بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
މާފަންނު މަދަރުސާގެ ޕްރިންސިޕަލް، އަދި ކުރީގައި ޕްރިންސިޕަލްކަން ކުރެއްވި ހުރިހާ ބޭފުޅުން، އެންމެހައި ޓީޗަރުން، ލޮބުވެތި ދަރިވަރުން، ވަޑައިގެން ތިއްބެވި އެންމެހައި ޢިއްޒަތްތެރިން، ވަޒީރުން، އަދި ހުރިހާ ޖަލީސުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، ވަރަށްވެސް އުފާވެރި ޙަފްލާއެއް. މި ފަޚުރުވެރި ސްކޫލަށް 40 އަހަރު ވެގެން، އެކަން ފާހަގަކުރުމަށްޓަކައި މި ބޭއްވޭ ޙަފްލާގައި ބައިވެރިވުމަކީ، އަޅުގަނޑަށް ލިބޭ ވަރަށްބޮޑު އުފަލެއް.
އާދެ، ކަން ދިމާކުރި ގޮތުން، މާލޭގެ މޭޔަރަކަށް ހުރިއިރު، އަޅުގަނޑަށްވެސް މި ސްކޫލަށް ކޮންމެވެސްވަރަކަށް ކަންތައްތަކުގައި ޚިދުމަތް ކުރުމަށް ފުރުޞަތު ލިބިގެންދިޔައިމަ، ދެންމެގައި ޕްރިންސިޕަލް އެ ފާހަގަކުރެއްވި ފަދައިން، މި ސްކޫލްގައި އޭރުގައި ކަންތައްތައް ހުރިގޮތް ވަނީ އެނގިފައި.
އާދެ، އެގޮތުން، އެކަންކަން އެނގިފައިވާތީ، އަޅުގަނޑު ހަމަ އަވަސްވެގަންނާނީ، އަދި ތުއްތު ލޮބުވެތި ދަރިވަރުން މިތަނުގައި މި ސްކޫލަށް ދަތިވެފައިވާ ކަންކަން ފާހަގަކޮށް، އެހާ ޝައުޤުވެރިކަމާއެކީ އެކަންކަން ފާހަގަކޮށްދިނީތީއާ އެކީގައި، ފުރަތަމަވެސް އަޅުގަނޑު ބޭނުންވަނީ ޔަޤީންކަންދޭން، އިރާދަކުރެއްވިއްޔާ މި އަންނަ އަހަރު މި ސްކޫލްގައި ތިޔަ ލޮބުވެތި ތުއްތު ކުދިންގެ މާމައިންނާއި ކާފައިންނަށް ފަސޭހައިން ވަދެވޭގޮތަށް ބިންމަތީގައި ހުންނަ ހޯލެއް ހަދައިދޭނެ ކަމުގެ ޔަޤީންކަން.
އާދެ، 40 އަހަރު ދުވަހަކީ، ޖީލެއް ބިނާކުރުމުގައި ވަރަށްގިނަ ދުވަސްތަކެއް. އެހެން ނަމަވެސް، ފަޚުރުވެރި އެތައް ދަރިވަރުންތަކެއް އުފައްދާފައިވާ ސްކޫލެއް މި ސްކޫލަކީ. އެކިއެކި ދާއިރާތަކުން ޤައުމަށް ޚިދުމަތްކުރުމުގައި މިހާރު އެ ގެންދަވަނީ މި ސްކޫލުން ދަރިވަރުވެފައިވާ އެތައް ބޭފުޅުންނެއް ޚިދުމަތް ކުރައްވަމުން. މިތަނުގައި މިއަދު މި ތިއްބެވި ލޮބުވެތި ތުއްތުކުދިންނަކީ، ހަމަ އެގޮތަށް ކުރިއަށް އޮތް ތަނުގައި، މި ސްކޫލްގެ މި ޚިދުމަތްތެރި، އެހާމެ ޒިންމާދާރުކަމާ އެކީގައި މަސައްކަތް ކުރަމުންދާ ޓީޗަރުންގެ ވަރަށް ހިންމަތާއެކީގައި ހަމަ ޔަޤީނުންވެސް އެފަދަ ޚިދުމަތްތެރިންނަށް ވާނެ ދަރިވަރުން.
