ރައްޔިތުންނާއެކު ކުރިއަށް - ހަފްތާ 52 ފާހަގަކުރުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްކެވި ވާހަކަފުޅު

بِسْمِ ٱللّٰهِ ٱلرَّحْمٰنِ ٱلرَّحِيمِ‎

اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.

ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފްގެ ދެކަނބަލުން، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲގެ ދެކަނބަލުން، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ދައުލަތުގެ އެކިއެކި މުއައްސަސާތަކުގެ ވެރިން، ވަޑައިގެން ތިއްބެވި އެންމެހައި ޢިއްޒަތްތެރިން، ލޮބުވެތި ދިވެހި ރައްޔިތުން؛

السَّلامُ عَلَيْكُم ورَحْمَةُ اللهِ وَبَرَكاتُهُ.

އާދެ، ރައްޔިތުން ޤައުމުގެ ކަންކަން، ހަމަ މަގުން ގެންދިޔުމުގެ ނިޔަތުގައި، މިދިޔަ އަހަރުގެ ރިޔާސީ އިންތިޚާބުގައި ރައްޔިތުން ނިންމެވީ، ދިވެހީންގެ ރާއްޖެއަށް ދަތުރުކުރުމަށް. ދިވެހީންގެ ރާއްޖެއަށް ދަތުރުކުރުމަށް ނިންމި ނިންމުމުގައި، އެ ނިންމުން ނިންމަވައި، އަޅުގަނޑާ ރައްޔިތުން ޒިންމާތަކެއް ހަވާލުކުރެއްވި.

އާދެ، އަޅުގަނޑު ފުރަތަމަ ދަންނަވާލަން ބޭނުންވަނީ، އަޅުގަނޑަކީ އިރާދަކުރެއްވިއްޔާ ރައްޔިތުން ހަވާލުކުރެއްވި ހުރިހާ ޒިންމާއެއް، ހުރިހާ މަސްއޫލިއްޔަތެއް މިހާރުވެސް އަދި ފަހުންވެސް އިޚްލާޞްތެރިކަމާއެކުގައި، ތެދުވެރިކަމާއި، އަމާނާތްތެރިކަމާއެކުގައި އަދާކުރާނެ މީހެކޭ. އަދާކުރަމުންދާ މީހެކޭ.

އަޅުގަނޑުގެ ހަނދާނަށް އަންނަނީ، އިންތިޚާބުގެ ނަތީޖާ އިޢުލާނު ކުރެވިގެންދިޔަ ދުވަސް. ނޫނީވިއްޔާ ފަހު ބުރުގެ ވޯޓު ނެގިގެންދިޔަ ވަގުތު. އިޢުލާނު ކުރެވިގެންދިޔަ ވަގުތު. އާދެ، އަޅުގަނޑަކީ، ވީ ވަޢުދެއްވިއްޔާ އިރާދަކުރެއްވީތީ، ވަޢުދުވީގޮތަށް ފުއްދަމުންދާ މީހެއް. އާދެ، މަގާމުގެ މަސްއޫލިއްޔަތާ ހަވާލުވާން އޭރު ދުވަސްތަކެއް އޮތް. ނޮވެންބަރު 17އާ ހަމަޔަށް ދިޔުމަށް ދުވަސްކޮޅެއް އޮތް. އެހެން ނަމަވެސް، އެރެއިން ފެށިގެން އަޅުގަނޑަށް އެ ވަގުތުވެސް ފުއްދެންހުރި ވަޢުދެއްވިއްޔާ ފުއްދުމުގެ މަސައްކަތް ފެށިން. އެއީ، ކޮން ކަމެއްތޯ؟ އަޅުގަނޑު ރިޔާސީ އިންތިޚާބުގައި، އެންމެ ބޮޑަށް ދެއްކި އެއް ވާހަކައަކީ، ރައީސް ޔާމީން ނުޙައްޤުން ޖަލުގައި ހުރުމަކީ، އަޅުގަނޑުމެން ގަބޫލުކުރާ ކަމަކަށް ނުވާތީ، ސަރުކާރުން ސިޔާސީ ނުފޫޒު ފޯރުވައިގެން، އެ މަނިކުފާނު ހައްޔަރުކޮށްފައި ހުރި ހުރުން ދޫކޮށްލުމަށް، އަޅުގަނޑާ ރައްޔިތުން ޒިންމާ ހަވާލުކުރާ ހިސާބުން މަސައްކަތް ފަށާނަމޭ. ސަރުކާރުން، ރައީސުލްޖުމްހޫރިއްޔާގެ އޮފީހުން ނުފޫޒު ފޯރުވައިގެން، ޝަރުޢީ ދާއިރާ، ސަރުކާރުން ބޭނުންވާ ގޮތަކަށް ހިންގަމުންދާ ހިންގުން ނިމުމަކަށް ގެންނާނަމޭ.

އެރޭ، މި ދެންނެވީ 30 ސެޕްޓެންބަރު. ފުރަތަމަ އަޅުގަނޑަށް އޭރުގެ ރައީސުލްޖުމްހޫރިއްޔާ މަރުޙަބާ ވިދާޅުވުމަށް ގުޅުއްވި. އަޅުގަނޑުގެ ވާދަވެރި ކެންޑިޑޭޓް ގުޅުއްވި. ގުޅުއްވާފައި ވާހަކަފުޅު ދެއްކެވިއިރު، އެ ފޯނުކޯލްގައިވެސް އަޅުގަނޑު ފުރަތަމަ ދެންނެވީ، ރައީސް ޔާމީން ގެޔަށް ގެނެސްދެއްވާށޭ. ބައެއް ބޭފުޅުން ހަނދުމަފުޅުނެތިދާނެ.

ވީޑިއޯ:

"އަޅުގަނޑު މި ދަނޑިވަޅުގައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް، ވަރަށް އިޚްލާޞްތެރިކަމާއި އަދަބުވެރިކަމާއެކީގައި ދަންނަވާލަން. އަޅުގަނޑުމެންގެ ލޮބުވެތި ރައީސް، ރައީސް ޔާމީން ގެޔަށް ބަދަލުކޮށްދެއްވުމަށް. އެ މަނިކުފާނު ގެޔަށް ބަދަލުކުރެއްވުމަކީ، ރައީސުލްޖުމްހޫރިއްޔާއަށް ޤާނޫނީގޮތުން ކުރެއްވެވޭނެ ކަމެއް. އެކަން ކުރެއްވުމަކީ، މިއަދު މި ޤައުމުގެ މަޞްލަޙަތަށްޓަކައި އެންމެ ރަނގަޅު ގޮތް ކަމުގައި އަޅުގަނޑު މި ދަންނަވާލީ."

މިއީ ފެންނާން ހުރި ޙަޤީޤަތް. ފުރަތަމަ ފޯނުކޯލްގައިވެސް އަޅުގަނޑު ދެންނެވިން. އޭގެ އިރުކޮޅެއްފަހުން ބޭއްވި ޕްރެސް ކޮންފަރެންސް، ފުރަތަމަ ޕްރެސް ކޮންފަރެންސްގައިވެސް އަޅުގަނޑު ދެއްކި ވާހަކަ މިއީ.

އެހެންވެގެން، ޖެހިގެން އައި ދުވަހު، އެ މަނިކުފާނު ގެޔަށް ގެންނެވުމަށް ރައީސް އިބްރާހީމް މުޙައްމަދު ޞާލިޙް ނިންމެވީ. އަދި އަޅުގަނޑާ ބައްދަކުރުމަށް ދެއްވި ފުރުޞަތުގައި، އަޅުގަނޑާއި މިހާރުގެ ރައްޔިތުންގެ މަޖިލީހުގެ ރައީސާ ދެ މީހުން ދިޔައިން. ފުރަތަމަވެސް އަޅުގަނޑުމެން ގޮސްފައިވެސް ދެންނެވީ، އެ މަނިކުފާނު މިހާރު ގެޔަށް ގެންނެވުމަށް ލޯންޗު ފުރި ވާހަކަ އަޅުގަނޑުމެންނަށް އޮތީ މަޢުލޫމާތު ލިބިފައޭ. އަޅުގަނޑު އެދުނުގޮތަށް އެކަން ކޮށްދެއްވާތީ، ވަރަށް ބޮޑަށް ޝުކުރު ދަންނަވަމޭ. މިހެން ނޫންތޯ ދެންނެވީ. ޙަޤީޤަތް. އެހެންވީމާ، ވަޢުދު ފުއްދަން އޭރުވެސް ފަށާފައި އެއޮތީ.

17 ނޮވެންބަރުގައި ހުވާކޮށްގެން، އެންމެ ފުރަތަމަ، ރައްޔިތުންނާ މުޚާޠަބުކޮށް އަޅުގަނޑު ވާހަކަ ދައްކަން ފަށާފައި، ގަޑިން 5:03 ގައި އަޅުގަނޑު ވީ ވަޢުދު ފުއްދިން. އަޅުގަނޑު އިޢުލާނު ކުރިން، މި ހިނދުން ފެށިގެން ޝަރުޢީ ދާއިރާއަށް ނުފޫޒު ފޯރުވުން ނިމުނީއޭ. އެކަން އެއޮތީ ނިންމާފައޭ. އެހެންވީމާ، އެ ހިސާބުން ފެށިގެން، ސިޔާސީ ޙުކުމެއްގައި ހައްޔަރުކޮށްފައި ހުރި ރައީސް ޔާމީން މިނިވަންކުރުމަކީ، ޝަރުޢީ ދާއިރާގެ އަތްމަތީގައި އޮތް ކަމެއް. އަޅުގަނޑުމެން ޝަރުޢީ ދާއިރާއަށް ނުފޫޒު ނުފޯރުވާތީ، اَلْحَمْدُ للَّهِ، އެ މަނިކުފާނު އެހެރީ މިނިވަންވެވަޑައިގެންފައި. މިއީ ޙަޤީޤަތް. އެހެންވީމާ، މި ވަޢުދު އެއޮތީ ފުއްދާފައި.

އާދެ، އިޤްތިޞާދު އޮތް ޙާލަތު. އަޅުގަނޑުމެންނާ ދިމާއަށް ބައެއް ބޭފުޅުން އެބަ ވިދާޅުވޭ. އަޅުގަނޑުމެން ހަވާލުވެގެން އިޤްތިޞާދު މެނޭޖް ނުކުރެވިގެން، ބަނގުރޫޓުވާ ހިސާބަށް ދިޔައީއޭ. އެހެނެއްނޫނޭވީ އިނގޭތޯ. އަޅުގަނޑުމެން ހަވާލުވުމުގެ ހަ ދުވަސް ކުރިން، އައި.އެމް.އެފް.އިން ނެރުނު ރިޕޯޓެއް. ހަ ދުވަސް ކުރިން. އެހެންވީމާ، ކޮން ސަރުކާރެއްތޯ، އޭރު އޮންނާނީ؟ ހަ ދުވަސް ކުރިން ނެރުނު، ޝާއިޢުކުރި ރިޕޯޓެއްގައި މި އޮންނަނީ ބުނެފައި،

The Maldives remains at a high risk of External debt distress in a high overall risk of debt distress.

ކޮން ސަރުކާރެއް އޮވެގެންތޯ؟ އަޅުގަނޑުމެން އަދި ހަވާލެއްނުވޭ. އޭގެ ހަ ދުވަސް ކުރިން މިއޮތީ އައި.އެމް.އެފް. އިން ރިޕޯޓު ނެރެފައި ބުނެފައޭ، ޤައުމު އޮތް ޙާލަތު. 120 ބިލިއަން ރުފިޔާއަށްވުރެ ގިނަ ދަރަނި އޮތް ޙާލަތެއްގައި އަޅުގަނޑުމެން ތިބީ. އެ ޙާލަތުގައި އޮތް ޤައުމެއް އަޅުގަނޑުމެންނާ ހަވާލުވެގެންދިޔައީ. އެހެންވީމާ، ޤައުމު ބަނގުރޫޓުކޮށްލަން ރާވައި، އިޤްތިޞާދު މެނޭޖް ނުކޮށް، ކުރަން ނޭނގި، ފަސް އަހަރު ދުވަހުގެ ތެރޭގައި އަދި އެ އަހަރުގެ ސަޕްލިމެންޓްރީ ބަޖެޓުވެސް، އޭރު އޮތް ބަޖެޓް ހުސްކޮށް، އިތުރަށް ޚަރަދުކޮށްފައި އެބައޮތް. ޤާނޫނުއަސާސީއާ ޚިލާފަށް، ރައްޔިތުންގެ މަޖިލީހުގެ ހުއްދަ ނުހޯދައި ބަޖެޓް ފާސްނުކޮށް ޚަރަދުކޮށްފައި، ލީގަލައިޒް ކުރަންވެގެން ވެއްދީ ޑޮކިއުމެންޓެއް. މިގޮތަށް ނޫންތޯ، އިޤްތިޞާދު މެނޭޖްކުރީ؟ އެހެން އޮތް އިޤްތިޞާދެއް ހަލާކުކޮށްލާފައި، ބަނގުރޫޓުކޮށްލާ ދިމާއަށް ގެންގޮސްފައި އޮތް އިޤްތިޞާދަކުން އަރައިގަތުމަށް ދިވެހީންގެ ރާއްޖެއަށް ދާން ރައްޔިތުން ނިންމެވީ. އޭރުގައި އޮތް ސަރުކާރުން 8000 މިލިއަން، 8 ބިލިއަން ރުފިޔާ ޗާޕްކުރި. 8 ބިލިއަން ރުފިޔާ ޗާޕްކުރި. އެއީ، 17 ނޮވެންބަރު 2023ގެ ޙާލަތު. 8 ބިލިއަން ރުފިޔާ ޗާޕްކުރި.

އާދެ، އޭރުގެ މާލީ އިދާރާތަކުން އަންދާޒާ ކުރަމުން އައީ، 2024 ވަނަ އަހަރުގެ އެޕްރީލް މަހާ ހަމަޔަށް ދިވެހިރާއްޖެ ދާއިރުގައި، ސޮވްރިންގ ޑިފޯލްޓަކަށް ދާނެ ކަމަށް. ބަނގުރޫޓުވާނެ ކަމަށް. ސޮވްރިންގ ޑިފޯލްޓް އިޢުލާނު ކުރަން ޖެހިދާނެ ކަމަށް، އޭރުގައި ނެރުނު، އަޅުގަނޑުމެން ވެރިކަމާ ހަވާލުވުމުގެ ހަ ދުވަސް ކުރިން ނެރުނު ރިޕޯޓެއް މިއީ. އެ ޙާލަތުގައި އޮތް ޤައުމަކާ އަޅުގަނޑުމެން ހަވާލުވީ. އާދެ، އެހެން އެ މީހުން ބުނަމުންދިޔަ ވަރަށްގިނަ ސަބަބުތަކެއް އެބަހުރި. އެއީ، ފަސް އަހަރުގެ ތެރޭގައ، އޭގެކުރިން ދިޔަ ފަސް އަހަރުގެ ތެރޭގައި، 22.7 ބިލިއަން ރުފިޔާ ޚަރަދުކޮށް، 50 ބިލިއަން ރުފިޔާ ވަނީ އޭގެއިތުރަށް ޚަރަދުކޮށްފައި. 8 ބިލިއަން ރުފިޔާ ޗާޕްކޮށް، އަދި އޭގެއިތުރަށް، ދަރަނީގެ އިންޓްރެސްޓް، އަހަރަކު 1.4 ބިލިއަން ރުފިޔާ އަރުވަމުންދިޔައީ. އެހެންވީމާ، މިއީ އަޅުގަނޑުމެންނާ ހަމަޔަށް އައިއިރު އޮތް ޙާލަތަކީ. އެހެން ގޮތަކަށް ދަންނަވަންޏާ، ދައުލަތަށް ލިބޭ ކޮންމެ 100 ރުފިޔާއަކުން 24 ރުފިޔާ، ލޯނު އަނބުރާ ދައްކަން އޭރު ހޭދަކުރަންޖެހޭ ޙާލަތުގައި އޮތީ. އޭގެތެރެއިންވެސް 16 ރުފިޔާ ޚަރަދުކުރަންޖެހެނީ ދަރަނީގެ އިންޓްރެސްޓް ދައްކަން.

މި ޙާލަތުގައި އޮތް އިޤްތިޞާދެއް އޮތީ. މި ޙާލަތު އެހެންއޮތަސް، އަޅުގަނޑުމެން އިރާދަކުރެއްވީތީ، ފައިސާ ޗާޕްނުކޮށް، ފައިސާ ޗާޕްނުކޮށް، ދައްކަންޖެހޭ ދަރަނި ދެއްކުމުގައި، އަޅުގަނޑުމެންގެ ސިޔާސަތުތައް ބައްޓަންކޮށް، އަޅުގަނޑުމެން މިއަދާ ހަމަޔަށް މިއައީ، ބަނގުރޫޓުނުވެ. ބަނގުރޫޓުނުވެ، އޭރުގައި އޮތް ސަރުކާރުން އަޅުގަނޑުމެންގެ ޤައުމުގެ އިޤްތިޞާދު ހަލާކުކޮށްލައި އަނދަވަޅަކަށް ވައްޓާލަން ނިންމާފައި އޮތް ނިންމުން، ނޫނީވިއްޔާ ކޮށްފައި އޮތް ކަންތަކުން އަރައިގަތުމަށް.

އެހެންވީމާ، މި ސަރުކާރުގެ މި 52 ހަފްތާގައި، އަޅުގަނޑުމެން އެންމެން ގުޅިގެން ރައްޔިތުންނާއެކު މި ކުރެވުނު އެންމެބޮޑު އެއްކަމަކީ، މި ޙާލަތުން އަރައިގަތުން، ފައިސާ ޗާޕްނުކޮށް. އެހެންވީމާ، މިއީ ޙަޤީޤަތް. މިއީ ފެކްޓްސް. ނަންބަރޒުން ފެންނަން ހުރި ޙަޤީޤަތް. އާދެ، އެއީ އެންމެބޮޑު ކާމިޔާބީއަކީ ޙަޤީޤަތުގައި އަޅުގަނޑުމެންނަށް ހޯދިފައި އޮތް.

އާދެ، ކުރިއަށް މި އޮތް އަހަރަކީ، އަޅުގަނޑުމެންގެ ސަރުކާރުން ހުށަހަޅާފައި އޮތް ބަޖެޓް ފާސްކުރެވިގެން ގޮސް، އެ މަސައްކަތްތައް ކުރެވޭ އަހަރު. އަޅުގަނޑުމެން 2024 މި ނިންމާލަން ޖެހެނީ، ނިމިދިޔަ ސަރުކާރުގެ ސުޕަރ މެޖޯރިޓީ އޮތް މަޖިލީހަކުން އަޅުގަނޑުމެން ހިންގަން ބޭނުންވި އެއްވެސް މަޝްރޫޢަކަށް ޖާގަނުދީ ހަމަ ގަސްދުގައި ހަދާފައި އޮތް ބަޖެޓެއް ބޭނުންކޮށްގެން. ގަސްދުގައޭ މި ދެންނެވީ، މަޝްރޫޢުތަކެއް ހުރި. ގިނަ މަޝްރޫޢުތަކެއް. އެއްވެސް މަޝްރޫޢެއް ފެށޭވަރަށްވެސް ފައިސާ ނުހިމަނާ. އެހެންވީމާ، ގަސްދުގައި ސަރުކާރު ހިންގިޔަނުދިނުމަށްޓަކައި އޭރުގައި އޮތް މަޖިލީހުން ބަޖެޓެއް ފާސްކޮށްފައި ދިން. އެހެން ނަމަވެސް، އަޅުގަނޑުމެން ގިނަ މަސައްކަތްތަކެއް މިވަނީ ކޮށްފައި. އަދި ފަށާފައި. މިހާރު މި ހުށަހަޅަނީ، އަޅުގަނޑުމެން މިއިން އަރައިގަނެ، މި ދެންނެވި ފަދައިން، އަޅުގަނޑުމެންގެ އިޤްތިޞާދު މުއްސަނދިކޮށް، ރައްޔިތުން އިތުރަށް ފުދުންތެރިކޮށް، ގިނަ މަޝްރޫޢުތަކެއް ހިންގުމަށްޓަކައި ހުށަހެޅޭ ބަޖެޓެއް. އާދެ، އިރާދަކުރެއްވިއްޔާ މި ބަޖެޓަކީ ބޯހިޔާވަހިކަމުގެ ބަޖެޓް.

