވަހުން ފެށިގެން އިރާދަކުރެއްވިއްޔާ، މަސްވެރިންގެ ދަފްތަރާބެހޭ ގަވާއިދު ގެޒެޓް ކުރެވުނީމާ، ބޭންކް އޮފް މޯލްޑިވްސްއާއި، އެމް.އައި.ބީ.އިންނާއި، އެސް.ޓީ.އޯ.އިން މަސްވެރިންނަށް، އެހެން ވަޒީފާތަކުގައި އުޅޭ މީހުންނަށް އޮތް ފުރުޞަތުތައް ފަހިވެގެންދާނެ.
އާދެ، މަސްވެރިން އެދޭ މިކަހަލަ ގިނަ ކަންތައްތަކެއް އިރާދަކުރެއްވީތީ އަޅުގަނޑުމެން ހައްލުކޮށްދެމުން މިގެންދަނީ. މަސްވެރިކަމުގެ އިންޑަސްޓްރީއަށް ކުރިއެރުން ހޯދައިދިނުމަށް. ދާދިފަހުން އާރު.އެސް.ޑަބްލިޔޫ. ގާއިމުކުރުމަށް، ދޯނީގައި އައިސްކުރެވޭނެ ފެސިލިޓީ ގާއިމުކޮށްގެން، މަސްވެރިކަން ކުރިއަށް ގެންދިޔުމުގެ ފުރުޞަތުވެސް، ލޯނު ފެސިލިޓީވެސް އެވަނީ، ވަރަށް ގިނަ މަސްވެރިން ނަންގަވާފައި. އަދި ކުރިއަށް އޮތް އަހަރު އިރާދަކުރެއްވިއްޔާ، އެސް.ޑީ.އެފް.ސީ.ގެ ތެރެއިން އަދި އިތުރު އެތައް ބަޔަކަށް އެ ފުރުޞަތު ދޭނަން. ހަމައެކަނި ގާއިމުކުރެވިފައި، މިހެން ރަށްރަށުގައި ހުންނަ އައިސް ޕްލާންޓްތަކުގެ އިތުރަށް، ދޯނީގައިވެސް އަމިއްލަ ކެޕޭސިޓީ ގާއިމުކޮށްގެން ކުރިއަށް ގެންދިޔުން އެއީ، އަޅުގަނޑުމެން ވަރަށް ބޮޑަށް އިސްކަންދޭނެ ކަމެއް. މަސްވެރިކަމުގެ އިންޑަސްޓްރީ އިތުރަށް ފުޅާކުރުމުގައި. އަދި މިހާރު މި ގާއިމުކުރެވޭ އައިސް ޕްލާންޓްތައް، ކޮންމެހެން ސަރުކާރުން ހިންގުމުގެ ބަދަލުގައި، އެ ރަށެއްގެ މަސްވެރިން ބޭނުންވެލައްވާނަމަ، ކައުންސިލާ ހަވާލުކޮށްގެން، އައިސް ޕްލާންޓްތައް ހިންގުމަކީވެސް ސަރުކާރުން ވަރަށް ބޭނުން ކަމެއް. އަޅުގަނޑުމެން ބޭނުންވަނީ ވީވަރަކުން ލާމަރުކަޒީ ކުރަން.
އެ ރަށެއްގެ މަސްވެރިން ނިންމަވާނީ، އެ ރަށެއްގެ އައިސް ޕްލާންޓް ހިންގާނީ މިފްކޯއިންތޯ، ސަރުކާރުގެ އެހެން ކުންފުންޏަކުންތޯ، ނޫނީވިއްޔާ ކައުންސިލުންތޯ. އެހެންވީމާ، އެ ރަށެއްގެ މަސްވެރިންނަށް އަޅުގަނޑު ދޫކޮށްލާނަން އެ ކަންތައް. ކައުންސިލާ ހަވާލުކޮށްގެންވެސް ކުރިއަށް ގެންދެވޭނެ. އެއީވެސް އަޅުގަނޑުމެންގެ ސިޔާސަތުގެ ތެރޭގައި ކަނޑައަޅާފައި އޮތް ކަމެއް.