އާދެ، އަޅުގަނޑު ހަމަ ދޭނެ ޔަޤީންކަމަކީ، މާފަންނު މަދަރުސާގެ ކުރިއެރުމަށްޓަކައި ކޮށްދޭން ހުރި އަދި ކޮށްދެވޭނެ ހުރިހާ ކަމެއް ސަރުކާރުން އިރާދަކުރެއްވިއްޔާ ކޮށްދޭނެ ކަމުގެ ޔަޤީންކަން.
އާދެ، ކޮމިއުނިޓީ ސްކޫލްތަކަކީ ވަރަށް މުހިންމު ތަންތަން. ކޮމިއުނިޓީ ކޮންސެޕްޓްގައި ސްކޫލްތައް ހިންގުމަށްޓަކައި ލާމަރުކަޒީ ނިޒާމުގެ ތެރެއިން ކައުންސިލާ ހަވާލުކުރެވިފައި އެވަނީ. އާދެ، އެހެންވީމާ، ސަރުކާރުން ފުރިހަމަ އެއްބާރުލުންދީ، އަދި ސަރުކާރުން މި ފުލް ކޮންސެޕްޓްގައި ސްކޫލް ހިންގުމުގައި، ކުރިއަށް އޮތް ތަނުގައި ދެވޭނެ ފުރިހަމަ އެއްބާރުލުން ދީގެން، މިހާރަށްވުރެ ރަނގަޅަށް ކަންތައްތައް ގެންދިޔުމަކީ، މާލޭގައި ދެންހުރި މިފަދަ ސްކޫލްތައްވެސް ޝާމިލްވާހެން އަޅުގަނޑުމެން ކަންކަން ކުރާނެގޮތް.
އާދެ، ސްކޫލުން ބޭނުންވާ އިތުރު ކަންކަމުގައިވެސް ސްކޫލްގެ ފަރާތުން ސަރުކާރުގައި، އެޑިޔުކޭޝަން މިނިސްޓްރީގައި އެދިވަޑައިގެންފައިވާނަމަ، އަދި އެދިވަޑައިގެންފިނަމަ، ކުރިއަށް އޮތް ތަނުގައި އެކަންކަން އަޅުގަނޑުމެން ކޮށްދޭނަން. ކައުންސިލުގެ ކިބައިންވެސް އަޅުގަނޑު އެދެން ބޭނުންވަނީ، ސްކޫލުން އެދޭ ކަންކަމުގައި ސަރުކާރާ ގުޅިގެން މަސައްކަތް ކުރަމުން ގެންދިޔުމަށް. ބެލެނިވެރިންނާއި ޓީޗަރުން އެދިވަޑައިގަންނަވާ ގޮތަށް ޕްރިންސިޕަލް ފާހަގަކުރައްވާފައިވާ ގޮތަށް، މި ސްކޫލްގެ ކުރިއެރުމަށްޓަކައި އިރާދަކުރެއްވިއްޔާ އަޅުގަނޑުމެން ކަންތައްތައް ކޮށްދޭނަން.
އާދެ، ޚާއްޞަގޮތެއްގައި ސެން ޓީޗަރުން ތަމްރީނު ކުރުމުގެ އާ ޕްރޮގްރާމެއް މިހާރުވެސް އެޑިޔުކޭޝަން މިނިސްޓްރީން ފެށުމުގެ މަރުޙަލާގައި އެދަނީ. އާ ކޮންސެޕްޓެއްގައި. އިންކްލޫސިވް ގޮތެއްގައި ހުރިހާ ޓީޗަރުންނަކީވެސް އެ ދާއިރާއިން ތަމްރީނު ލިބިފައިވާ ޓީޗަރުންނަށް ހެދުމާއި، ޚާއްޞަކޮށް، އެ ދާއިރާގެ ޓީޗަރުން އުފެއްދުމަށް. މި ދެ ކަންތައް ކުރުމުގެ މަސައްކަތްތަކެއް
ފެށިގެން އެދަނީ. މިކަމުގައި ޝައުޤުވެރިކަން ފާޅުކުރާ ހުރިހާ ފަރާތްތަކަކަށް ފުރުޞަތުދީގެން، އިރާދަކުރެއްވިއްޔާ، ކުރިއަށް އޮތް ތަނުގައި ޚާއްޞަ އެހީއަށް ބޭނުންވާ ކުދިންނަށް އިންކްލޫސިވް ގޮތެއްގައި ހަމަ އެއްވެސް ތަފާތެއް ނުގެނެސް، ތަޢުލީމީ ފުރުޞަތު ހޯދައިދިނުމުގައި އަޅުގަނޑުމެންގެ މެނިފެސްޓޯގައި ކަނޑައަޅާފައި އޮތް ގޮތަށް، އެ ސިޔާސަތު ތަންފީޛު ކުރުމަކީ އަޅުގަނޑު ހަމަ އެންމެ ބޭނުންވާ ގޮތް. އެގޮތަށް އެކަންތައް އިރާދަކުރެއްވިއްޔާ ކޮށްދެވޭނެ ކަމަށް އަޅުގަނޑު ޔަޤީންކުރަން.