އާދެ، ވީޑިއޯ ކްލިޕެއް ދައްކާލަން މިހާރު އަޅުގަނޑު ފުރުޞަތު ދޭނަން. މާލީ ޙާލަތު ދައްކައިދިނުމާ ބެހޭގޮތުން.

ވީޑިއޯ:

"މިދިޔަ ސަރުކާރުގެ ފަސް އަހަރު ނިމުނުއިރު، ރާއްޖޭގެ އިޤްތިޞާދު އޮތީ ފުން އަނދަވަޅަކަށް ވެއްޓިފައި. ޤައުމަށް ކުރިމަތިވާނޭ ނުރައްކަލަކަށް ފަރުވާތެރިކަމެއްނެތި، ކުރީ ސަރުކާރުގެ ތިން އަހަރުގެ ތެރޭގައި، ދައުލަތުން 8.2 ބިލިއަން ރުފިޔާ ޗާޕްކޮށްފައިވާކަން، މަރުކަޒީ ބޭންކް، އެމް.އެމް.އޭ.ގެ ތަފާސްހިސާބުތަކުން ދައްކާ. މި ސަރުކާރު ވެރިކަމާ ހަވާލުވީއިރު، ދައުލަތުގެ ދަރަނި އޮތީ 120 ބިލިއަން ރުފިޔާގައި. ނިމިދިޔަ ސަރުކާރުގައި އެކަނިވެސް 60 ބިލިއަނަށްވުރެ ގިނަ ރުފިޔާގެ ދަރަނި އުފައްދައި، އެއިން އެކަށީގެންވާ އުފެއްދުންތެރި މަސައްކަތެއް ކޮށްފައި ނެތް."

އާދެ، އަޅުގަނޑުމެން ހަވާލުވީއިރުގައި، ވަރަށްގިނަ މައްސަލަތަކެއް ހުރި، އިޤްތިޞާދީ ދާއިރާއަށް ބަލާއިރުގައިވެސް. އެފަދަ އެއް މައްސަލައަކީ، ދިވެހިރާއްޖެއަށް ލިބޭ ބޭރު ފައިސާ، ދިވެހި އިޤްތިޞާދުގައި ދައުރުނުވުން. މި ނިމިދިޔަ 2023 ވަނަ އަހަރު ދައުލަތަށް ލިބުނީ، 950 މިލިއަން ޑޮލަރު. އެކަމަކު ދިވެހި ހުރިހާ ރައްޔިތުންނަށް އެއަށްވުރެ މާގިނަ ފައިސާ ބޭނުންވޭ، ކަންކަން ކޮށްދިނުމަށް. ތެޔޮގަތުމަށް އެކަނި ބޭނުންވޭ، 753 މިލިއަން ޑޮލަރު. ކާބޯތަކެތި އެތެރެކުރަން ބޭނުންވޭ، 675 މިލިއަން ޑޮލަރު. ކިޔަވާ ކުދިންގެ، އަޅުގަނޑުމެން ބޭރަށް ފޮނުވާފައި ތިބި ކިޔަވާ ކުދިންނަށް އެބަ ބޭނުންވޭ، 37 މިލިއަން ޑޮލަރު، ސްކޮލަރޝިޕްސްތަކަށް، ކަންކަމަށް. ޢާންމު ބޭނުންކުރާ ބޭންކް ކާޑުތަކަށް 200 މިލިއަން ޑޮލަރު ބޭނުންވޭ. އަދި ސަރުކާރުން ދަރަނި ދެއްކުމަށް 507 މިލިއަން ޑޮލަރު ބޭނުންވޭ.

އާދެ، މިގޮތުން ބަލާއިރުގައި، 2023 ވަނަ އަހަރު ޓޫރިޒަމް ސެކްޓަރއަށް އެކަނި، ޓޫރިޒަމް ސެކްޓަރގެ ޖުމްލަ އާމްދަނީއަކީ، 4.5 ބިލިއަން ޑޮލަރު. 4.5 ބިލިއަން ޑޮލަރަކީ، މުޅި ޓޫރިޒަމް އިންޑަސްޓްރީގެ ޖުމްލަ އާމްދަނީ. މީގެތެރެއިން ބޭންކުތަކަށް މާރުކޮށްފައި ވަނީ، އެންމެ 1.5 ޕަސެންޓް. 1.5 ޕަސެންޓް ބޭންކުތަކަށް މާރުކުރަނީ. އެހެންވީމާ، އަޅުގަނޑުމެން ބޭނުންވީ، ޒަމާންވީ މި މައްސަލައަށް ޙައްލެއް ގެންނަން. އާދެ، އެހެންވެގެން އަޅުގަނޑުމެން ރައްޔިތުންގެ ފަޅި ޚިޔާރުކުރީ. މި ސަރުކާރު އޮންނާނީ ރައްޔިތުންނާއެކު. ރައްޔިތުން ހޮވި ސަރުކާރެއް މިއީ. މި ސަރުކާރު ކުރިއަށްދާނީ، ރައްޔިތުންގެ ޚިޔާލާއި މަޝްވަރާއާ އެކީގައި، ރައްޔިތުން އެދޭ ކަންކަން ކޮށްދިނުމުގައި. ރައްޔިތުން އެދޭ އަމާޒަށް، ރައްޔިތުންގެ ފަޅީގައި އޮވެގެން.

އާދެ، މިގޮތަށް އަޅުގަނޑުމެން ޑޮލަރު މާރުކުރަން، ގަވާއިދު އެމް.އެމް.އޭ.އިން ބަދަލުކޮށް، އިޢުލާނު ކުރުމުން ހާސިލު މިވަނީ ކޮންކަމެއްތޯ؟ އާދެ، އަޅުގަނޑު ފުރަތަމަވެސް ދަންނަވާލަން ބޭނުންވޭ. އަޅުގަނޑުމެންގެ ޤައުމުގެ މި މައި އިންޑަސްޓްރީ، ޓޫރިޒަމް އިންޑަސްޓްރީ މި ހިސާބަށް ގެނައުމުގައި، 1970 އިން ފެށިގެން އަމިއްލައަށް ތެދުވެވަޑައިގެން މަސައްކަތް ކޮށްދެއްވި ވަރަށްގިނަ ބޭފުޅުން، ވަރަށް ޚިދުމަތްތެރި ބޭފުޅުން ތިއްބެވި. އެ ބޭފުޅުން އޭރު ތެދުވެވަޑައިގެން އެ ފެށްޓެވި މަސައްކަތުގެ ސަބަބުން ޤައުމުގައި ޓޫރިޒަމް އިންޑަސްޓްރީ ފުޅާވެ މިއަދާ ހަމަޔަށް މިއައީ. އެ ބޭފުޅުންނަށް އަދިވެސް މި ފުރުޞަތުގައިވެސް އަޅުގަނޑު ހިތުގެ އެންމެ ފުންމިނުން އެކަމަށްޓަކައި ޝުކުރު ދަންނަވަން. އަދިވެސް އެ ބޭފުޅުންގެ ޚިދުމަތް މި ޤައުމަށް ބޭނުންވޭ. އަދި އެ ބޭފުޅުންގެ މިސާލުން މިސާލު ނަގައިގެން، ޓޫރިޒަމް އިންޑަސްޓްރީގައި އެހެން ދިވެހިންވެސް މަސައްކަތް ކުރުން އަޅުގަނޑު އެދެން.

އާދެ، އަޅުގަނޑު ވަރަށް އިޚްލާޞްތެރިކަމާ އެކީގައި، އަޅުގަނޑުމެންގެ ޓޫރިޒަމް އިންޑަސްޓްރީގެ ޕައޮނިއަރސްއަށް ދަންނަވާލަން ބޭނުންވަނީ، ތިޔަބޭފުޅުންގެ ނާޖާއިޒު ފައިދާ، ސިޔާސީގޮތުން ޤައުމަށް ލޯބިނުކުރާ ދިވެހީންގެ ރައްޔިތުންގެ ފަޅީގައި ނެތް ސިޔާސީ ވެރިންނަށް، ތިޔަބޭފުޅުންގެ ފައިދާ، ނާޖާއިޒު ގޮތުގައި ނެގިޔަނުދެއްވާށޭ. އަޅުގަނޑުމެން މިތިބީ ރައްޔިތުންނާ އެކީގައޭ. ރައްޔިތުންގެ ފަޅީގައި، ރައްޔިތުންނާ އެކީގައި މުޅި ޤައުމުގެ ކަންކަން ކުރިއަށް ގެންދިޔުމުގައި، ތިޔަ ޚިދުމަތްތެރިން، ހީވާގި އިސް ރަށްވެހިން އަޅުގަނޑުމެންނާ އެކީގައި ވަޑައިގަތުމަކީ ޤައުމަށް އެންމެ ފައިދާހުރި ގޮތޭ.

އާދެ، މި ޑޮލަރު މާރުކުރުމުގެ ކަންތަކުގައި، ޙަޤީޤަތުގައި ރައްޔިތުންނަށް މިއިން ވާނެ ފައިދާ އަޅުގަނޑު ދަންނަވާލާނަން.

ޖަނަވަރީން ފެށިގެން މިއަށް ޢަމަލުކުރަން މި ފަށަނީ. ޖަނަވަރީން ފެށިގެން ޢަމަލުކުރަން ފަށައި، އަޅުގަނޑުމެން ކަނޑައަޅާފައި އޮތްގޮތަށް މާރުކުރަމުންދާނަމަ، އިފެކްޓިވްލީ އެ މާރުކުރެވެނީ، ޖުމްލަކޮށް، ޓޫރިޒަމް އިންޑަސްޓްރީއަށް ވަންނަ އާމްދަނީގެ ގާތްގަނޑަކަށް 20 ޕަސެންޓް ޑޮލަރު މާރުކުރަން މި ދަންނަވަނީ. 20 ޕަސެންޓް އެކަނި. 15 ޕަސެންޓާއި 20 ޕަސެންޓާ ދޭތެރޭ. 20 ޕަސެންޓް ޑޮލަރު ބޭންކުތަކަށް މާރުކުރަން. އެއިންވާ ފައިދާއަކީ، އެއްކަމަކީ، އަޅުގަނޑުމެން ކުރަން ވިސްނާފައި އޮތް އެއްކަމަކީ، ސަރުކާރު ޙިއްޞާވާ ކުންފުނިތަކުން މިހާރު މިޖެހެނީ ޑޮލަރު ހޯދަން ކީއްކުރަންތޯ؟ ނުގަވާއިދުން އެކަން ކުރަން ޖެހިފައި މިއޮތީ. ޕެރެލަލް މާކެޓުގައި. ނޫނީވިއްޔާ ބްލެކް މާކެޓުން އަގުބޮޑުކޮށް ޑޮލަރު ހޯދަން ޖެހުނީމަ، ޙަޤީޤަތުގައި މި ބްލެކް މާކެޓަށް ވަރަށް ބޮޑަށް މި އިތުރުވެގެން މިދަނީ. ރޭޓް މައްޗަށް ދަނީ. އެހެންވީމާ، އެސް.އޯ.އީ.ތަކުން، ނޫނީ ސަރުކާރު ޙިއްޞާވާ ކުންފުނިތަކުން ޕެރެލަލް މާކެޓަށް ނުގޮސް، ރަސްމީ ރޭޓުގައި ޑޮލަރު ލިބޭނެ އިންތިޒާމު އިރާދަކުރެއްވިއްޔާ ޖަނަވަރީ 1 ން ފެށިގެން މި ތަންފީޒު ކުރަން ފަށާ ހިސާބުން ޓޫރިޒަމް އިންޑަސްޓްރީން އެ ގަވާއިދާ އެއްގޮތަށް ބޭންކުތަކަށް މާރުކުރާ ކަމުގައިވާނަމަ، އެންމެ ލަސްވެގެން މި އަންނަ އަހަރުގެ ޖުލައި މަހުން ފެށިގެން މި ދެންނެވިހެން ސަރުކާރު ޙިއްޞާވާ ކުންފުނިތަކުން ދެން ޕެރެލަލް މާކެޓްގައި މާރުކުރަން ނުޖެހި، ސީދާ ރަސްމީ ރޭޓުގައި ޑޮލަރު ލިބޭނެ އިންތިޒާމު ހަމަޖެހޭނެ. އޭގެ ސަބަބުން ވަރަށްބޮޑު ކުރިއެރުމެއް ލިބިގެންދާނެ.

އަދި ދަންނަވާލަންތޯ. ވެލާނާ އިންޓަރނޭޝަނަލް އެއަރޕޯޓުން ފުރާ ކޮންމެ ދިވެއްސަކަށް މިހާރު މި 500 ޑޮލަރު މި ގަންނަން ލިބެނީ ބޭންކް ރޭޓުގައި ދޮގެއްތޯ. އަޅުގަނޑުމެން ބޭނުންވަނީ، މި ޑޮލަރު މާރުކުރުމުގެ ކަންތައް، ޓޫރިޒަމް އިންޑަސްޓްރީގެ އެހީތެރިކަމާ އެކީގައި، އެއްބާރުލުމާ އެކީގައި ކުރިއަށްދާ ކަމަށްވަންޏާ، ޖަނަވަރީން ފެށިގެން ގާތްގަނޑަކަށް އަހަރެއްހާ ދުވަސް، ނޫނީވިއްޔާ ސާދަވަރަކަށް މަސް، 2026ގެ ފުރަތަމަ ކުއާރޓަރު ތެރެއަށްދާއިރަށް، އަޅުގަނޑުމެން މި ޕްލޭންކޮށްގެން، ޓެކްނިކަލީ ވާރކްކޮށްގެން ކުރާ ކަންތައް މިއީ. އެހިސާބަށް ދާއިރު، އަޅުގަނޑުމެންނަށް އެބަ ފުރުޞަތު ލިބޭ، މި 500 ޑޮލަރުގެ ބަދަލުގައި 1000 ޑޮލަރު، ބޭރަށް ފުރާއިރުގައި ގަތުމުގެ ފުރުޞަތު ދޭން. ދެން މިކަމަށް ހުރަސްއަޅަންވީ ކީއްކުރަންތޯ؟ 1000 ޑޮލަރު ބޭންކް ރޭޓުގައި ގަންނަން ލިބެންޏާ، އަޅުގަނޑު ހިތުން މި ޢާންމުކޮށް ބޭރަށްދާ ދިވެހިން ކުރައްވަން މި ވަޑައިގަންނަވާ ކަންކަމުގައި ވަރަށްބޮޑު ލުޔެއް އެބަ ލިބޭ، 500 ޑޮލަރުގެ ބަދަލުގައި ޑަބަލްކޮށްލެވުނީމަ. އެހެންވީމާ، 2026ގެ ފުރަތަމަ ކުއާރޓަރުގެ ތެރޭގައި، ފުރަތަމަ ތިންމަސް ތެރޭގައި، އަޅުގަނޑުމެންނަށް 1000 ޑޮލަރު ގަންނަން، ބޭންކް ރޭޓުގައި ގަންނަން ލިބޭގޮތް، ފުރާއިރުގައި ލިބޭގޮތް ހަދައިދެވޭނެއޭ، މި ޖަނަވަރީން ފެށިގެން މިކަން ފެށިއްޖިއްޔާ.

އާދެ، ކްރެޑިޓް ކާޑުގެ ލިމިޓް މިހާރު 700 ޑޮލަރުކަންނޭނގެ. އަޅުގަނޑުމެން ގަސްދުކޮށްފައި މިއޮތީ، މި ދެންނެވި ގޮތަށް، ޖަނަވަރީން ފެށިގެން ގޮސް 2026 ވަނަ އަހަރުގެ ފުރަތަމަ ކުއާރޓަރު ނިމޭ ހިސާބަށްދާއިރަށް، ސަސްޓެއިން ކުރެވޭގޮތަކަށް ޑޮލަރު މާރުކުރާ ކަމަށްވަންޏާ، 1400 ޑޮލަރާ ހަމަޔަށް ކްރެޑިޓް ކާޑުގެ ލިމިޓް ބޮޑުކޮށްދޭން. ޢާންމު ރައްޔިތުންނަށް ކިހާބޮޑު ފައިދާއެއްތޯ، ފަސޭހައެއްތޯ މިއިން މިވަނީ؟

އަދިވެސް އެއް ކަންތައް. ދިވެހި ވިޔަފާރިވެރިންނަށް ތަކެތި އިމްޕޯޓް ކުރުމުގައި، މި ބޭންކުތަކުން ޓީ.ޓީ. ހެދުމަށް ދޫކުރާ ޑޮލަރުގެ ނިސްބަތްވެސް އިތުރުކުރުން. އެ ކަންތައް އިރާދަކުރެއްވިއްޔާ، ޖަނަވަރީން ފެށިގެން ޑޮލަރު މާރުކުރުމުގެ ކަންތައް ގަވާއިދާ އެއްގޮތަށް، ޓޫރިޒަމް އިންޑަސްޓްރީން ކުރައްވާ ކަމަށްވަންޏާ، ޖުލައި މަހުން ފެށިގެން، 6 މަސް ތެރޭގައި އަޅުގަނޑުމެން އެކަން ކޮށްދޭނަން. ވިޔަފާރިތަކަށް ވަރަށްބޮޑު ކުރިއެރުމެއް ލިބިގެންދާނެ.

އާދެ، އެހެންވީމާ، އަޅުގަނޑު މި ދަންނަވަނީ، އަޅުގަނޑުމެން ތިބޭނީ ރައްޔިތުންގެ ފަޅީގައޭ. މިކަމުގައި އަޅުގަނޑުމެން ނެތިން، މި ގަވާއިދު ބަދަލުކުރާކަށެއް. ނުކުރާނަން ބަދަލެއް. ވަރަށް ސާފުކޮށް މި ދެންނެވީ، ގަވާއިދު ބަދަލެއް ނުކުރާނަމޭ. ވަރަށް ސާފުކޮށް މި ދެންނެވީ، ގަވާއިދު ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނެއޭ. ގަވާއިދަށް ތަބާވުމަކީ އެންމެންގެ މައްޗަށް ލާޒިމު ކަމެކޭ. މިކަން ކުރައްވަން ޖެހިވަޑައިގަންނަވާނެއޭ. މިއީ ޤާނޫނުއަސާސީއާ އެއްގޮތަށް ކުރާ ކަމެއް. ޤާނޫނުތަކާ އެއްގޮތަށް ކުރާ ކަމެއް. އަދި މިކަން އިތުރަށް ތަންފީޒު ކުރުމަށް އެހީތެރިކަން ދިނުމަށް، އެމް.އެމް.އޭ. އަށް ފަސޭހަކޮށްދިނުމަށް، އެކަމަށް ޚާއްޞަ ފްލެކްސް ޤާނޫނެއްވެސް އިރާދަކުރެއްވިއްޔާ މަޖިލީހުން އަޅުގަނޑުމެން ފާސްކޮށްދޭނަން. މި ސަރުކާރު އޮންނާނީ 100 ޕަސެންޓް ރައްޔިތުންނާ އެކީގައި. ސުވާލެއްވެސް އެއަކު ނޯންނާނެ. އާދެ، އެއީ، އެގޮތަށް އޮތް މައްސަލައެއް.