އާދެ، މިފަދަ އެތައް ކަމެއް، އިރާދަކުރެއްވީތީ އަޅުގަނޑުމެން ކެޕޭސިޓީ އިތުރުކުރަން، ސްޓޯރޭޖް ކެޕޭސިޓީ އިތުރުކުރުމަށްވެސް ފެށިފައި ވަނީ. އަޅުގަނޑު ވަޢުދުވީ، ކޯލްޑް ސްޓޯރޭޖް ކެޕޭސިޓީ މި ދައުރުގައި ދެގުނަކުރަން. އިރާދަކުރެއްވިއްޔާ އެކަމުގެ އިންވެސްޓްމަންޓްތަކާއި، އަދި އެކަމަށް ފަންޑިންގވެސް ހަމަޖެހިގެން، އަޅުގަނޑުމެން ތާވަލުކުރި ގޮތަށް، މި އަންނަ އަހަރުގެ ތެރޭގައި މަސައްކަތްތައް ފެށިގެންދާނެ. އަދި ހަމައެއާއެކީގައި، މި ދެންނެވިހެން އައިސް ޕްލާންޓްތަކާއި، އަދި ޕްރޮސެސިންގ ކޭނިންގ ފެސިލިޓީތައްވެސް ގާއިމުކުރަން ވަޢުދުވީގޮތަށް، އެ ކޭނިންގ ޕްރޮސެސިންގ މަސައްކަތްތައްވެސް، އެ ކެޕޭސިޓީ ބޮޑުކުރުމުގެ މަސައްކަތްވެސް ހިނގާނެ.
ހަމައެއާއެކީގައި، މި އިންޑަސްޓްރީ ފުޅާކުރުމަށް، ޑައިވަރސިފައި ކުރުމަށްވެސް ވަރަށް ގިނަ ކަންކަން އެބަ ކުރެވޭ. އެހެންވީމާ، އަޅުގަނޑުމެންގެ މެނިފެސްޓޯގައި ކަނޑައަޅާފައިވާ ގޮތަށް، އަދި ވަޢުދުވެފައިވާ ގޮތަށް، މަސްވެރިންގެ އަޑުއަހައިގެން، އަޅުގަނޑުމެން މި އިންޑަސްޓްރީ މަސްވެރިން އެދޭ ހިސާބަށް، އަދި އެއަށްވުރެވެސް ދުރަށް އިރާދަކުރެއްވިއްޔާ ގެންގޮސްދޭނެ ކަމުގެ ޔަގީންކަން އަޅުގަނޑު އަރުވަން.
އަޅުގަނޑު ޔަގީންކުރަނީ، އިރާދަކުރެއްވިއްޔާ މަސްވެރިކަމުގެ އިންޑަސްޓްރީއަކީ، މި ރާއްޖޭގައި ވަރަށް ބޮޑަށް ފުޅާވެ، އަދި ޙަޤީޤަތުގައިވެސް އެންމެ ބޮޑު ކެޕޭސިޓީގައި، އަޅުގަނޑުމެންގެ އީ.އީ.ޒެޑް.ގެ ފުލް ބޭނުން އަޅުގަނޑުމެންނަށް ހިފޭ ފެންވަރަށް ގެންދެވިއްޖިއްޔާ، ޙަޤީޤަތުގައިވެސް އެންމެ ބޮޑު އާމްދަނީއެއް ރާއްޖެއަށް ލިބި، އެންމެ ބޮޑަށް ޖީ.ޑީ.ޕީ. އަށް ކޮންޓްރިބިއުޓް ކުރާނެ އިންޑަސްޓްރީއަކަށްވެސް ހެދޭނެ އިންޑަސްޓްރީއެއް. އެ ހިސާބަށް އިރާދަކުރެއްވިއްޔާ ގެންދެވޭނެ. އެކަމުގައި އަޅުގަނޑުމެން އެންމެން ގުޅިގެން މަސައްކަތްކުރުމަކީ، އަޅުގަނޑު ވަރަށް ބޮޑަށް އުންމީދުކުރާ ކަމެއް.
އާދެ، އަދިވެސް އެއްފަހަރު ގާފަރުގެ ލޮބުވެތި ރައްޔިތުންނަށް، ވަރަށް ބޮޑަށް ޝުކުރު ދަންނަވަން، މި ވަގުތުކޮޅު އަޅުގަނޑުމެންނާ އެކީގައި ވަޑައިގެން ތިޔަ ހޭދަކޮށްލެއްވި ކަމަށްޓަކައި. މި ރަށުގެ ރައްޔިތުންގެ ތަރައްޤީއަށް ކުރަންހުރި ކަންކަމުގައި، މި ދެންނެވިފަދައިން، މި އަންނަ އަހަރު ކުރިއަށްދާނެ ކަންކަން މި ދެންނެވީ. އަދި މުޅި ރާއްޖޭގެ ތަރައްޤީގައިވެސް އޮތީ ހަމަ އެ ސިޔާސަތު.
އާދެ، އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތުގައި މާތް اللهُ سُبْحَانَهُ وَتَعَالَى ބަރަކާތްލެއްވުން. އަޅުގަނޑުމެންގެ ޤައުމަށް އުފާފަގަތިކަން މިންވަރު ކުރައްވާށި! އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.