އެހެންވީމާ، އަޅުގަނޑު ހަމަ ކުރިންވެސް ދެންނެވި ފަދައިން، މޭޔަރަކަށް ހުރިއިރުގައި ވަރަށް ގާތުން ފެނުނު، މި ސްކޫލްގައި ޚާއްޞަ އެހީއަށް ބޭނުންވާ ކުދިންނަށް ވަރަށް ލޯތްބާއި ކުލުނާ އެކީގައި އެހީތެރިކަން ދެމުންދާ ތަން. އެހެންވީމާ، ޓްރެއިންޑް ޓީޗަރުން އަދި ތިޔަ ލޮބުވެތި ޓީޗަރުންނަށް އެ ޓްރޭނިންގ ލިބިގެންދިޔައިމަ، އިތުރަށް ތިޔަ ލޮބުވެތި ޓީޗަރުންނަށް އެ ކުދިންނަށް ދެވޭނެ އެހީތެރިކަން އަދި ޓްރޭނިންގ އަދި ތަޢުލީމު ވަރަށް ބޮޑަށް އިތުރުވެގެންދާނެ.
އެހެންވީމާ، އެގޮތުން އެކަންކަން ކުރުމަށްޓަކައި އެޑިޔުކޭޝަން މިނިސްޓްރީން މިހާރު އެވަނީ ރާއްޖޭގެ ހުރިހާ ދިމާއެއްގައި ހުރި މިފަދަ ސްކޫލްތައް ޝާމިލުވާ ގޮތެއްގައި އެކަން ފުޅާކުރުމުގެ މަސައްކަތްތަކެއް ފަށާފައި. އުންމީދު ކުރަނީ، މި އަންނަ އަހަރުގެ ތެރޭގައި، އެކި ލެވެލް ލެވެލްއަށް ޓްރޭނިންގ ދިނުމަށް، ޑިޕްލޮމާ އިން ފެށިގެން ޑިގްރީއާ ހަމަޔަށް ޓްރޭނިންގ ދިނުމުގެ ޕްރޮގްރާމްތަކެއް ގެންދިޔުމުގެ މަސައްކަތް ކުރާތީ، އެކި ދުވަސްވަރަށް އެކި ކުދިންނަށް އެކި ޓީޗަރުން ތަމްރީނު ކުރެވިގެންދާނެ ކަމަށް.
އާދެ، މާފަންނު މަދަރުސާގެ ތަރައްޤީއަށްޓަކައި ސްކޫލްގައި މި ދެންނެވި ގޮތަށް ހޯލު ބިނާކުރުމުގެ އިތުރަށްވެސް ދެން ކުރެވެންހުރި ކަންކަމުގައި ސީދާ ސަރުކާރުގެ ފަރާތުން އެޑިޔުކޭޝަން މިނިސްޓްރީން އަދި ކައުންސިލް މެދުވެރިކޮށް، ކައުންސިލުން އެދޭ ކަންތައްތަކުގައިވެސް ސަރުކާރުގެ ފަރާތުން އެހީތެރިކަން ދިނުމާ އެކީގައި، އިރާދަކުރެއްވިއްޔާ، މި އަންނަ އަހަރު އަޅުގަނޑު ދެކެން ބޭނުންވަނީ، އަދި އަޅުގަނޑު ޔަޤީންކުރަނީ، ތިޔަބޭފުޅުންނަށް ޔަޤީންކަންދެނީ، މިދިޔަ ދުވަސްތަކަށްވުރެ މާބޮޑަށްވެސް ތިޔަބޭފުޅުންނަށް އުފާވެރި ގޮތެއްގައި މި ސްކޫލްގެ ކަންކަން ބައްޓަންވެގެންދާނެ ކަމަށް. ސަރުކާރުގެ ފުރިހަމަ އެއްބާރުލުން ދޭނެކަން ތަކުރާރުކޮށް އަދިވެސް ދަންނަވަން.