އަދިވެސް ވަރަށްގިނަ މައްސަލަ ޙައްލުކުރަން އަޅުގަނޑުމެން މަސައްކަތް ފަށައިފިން. ރައްޔިތުންގެ ފަޅީގައި ތިބެގެން. އަޅުގަނޑުމެންނާ ހަވާލުވީއިރުގައި، ގަވާއިދާ ޚިލާފަށް އުޅޭ ބިދޭސީންގެ ޢަދަދު ނުވެސް އެނގޭ. ނުވެސް އެނގޭ. އިންސާނީ ވަގުފާރީގެ ކަންތައް އިންތިހާއަށް ގޮސް، ބައިނަލްއަޤްވާމީ މަސްރަޙުގައި އަޅުގަނޑުމެން އޮތީ ބްލެކް ލިސްޓް ކުރާ ހިސާބުގައި. އެކަމަކު ސަރުކާރުތައް ބަދަލުވަމުން ބަދަލުވަމުންދޭ. އެއްވެސް ސަރުކާރަކުން އަޅައެއްނުލާ. ފަސޭހަގޮތް ޚިޔާރުކުރަނީ. ހިހޫތަނުން. ފަސޭހަގޮތް ޚިޔާރުކުރީ. އެކަމަކު މި ސަރުކާރު އެހެނެއް ނަހަދާނެ. މި ސަރުކާރު އޮންނާނީ ރައްޔިތުންގެ ފަޅީގައި.

އާދެ، 2023 ވަނަ އަހަރު ބިދޭސީން ވަނީ، އަޑުއައްސަވާ މި ތަންކޮޅު. 587 މިލިއަން ޑޮލަރު ރާއްޖެއިން ބޭރަށް ފޮނުވާފައި. 587 މިލިއަން ޑޮލަރު މިދިޔަ އަހަރު ބިދޭސީން ރާއްޖެއިން ފޮނުވި. މީގެތެރޭގައި ގިނައީ ގަވާއިދާ ޚިލާފަށް އުޅޭ ބިދޭސީން. މި ފައިސާ މިތާ ބެހެއްޓިއްޖިއްޔާ ކިހާ ރަނގަޅުތޯ. އާދެ، ގަވާއިދާ ޚިލާފަށް އުޅޭ ބިދޭސީން، މި ބޮޑު މައްސަލަ ޙައްލުކުރުމަށް އަޅުގަނޑުމެން ވަނީ ފުރަތަމަ ދުވަހުން ފެށިގެން މަސައްކަތް ކޮށްފައި. ހޯމް ލޭންޑް ސެކިއުރިޓީ މިނިސްޓްރީއެއް އުފެއްދީ އެ ބޭނުމުގައި. ހޯމް ލޭންޑް ސެކިއުރިޓީ މިނިސްޓްރީގެ ދަށަށް ހުންނާނީ އަޅުގަނޑު ބަދަލުކޮށްފައި، މިކަމަށް ބޭނުންވާނެ ހުރިހާ މުއައްސަސާއެއް. ހުރިހާ މުއައްސަސާއެއް ބަދަލުކޮށްފައި އޮންނާނެ. އެހެންނޫނީ މިވާގޮތަކީ، އެކި ތަންތާނގައި އެކި މުއައްސަސާތައް، އިމިގްރޭޝަން އެއްތާނގައި. ކަސްޓަމްސް އަނެއްތާކު. ލޭބަރ ރިލޭޝަންސް އޮތޯރިޓީ އެހެން ތަނެއްގައި. ދެން މިހެން ކިޔާނެ ކަމެއްނެތް. އެކި ތަންތާ ހުރީމަ، މިކަން ނުވޭ ސަރުކާރުތަކުގައި. އެހެންވީމާ، އެއް އަމްބްރެއްލާއެއްގެ ދަށަށް މި ހުރިހާ މުއައްސަސާތައް އަޅުގަނޑު ގެނައީ، ބިދޭސީންގެ މައްސަލަ ޙައްލުކުރުމަށާއި، ޑްރަގުގެ މައްސަލަ ޙައްލުކުރުމަށާއި، ގޭންގްތަކުގެ މައްސަލަ ޙައްލުކުރުމަށް. ސަރުކާރަށް ރައްޔިތުން ފުރިހަމައަށް އެއްބާރުލުން ދޭނަމަ، އިރާދަކުރެއްވިއްޔާ ހަދަންޖެހޭ ޤާނޫނުތައް ހަދައިގެން، މި ތިން މައްސަލަ އަޅުގަނޑުމެން ޙައްލުކޮށްދޭނަން. ތިން މައްސަލަ ޙައްލުކޮށްދޭނަން. ގޭންގްތަކުގެ މައްސަލަ. ޑްރަގްގެ މައްސަލަ. ބިދޭސީންގެ މައްސަލަ.

އާދެ، މި ވޭތުވެދިޔަ 52 ހަފްތާގެ ތެރޭގައި، އަޅުގަނޑުމެން ވާނީ 5012 ބިދޭސީން ފޮނުވާލާފައި. ޑީޕޯޓްކޮށްފައި. މިއީ އޭގެ ކުރީގެ ތިން އަހަރު ދުވަހުގެ ޖުމްލައަށްވުރެ އިތުރު ޢަދަދެއް. އޭގެ ކުރީގެ ތިން އަހަރަށްވުރެވެސް ގިނަ ޢަދަދެއް. މިއީ، މި އަހަރު އަޅުގަނޑުމެން، މިދިޔަ 52 ހަފްތާގެ ތެރޭގައި، މި ދެންނެވި ގޮތަށް ނުގަވާއިދުން އުޅޭ މީހުން ހޯދައި، ބޭރުކުރި ޢަދަދު. އަޅުގަނޑު ވާހަކަ ދައްކާނީ ނަތީޖާއިން. އަޅުގަނޑު ނުދައްކާނަން ހުސް ވާހަކައެއް. މި ނަތީޖާ ދޮގެއްނުކުރާނަން. މިއީ ފެންނަން ހުރި ޙަޤީޤަތް.

އާދެ، 136 ރަށުގައި އަޅުގަނޑުމެން ވާނީ މި އޮޕަރޭޝަން ހިންގާފައި. "ކުރަނގި އޮޕަރޭޝަން" އަޅުގަނޑުމެން އެއަށް ކީ. އެ އޮޕަރޭޝަން އަޅުގަނޑުމެން ހިންގިން 136 ރަށުގައި. މީގެތެރެއިން އަޅުގަނޑުމެން ވާނީ 12113 މީހުންގެ ބައޯ މެޓްރިކްސް ނަގާފައި. އާދެ، އިރާދަކުރެއްވިއްޔާ އަޅުގަނޑުމެން ކުރިއަށް އޮތް އަހަރުގެ އެޕްރީލް، މޭ މަހާ ހިސާބަށް ދާންވާއިރަށް މި މަސައްކަތް ކޮމްޕްލީޓް ކުރެވޭނެ. އޭރުން ރާއްޖޭގައި އުޅޭ ހުރިހާ ބިދޭސީންގެ ބައޯ މެޓްރިކްސް ނަގައި ނިމުނީ. އޭރުން އަޅުގަނޑުމެންނަށް އެނގޭނެ، މިތާ އުޅެނީ ކޮންބައެއްކަމާއި، އެ މީހުންގެ ތަފްޞީލު. ދެން ރަސްމީ ސިސްޓަމަށް ވައްދަން ބޭނުންވާ މީހުން ވައްދާފައި، ޑީޕޯޓް ކުރާނީ. އަދި އެ މީހުންގެ ހުރިހާ ކަމެއް އިންޓަރނޭޝަނަލް މިންގަނޑުތަކުގެ ތެރެއިން އަޅުގަނޑުމެން ކުރިއަށް ގެންދާނީ. މިހާރު މާލޭގެ އެކި ތަންތާނގައި ކޮއްލަވާނި ހަދައިގެން ކުދިކުދި ތަންކޮޅުގައި، 100، 200 މީހުން މިއުޅޭ މައްސަލަ ޙައްލުކުރެވި، އިރާދަކުރެއްވިއްޔާ އަޅުގަނޑުމެން މިކަމަށް ޙައްލެއް ގެންނާނަން. ރައްޔިތުން އަޅުގަނޑުމެންނާ އެކީގައި ތިބިއްޔާ ގެރެންޓީ، އެކަން ކުރާނަން އަޅުގަނޑުމެން.

އާދެ، އަޅުގަނޑު މިގޮތުން ދަންނަވާލަން ބޭނުންވޭ، އަދިވެސް ބައެއް މަޢުލޫމާތު. އާދެ، ނުރައްކާތެރި އެކްސިޑެންޓްތަކުގައި މަރުވާ މީހުންގެ ޢަދަދު، 2023 ގައި މަރުވި ޢަދަދާ ބަލާއިރުގައި، އަޅުގަނޑުމެން މަގުމަތީގައި މިކަންކަން ބަލަހައްޓައި، ޢާންމުން ހޭލުންތެރިކުރުވުމާއި، ޤާނޫނުތައް ތަންފީޒު ކުރުމާއި، މިކަންކަމުގެ ނަތީޖާއެއްގެ ގޮތުން މިދިޔަ އަހަރަށްވުރެ މި އަހަރުގެ މިހާތަނަށް އައިއިރުގައި، ނުރައްކާތެރި ގޮތުގައި އެކްސިޑެންޓްތަކުގައި މަރުވި މީހުންގެ ޢަދަދު 33 ޕަސެންޓް މަދުކުރެވިއްޖެ.

މިދިޔަ އަހަރާ އަޅައިބަލާއިރުގައި، އަތުލައިގަނެވުނު މަސްތުވާތަކެތީގެ ޢަދަދު، 61 ޕަސެންޓް އިތުރުކުރެވިއްޖެ. 61 ޕަސެންޓް އިތުރުކުރެވިއްޖެ. މީގެކުރީގައި ވާގޮތަކީ، އެ އަތުލައިގަންނަ މަސްތުވާތަކެތި، ކޮންމެވެސް ދޮރަކުން ނުކުންނަނީ. ނޫނީވިއްޔާ އަތުލައިނުގަނެވޭ. އަދި އެއަށްވުރެ އިތުރަށް، މިދިޔަ އަހަރާ އަޅައިބަލާއިރުގައި، އަތުލައިގަނެވުނު ބަނގުރަލުގެ ޢަދަދު، 141 ޕަސެންޓް އިތުރުކުރެވިއްޖެ. 141 ޕަސެންޓް. އަޅުގަނޑުމެން ބޭނުންވަނީ، މަސްތުވާތަކެތި މި ޤައުމުން ނެތިކުރަން. ބޭނުންކުރުން ހުއްޓުވަން. ބަނގުރަލުގެ މައްސަލަ ޙައްލުކުރަން. އާދެ، އޭގެއިތުރަށް، ޢާންމުންގެ ފުރާނައަށް ނުރައްކާވާހެން ބާރު ސްޕީޑްގައި ގަވާއިދާ ޚިލާފަށް މަގުމަތީގައި ދުއްވުންވެސް މިހާރު ވަނީ ވަރަށްބޮޑު ތަނުން ހުއްޓުވިފައި. އާދެ، އެހެންވީމާ، މިހިރަ ކަންތައްތަކަކީ، ސަރުކާރުތަކުން ހަމަ ލޯކުރިމަތިން ފެންނަ ކަންކަން. އަޅައިނުލައި ދޫކޮށްލާފައި ހުރި ކަންކަން. އަޅުގަނޑުމެން ނުތިބޭނަން އެގޮތަކަށެއް.

އާދެ، ކުރިއަށްދާނަން. އާސަންދަ ނިޒާމުގެ ވާހަކަ ވަރަށް ބޮޑަށް ދެކެވޭ. އަޅުގަނޑު މިރޭ މިކަމާ ބެހޭގޮތުން ހުރި ކަންބޮޑުވުންތަކާއި އަދި އެކަމުގައި ހުރި މިސްއަންޑަރސްޓޭންޑިންގސް ފިލުވައިދެވޭތޯ ބަލައިދޭނަން.

އާދެ، މިގޮތުން ބަލާއިރުގައި، އަޅުގަނޑުމެންނަށް މި ފެންނަނީ ޒަމާންތަކެއް ވަންދެން ބޭހުން، ބޭހުގެ ވިޔަފާރިން އަޅުގަނޑުމެން ނިކަމެތި ރައްޔިތުންގެ ފައިސާއިން މުއްސަނދިވަމުންދިޔަ ބައެއް. މި ދަންނަވާ ވާހަކައަކީ، އާދައިގެ ރަށެއްގައިވެސް 14، 12 ފޫޓުގެ ތަންކޮޅެއް ނަގައިގެން ބޭސްފިހާރައެއް ހަދާ މީހާ، މާގިނަ ދުވަހެއް ނުވާނެ، މަސްދޯނި ބަންނާނެ. ބޮޑެތި ގެ ގަންނާނެ. ކިހިނެއްތޯ މިވަނީ؟ ކިހިނެއްތޯ މިވަނީ؟ އާސަންދައިގެ ތެރެއިން މިކުރާ ކަމަކީ، އެތައް ގުނައެއް މައްޗަށް ޕްރޮފިޓް ޕަސެންޓް ޖައްސާލައިގެން، އާސަންދަ ތެރެއިން ރައްޔިތުންގެ ފައިސާ، ރައްޔިތުންނަށް ކަންކަމުގައި ހެޔޮގޮތުގައި ޚަރަދުކުރެވެން ހުރި ފައިސާ ހޯދަނީ ނުގަވާއިދުން. އެހެން ނަމަވެސް، ނިޒާމުގެ ތެރެއިން. މިކަން މިހެން ހިނގުމުގެ ސަބަބުން ޙަޤީޤަތުގައި މި އާސަންދަ ނިޒާމު މިއޮތީ ވަރަށްބޮޑު ތަނުން ބޮއްސުންލާފައި. އަޅުގަނޑުމެން މި ދަންނަވަނީ، އާސަންދަ ރިފޯމް ކުރާ ވާހަކަ. މިކަން ޙައްލުކުރާ ވާހަކަ. އެއްގޮތަކަށްވެސް ރައްޔިތުން މިހާރު ތިޔަ ކުރައްވާ ބޭސްފަރުވާއަށް އެއްވެސްކަހަލަ ބަދަލެއް ނާންނާނެ. ރައްޔިތުންގެ އަތުންނެއް އަޅުގަނޑުމެންނެއް ކުރިއަށް އޮތް އަހަރުތަކުގައި، މި އަންނަ އަހަރުގެ ބަޖެޓަކުންވެސް އަދި ކުރިއަށް އޮތް އަހަރުތަކުގައިވެސް އަޅުގަނޑުމެން މިހާރަކު ނުނަގާ. ފައިސާއެއް ނުނަގާނަން. ވަރަށް ސާފުކޮށް މި ދަންނަވަނީ. ރައްޔިތުން ދައްކަންޖެހޭ އެއްޗެއް ނޯންނާނެ. މިހާރު އޮތް ސިސްޓަމްގެ ތެރެއިން ދާނީ. އެ ނިޒާމު އޮންނާނެ. އެކަމަކު ރިފޯމްކޮށް، މިކަހަލަ ބޭކާރު ޚަރަދު ކުރުން ހުއްޓުވަންޖެހޭ.

އަޅުގަނޑު ދަންނަވާލާނަން ބޭހާ ބެހޭގޮތުން ބައެއް ކަންކަން. އާދެ، އެންމެ ވިޔަފާރިއަކަށް، އެންމެ އިންޖެކްޝަނަކަށް އެއް އަހަރުގެ ތެރޭގައި 33 މިލިއަން ރުފިޔާ، ދައުލަތުގެ މާލިއްޔާއިން އެބަ ޚަރަދުކުރޭ. އާދެ، މި ރާއްޖޭގައި ބޭހުގެ އަގު އުޅެނީ މުޅި ދުނިޔެއަށް ބަލާއިރުގައިވެސް 15 ގުނަ އަގުބޮޑުކޮށް. 15 ގުނަ އަގުބޮޑު ރާއްޖޭގެ ބޭސް، އެހެން ޤައުމުތަކަށްވުރެ. އެހެންވީމާ، މިކަންކަން ޙައްލުކުރަން މި ފެށީ. ބަލްކް ޕްރޮކިއުމަންޓުގެ ތެރެއިން. ބަލްކްކޮށް ބޭސް ގަނެގެން، އެންމެ ތަރައްޤީވެފައި ހުރި ޤައުމުތަކުގައި ހުންނަ ފެންވަރު ރަނގަޅު ބޭސް ގެނެސްގެން، އެ ބޭސް ފޯރުކޮށްދިނުމަށް ބަލްކް ޕުރޮކިއުމަންޓް ނިޒާމެއްގެ ތެރެއިން ބޭސްގަތުމުގެ ނިޒާމު އަޅުގަނޑުމެން މި ގެންނަނީ. ފަށާފައި މިހާރު އެއޮތީ. އޭގެތެރެއިން އަޅުގަނޑުމެން އަގުތައް ކޮންޓްރޯލް ކުރެވިގެންދާނެ. އާދެ، އޭގެ ސަބަބުން އެތައް ސަތޭކަ މިލިއަން ރުފިޔާއެއް އެބަ ސަލާމަތް ކުރެވޭ.

އަޅުގަނޑު ބައެއް ކަންކަން ދަންނަވާލާނަން. މިސާލަކަށް، ޒަޚަމްތަކުގައި އުފެދޭ އިންފެކްޝަނަކަށް ފަރުވާކުރުމަށް ބޭނުންވާ ބޭހެއް. ބަލްކް ޕްރޮކިއުމަންޓްގެ ތެރެއިން ލިބޭނެ 10 ރުފިޔާއަށް. އެހެން ނަމަވެސް، މި ބޭސް މިހާރު ބޭސްފިހާރަތަކުން ވިއްކަނީ، 428 ރުފިޔާއަށް. 10 ރުފިޔާއަށް ޖެހޭ ބޭސް، އާސަންދަ ތެރެއިން 4000 ޕަސެންޓުގެ ފައިދާއެއް، މި ބޭސް ގެނެސްގެން އެބަ ހޯދާ. މިއީ އެންމެ ބޭހެއް. ރައްޔިތުންގެ ފައިސާ. މިކަހަލަ އެބައުޅޭ، 250 ބާވަތުގެ ބޭސް. ޢާންމުކޮށް ބޭނުންކުރާ 250 ބާވަތުގެ ބޭސް. ހަކުރުބައްޔަށް ބޭނުންކުރާ އިންސިއުލިންގއެއް. މި ބަލްކް ޕްރޮކިއުމަންޓް ނިޒާމުތެރެއިން 86/35 ރުފިޔާއަށް ލިބޭނެ. އެކަމަކު މިހާރު މިކަން އިޞްލާޙުނުކޮށް އޮތްއިރުގައި ވިއްކަނީ 316 ރުފިޔާއަށް. 366 ޕަސެންޓުގެ ފައިދާއެއް ލާފައި މި ވިއްކަނީ.

އާދެ، މިކަހަލަ ގޮތަކަށް މިހިރީ ހުރިހާ ބޭހެއްގެ އަގުތައް. އެހެންވީމާ، މި އިސްރާފް ހުއްޓުވުމުގެ ނަތީޖާއެއްގެ ގޮތުން، ގާތްގަނޑަކަށް 550 މިލިއަން ރުފިޔާއާ ހަމަޔަށް، ރައްޔިތުންގެ ފައިސާ އަޅުގަނޑުމެންނަށް މި އާސަންދަ ނިޒާމުގެ ތެރެއިން އެބަ ސަލާމަތް ކުރެވޭ. އެއްގޮތަކަށްވެސް މިއުޅެނީކީއެއް ރައްޔިތުން އާސަންދައިން ކުރާ ބޭސްފަރުވާއަށް އަޅުގަނޑުމެން އެއްޗެއް ނަގާކަށް ނޫން. ނުނަގާނަން. އެކަމެއް ނުކުރާނަން. އެހެންވީމާ، އެ އޮޅުން މިރޭ ވަރަށް ސާފުވާނެ ކަމަށް އަޅުގަނޑު ޔަޤީންކުރަން. މިހާރު އޮތް ނިޒާމުގެ ތެރެއިން އިތުރު އެއްޗެއް ތިޔަބޭފުޅުން، ރައްޔިތުން ދައްކަންޖެހޭގޮތަށް ބަދަލުކޮށް، އެކަން ކުރާކަށެއް އަޅުގަނޑުމެން ނޫޅެން. އެހެން ނަހަދާނަން. އާދެ، އެހެންވީމާ، އެއީ މިހާރު މި ކުރަން އުޅޭ މައިގަނޑު ކަމަކީ. އަދި ފަށާފައި އޮތް މަސައްކަތަކީ. އާދެ، އެހެންވީމާ، އެގޮތަށް އެކަންތައް އަޅުގަނޑުމެން ކުރިއަށް ގެންދާނެ ވާހަކަ ދަންނަވަން.

މީގެއިތުރަށް، ބޭހުގެ އިތުރަށް، ޢާންމުކޮށް ބޭނުންކުރާ ކޮންޒިއުމަބަލްސްތައްވެސް. ބަލްކް ޕްރޮކިއު ކުރާނީ އަޅުގަނޑުމެން. އަދި މި ގެންނަ މެޝިންތައްވެސް. ހަދަން އަޅުގަނޑުމެން ނިންމާފައި މިއޮތް ގޮތަކީ، ހަމަ އެންމެ ބްރޭންޑް، އެންމެ ރަނގަޅު، ދުނިޔޭގެ އެންމެ ފެންވަރު ރަނގަޅު ބްރޭންޑްތަކުގެ މެޝިންތައް ގެންނާނީ. އަޅުގަނޑުމެންގެ އެކި ކެޓަގަރީގެ ހޮސްޕިޓަލްތައް މިހިރީ. އެ ކެޓަގަރީތަކަށް ބޭނުންވާގޮތަށް ބަދަލުކުރަންޖެހޭ ތާވަލު ހަދައިގެން އަޅުގަނޑުމެން ބަލްކްކޮށް ގަންނާނީ. ގަނެގެން އެ އެއްޗެހި ބަދަލުކުރަމުންދާނީ. އެހެންވީމާ، ކޮންޒިއުމަބަލްސްވެސް ބަލްކް ޕްރޮކިއުމަންޓް. މެޝިނަރީ އެންޑް އިކްއިޕްމަންޓްސް، ބަލްކް ޕްރޮކިއުމަންޓް ބޭސް، ބަލްކް ޕްރޮކިއުމަންޓްތައް. އިންޓަރނޭޝަނަލީ ބޭނުންކުރާ މިންގަނޑުތަކުގައި، އެންމެ ފެންވަރު ރަނގަޅު ގޮތުގައި އަޅުގަނޑުމެން މިކަން ކުރާނީ. އެހެންވީމާ، މިކަން ކުރުމަށް އަޅުގަނޑު މަސައްކަތް ފެށީމާ، ރައްޔިތުން އަތުން ބޭސްފަރުވާއަށް އަޅުގަނޑުމެން ފައިސާ ނަގާށޭ އުޅެނީ، ބައެއް މީހުން މި ކިޔަނީ.

ވޭޕް މަނާކުރުން. އާދެ، ވޭޕް މަނާކުރުމާއި، ދުންފަތާ ދުރަށް އަޅުގަނޑުމެންގެ ރައްޔިތުން ގެންދަން އަޅުގަނޑު ބޭނުން. ވޭޕް މަނާކުރަން އަޅުގަނޑު ބޭނުންވި ސަބަބަކީ، ވަރަށް ނުރައްކާ ހިސާބަކަށް މި މުޖުތަމަޢުގައި މި މައްސަލަ ގޮސްފައި އޮތީމަ. މި ވޭޕްގެ ތެރެއިން އެކިކަހަލަ ޑްރަގުގެ ތެރެއަށް ޒުވާނުން އެބަ ގެންދޭ. ޒުވާނުންނެއް ނޫން ހަމައެކަނި. ތުއްތުކުދިންވެސް. ގްރޭޑް 3، 4 ގައި އުޅޭ ކުދިންވެސް އެބަ ގެންގުޅޭ ދަބަހަށްލައިގެން މި ވޭޕް. ނުކުޅެދުންތެރިކަން ހުންނަ ކުދިންގެ ދަބަސްތަކުންވެސް، މި ދެންނެވި އުމުރުގެ ކުދިންގެ ދަބަސްތަކުން ފެނިފައި އެބަހުރި މި ވޭޕް. އެހެންވީމާ، މިކަން ހުއްޓާލަން ބޭނުންވީ އެއްފަހަރާ. ބައެއް ބޭފުޅުން ލަފާދެއްވި، ސްޓެޕް ބައި ސްޓެޕް ގެންދަންވީނޫންހޭ. އެއީއެއް ނޫން އަޅުގަނޑު ހިތުން ރައްޔިތުން ބޭނުންވާ ގޮތަކީ. އެހެންވީމާ، އަޅުގަނޑުމެން ސްވިފްޓް އެކްޝަން ނެގީ. އެކަން މިހާރު އެއޮތީ ރާއްޖޭގައި ވޭޕް އެތެރެކުރުން މަނާވެފައި. އަދި މި އަންނަ މަހުގެ 15 ވަނަ ދުވަހުން ފެށިގެން ވޭޕް ވިއްކުންވެސް މަނާވާނެ. އެއާބެހޭ ބާވަތްތައް ވިއްކުންވެސް މަނާވާނެ. އެހެންވީމާ، އެކަން މިކުރީ ރައްޔިތުންގެ ޙައްޤުގައި.

ދެން ދުންފަތުގެ ވާހަކަ. އާދެ، ބައެއް ބޭފުޅުން ވިދާޅުވަނީ، އެހާ ބޮޑަށް ގިނަ ރައްޔިތުންތަކެއް ދެވިހިފާފައި އޮތް ކަމެއްގައި، ނާޖާއިޒު ފައިދާ ނަގައިގެން ފައިސާ ހޯދާށޭ ތިޔަ އުޅެނީ. ނޫން. އެއެއްނޫން އަޅުގަނޑުގެ ނިޔަތަކީ. އަދި ސަރުކާރުގެ ނިޔަތަކީ. އަޅުގަނޑުމެން ބޭނުންވަނީ މިކަމުން ރައްޔިތުން ދުރަށް ވަޑައިގަންނަވަން. މިއީ ޞިއްޙަތަށް ވަރަށް ގެއްލުންހުރި ކަމެއް. އަޅުގަނޑު އެދެން، ޑޮކްޓަރުން ނުކުމެވަޑައިގެން، ދުންފަތުގެ އިސްތިޢުމާލު ކުރުމުން ހުރި ގެއްލުންތައް ރައްޔިތުންނަށް ކިޔައިދެއްވަންވެސް، މުޅި ޙަޔާތުގައި މީހާ ތަޙައްމަލް ކުރަންޖެހޭ ކަންތައްތައް. އެހެންވީމާ، މިކަމުން ދުރަށްދިޔުން އެއީ، އަޅުގަނޑުގެ ނިޔަތަކީ. ދުރަށް ގެންދިޔުން. އަޅުގަނޑަށް އެނގޭ، ވަރަށް އުނދަގޫވާނެކަން. އަދި ގިނަ ރައްޔިތުން މިކަމާ ނުރުހޭނެކަންވެސް އަޅުގަނޑަށް އެނގޭ. އެކަމަކު ރައްޔިތުން ދެކެ ލޯބިވާތީ. ރައްޔިތުންނަށް ހެޔޮގޮތް އަޅުގަނޑު އެދޭތީ، އަޅުގަނޑު ބޭނުންވީ، ރައްޔިތުން ދުރަށް ވަޑައިގަންނަވާ ކަމަކަށް މިކަން ހެދުމަށް. އަޅުގަނޑު އެދެނީ އީޖާބީ ގޮތެއްގައި މިކަން ތިޔަބޭފުޅުން ބަލައިގަތުން.

މި ފިޔަވަޅު އަޅަން ނިންމިތާ ކައިރީގައި، ވަރަށް ރައްޓެހި، ހަމަ އުމުރުން ދުވަސްވީ ބޭފުޅެއް. އަޅުގަނޑުގެ ވަރަށް ގާތް ރައްޓެއްސެއް އެއްދުވަހަކު މެސެޖް ކުރައްވާފައި ވިދާޅުވަނީ، "ކޮއިފުޅާއޭ، އަމީންދީދީވެސް އަވަހާރަކޮށްލީ ސިނގިރޭޓް މަނާކޮށްގެންނޭ." އަޅުގަނޑު ދެންނެވީ، "ބޭބޭއޭ އެހެންނެއް ނުވާނެއޭ. ރައްޔިތުން ވަރަށް ހޭލުންތެރި ޤައުމެކޭ މިހާރު މި ޤައުމަކީ. ރައްޔިތުންގެ ޙައްޤުގައޭ މިކަން މި ކުރަނީ. އިރާދަކުރެއްވިއްޔާ، ރައްޔިތުން ބަލައިގަންނާނެއޭ މިކަން." އަޅުގަނޑު އެދެނީ، ރައްޔިތުން މިކަން ބަލައިގަންނަން. އަޅުގަނޑު މިކަން މިކުރަނީ ޙަޤީޤަތުގައިވެސް، ޙަޤީޤަތުގައިވެސް ހެޔޮއެދޭތީ. އަޅުގަނޑު ބޭނުންވީ ރައްޔިތުން މިކަމުން ދުރަށްދާން. އެއްފަހަރަކާ ނުދެވޭނެ. އެކަމަކު މަޑުމަޑުން ނަމަވެސް ދުރަށް ވަޑައިގަންނަވާ.

ވީޑިއޯ:

"ބެލެނިވެރިއެއްގެ ހައިސިއްޔަތުން އަޅުގަނޑު ދަންނަވާލަން އޮތީ، ވޭޕް ބޭންކުރުމަކީ، އެއީ ވަރަށް ރަނގަޅު ސިޔާސަތެއް. އެކަމުގައި އަޅުގަނޑުމެންގެ އަންނަން އޮތް ޖީލުތައް ސަލާމަތް ކުރެވިގެންދާނެ. މިހާރުވެސް ސްކޫލްތަކަށް ވަރަށް ބޮޑަށް މިކަން އަންނަނީ ފެތުރެމުން. އަޅުގަނޑުމެންގެ ކުދި ދަރިންނާ ހަމަޔަށް މީތި އެކްސްޕޯރޒް ވެފައި މިއޮތީ. އަޅުގަނޑުމެން އެބަޖެހޭ މިކަން ކޮންމެހެންނެއް ހަދާފައިވެސް ހުއްޓުވަން. އަޅުގަނޑަށް ފެންނަ ގޮތުގައި ވެއްޖިއްޔާ، ދުންފަތުގެ އިސްތިޢުމާލު ކުރުމަށްވުރެވެސް ވޭޕްގެ ނުރައްކާ ބޮޑުކަމަށް އަޅުގަނޑުމެންނަށް މިހާތަނަށް، އަޅުގަނޑުމެންގެ ޑޮކްޓަރުންގެ ލަފަޔާ އެކީގައިވެސް އަޑުއިވިފައި އޮތް ގޮތުގައި ވެއްޖިއްޔާ، ވޭޕުން އިންސާނަކަށް ކުރާ އަސަރު މާ ނުރައްކާތެރި ކަމަށްވެސް އަޑުއިވިފައި ވުމާއެކު، އަޅުގަނޑުމެންގެ ދަރިން މިސާލަކަށް، އޭގެތެރެއަށް ވަދެ، އެކަމުން ހަލާކުވެގެންދިޔުމަކީ އަޅުގަނޑުމެންވެސް ދެކެން ބޭނުންވާ މަންޒަރެއް ނޫންވީމަ."

އާދެ، އެހެންވީމާ، މިއީ އަޅުގަނޑުމެން މިކަން މިކުރާ ސަބަބަކީ.

އާދެ، އަޅުގަނޑުމެން ވާނީ މި 52 ހަފްތާ ތެރޭގައި، މިގޮތަށް ވަރަށް މުހިންމު ކަންތައްތަކެއް ފަށާފައި. އެއަރ އެމްބިއުލެންސްގެ ޚިދުމަތް އަޅުގަނޑުމެން ފެށިން. ފަށައި، މިއަދާ ހަމަޔަށް އައިއިރުގައި، 540 ފަރާތަކަށް މި އެއަރ އެމްބިއުލެންސްގެ ޚިދުމަތް ދީފިން. ބައެއް ބޭފުޅުން އެބަ ވިދާޅުވޭ، އަޅުގަނޑުމެން ފަށާފައި ހުއްޓާލީއޭ. އެހެނެއްނޫން. 540 ފަރާތަކުން އެއަރ އެމްބިއުލެންސްގެ އެހީތެރިކަން ހޯދާފައި ވަނީ.

އާދެ، އަޅުގަނޑު ހަމައެއާއެކީގައި ދަންނަވާލާނަން، ބައެއް ކަންތައްތައް. އަޅުގަނޑުމެން ކުރިން. އައި.ވީ.އެފް. ޓްރީޓްމަންޓް. މިއީ ވަރަށްގިނަ ދެމަފިރިން ބޭނުންވެފައި ހުރި ކަންތައް. އާސަންދަ ތެރެއިން މިހާރު 100 ބޭފުޅުންނަށް މިކަން ހަމަޖެހިގެން އެ ޓްރީޓްމަންޓް މަސައްކަތް ފެށިފައި ވަނީ. ދަރުމަވަންތަ ހޮސްޕިޓަލްގައި ޤާއިމުކުރެވިފައިވާ ޚިދުމަތުގެ ތެރެއިން. އެންޑޯމެޓްރިއޯސިސްއާއި، ޕީ.ސީ.އޯ.އެސް އާދެ، އާސަންދަ ތެރެއިން ހަމަޖެހިފައި ވަނީ. އަދި ދެންހުރި މިކަހަލަ މުހިންމު ކަންތައްތައްވެސް.

އާދެ، މެންޓަލް ހެލްތް ލައިނެއްވެސް އަޅުގަނޑުމެން ޤާއިމުކޮށްފިން. ޚާއްޞަކޮށް، މިކަމަށް ބޭނުންވާ ވަރަށްގިނަ ޒުވާނުން ތިބި. މިއަދާ ހަމަޔަށް އައިއިރު، 1618 ފަރާތަކަށް އަޅުގަނޑުމެން ވާނީ ހަމަ ޕްރޮފެޝަނަލް އެހީތެރިކަން ދީފައި. އަދި ވަރަށްފަހުން ވާނީ އަޅުގަނޑުމެން 911 ޚިދުމަތް ތަޢާރުފްކޮށްފައި، އިމަރޖެންސީ ސަރވިސްއަށް. އާދެ، މީގެތެރެއިންވެސް ހަމަ ޕްރޮފެޝަނަލީ އަޅުގަނޑުމެން އެހީތެރިކަން ދޭނަން. އަޅުގަނޑުމެން ބޭނުންވަނީ، ހަމަ ރައްޔިތުންނަށް ބޭނުންވާ ކެއަރ ފުރިހަމަގޮތުގައި އޮންޓައިމް ދޭ ބައެއް ގޮތުގައި ވާން.

ތެލަސީމިއާ ކުދިންނަށްވެސް ބައްލަވާ! ތެލަސީމިއާ ބައްޔަކީ މި ރާއްޖޭގައި ވަރަށް ބޮޑު ވެފައި އޮތް ކަމެއް. އެކަމަކު ބޯންމެރޯ ޓްރާންސްޕްލާންޓް ހެދުމަށްޓަކައި ވޭތުވެދިޔަ، މި ސަރުކާރު އައުމުގެ ކުރީގައި ފަސް އަހަރު މަގުފަހިކޮށްދީފައި ވަނީ ކިތައް ކުދިންނަށްތޯ؟ އެންމެ ކުއްޖަކަށް. އެންމެ ކުއްޖަކަށް ފަސް އަހަރުގެ ތެރޭގައި. އެކަމަކު މިދިޔަ 52 ހަފްތާގެ ތެރޭގައި، 14 ކުއްޖަކު، އަޅުގަނޑުމެން ބޯންމެރޯ ޓްރާންސްޕްލާންޓް ހަދަން ދައުލަތުގެ ޚަރަދުގައި ފޮނުވައިފިން. އަޅުގަނޑުމެން ވާހަކަ ދައްކާނީ ނަތީޖާއިން. އަޅުގަނޑަށް ހަމައެކަނި މުހިންމީ ނަތީޖާ. އަޅުގަނޑުމެން އިރާދަކުރެއްވިއްޔާ، ޤާނޫނާއި ގަވާއިދާ އެއްގޮތަށް އަދި ޤާނޫނުތަކާއި ގަވާއިދަށް ގެންނަންޖެހޭ ބަދަލެއްވިއްޔާ ގެނެސްގެންވިޔަސް، ކުރަންޖެހުނު ކޮންމެ ކަމެއް ކޮށްގެންވެސް އަޅުގަނޑަށް އަބަދުވެސް މުހިންމީ އަޅުގަނޑު ދާން ބޭނުންވާ ހިސާބަށް ދިޔުން. ނަތީޖާ ނެރުން. އަޅުގަނޑު ވަޢުދުވިން، އަޅުގަނޑުމެން ޤާއިމުކުރާނީ، ރިޒަލްޓް އޮރިއެންޓަޑް ގަވަރންމަންޓެކޭ. އިރާދަކުރެއްވިއްޔާ މި ހިނގަނީ، އަދި ކުރިއަށް އޮތް ހަތަރު އަހަރުވެސް ހިނގާނީ، ތިޔަބޭފުޅުންގެ އެހީތެރިކަމާއެކީގައި އެފަދަ ސަރުކާރެއް.

އާދެ، ގެދޮރުވެރިކަން، ބޯހިޔާވަހިކަން މިއީ އެންމެ ބޮޑު މައްސަލަ، އަޅުގަނޑު ޙައްލުކުރަން ވަޢުދުވި. އާދެ، މިދިޔަ އެއް އަހަރުގެ ތެރޭގައި އަޅުގަނޑުމެން ކުރި އެއްކަމަކީ، ކުރިން އަޅާފައި ހުރި ގެދޮރުތައް، ބޯހިޔާވަހިކަން، މިތަންތަނަށް ނަގަމުންދިޔަ ބައެއް ކުލިތަކާއި، ޖޫރިމަނާތަކަށް ލުއިތަކެއް ގެނައުން. އެގޮތުން ބަލާއިރުގައި، ރަށްރަށުގައި އަޅާފައި ހުރި އަސާސީ ބޯހިޔާވަހިކަމުގެ އަގުތައް ހުރީ އަތްނުފޯރާ ހިސާބުގައި. އަޅުގަނޑުމެން ވާނީ 5000 ރުފިޔާއަށް ހުރި ތަންތަން 3000 ރުފިޔާއަށް، މިހެންގޮސް ކުޑަކޮށްދީފައި ހުންނާނީ. ރަށްރަށުގައި ހުރި ގެދޮރުތައް. ބޯހިޔާވަހިކަން. ހަމައެއާއެކީގައި، ހިޔާ ފްލެޓުން އަޅުގަނޑުމެން ވާނީ ފިނިޝިންގ މަސައްކަތަށް ދިޔަ ޚަރަދު، އެވްރެޖްކޮށް އެއީ، ދެ ލައްކަ ރުފިޔާ ކަމަށް ބަލައި، ވަޢުދުވީ ގޮތަށް، އަގުން އެބައި އުނިކޮށްދީފައި. މިއީ 7000 ފްލެޓަށް، 7000 ޢާއިލާއަށް ލިބުނު ވަރަށްބޮޑު ލުޔެއް. ހަމަ ފޭސް 1 ގައިވެސް އެގޮތަށް. ފޭސް 1 ގައި އަޅާފައި ހުރި ފްލެޓްތަކުންވެސް 20 ޕަސެންޓް އަޅުގަނޑުމެން ވާނީ އަގުން ކަނޑައިދީފައި. މަހުން މަހަށް ދައްކާ އަގުން ކަނޑައިދީފައި.