އާދެ، އަޅުގަނޑު ހަމަ ވަރަށް ބޮޑަށް ލޮބުވެތި ތުއްތު ކުދިންނަށް ވަރަށް އުފަލާއެކީގައި ހަމަ މަރުޙަބާ ކިޔާލަން ބޭނުން. މިތަނުގައި ބޭންޑް ފެނިގެންދިޔަ. އަދި ލަވަ ކިޔިގެންދިޔަ. އަދި ވަރަށް ރަނގަޅު ޕަރފޯމަންސެއް ފެނިގެންދިޔަ. މި ހުރިހާ ކުދިންނަކީ ވަރަށް ހުނަރުވެރި ކުދިން. ޤައުމުގެ މުސްތަޤްބަލުގެ ވަރަށް ރަނގަޅު ބިންގަލެއް މި ސްކޫލްގައި މި އެޅިގެން މިދަނީ. މި ކުދިން ފެނިގެން ދިޔައިމަ އަޅުގަނޑުމެންނަށްވެސް އެބަ ހިތްވަރު ލިބިގެންދޭ، ރަނގަޅު ބިންގަލެއްގައި ކުދިން ބިނާކުރެވިގެންދާ ތަން ފެނިގެންދާތީ.
އެހެންވީމާ، އަޅުގަނޑުމެން އެންމެން އެކުގައި ރާއްޖޭގައި އަޅުގަނޑުމެން ބޭނުންވާ ގޮތަށް މާތްވެގެންވާ އިސްލާމްދީނުގެ ވަރުގަދަ ޢަޤީދާގެ މަތީގައި ތިބި، ދިވެހި ޤައުމު ދެކެ ލޯބިވާ، ޤައުމިއްޔަތުގެ ރޫޙު ފުރިހަމައަށް އަށަގަނެފައިވާ ދިވެހި ލޮބުވެތި ދަރިންތަކެއް ޤައުމުގެ މުސްތަޤްބަލާ ހަވާލުވެވޭނެ ފަދަ ޒިންމާދާރު ދަރިންތަކެއް ބިނާކުރުމުގައި އަޅުގަނޑުމެން އެންމެން އެކުގައި، އެއް ރޫޙެއްގައި ޤައުމީ ވިސްނުމެއްގައި މަސައްކަތް ކުރުމަކީ މިއަދު އަޅުގަނޑުމެން ޢަޒުމް ކަނޑައަޅަންޖެހޭ ކަމެއް. އިރާދަކުރެއްވިއްޔާ އަޅުގަނޑުމެންގެ ޤައުމުގެ މުސްތަޤްބަލަކީ ވަރަށް އުޖާލާ މުސްތަޤްބަލެއް.
އަދިވެސް އެއްފަހަރު، މާފަންނު މަދަރުސާގެ 40 އަހަރުގެ މި އުފާވެރި މުނާސަބަތުގައި، ޕްރިންސިޕަލަށާއި، ޓީޗަރުންނަށާއި ބެލެނިވެރިންނަށާއި، ލޮބުވެތި ތުއްތު ކުދިންނަށާއި، އަދި ކުރީގެ ހުރިހާ ޚިދުމަތްތެރިންނަށް، ޢިއްޒަތްތެރިންނަށް ވަރަށް ބޮޑަށް މަރުޙަބާ ދަންނަވަމުން، އަޅުގަނޑުގެ ވާހަކަކޮޅު ނިންމާލާނަން. ވަރަށް ބޮޑަށް ޝުކުރިއްޔާ!
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.