ހަމަ އޭގެއިތުރަށް، އިޖުތިމާޢީ ބޯހިޔާވަހިކަން މުޅި ރާއްޖޭގައި، ހުޅުމާލެވެސް ހިމެނޭހެން، މާލެވެސް ހިމެނޭހެން، މުޅި ރާއްޖޭގައި ހުރި ހުރިހާ އިޖުތިމާޢީ ބޯހިޔާވަހިކަމުން، ބައެއް މީހުންނަށް ފައިސާ ނުދެއްކިގެން އަރާފައި ހުރި ޖޫރިމަނާވެސް އަޅުގަނޑުމެން ވާނީ މާފުކޮށްދީފައި. 77 މިލިއަން ރުފިޔާ ވާނީ، އެގޮތަށް އަރާފައި އޮތް ޖޫރިމަނާއިން މާފުކޮށްދީފައި.

އެހެންވީމާ، މިކަހަލަ އެތައް ލުޔެއް އަޅުގަނޑުމެން ވާނީ އިޖުތިމާޢީ ބޯހިޔާވަހިކަމުގެ ތެރެއިން ދީފައި. އަދި އޭގެ ތަފްޞީލާއި، ކުރިއަށް ހުރި މަޝްރޫޢުތަކާއި އަދި އިތުރު ބޯހިޔާވަހިކަމުގެ ތަފްޞީލަށް ދާނަން ފަހުން.

މިގޮތަށް ދީފައި ހުރި ލުއިތަކުގެ ތެރެއިން މިދިޔަ ރޯދަމަހު އަޅުގަނޑުމެން ވާނީ ފުރަތަމަފަހަރަށް ސަރުކާރުން ރޯދަމަހުގެ ޑިސްކައުންޓެއްގެ ގޮތުގައި، ކަރަންޓް ބިލާއި، ފެން ބިލްތަކަށް ޑިސްކައުންޓެއް ދީފައި. އެގޮތުން، 142 މިލިއަން ރުފިޔާގެ ޑިސްކައުންޓް ދިނިން. އަދި ހަމައެއާއެކީގައި، 82000 ގޭބީސީއަކަށް 1.6 މިލިއަން ކިލޯގެ ކާޑުގެ ބާވަތްތައް ހިލޭ ދިނިން. މިއީ މިދިޔަ އަހަރުގެ ތެރޭގައި ކުރި މަސައްކަތް. މިއީ ހިލޭ ދީފައި ހުރި އެހީތެރިކަން ސަރުކާރުން. ކުރިން ނުކުރާ ކަންތައްތައް. ކުރިއަށް އޮތް ރަމަޟާންމަހު އަޅުގަނޑުމެން ގަސްދުކުރަނީ، އެސް.ޓީ.އޯ.ގެ އެމް.ޑީ. އަށް އަޅުގަނޑު ދަންނަވައިފިން، ކާޑުގެ ބަދަލުގައި މަސްދަޅުކޭސް. ކޮންމެ ގެޔަކަށް މަސްދަޅު ކޭހެއް ހިލޭ ދޭން.

އާދެ، ދެން އަޅުގަނޑު ހަމަ ދަންނަވާލަން ބޭނުންވަނީ، މިގޮތުން ބަލާއިރުގައި، ގެދޮރުއެޅުމުގެ ލޯނު ސްކީމް އެއީ، އެންމެބޮޑު މަޝްރޫޢު. ގެދޮރާ ބެހޭގޮތުން ހިންގަން އަޅުގަނޑުމެން ނިންމި އެއް މަޝްރޫޢަކީ ލޯން ސްކީމް. ވަރަށްފަހުން އަޅުގަނޑުމެން ވާނީ މި ލޯން ސްކީމް ތަޢާރުފްކޮށްފައި.

އާދެ، މީގައި މިވަނީ ކިހިނެއްތޯ؟ ބޭންކްތަކުން މިއަދާ ހަމަޔަށް އައިއިރުގައި، 10 ޕަސެންޓުން މައްޗަށް އިންޓްރެސްޓް ހުންނަ އަދި އިކުއިޓީއަށްވެސް ވަރަށްބޮޑު އެއްޗެއް ލާންޖެހޭ. އެ މީހާގެ މަހުން މަހަށް ލިބޭ އާމްދަނީވެސް، ވިހި، ތިރީސްހާހަށް ވާންޖެހޭ. މިހެން އޮންނަ، އެފޯޑް ނުކުރެވޭ ލޯނުތަކެއް ނަގައިގެން ގެ އަޅަންޖެހެނީ. އެހެންނޫންތޯ ވަނީ. އެހެން ނަމަވެސް، އަޅުގަނޑުމެން މި ތަޢާރުފްކުރި ލޯން ސްކީމް މިހާރު އެއޮތީ ތަޢާރުފްކޮށްފައި. އެޕްލައި ކުރެވޭނެ. ހޮވޭ މީހުންނަށް ލޯނުތައް ލިބޭނެ. އިސްލާމިކް ލޯން ސްކީމެއް އެއީ. އިސްލާމިކް ލޯން ސްކީމެއް. ޝަރީޢާ ކޮމްޕްލައަންޓް ލޯން ސްކީމެއް އަޅުގަނޑުމެން ތަޢާރުފްކުރީ. އެހެންވީމާ، ފަސް ޕަސެންޓުގެ ސަރވިސް ޗާރޖެއް. އަޅުގަނޑު ވަޢުދުވީ ގޮތަށް، ފަސް ޕަސެންޓުގެ ސަރވިސް ޗާރޖެއް ނަގާ ލޯނު ސްކީމެއް މިއޮތީ ތަޢާރުފްކޮށްފައި. މިއިން މުޅި ރާއްޖޭގެ ހުރިހާ ރަށެއްގައި ތިބި ރައްޔިތުންނަށްވެސް ލޯނު ނެގޭނެ. ހުރިހާ ރަށަކަށްވެސް. ބައެއް ބޭފުޅުންނަށް އޮޅިވަޑައިގަންނަވާ އެބަ، ތިމަންނަމެން ރަށްކުޑަވީމަ ލޯނެއް ނުނެގޭނެއޭ. ނޫން. އެންމެ ކުޑަ އާބާދީގެ ރަށުގެ ރައްޔިތުންނަށްވެސް އެއް މިލިއަން ރުފިޔާއާ ހަމަޔަށް މި ލޯނު ނެގޭނެ. އެއް މިލިއަން ނަގައިގެން، އެ މީހާގެ ގޯތީގައި، މިހާރު ގެއެއް ނެތިއްޔާ، އަޅާ ފުރަތަމަ ގެޔަކީ އެއީ ކަމަށްވަންޏާ، ލޯނު ނަގައިގެން، ގެ އެޅޭނެ. އިސްލާމިކް ލޯނުގެ ތެރެއިން.

ދެން އަޅުގަނޑުމެން ކަނޑައެޅީ، އަރބަން ސެންޓަރ، ނޫނީވިއްޔާ މިހާތަނަށް އައިއިރުގައި ތަރައްޤީވެފައި ހުރި ބައެއް ރަށްތައް ޚިޔާރުކޮށްފައި، އެ ރަށްތަކުގައި ކޮންސްޓްރަކްޝަންސް ކޮސްޓްވެސް އަގުބޮޑުވީމައާ އެކީގައި، އަޅުގަނޑުމެން ނިންމީ، ތިން މިލިއަނާ ހަމަޔަށް ކެޕް ގެންދަން. އެހެންވީމާ، އެގޮތަށް ކަނޑައެޅި ލިސްޓު ވާނީ ގެޒެޓްވެސް ކޮށްފައި. އެ ރަށްތަކުގައި ތިން މިލިއަނާ ހަމަޔަށް ނެގޭ ލޯނު ނެގޭނެ.

ދެން މާލެ. މާލޭގައި ތަކެތި އެންމެ އަގުބޮޑީ. އެހެންވީމާ، މާލެ ސަރަޙައްދު. މާލެ، ވިލިމާލެ، ހުޅުމާލޭގައި، ހަ މިލިއަނާ ހަމަޔަށް ލޯނު ނެގޭ. އަދި ގޭބީސީ، އަދި ޢާއިލާ ބަހާފައި، ގޯތި ތަންތަންކޮޅު ބަހާލާފައި ހުރެއްޖިއްޔާ، އެއްވެގެން، ބެހެނިވެރިން އެއްވެގެން ދިހަ މިލިއަނާ ހަމަޔަށް ލޯނު ނެގޭނެ. ދިހަ މިލިއަނާ ހަމަޔަށް. މިއިން ތިން ކަމެއް ކުރެވޭ. އެއްގޮތަކަށްވެސް ގެ ނާޅައި ހުރިއްޔާ، ނޫނީ އަލުން އަޅަންޖެހޭ ގެއެއްވިއްޔާ، ގެ އެޅުމަށް، ނޫނީވިއްޔާ ހަދަން ފަށައި ނުނިމިހުރި ގެ ނިންމުމަށް، ނޫނީވިއްޔާ ގެ މަރާމާތު ކުރުމަށް. މި ތިން ކަންތަކަށް މި ލޯނު ނެގޭނެ. ފަސް ޕަސެންޓް އިންޓްރެސްޓްގައި. ދެން އެއް މިލިއަނާ ހަމަޔަށް ނަގާ ލޯނު ނަގާ މީހުން އިކުއިޓީ ބަހައްޓާކަށްވެސް ނުޖެހޭ. ވަރަށް ލުއިކޮށް، ދެންހުރި ލޯނުތަކަށްވެސް މި އިކުއިޓީ ބައިވެސް އޮތީ. ވަރަށް ލުއިކޮށް.

އެހެންވީމާ، ޙަޤީޤީ މާނައިގައި އަތްފޯރާފަށުގެ އިޖުތިމާޢީ ލޯން ސްކީމެއް މިއޮތީ، އިސްލާމިކް ފައިނޭންސް ޝަރީޢާ ކޮމްޕްލައަންޓް ލޯން ސްކީމެއް ތަޢާރުފްކޮށްފައި. ރާއްޖޭގެ ހުރިހާ ރައްޔިތުންނަށް ފައިދާ ކުރާނެ ލޯން ސްކީމެއް މިއީ. އެ ލޯން ސްކީމް މިއޮތީ ހުޅުވާލާފައި މިހާރު. މިކަމަށްޓަކައި މި އަންނަ އަހަރުގެ ބަޖެޓުގައި، މި ފަންޑަށް އަޅުގަނޑުމެން 1000 މިލިއަން ރުފިޔާ، އެއް ބިލިއަން ރުފިޔާ ހިމަނާފައި އޮންނާނެ. އަދި ކޮންމެ އަހަރަކު އިތުރު 1000 މިލިއަން ލާނެ. ދެން މި ބޭންކިންގ ނިޒާމުގެ ތެރެއިން، ސަރުކާރުން މި ލޯން ސްކީމަށް، ފަސް ޕަސެންޓުން މައްޗަށް އަރާ ބޭންކުތަކަށް މި ފައިސާ ދައްކާނެ. އިފެކްޓިވްލީ މި އަންނަ އަހަރު އެކަނިވެސް ރައްޔިތުންނަށް ދެ ބިލިއަން ރުފިޔާއަށްވުރެ ގިނަ ލޯނު މި ސްކީމުން ދެވޭނެ. ދެ ބިލިއަނަށްވުރެ ގިނަ ލޯނު ދެވޭނެ މި އަންނަ އަހަރު. އަދި ދެން އަންނަ އަހަރުވެސް ދެ ބިލިއަން ރުފިޔާ ދެވޭނެ.

އެހެންވީމާ، ރާއްޖޭގެ ރައްޔިތުންގެ ތެރެއިން އަމިއްލައަށް ގޭގައި ގެދޮރުއަޅަން، ނޫނީވިއްޔާ ނިންމަން ހުރި ގެ ނިންމަން، ނޫނީ މަރާމާތު ކުރަން ހުރި ގެއެއްވިއްޔާ މަރާމާތު ކުރަން، ފަސް ޕަސެންޓަށްވުރެ ކުޑަ ސަރވިސް ޗާރޖަކުން އޮންނަ އިސްލާމިކް ފައިނޭންސް ލޯން ސްކީމެއް މިއޮތީ ހުޅުވާލާފައި. މިއީ ރާއްޖޭގައި ދުވަހަކުވެސް ކުރި ކަމެއް ނޫން. އަޅުގަނޑުމެން ވާހަކަ ދައްކާނީ ނަތީޖާއިން. ޢަމަލުން.

އާދެ، ދެން ވާގޮތަކީ، ކުރީގައި މިހެން އޮންނަ އެއްވެސް އެއްޗެއްގައި މަސްވެރިންނަކަށް ބައިވެރިއެއްނުވެވޭ. އެހެން ނޫންތޯ. މަސްވެރިންނަކީ އާމްދަނީ ލިބޭ ބައެއް ގޮތަކަށް ބޭންކިންގ ނިޒާމު ބަލައެއްނުގަނޭ. އަޅުގަނޑުމެން ވާނީ މަސްވެރިންގެ ދަފްތަރެއް ހަދަން ފަށާފައި، ވަޢުދުވީ ގޮތަށް. މަސްވެރިންގެ ދުވަހު އިރާދަކުރެއްވިއްޔާ ދަފްތަރުގައި ހުރިހާ ދޯނިތަކެއް، ހުރިހާ އެންމެން ބައިވެރިވާނެ. މިހާރުވެސް ގާތްގަނޑަކަށް 100 ޕަސެންޓާ ހަމަޔަށްވެސް. ނަތީޖާއަކީ މަސްވެރިންނަކީވެސް ބޭންކުތަކުން އާމްދަނީ ލިބޭގޮތުގައި ބަލައިގަތުން. އެހެންވީމާ، މި ލޯން ސްކީމަށް މަސްވެރިންވެސް އެބަ ކޮލިފައިވޭ. އެހެންވީމާ، އެގޮތަށް މިކަން މި ކުރަނީ.

ހަމައެއާއެކީގައި، އަޅުގަނޑުމެން ބަންކަރިންގ ސަރވިސް ފަށައިފިން. ސީ ޓު އެއަރ ކާގޯ ޚިދުމަތް ފަށައިގެން މިހާރު 11 އެއަރލައިނަކުން އެ ޚިދުމަތާ ގުޅިއްޖެ. ރޭގައި ޑިވެލޮޕްމަންޓް ބޭންކް އޮފް މޯލްޑިވްސް މިވަނީ ހުޅުވާފައި.

އެހެންވީމާ، އަޅުގަނޑުމެން މަސައްކަތް މި ކުރަނީ، ވަރަށް ޖޯޝުގައި، ޙަޤީޤީ ނަތީޖާ ނެރުމުގެ ނިޔަތުގައި. ވަރަށް ބާރު ސްޕީޑްގައި.

އާދެ، ހަމަ އެގޮތުން، ލާމަރުކަޒީ ނިޒާމަށް ބަލާއިރުގައިވެސް އަޅުގަނޑުމެން ވާނީ ރަށްތަކަށް، ކައުންސިލްތަކަށް މިހާރު ރަށްތައް ހޯދުމުގެ ފުރުޞަތު ދީފައި. މިހާރު 28 ރަށެއް އެވަނީ ލާމަރުކަޒީ ނިޒާމުގެ ތެރެއިން ދޫކޮށްފައި. ކައުންސިލްތަކުން އެ ރަށްތައް ނަގައިގެން، ރަށުގެ ރައްޔިތުންނަށް ފައިދާވާ ކަންތައްތައް ކުރުމަށް. އެހެންވީމާ، މިކަހަލަ ވަރަށްގިނަ ފުރުޞަތުތައް އަޅުގަނޑުމެން މި ދެނީ.

އިހަކަށްދުވަހު އަޅުގަނޑުމެން މި ލޯންޗްކުރީ، އައި.ޑީ. ކާޑާއި، ޕާސްޕޯޓް، ކޮންމެ އަތޮޅެއްގައި ތިބެގެން ހެއްދޭ، އިޝޫކޮށްގެން ލިބޭގޮތް ހެދުން. މި އަންނަ އަހަރު ނިމޭއިރުގައި، މި ނިޒާމުގެ ތެރެއިން ކޮންމެ އަތޮޅެއްގައި، މަދުވެގެން ވެރިކަން ކުރާ ރަށުގައި އަދި ބައެއް އަތޮޅުތަކުގައި، އިތުރު ރަށްތައްވެސް ހިމެނޭހެން، މި އަންނަ އަހަރު ނިމޭއިރުގައި، ހުރިހާ އަތޮޅެއްގައި، އެ އަތޮޅެއްގައި ތިބެގެން އައި.ޑީ. ކާޑު ލިބޭނެ. ޕާސްޕޯޓް ލިބޭނެ. މިހާރު އެވަނީ ވިލިމާލޭގައި ތިބެގެން، މިހާރު މި ފެށޭ ހަފްތާއިން ފެށިގެން ލިބޭގޮތަށް ހަމަޖެހިފައި. ހުޅުމާލޭގައި ފޭސް 1 ގައި ތިބެގެން ލިބޭނެ. ހުޅުމާލެ ފޭސް 2 ގައި ތިބެގެން ލިބޭނެ. މާލެ އަންނާކަށް ނުޖެހޭނެ.

އާދެ، ކައުންސިލް އިދާރާތައް އެޅުމަށްޓަކައިވެސް މި ބޮލަށް ވެއްޓިފައި ހުރި ތަންތަން، ވެއްޓެންވެފައި ހުރި ތަންތަން. އެހާވެސް އަޅައިނުލާ ހުރީ. ލާމަރުކަޒީ ނިޒާމޭ މި ބޭފުޅުން ކިޔަނީ ނަމަކަށް. މި ހުރިހާ ދުވަހު ފުރުޞަތު ލިބިގެންދިޔައިރުގައި، އެއްވެސްވަރަކަށް ނެތޭ މިތަންތަނާ އަޅައިލާފައެއް. އެހެން ނަމަވެސް، އަޅުގަނޑުމެން ޙަޤީޤީ މާނައިގައި ރައްޔިތުންނަށް ޚިދުމަތް ކުރަން އައީ.

އަޅުގަނޑުމެން މިހާރު ދެ މަޝްރޫޢެއް މި ހިންގަނީ. އެއް މަޝްރޫޢަކީ، ޗައިނާ ސަރުކާރުން ހިލޭ އެހީގެ ދަށުން 50 ރަށެއްގެ ކައުންސިލް އިމާރާތް އެޅުމުގެ މަޝްރޫޢު. އިރާދަކުރެއްވިއްޔާ މި އަންނަ އަހަރު އަޅައިދޭނަން. 50 ރަށެއްގެ ކައުންސިލް އިމާރާތް. އަނެއް މަޝްރޫޢަކީ، ކޮންޓްރެކްޓަރ ފައިނޭންސް އުޞޫލުން، ސަރުކާރުން އެ އޮންނަ އުޞޫލަކުން ޕޭކުރާގޮތަށް، އަދި އިތުރު 50 ރަށުގައި އިމާރާތް އަޅާގޮތަށް. އެހެންވީމާ، ޖުމްލަ 100 ރަށުގެ ކައުންސިލް އިމާރާތް، އިރާދަކުރެއްވިއްޔާ މި އަންނަ އަހަރު އަޅަން ފަށާނެ. މި ދައުރު ތެރޭގައި ނިންމާނަން.

އާދެ، ހަމައެއާއެކީގައި، އަޅުގަނޑު އަބަދުވެސް ދަންނަވަން، ފުރަތަމަ ދުވަހުން ފެށިގެން. އަޅުގަނޑުމެން މިއުޅެނީ ދެ ވައްތަރެއްގެ ތަރައްޤީއެއް ކުރާށޭ. ހަމައެކަނި އިމާރާތް އަޅާކަށް ނޫނޭ. ފިކުރީ ބިނާވެސް ކުރާށޭ. ސިކުނޑި ބިނާކުރާށޭ. ދީނީގޮތުން އަޅުގަނޑުމެންގެ ރައްޔިތުން ތަރައްޤީކުރާށޭ. އަޚްލާޤީ ގޮތުން އަޅުގަނޑުމެންގެ ރައްޔިތުން، ޒުވާނުން ތަރައްޤީ ކުރާށޭ. އެގޮތުން ބަލާއިރުގައި، އަޅުގަނޑުމެން ވާނީ ވަރަށްގިނަ ޒުވާނުންނަށް ފުރުޞަތުތައް ދީފައި. 270 ޒުވާނުން ޚަޠީބުންނަށް ހެދުމަށްޓަކައި ތަމްރީނު ދެވިއްޖެ. އަދި ހަމައެއާއެކީގައި ވާނީ މިގޮތުން، ޒުވާނުންނަށް ވަރަށްގިނަ ފުރުޞަތުތައް ހޯދައިދިނުމަށްޓަކައި، ދީނީ ރޮނގުން ވަރަށްގިނަ ކަންތައްތަކެއް ފޯރުކޮށްދޭން ފަށާފައި.

އާދެ، ތަޢުލީމީ ދާއިރާއަށް ބަލާއިރުގައިވެސް ވަރަށްގިނަ ކަންތައްތައް އަޅުގަނޑުމެންނަށް ކުރެވިއްޖެ. އާދެ، މި އަހަރުގެ ތެރޭގައި، ފުރަތަމަ ފަހަރަށް، 600 އަށްވުރެ ގިނަ ފުރުޞަތު ދެވިއްޖެ، ތަޢުލީމީ ދާއިރާގެ ޓީޗަރުންނަށް ވުމުގެ ފުރުޞަތު. މިއީ ވޭތުވެދިޔަ 10 އަހަރު ތެރޭގައިވެސް، 10 އަހަރު ތެރޭގައިވެސް އެންމެ ގިނަ ފުރުޞަތު، ޓީޗަރ ޓްރޭނިންގއަށް ދެވުނު އަހަރު.

އާދެ، ހަމައެއާއެކީގައި، އޭ ލެވެލް ކިޔަވާ ޕަސެންޓޭޖްވެސް މިހާރު ވަނީ ކުރީ އަހަރުތަކަށްވުރެ 70 ޕަސެންޓް އިތުރުކުރެވިފައި.

އާދެ، އަޅުގަނޑު މި ފުރުޞަތުގައި، ކުރިން އަޅުގަނޑު ދެއްކި ވާހަކައިން، އައި.ވީ.އެފް.އާ ގުޅޭގޮތުން އަޅުގަނޑު އެދެން، އެކަމާ ގުޅޭ ވީޑިއޯ ކްލިޕް އަޅުވައިދިނުން.

ވީޑިއޯ:

"އެހެން ނަމަވެސް، ދަރިޔަކު ލިބުމުގެ އުފަލެއް ނުލިބޭ. އަޅުގަނޑުމެން ދަރިޔަކު ހޯދަން އެތައް ބޭސްފަރުވާއެއް ރާއްޖެއިންނާއި، ރާއްޖެއިން ބޭރުންވެސް ކުރެވިއްޖެ. އައި.ވީ.އެފް. ހެދުމަކީ، އަޅުގަނޑުމެން ކަހަލަ ނިކަމެތި ރައްޔިތުންނަށް ވަރަށްދަތި ކަމެއް. ނަމަވެސް، މިއަދު އިރާދަކުރެއްވިއްޔާ، اَلْحَمْدُ للَّهِ، އެ ހުވަފެން ޙަޤީޤަތަކަށް ވެއްޖެ. ސަރުކާރުން އާސަންދަ މެދުވެރިކޮށް، އައި.ވީ.އެފް. ޚިދުމަތް ދިނުމަކީ، އަޅުގަނޑުމެން ކަހަލަ ނިކަމެތި ރައްޔިތުންނަށް ލިބުނު އުންމީދެއް. އުފާވެރިކަމެއް. އަހަރުމެން ވަރަށް ދުވަހުއްސުރެ ކުރަމުން އައި އުންމީދެއް ޙަޤީޤަތަކަށްވީމަ، ދެން ނޭނގެ ބުނާނެ އެއްޗެއްވެސް. އެ އިޙްސާސްތައް ބުނެދޭންވެސް އުނދަގޫ. اَلْحَمْدُ للَّهِ."

އާދެ މިފަދަ އެތައް ބޭފުޅުންނެއްގެ އިޙްސާސްތައް ހުރީ މިހެން. އެހެންވީމާ، އަޅުގަނޑުމެން ރައްޔިތުންގެ އިޙްސާސްތައް އަޑުއަހައިގެން، ރައްޔިތުންނަށް ބޭނުންވާ ކަންތައްތައް އިރާދަކުރެއްވީތީ މިކޮށްދެނީ.

މި ހުރިހާ ކަމެއް މި ކުރަނީ، ކުރީގައި ކަންތައްތައް ކޮށްފައި، ޚަރާބުކޮށްލާފައި އޮތް އަޅުގަނޑުމެންގެ އިޤްތިޞާދުގެ ތެރެއިން ކަންތައްތައް ރަނގަޅުކޮށްގެން. އޭގެ އެއް މިސާލަކީ، އަޅުގަނޑު ކުރިން ދެންނެވި ފަދައިން، ފައިސާ ޗާޕްކުރުން.

ހަމަ އޭގެއިތުރަށް، ބަދަލުގެ ގޮތުގައި ދޫކޮށްފައި ހުރި ފައިސާ. އާދެ، ނިޒާމުން ބޭރުން ޤާނޫނާއި ގަވާއިދާ ޚިލާފަށް، މިދިޔަ ސަރުކާރުން ވަނީ 1000 މިލިއަން ރުފިޔާ، ބަދަލުގެ ގޮތުގައި ދީފައި. އެއް ބިލިއަން ރުފިޔާ. އެއް ބިލިއަން ރުފިޔާ. އަޅުގަނޑުމެންނެއް އެކަމެއް ނުކުރަން. އަޅުގަނޑު ކުރި ކަމަކީ، އައިގޮތަށް އައިސް ސެޓްލްމަންޓް ކޮމިޓީ އުވާލީ. އެހެންވީމާ، މިހާރަކު ބަދަލެއް ނުދޭނެ. އެކަމަކު މި ބޭފުޅުން ކުރެއްވި ކަމަކީ، ސިޔާސީ ބޭނުމުގައި، އެކިއެކި އުޒުރުތައް ދައްކައިގެން، 1000 މިލިއަން ރުފިޔާ، ރައްޔިތުންގެ ފައިސާއިން ނަގައި، ދިނީ.

އާދެ، ހަމަ އެއާއެކީގައި، މިދިޔަ އަހަރުތަކުގައި ނުހޯދާ ހުރި ރައްޔިތުންގެ ފައިސާ، ދައުލަތަށް ވައްދަންޖެހޭ 16 ބިލިއަން ރުފިޔާ އެބައޮތް. 16 ބިލިއަން ރުފިޔާ. އޭގެތެރެއިން މިދިޔަ 52 ހަފްތާގެ ތެރޭގައި، 2.7 ބިލިއަން ރުފިޔާ، އަޅުގަނޑުމެން ވައްދައިދީފިން. 2.7 ބިލިއަން ރުފިޔާ.

އަޅުގަނޑުމެން ހަވާލުވީއިރުގައި، މަސްވެރިންނަށް ނުދީ 250 މިލިއަން ރުފިޔާ އޮތް. 250 މިލިއަން ރުފިޔާ. އަޅުގަނޑުމެން ވާނީ އެ ހުރިހާ ފައިސާއެއް ދީ، އޭގެއިތުރަށްވެސް، މިދިޔަ ނޮވެންބަރު 11 އާ ހަމަޔަށް ދޭންހުރި އެއް ބިލިއަން ރުފިޔާއަށްވުރެ ގިނަ ފައިސާ ދީ، އެ ޑޭޓާ ހަމަޔަށް އައިއިރުގައި، ދޭންހުރި ހުރިހާ ފައިސާއެއް ދީ ނިންމާފައި ވާނީ މަސްވެރިންނަށް. އެހެންވީމާ، އެއީ އަޅުގަނޑުމެން ފައިސާ ޗާޕްނުކޮށް ކުރާ ކަންކަން ހުރިގޮތަކީ.

އާދެ، ދެން އަޅުގަނޑު ބަލައިލާނަން. ގުޅީފަޅު ހިއްކުމުގެ ކަންތައް، އަޅުގަނޑުމެންނާ ހަވާލުވީއިރު އޮތް ގޮތުގެ މައްޗަށް. ގުޅީފަޅު ހިއްކަން ފަށާފައި އޮތީ، 44 ޕަސެންޓް މަސައްކަތް ނިންމާފައި. އަޅުގަނޑުމެން ވާނީ މިހާރު އެ ބައި ހިއްކައި ނިންމާފައި. މުޅި ޕްރޮޖެކްޓް، އެއީ އަޅުގަނޑުމެން އިތުރަށް ހިއްކަން ބުނި ބައި. އެއީ އެންމެ ފުން ސަރަޙައްދު. އެތަންވެސް އިރާދަކުރެއްވިއްޔާ ވަރަށް އަވަހަށް ހިއްކަން ބަޔަކާ ހަވާލުކުރާނަން. އެތަން ނުލައި ބަލައިފީވިއްޔާ އެކީ ހިއްކައި ނިމިއްޖެ. އެތަން ހިމަނައިގެން، ގާތްގަނޑަކަށް 70 ޕަސެންޓް އެއޮތީ ހިއްކިފައި. މި އަންނަ އަހަރުގެ ތެރޭގައި މުޅި ގުޅީފަޅު ހިއްކައި ނިންމައިދޭނަން.

އާދެ، ފޭސް 3. ފޭސް 3ންވެސް، ނޫނީވިއްޔާ ފަޅުތެރެއިން، ހުޅުމާލެ ފަޅުތެރެއިން ގޯތިދިންއިރުގައި، ނުހިއްކާ އޮތް ތަން. އެތަން 17 ޕަސެންޓް ހިއްކާފައި އޮތީ އަޅުގަނޑުމެން ހަވާލުވިއިރުގައި. މިހާރު އެތަން 38 ޕަސެންޓް ހިއްކައި ނިމިއްޖެ. އިރާދަކުރެއްވިއްޔާ އެންމެ ލަސްވެގެން، ކުރިއަށް އޮތް ހައެއްކަ މަސް ދުވަހުގެ ތެރޭގައި، އަޅުގަނޑުމެން އެކީގައި ހިއްކައި ނިންމާނަން.

ހަމަ އެގޮތަށް، ގިރާވަރުފަޅުވެސް. ގިރާވަރުފަޅު އަޅުގަނޑުމެންނާ ހަވާލުވިއިރު އޮތީ، 19 ޕަސެންޓް ހިއްކާފައި. މިހާރު 33 ޕަސެންޓް ހިއްކިއްޖެ. އާދެ، މި މަޝްރޫޢުގެ ވާހަކަ ކުޑަކޮށް ދަންނަވާލާނަން. މި މަޝްރޫޢުގައި މިއޮތީ ނުގަވާއިދުން އެއްވެސް އިންޞާފެއް ނެތްގޮތަށް، ބޭރުގެ ފަރާތަކަށް ވަރަށް ގިނަ ބިންތައް ލިބޭގޮތަށް ލޮޕްސައިޑަޑް އެގްރީމެންޓެއް ހަދައިގެން. ވަރަށް ގަޑުބަޑުގޮތަކަށް އެގްރީމެންޓް ހަދާފައި އޮތީ. އޭގެތެރެއިން ނުކުންނަން އަޅުގަނޑުމެން މި މަސައްކަތް ކުރަނީ މިހާރު. ނުކުމެ، އެތަން ރައްޔިތުންނަށް އެންމެ ފައިދާވާނެ ގޮތަށް، އެންމެ ކުޑަ ޚަރަދަކުން އެތަން ހިއްކައި ނިންމަން. އެހެންވީމާ، އިރާދަކުރެއްވިއްޔާ، އެކަން ކޮށް، އަޅުގަނޑުމެން ގިރާވަރުފަޅުވެސް، މި އަންނަ އަހަރުގެ ތެރޭގައި ހިއްކައި ނިންމާނަން.

އާދެ، އޭރުން ކަނޑުންނާއި ފަޅުން ދިން ގޯތިތައް ދީ ހަވާލުކޮށް ނިންމޭނެ އަޅުގަނޑުމެންނަށް. އަޅުގަނޑުމެން ވާނީ ފޭސް 2 ގައި ހުރި، ހިކިފަސްތަނުން ދީފައި ހުރި ގޯތިތަކަށް މިހާރު ރަޖިސްޓްރީވެސް ހަދައިދީ ނިންމާފައި. ފޭސް 2 ގެ އެންމެންނަށް ރަޖިސްޓްރީ ހަދައިދީ ނިންމައިފިން، ބިންވެރިޔާ ސްކީމުން. ދެން ފޭސް 3، އަޅުގަނޑު ދެންނެވި ފަދައިން، ހިއްކަމުން މިދަނީ. އެތަން ހިއްކައި ނިމުނުހާ އަވަހަކަށް އެތާނގެ ރަޖިސްޓްރީތައް ލިބޭނެ. ގިރާވަރުފަޅުވެސް ހިއްކައި ނިމުނީމަ. އަދި ގުޅީފަޅުވެސް. އެހެންވީމާ، އެތަންތަން ހިއްކެމުންދާވަރަކަށް، ހިއްކައި ނިމުނުހާ އަވަހަކަށް، އަޅުގަނޑުމެން އެތަންތަނުގެވެސް ރަޖިސްޓްރީ ހަވާލުކުރާނަން އިރާދަކުރެއްވިއްޔާ. އަޅުގަނޑުމެން ދެން މި ފަށަނީ، އެ ތަންތަނުގެ ޢުމްރާނީ ތަރައްޤީގެ މަސައްކަތްތައް.

ދެން މި ފްލެޓް ލިސްޓް، އެންމެ ގިނަ މީހުންނަށް މި ކަންބޮޑުވާ ލިސްޓަކީ. އާދެ، އަޅުގަނޑު ދެންނެވީ ކީކޭތޯ؟ އަޅުގަނޑު ދެންނެވީ، ގެޒެޓް ކޮށްފައި އޮތް އެއްވެސް ލިސްޓެއް، އެއީ، ގޯތިވިޔަސް، ފްލެޓްވިޔަސް އަތުލުމަކީ އަޅުގަނޑުގެ ސިޔާސަތެއް ނޫނޭ. އެކަމެއް ނުކުރާނަމޭ. އެހެން ނަމަވެސް، އަބަދުވެސް ކަންކުރާ އުޞޫލުން، ގަވާއިދާ ޚިލާފަށް އޮޅުވާލައިގެން، މަކަރު ހަދައިގެން ޑޮކިއުމެންޓްސްތައް ނުލައި، އެކަން ކޮށްފައި އޮވެއްޖިއްޔާ، އެ މީހަކު އަތުން ކެންސަލްވާނެއޭ. އެއީ، އެންމެ ކުރިއްސުރެވެސް އެކަން ކުރާ ގޮތޭ. އެހެންވީމާ، އެއީކީއެއް، އެ ވަޢުދުގެ ތެރޭގައި ގެންނާކަށްޖެހޭ ވާހަކައެއްވެސް ނޫން. އެއީ، އަބަދުވެސް އޮންނަ ގޮތޭ. އެކަމަކު އެކަހަލަ މައްސަލައެއް ނެތް، ރަނގަޅަށް ހުށަހަޅައިގެން، ޕޮއިންޓް ހަމަވެގެން ލިބިފައި ހުރި އެއްވެސް މީހަކު ހުރިއްޔާ، އެއްވެސް މީހަކު އަތުން ގޯއްޗެއްވިޔަސް، ފްލެޓެއްވިޔަސް އަތެއްނުލާނަމޭ. އެހެންވީމާ، ނޫންތޯ، ފޭސް 2ގެ ހުރިހާ ގޯއްޗެއް ހަވާލުކުރީ. ފޭސް 3 ހިއްކައި ނިމޭއިރަށް ހަވާލުކުރާނަން. ގިރާވަރުފަޅު ނިންމޭއިރަށް ހަވާލުކުރާނަން. ގުޅީފަޅު ނިންމޭއިރަށް ހަވާލުކުރާނަން.

އެހެންވީމާ، ފްލެޓް ލިސްޓުގައިވެސް ވެގެން މިއުޅޭ ގޮތަކީ، ހައުސިންގ މިނިސްޓްރީން ވަރަށްގިނަ ވަގުތު އެބަ ހޭދަކުރޭ އެކަމުގައި. އަދި އެކަމަށްޓަކައި ނަގާފައި ހުރި ކޮމިޓީތަކުންވެސް އެކަން އޯވަރސީ ކުރަމުން އެގެންދަނީ. އެހެންވީމާ، އެކަން މި ކުރަނީ، އެއްވެސް ފަރާތެއްގެ ނުފޫޒު އެއަށް ނުވަންނަ ގޮތަށް. އެއްވެސް ފަރާތަކަށް ނުފޫޒެއް ނުފޯރުވޭނެ. އެކަމެއް ނުކުރެވޭނެ. އަޅުގަނޑު ބޭނުންވަނީ، ވަރަށް ނަޒާޙަތްތެރި ގޮތުގައި، އެންމެ އިންޞާފުވެރިކޮށް، އިޢުލާނުކޮށްފައި ހުރި ޝަރުޠުތަކާ އެއްގޮތަށް، ޕޮއިންޓް ނިޒާމާ އެއްގޮތަށް، އެންމެ ތަރުތީބުން، މަތިން ތިރިޔަށް، 4000 މީހުން ހަމަކުރަން. އެ ތަރުތީބުން ލިބޭ 4000 މީހުންނަށް އެ ފްލެޓްތައް ދެވޭނީ. ގަވާއިދާ ޚިލާފަށް، ނޫނީވިއްޔާ ޑޮކިއުމަންޓްތައް އޮޅުވާލައިގެން، ނޫނީވިއްޔާ އެހެން ގޮތަކުން ލާފައި އޮތް މީހެއްވިއްޔާ، އެއީ، އަބަދުވެސް ކެންސަލްވާ ގޮތަށް، އެ މީހަކު ކެންސަލްވާނެ. އެކަން ކުރިންވެސް އަޅުގަނޑު ދަންނަވާފައި އޮންނާނީ. އަޅުގަނޑު އިންތިޚާބު ތެރޭގައިވެސް އެ ވާހަކަ ދެއްކިން.

އެކަހަލަ ވީޑިއޯ ކްލިޕެއް އޮތިއްޔާ އަޅުވާލަދިނުން އެދެން.

ވީޑިއޯ:

"މި ފްލެޓްގެ ވާހަކަ ހަމަ ރޭގައިވެސް ދެންނެވިން. އަނެއްކާވެސް ތަކުރާރުކޮށްލާނަން. 4000 ފްލެޓެއްގައި މިއުޅެނީ މައްސަލަ ޖެހިގެން. އަޅުގަނޑު ދެންނެވިން، ފްލެޓެއްވިޔަސް، ގޯއްޗެއްވިޔަސް ހަވާލުކުރާނަމޭ. އެއީ، އަޅުގަނޑު ވީ ވަޢުދު. ވަޢުދުމަތީގައި އަޅުގަނޑު ހުންނާނީ. އެހެން ނަމަވެސް، މިނިވަން މުއައްސަސާއަކުން އަދި އަމުދުން އޭ.ސީ.ސީ.އިން މައްސަލައެއް ބަލާފައި އެއޮތީ، ބޮޑު ރިޕޯޓެއް ނެރެފައި. ދެން އަޅުގަނޑު މިހިރީ ﷲ ގަންދީ ހުވާކޮށްގެން، ޤާނޫނުއަސާސީ ނަގަހައްޓައި ދަމަހައްޓާ މީހެއްގެ ގޮތުގައި. އޭގައި އެބައޮތް، އޭ.ސީ.ސީ.ގެ ދައުރު. ދެންހުރި މުއައްސަސާތަކުގެ ދައުރު. ފުރުޞަތު ދޭންޖެހޭނެ ކަމަށް ޤާނޫނުއަސާސީގައި. އެހެންވީމާ، އޭ.ސީ.ސީ.އިން ރިޕޯޓެއް ނެރުނީމަ، އަޅުގަނޑަށް އެބަ ލާޒިމުވޭ، ކަމާބެހޭ މިނިސްޓަރަށް ދަންނަވައިގެން، މި ރިޕޯޓުގައި އޮތް އެއްޗެއް ބަލައިލަން. އަޅުގަނޑު އުންމީދު މި ކުރަނީ، އެ ބަލައި ނިމޭއިރުގައި، އެއްވެސްކަހަލަ ބަދަލެއް ގެންނަން ނުޖެހި، ފްލެޓް ހަވާލުކޮށްލެވޭނެ ކަމަށް. ވަރސްޓް ކޭސްގައި، ވަރސްޓް ކޭސްއޭ މި ދެންނެވީ، އެންމެ މީހެއްގެވެސް ފްލެޓް، އޭ.ސީ.ސީ.އިން ބަލާފައި އޮތްގޮތް އެއީ، ރަނގަޅު ގޮތް ކަމަށް ނިމެންޏާ، ގަސްދުގައި އޮޅުވާލައިގެން، ދޮގުހަދައިގެން، މަކަރު ހަދައިގެން މީހަކަށް ފްލެޓެއް ދީފައި އޮވެއްޖިއްޔާ، އެއީ އަބަދުވެސް އޮންނަ އުޞޫލު، އެކަހަލަ ކޭސްއެއްގައި ވިއްޔާ، އެ މީހަކު އަތުން ފްލެޓް އަތުލަން. މިއީ މިހާރު ކުރާ ކަމެއް ނޫން. އެންމެ ފުރަތަމަ، 1990 ގައި ގޯތިދޭން، ފްލޭޓް ދޭން ފެށިއިރުވެސް އެކަން އޮންނަ ގޮތް އެއީ. އެ ކޭސްގައި އެ މީހަކު އަތުން ގެއްލޭ ފްލެޓްވެސް، އަޅުގަނޑު ދެންމެ މި ދެންނެވި ފަދައިން، އަދި ފެށުނީއްސުރެ އަޅުގަނޑު ދަންނަވާ ފަދައިން، ކޮންމެ ދިވެހި ރައްޔިތަކަށް ގޯތި ގެދޮރު، އެންމެ އަސާސީ ކަމެއްގެ ގޮތުގައި އަޅުގަނޑު ދެކެން. ރައްޔިތުންގެ އެންމެ އަސާސީ ކަމަކީ ގޯތިގެދޮރު. މި ފަސް އަހަރު ނިމޭއިރުގައި، ގޯތީގެ މައްސަލަ، ހައުސިންގ މައްސަލަ ޙައްލުނުވާ އެއްވެސް ރައްޔިތެއް އިރާދަކުރެއްވިއްޔާ، މި ރާއްޖޭގައި ނުހުރުން އަޅުގަނޑުގެ އަމާޒަކީ. އަޅުގަނޑުމެންގެ ސަރުކާރުގެ ސިޔާސަތަކީ.''

އެހެންވީމާ، މިފަހަރު މި ދެންނެވި ޙާލަތުގައި، އިސްތިސްނާ ޙާލަތެއްގައި ވިޔަސް، ފްލެޓް ގެއްލޭ މީހަކު ހުރި ކަމުގައިވިޔަސް، ދެން އެންމެ އަވަހަށް ހުޅުވާލާ ސްކީމަކުން އެ މީހަކަށް އެކަން ޙައްލުވާނެ. އަޅުގަނޑު ދެންމެ މި ދެންނެވީ، މި ފަސް އަހަރުގެ ތެރޭގައި، މާލެސިޓީގައި ނުހުންނާނެއޭ ގޯތިގެދޮރުގެ މައްސަލަ ޙައްލުނުވާ މީހަކު. މި 4000 ފްލެޓް ކޭސްގައި އަޅުގަނޑު މި އުންމީދު ކުރަނީ، އަޅުގަނޑުމެން ބަލާނީ، ހަމަ ހުރިހާ އެންމެންނަށް ލިބޭނެ ކަމަށް. އެހެންވީމާ، ތެދުބަހުން، ތެދުވެރިކަމާ އެކީގައި، އިޚްލާޞްތެރިކަމާ އެކީގައި އަޅުގަނޑު ދައްކާ ވާހަކައެއް ވިއްޔާ ދައްކާނީ.

އެހެންވީމާ، އަޅުގަނޑު އެދެނީ، މާލޭސިޓީގެ ރައްޔިތުންގެ ކިބައިން މި ތެދު ޙަޤީޤަތް ގަބޫލުކުރެއްވުމަށް. މިއަކު ނެތް އެނޫން އެއްވެސް ވާހަކައެއް.

އަޅުގަނޑު ދައްކާ ވާހަކަ އަބަދުވެސް ދައްކާނީ ހަމަ އެއްގޮތަކަށް. އެހެންވީމާ، 4000 ފްލެޓްގެ ކަންތައް މި ބަލަންޖެހޭލެއް، ސްކޫރިޓިނައިޒް ކުރަންޖެހޭވަރު ބޮޑީ. އޭ.ސީ.ސީ.އިންވެސް ބަލާފައި އެހެރީ ވަރަށްގިނަ ކަންތައްތައް ފާހަގަކޮށްފައި. މީގެތެރެއިން އަޅުގަނޑު ބައެއް ކަންތައްތައް ދަންނަވާލާނަން.

އުޞޫލާ ޚިލާފަށް މިހާތަނަށް ފާހަގަކުރި ކަންތައް އިނގޭތޯ. އުޞޫލާ ޚިލާފަށް، ގެދޮރުވެރިން ކޮމިޓީގައި ހިމެނޭ، ސިޔާސީ ފަރާތްތަކަށް ފްލެޓް ލިބޭގޮތަށް މާކްސް ބަދަލުކޮށްފައި މިދިޔަ ސަރުކާރުން އެބަހުރި އިނގޭތޯ. މިއީ ކޮށްފައި ހުރި ކަންތައް. ޢަދަދުތަކާއެކީ، އަޅުގަނޑުމެން ލިސްޓް ނެރޭއިރުގައި، ކޮންމެ މީހެއްގެ ނަން ކައިރީގައި އޮންނާނެ ތަފްޞީލު. ތަފްޞީލާއެކީ އަޅުގަނޑުމެން ނެރޭނީ. ވަރަށް ދެފުށް ފެންނަ ލިސްޓެއް ނެރޭނަން އަޅުގަނޑުމެން. ކޮންމެ މީހެއްގެ ތަފްޞީލު. ހޮވުނުގޮތްވިޔަސް، ނުހޮވުނުގޮތްވިޔަސް އޮންނާނެ. އުޞޫލާ ޚިލާފަށް، ކުރީ ސަރުކާރުގެ އިސްވެރިންގެ ޢާއިލީ ފަރާތްތަކަށް ފްލެޓް ދީފައި އެބަހުރި. އުޞޫލާ ޚިލާފަށް، ބައެއް ޢާއިލާތަކުގެ، މި ދެންނެވިހެން ނުފޫޒު ގަދަ މީހުންގެ ޢާއިލާތަކުގެ ބައެއް، އެއް ޢާއިލާގެ ގިނަ މެންބަރުންނަށް ފްލެޓްތައް ބަހާފައި އެބަހުރި. ޕޯޓަލްއަށް ހުށަހެޅި ލިޔުންތަކުގެ އިތުރުން، ބައެއް ފަރާތްތަކުގެ ލިޔުންތައް ބަލައިގަނެ، ފްލެޓް ދީފައި އެބަހުރި. މިއީ ކޮށްފައި ހުރި ކަންތައް. ފޯމެއްވެސް ނުލާ. ފޯމުވެސް ނުލައި، ހަމައެކަނި އައި.ޑީ. ކާޑު ހުށަހަޅައިގެންވެސް ފްލެޓް ދީފައި އެބަހުރި. އަދި އައި.ޑީ. ކާޑުގެ އެއްފަޅި. ދެން އެ ބޭފުޅުން ކޮން ވާހަކައެއްތޯ މި ދައްކަނީ؟ އުޞޫލާ ޚިލާފަށް ބައެއް ފަރާތްތަކަށް ފްލެޓް ދިނުމަށްޓަކައި ޕޯޓަލްގެ ބެކް އެންޑުން މާކްޝީޓް ބަދަލުކޮށްފައި އެބަހުރި. ދެން އެ ބޭފުޅުން ކިހާވަރަކަށް މިކަމާ އުޅުއްވާނެ ނޫންތޯ. އެހެންވީމާ، ލަސްވަނީ. ލަސްވާނެ ދޮގެއްތޯ. މި ހުރިހާ ކަމެއް ބަލާފައި، އިރާދަކުރެއްވިއްޔާ އަޅުގަނޑުމެން މިކަން ނިންމައިދޭނަން އިންޞާފުވެރިކަމާ އެކީގައި. އަޅުގަނޑު މިހިރީ ﷲ ގަންދީ ހުވާކޮށްގެން. ﷲ ހުރިހާ ކަމެއް ދެނެވޮޑިގެންވޭ. އަޅުގަނޑުމެން ހުރިހާ ކަމެއްވެސް ކުރާނީ ތެދުވެރިކަމާއި އަމާނާތްތެރިކަމާ އެކީގައި.

އެހެންވީމާ، ހައުސިންގގެ ވާހަކައިން ކުރިއަށްދާނަން. މި އަންނަ އަހަރަށް މިއޮތީ އަޅުގަނޑު މިއޮތީ ބޯހިޔާވަހިކަމުގެ ބަޖެޓެއް ހުށަހަޅާފައި. މިހެން މި ދަންނަވަނީ ސަބަބެއް އޮވެގެންނޭ. މި އަންނަ އަހަރުގެ ބަޖެޓްގެ ތެރޭގައި އޮންނާނެ، 2500 މިލިއަން، 2.5 ބިލިއަން ރުފިޔާ ކަނޑައެޅީ ކޮންކަމަކަށް؟ ހަމައެކަނި ގެދޮރު ބިނާކުރަން. 2500 މިލިއަން ރުފިޔާ ދުވަހަކުވެސް ރާއްޖޭގެ ތާރީޚުގައި، އެއްވެސް ސަރުކާރަކުން ގެދޮރު ބިނާކުރާކަށް ނުހިމަނައޭ، މިހާ ގިނަ ޢަދަދެއްގެ ފައިސާއެއް. މި އަންނަ އަހަރުގެ ބަޖެޓަކީ ބޯހިޔާވަހިކަމުގެ ބަޖެޓް.

އޭގެއިތުރަށް، ކުރިން އަޅުގަނޑު ދެންނެވި ހައުސިންގ ލޯން ސްކީމަށް އެއް ބިލިއަން ރުފިޔާ އެއޮތީ ހިމަނާފައި. އާދެ، އަޅުގަނޑަށް މިސްޓޭކެއް ހެދިއްޖެ. 1500 މިލިއަން ރުފިޔާ، ހައުސިންގ އަޅަން. އަދި 1000 މިލިއަން ރުފިޔާ ހައުސިންގ ލޯން ސްކީމަށް. އެހެންވީމާ، 2.5 ބިލިއަން ރުފިޔާ މިއޮތީ ގެދޮރުވެރިކަމަށް ކަނޑައަޅާފައި. އެކަން ހަނދާންވީކަން ވަރަށް އުފާކުރަން. އެހެން ނޫނީވިއްޔާ އަނެއްކާ އަޅުގަނޑު ދޮގުހެދީ ކަމަށްވާނީ.

އާދެ، މީގެތެރެއިން މާލެ ސަރަޙައްދުގައި 15000 ހައުސިންގ ޔުނިޓް، މި އަންނަ އަހަރު އަޅަން ފަށާނެ. އަތޮޅުތެރޭގައި 12940 ހައުސިންގ ޔުނިޓް. އެއީ، ވަޢުދުތައް. ހުސް ވަޢުދު އިނގޭތޯ. އަޅުގަނޑު ރަށްރަށަށް ގޮސް، ވެފައި ހުރި ވަޢުދުތައް. މިސާލަކަށް، ކުޅުދުއްފުށީ ސިޓީގައި އަޅާ ފްލެޓްތައް އޭގެތެރޭގައި ހިމެނޭނެ. އަޅުގަނޑު ވަޢުދުވިން، ތިނަދޫ، އައްޑޫ، ފުވައްމުލައް އަދި ބައެއް ރަށްތަކުގައި ޢަދަދުތަކާއެކީ ވަޢުދުވެފައި ހުންނާނެ. 30 ން، 50 ން، 100 އިން. ލިޔެވިފައި ހުރި އެއްޗެހި މިއީ. ޖުމްލަ 12940 ހައުސިންގ ޔުނިޓުގެ ޢަމަލީ މަސައްކަތް، މި ދެންނެވި 1.5 ބިލިއަން ރުފިޔާގެ ޕީ.އެސް.އައި.ޕީ. މަޝްރޫޢުތަކުގެ ތެރެއިން މި އަންނަ އަހަރު ހިންގަން ފަށާނަމޭ. އިރާދަކުރެއްވިއްޔާ، އެ މަސައްކަތްތައް މި ދައުރުގައި ނިންމައި ހަވާލުކުރާނަމޭ.

މިއީ ބޯހިޔާވަހިކަމުގެ ބަޖެޓެއް. އެހެންވީމާ، 41 ރަށުގައި އަލަށް ހައުސިންގ ޔުނިޓް. އެ 41 ރަށުގައި ވެފައި ހުންނާނެ ވަޢުދު އަޅުގަނޑު އެ ރަށަށް ގޮސްފައި. މި ރަށުގައި މިވަރަށް އަޅައިދޭނަމޭ. އެހެންވީމާ، އެ ހުރިހާ މަޝްރޫޢެއް މި އަންނަ އަހަރު ފެށޭނެ. ހުރިހާ މަޝްރޫޢެއް ފެށޭނެ.

އާދެ، އޭގެއިތުރަށް، ދެން އެންމެ އިސްކަމެއް މިދިނީ ދެ ކަމަކަށް. ޞިއްޙަތާއި ތަޢުލީމަށް. ޞިއްޙީ ދާއިރާއިން މި އަންނަ އަހަރުގެ ބަޖެޓުގެ ތެރެއިން ވަރަށް މުހިންމު މަޝްރޫޢުތަކެއް ހިނގާނެ. ހުރިހާ ރަށެއްގައި މިހިރަ ހެލްތު ސެންޓަރުތައް އަޕްގްރޭޑް ކުރުމާއި، އޭގެއިތުރަށް، ވަރަށްގިނަ މަސައްކަތްތައް ހިމެނޭ. މޭޖަރ ބައެއް ހޮސްޕިޓަލްތައް. ކެންސަރ ހޮސްޕިޓަލް. ތެލަސީމިއާ ހޮސްޕިޓަލް މިހާރު ހަވާލުކޮށްފައިވީ ބަޔަކާ. އަންހެނުންނާއި ކުޑަކުދީންގެ ހޮސްޕިޓަލް. ޕްރޮޕޯޒަލް ހުށަހަޅާފައި އެބައޮތް. މެންޓަލް ހޮސްޕިޓަލް، އިރާދަކުރެއްވިއްޔާ އިންޑިއާގެ އެލް.އޯ.ސީ.ގެ ތެރެއިން ހަމަޖެހިގެން ފެށޭނެ. އަދި އޭގެއިތުރަށް، މިހާރު ވިލިމާލޭގައި، ޗައިނާގެ ހިލޭ އެހީއާ އެކީގައި މި ފެށެން އުޅޭ ހޮސްޕިޓަލް. އާދެ، މި ހުރިހާ ހޮސްޕިޓަލްގެ އިތުރަށް، އެކި ރަށްރަށުގައި އިތުރު ފަސް މޭޖަރ ހޮސްޕިޓަލް، ރީޖަނަލް ހޮސްޕިޓަލް ލެވެލްގައި، މި އަންނަ އަހަރުގެ ތެރޭގައި ހިނގާނެ.

އެހެންވީމާ، ކީއްކުރަންތޯ މިކަން މި ކުރަނީ؟ ރާއްޖެއިން ބޭރަށް ރައްޔިތުން ދާންޖެހޭވަރު ކުޑަކުރުމަށްޓަކައި. ރާއްޖޭގައި ތިބެގެން ރަނގަޅު ފެންވަރުގެ ޚިދުމަތް ހޯދުމަށްޓަކައި. އަދި އޭގެއިތުރަށް، ޞިއްޙީ ދާއިރާގައި މީހުން ބިނާކުރުން، މި އަންނަ އަހަރު ވަރަށްބޮޑު އިސްކަމެއް ދޭނަން. މީހުން ބިނާކުރުން. ނަރުހުން، ޑޮކްޓަރުން، އެލައިޑް ހެލްތް ޕްރޮފެޝަނަލުން. އަދި އެކި މީހުން. އެހެންވީމާ، މި އަންނަ އަހަރުގެ ބަޖެޓުގެ ތެރެއިން ވަރަށްބޮޑު ހޭދައެއް ކުރެވޭނެ، އިމާރާތް އެޅުމާއި، އިކްއިޕްމަންޓް ގަތުމަށާއި، މީހުން ބިނާކުރުމަށް. މީގެ ބޭނުމަކީ، ރާއްޖޭގެ ރައްޔިތުން އެތިބި ތަނެއްގައި ތިބެގެން، ނޫނީ އަރބަން ސެންޓަރުތަކަށް ގޮސްގެން، ރާއްޖެއިން ބޭރަށް ދާންޖެހޭވަރު ކުޑަކުރުން. މިއީ ޖުމްލަކޮށް، މި ރިފޯމް އެޖެންޑާގެ ތެރެއިން ވަރަށް މުހިންމު އިސްކަމެއް އަޅުގަނޑު ދޭ ކަމެއް.

އަނެއްކަމަކީ، ޖީ.ޕީ. ކްލިނިކްތަކެއް ތަޢާރުފް ކުރުން. ޖީ.ޕީ. ކުލިނިކްތައް މި ހަދަނީ، މާލޭގެ ހުރިހާ އަވަށެއްގައްޔާއި އަދި ބައެއް އަރބަން ސެންޓަރުތަކުގައި. މިކަން މި ކުރަނީ، އެ ތަންތަނުން އާދައިގެ ކަންތައްތަކަށް ބަލައިލެވިފައި، ބޭސްފަރުވާ ދެވޭގޮތަށް. ދެން ސްޕެޝަލިސްޓުން ކައިރިއަށް ދާންޖެހޭ މީހުން ދާނީ ހޮސްޕިޓަލަށް. މިކަން ކުރުމުގެ ސަބަބުން ވަރަށް އަވަހަށް ޚިދުމަތް ދެވިފައި، ކިޔޫތަކުގައި މަޑުކުރަން ނުޖެހި، ޚަރަދުގެ ގޮތުންވެސް އަދި އިފެކްޓިވްނަސްވެސް ވަރަށްބޮޑުތަން ރަނގަޅުވޭ އެބަ.

އެހެންވީމާ، މިކަހަލަ މުހިންމު ކަންތައްތަކެއް، މި އަންނަ އަހަރު އަދި މި އަހަރުގެ ބާކީ މިއޮތް ހަފްތާތަކުގައިވެސް ފަށާނަން. ޚާއްޞަކޮށް، ޖީ.ޕީ. ކުލިނިކްތައް ޤާއިމުކުރުމުގެ ކަންތައް، މާލޭގެ ބައެއް ސަރަޙައްދުތަކުގައި. ފެށޭތޯ ބަލާނަން. މިހާރު ބިންތައް އައިޑެންޓިފައި މި ކުރަނީ.

އެހެންވީމާ، މިގޮތަށް އަޅުގަނޑުމެން ޞިއްޙީ ނިޒާމު. އަދި އޭގެއިތުރަށް، ދެންހުރި ކަންތައްތައްވެސް ކުރިއަށް ގެންދެވޭނެ.

ހަމަ އެގޮތަށް، ޕްރައިމަރީ ހެލްތް ކެއަރއަކީ އަޅުގަނޑު ވަޢުދުވީ އެއް ކަންތައް. ކިއުރެޓިވް ހެލްތް ކެއަރގެ އިތުރަށް، ޕްރައިމަރީ ހެލްތް ކެއަރ. ބަލިޖެހުމުގެ ކުރިން، ބައްޔާ ހަމަޔަށް ވާސިލްނުވަނީސް އެ މީހާ ޞިއްޙީގޮތުން ސަލާމަތްކުރުން. އެހެންވީމާ، އެކަމަށްޓަކައި ހުރިހާ އަތޮޅެއްގައި، ވަޢުދުވީގޮތަށް ޚިދުމަތްތައް ފެށިގެންދާނެ. ޤާއިމުވެގެންދާނެ. ހުރިހާ އަތޮޅެއްގައި.

އާދެ، ދެން އެހެން ދާއިރާތަކަށް ބަލާއިރުގައި، ޓޫރިޒަމް ދާއިރާއާއި އަދި ޓްރާންސްޕޯޓާ ގުޅިފައި އޮތް ކަމެއް މިއީ އުދުހުންތައް. ވައިޑް ބޮޑީ އެއަރ ކްރާފްޓްތައް މި ގެނެވެނީ. އިރާދަކުރެއްވިއްޔާ، ޖަނަވަރީ ކުރީކޮޅު ފުރަތަމަ ފްލައިޓް އުދުހެން ފަށާނެ. އެކަން ފުޅާކުރެވިގެން ގޮސް، މި އަންނަ އަހަރުގެ ތެރޭގައި، ޗައިނާއާއި އަދި ޔޫރަޕްގެ ޑެސްޓިނޭޝަންތަކަށް އަޅުގަނޑުމެންގެ، މޯލްޑިވިއަންގެ ވައިޑް ބޮޑީ އެއަރ ކްރާފްޓް ދަތުރުކުރާނެ.

މަސްވެރިން ބާނާ މަސް ޕްރޮސެސް ކުރުމަށް ކެޕޭސިޓީ އިތުރުކުރުން. ފިނިކުރުމަށް އައިސް ޕްލާންޓްތައް. އަދި ދޯނިތަކުގައި އާރު.އެސް.ޑަބްލިޔޫ. ސިސްޓަމް ބެހެއްޓުމާއި، މި ކަންތައްތައް. މިހާރު އެވަނީ އާރު.އެސް.ޑަބްލިޔޫ ޤާއިމުކުރުމަށް ލޯނުވެސް ދޭން ފަށާފައި. އަދި ޑަބަލް ކުރުމަށް އަޅުގަނޑު ވަޢުދުވީ އައިސް ސްޓޯރޭޖް. އެއަށްވުރެވެސް އިތުރުކުރެވޭ ހިސާބަށް ގެންދަން. އިރާދަކުރެއްވިއްޔާ އަޅުގަނޑުމެންނަށް ފުރުޞަތު އެބަހުރި. ޕްރޮސެސިންގ ޖާގަވެސް، ފުރުޞަތުތައްވެސް ޑަބަލްކުރުމަށް.

އެހެންވީމާ، މި ހުރިހާ މަސައްކަތްތަކެއް އިރާދަކުރެއްވިއްޔާ މި އަންނަ އަހަރުގެ ބަޖެޓުގެ ތެރެއިން އަޅުގަނޑުމެން މިވަނީ ހަމަޖައްސަން ފަށާފައި.

އެއަރޕޯޓް. ވެލާނާ އެއަރޕޯޓުގެ މަސައްކަތް އިރާދަކުރެއްވިއްޔާ އެދަނީ ބާރު ސްޕީޑްގައި. މި އަންނަ އަހަރުގެ މެދުތެރޭގައި އެއަރޕޯޓް ނިމިގެންދާނެ. ނިމުނީމާ އިރާދަކުރެއްވިއްޔާ، އަޅުގަނޑުމެންގެ ފަތުރުވެރިކަމުގެ އިންޑަސްޓްރީ، އަދި ޖުމްލަކޮށް އަޅުގަނޑުމެންގެ އިޤްތިޞާދުގެ ދޮރާށި އެ ފުޅާވެގެންދިޔައީ. އިރާދަކުރެއްވިއްޔާ އަޅުގަނޑުމެންނަށް ފެނިގެންދާނީ، އިޤްތިޞާދީ ގޮތުން އަޅުގަނޑުމެންގެ ޤައުމު ވަރަށްބޮޑު ތަނުން ކުރިއަރައިގެންދާ ތަން.

އާދެ، ހަމަ އެއާއެކީގައި، އަޅުގަނޑުމެން އެންމެ ގިނައިން މި ވާހަކަ ދައްކަނީ، އެންވަޔަރަންމަންޓް ދާއިރާއާ ގުޅޭގޮތުން. އިހަށްދުވަހު ކޮޕް-29 އަށް ގޮސްފައި މިއައީ. އިޢާދަކުރަނިވި ހަކަތައަކީ، އަޅުގަނޑުމެން ޙަޤީޤަތުގައިވެސް އިޤްތިޞާދީ ރިފޯމް އެޖެންޑާގެ ތެރެއިން އެންމެ އިސްކަންދޭ އެއް ކަންތައް. ކުރިން އަޅުގަނޑު ދެންނެވިން، 700 އެތައް މިލިއަން ޑޮލަރެއް ޚަރަދުކުރަމޭ ތެޔޮ އެތެރެކުރަން. އެކަން ހުއްޓައި އެބަލެވޭ، ރާއްޖޭގައި މިއޮތީ ސަން، ސީ، އެއަރ. މި ތިނެތިން އަޅުގަނޑުމެން ހަކަތަ އުފައްދަންވީނު. އެހެންވީމާ، އިންވެސްޓަރުން ގެނެސްގެން، ސޯލަރ ޕެނަލް، ފްލޯޓިންގ ސޯލަރ ޕެނަލް ޤާއިމުކޮށްގެންނާއި، ވިންޑުންނާއި، ވޭވް އެނަރޖީންނާއި، މިގޮތްގޮތުން. އަޅުގަނޑު މިހާރު ފުރުޞަތު ހުޅުވައިލައިފިން. ޝައުޤުވެރިކަން ހުރި ފަރާތްތައް މި ހޯދަނީ. ހޯދައިގެން އަޅުގަނޑުމެން ބޭނުންވަނީ، ސޯލަރ ޕަވަރއާ، އެކިގޮތްގޮތުން އިޢާދަކުރަނިވި ހަކަތަ ޤާއިމުކުރަން. އޭރުން އަޅުގަނޑުމެން ތެލަށްކުރާ ޚަރަދު ކުޑަވެ، ސަސްޓެއިނަބަލް ގޮތަކަށް އަޅުގަނޑުމެންގެ އިޤްތިޞާދު މެނޭޖް ކުރެވި، ކުރިއަށް ދެވޭ އެބަ.

އެހެންވީމާ، މިކަމަކީ އަޅުގަނޑުމެން ކުރާނެ ކަމެއް. އަޅުގަނޑު އިޢުލާނުކުރީ ކޮން ކަމެއް؟ 2028އާ ހަމަޔަށްދާއިރުގައި، އެންމެ މަދުވެގެން 33 ޕަސެންޓް، އަޅުގަނޑުމެން ފިއުލްއަށް ކުރާ ޚަރަދު ކުޑަކުރާނަމޭ. ރިނިއުބަލް އެނަރޖީއަށް ބަދަލުކޮށްގެން. އެހެންވީމާ، އެ މަސައްކަތްވެސް އެދަނީ ބާރު ސްޕީޑްގައި.

އޭގެއިތުރަށް، އިކޮނޮމިކް ގޭޓްވޭ އިހަވަންދިއްޕޮޅުގައި ޤާއިމުކުރުމަށްޓަކައި އެ މަސައްކަތްވެސް އެވަނީ ފެށިފައި. އިކޮނޮމީ ގޭޓްވޭ ޤާއިމުކުރުމަށްޓަކައި ވަރަށް މުހިންމު މަޝްރޫޢެއްގައި އިހަށްދުވަހުވެސް ސޮއިކުރެވިއްޖެ.

އާދެ، އަޅުގަނޑުމެން ކުރާ މަސައްކަތްތައް ކުރަނީ އިރާދަކުރެއްވީތީ، އެކަން ކުރަންޖެހޭގޮތަށް، ހުރިހާ ތަފްޞީލުތަކަކާ އެއްޗެހި ވަރކްއައުޓް ކޮށްފައި. އެހެންވީމާ، މިހެން ހުންނަ ކަންތައްތައް އަޅުގަނޑުމެން މިއީ ހަމައެކަނި ދަންނަވާލާ ވާހަކަތަކެއް ނޫން އިނގޭތޯ. އިރާދަކުރެއްވިއްޔާ، އަޅުގަނޑުމެންނަށް ފެނިގެންދާނީ، ސަރަޙައްދީ ތަރައްޤީގެ އާ ބާބެއް ފެށިގެންދާ ތަން.

އިހަށްދުވަހު އަޅުގަނޑުމެން މި ފެށީ 20 އަހަރުގެ މާސްޓަރ ޕްލޭންގެ މަސައްކަތްތައް. ރާއްޖޭގެ ހުރިހާ ރައްޔިތުން އެއަށް ބަސް ބުނާނެ މާސްޓަރ ޕްލޭނެއް މި ހަދަނީ. ރާއްޖޭގެ ހުރިހާ ރައްޔިތުން. އޭގެ މާނައަކީ ހުރިހާ ރައްޔިތުން. އެންމެ ކުޑަރަށުގެ ރައްޔިތުންވެސް، މާލޭގެ ރައްޔިތުންވެސް، ހުރިހާ ރައްޔިތުން އެއަށް ބަސް ބުނަންޖެހޭ، ރައްޔިތުންގެ ޝާމިލްވުން އޮތް،
އެ ރައްޔިތުން ރާއްޖެ ތަރައްޤީ ކުރަން ބޭނުންވާގޮތް، 20 އަހަރު ދުވަހުގެ ތެރޭގައި ތަރައްޤީވާން ބޭނުންވާގޮތް، އެ މާސްޓަރ ޕްލޭންގައި ހިމަނާފައި، މާސްޓަރ ޕްލޭންގެ މަސައްކަތް މި ފެށީ. އަޅުގަނޑު އިޢުލާނުކުރީ، އަޅުގަނޑު ބޭނުމޭ، 2040އާ ހަމަޔަށްދާއިރު، މި 20 އަހަރުގެ ތެރޭގައި 2040 އަންނާނީ. 2040އާ ހަމަޔަށްދާއިރުގައި، ރާއްޖެ ޑިވެލޮޕް ނޭޝަންސްއެއްގެ ގޮތުގައި އޮންނަ ހިސާބަށް، ތަރައްޤީވެފައި އޮންނަ ޤައުމެއްގެ މިންގަނޑަށް ފެތޭ މިންވަރަށް ރާއްޖެ ތަރައްޤީ ކުރަން. އެހެންވީމާ، 20 އަހަރުގެ މާސްޓަރ ޕްލޭންގެ ތެރޭގައި، ރައްޔިތުން އެދޭގޮތަށް ކަންތައްތައް ބައްޓަންކުރުމުގެ މަސައްކަތް މި ފެށީ. އެކަން ކުރެވޭނީ ސަރަޙައްދީ ތަރައްޤީން. ސަރަޙައްދީ ތަރައްޤީއަކީ ކޮބައިތޯ؟ މާލެއާ އެއްގޮތަށް އަތޮޅުތެރެވެސް ތަރައްޤީކުރުން.

އެހެންވީމާ، އަޅުގަނޑު މެނިފެސްޓޯ އިޢުލާނުކުރިއިރުގައި، އެންމެ އުތުރުގެ އަތޮޅުތައް، ހަތަރު އަތޮޅު އެކުލެވޭ އިންޓަރގްރޭޓަޑް ޑިވެލޮޕްމަންޓް ޒޯނެއް. އެންމެމަތީ ފެންވަރުގައި ހުރިހާ ޚިދުމަތެއް. ހއ. ހދ. ށ. ނ. ގައި ލިބޭގޮތަށް. އެންމެ ދެކުނުގެ ހަތަރު އަތޮޅު. އައްޑޫސިޓީ، ފުވައްމުލައް ސިޓީ، ދެން ގއ. ގދ. ސަދަން ޑިވެލޮޕްމަންޓް ޒޯން. މި ދެ ޒޯނުގައި، އެންމެމަތީ ފެންވަރުގެ ޞިއްޙީ ޚިދުމަތް. އެންމެމަތީ ފެންވަރުގެ ތަޢުލީމީ ޚިދުމަތް. އިޤްތިޞާދީ ޚިދުމަތްތައް، ފުރުޞަތުތައް ލިބޭ، ހައުސިންގ އެބަންޑަންސް، ނޫނީވިއްޔާ އެފޯޑަބަލް ހައުސިންގ ސްޓޮކް ޤާއިމުވެފައި އޮތް ދެ ޑިވެލޮޕްމަންޓް ޒޯނާއި، ދެން 7 އަރބަން ސެންޓަރެއް. އެއީ، ސަރަޙައްދީ ތަރައްޤީ ގެނައުމަށްޓަކައި. އުތުރުން 3 ރަށް އިޢުލާނުކޮށްފައި އެވަނީ. ދެކުނުން 4 ރަށް އިޢުލާނުކޮށްފައި އެވަނީ. މީގެ ބޭނުމަކީ، އެހެން ރަށްތަކަށް ކަންކަން ނުކުރުމެއް ނޫނޭ. އަޅުގަނޑު ކުރިންވެސް ދެންނެވިން، އެ ހުރިހާ ރަށެއްގައިވެސް ޚިދުމަތްތައް ކުރިއަށްދާނެއޭ. އެކަމަކު ސަރަޙައްދީ ތަރައްޤީގެ މި ވިސްނުމުގައި ކުރީމަ، ކުރިއަށް އޮތް 20 އަހަރު ދުވަހަށް އަޅުގަނޑުމެން އެބަޖެހޭ، މި ރަށްރަށުން އާބާދީ ތަރައްޤީ، މި ދެންނެވި ތަންތަން އެއްފަސްވާން. ކްލައިމެޓް އޭންގަލުން ބެއްޔަސް މިކަން ކުރަންޖެހޭ. ދުވަހުން ދުވަހަށް ކުރާ ޚަރަދަށް ބެއްޔަސް މިކަން ކުރަންޖެހެޔޭ އެބަ. އަޅުގަނޑު ވަޢުދުވެފައި އޮންނާނެ ކެމްޕެއިން ތެރޭގައި. އެންމެންނަށް އެއްވަރަކަށް އެންމެމަތީ ފެންވަރުގެ ޚިދުމަތް ދޭން ބޭނުމޭ. އެއީ، އަޅުގަނޑުގެ ހިތުގައި ކޮންމެ ރައްޔިތަކު ހަމަހަމައޭ. ކޮންމެ ރައްޔިތަކު ދެކެ އަޅުގަނޑު ލޯބިވަނީ އެއްވަރަށޭ. އެހެންވީމާ، މާލޭގައި ހުރި މީހާއެކޭ، އެންމެ އާބާދީ މަދު ރަށުގައި ހުރި މީހާއެކޭ އަޅުގަނޑުގެ ކުރިމަތީގައި އެއްވަރޭ. އެހެންވީމާ، އެންމެންނަށް އެއްވަރަކަށް ޚިދުމަތް ލިބެން ބޭނުންވެއޭ. އެހެންވެގެންނޭ މިކަން ކުރަންޖެހެނީ. އެހެންވީމާ، ބޮޑެތި ރަށްތަކަށް ދާންޖެހެއޭ. އެހެންވީމާ، މިގޮތަށް ސަރަޙައްދީ ޕްލޭނެއް ހަދަންޖެހެނީ. އެކަމަކު ރައްޔިތުން ބަސް ބުނެގެން ނިންމާނީ. އެހެންވީމާ، އެ މަސައްކަތް ފަށާފައި އެއޮތީ.

ދެން ބައެއް ބޭފުޅުން، މި ރައްޔިތުންނާ ވާހަކަ ނުދައްކައޭ ދަންނަވާތީ، މި ވާހަކަ މި ކިޔައިދެނީ.

އާދެ، ހަމަ އެގޮތަށް، ހުރިހާ ރަށަކަށް ޚިދުމަތް ދިނުމަށްޓަކައި މި އަންނަ އަހަރު ފެންނާނެ އަނެއްކަމަކީ، ކޮންމެ ރަށެއްގައި، އަޅުގަނޑު ކުރިން ދެންނެވި ފަދައިން، އާބާދީ އެއްފަސްވަންދެންވެސް ހުރިހާ ރަށެއްގައި ހުރިހާ ކަމެއް ކުރާނެ. ކޮންމެ ރަށެއްގައި، އޭ.ޓީ.އެމް.އެއް ބަހައްޓާނެ، މި އަންނަ އަހަރު. ކޮންމެ ރަށެއްގައި، އޭ.ޓީ.އެމް.އެއް ބަހައްޓާނެ. އެވަނީ ސޮއިކޮށްފައި މިހާރު ބީ.އެމް.އެލް. އާއި، އެމް.އައި.ބީ.އާ. އެކީ އެމް.އައި.ބީ. އިން ވަކި ޢަދަދެއް. ބީ.އެމް.އެލް.އިން ހުރިހާ ރަށެއްގައި. އެއޮތީ އިޢުލާނުކޮށްފައި. ޕްރޮގްރާމް ފަށާފައި ރަސްމީކޮށް.

ކޮންމެ ރަށެއްގައި، ކޮންމެ އަތޮޅެއްގައި، ވަޢުދުވީ ގޮތަށް، އެސް.ޓީ.އޯ. ރޭޓުގައި ތެޔޮ ލިބޭނެ. އެސް.ޓީ.އޯ. ރޭޓުގައި ތެލުގެ ޚިދުމަތް ލިބޭ ތަނެއް، ފިއުލް ސްކޮޑެއް، މި އަންނަ އަހަރުގެ ތެރޭގައި ހަދަން ތާވަލުވެސް އެއޮތީ އިޢުލާނުކޮށްފައި މިހާރު. އެ ތާވަލުގެ ދަށުން މި އަންނަ އަހަރު ކޮންމެ އަތޮޅެއްގައި ޤާއިމުކުރާނެ، އެސް.ޓީ.އޯ. ރޭޓުގައި ތެޔޮލިބޭ ތަންތަން. އޭރުން މަސްވެރިންނަށް ޚާއްޞަކޮށް ވަރަށް ލުއި ލިބޭނެ. ވެފައި އޮތް ވަޢުދު ފުއްދާނަން.

އާރު.ޓީ.އެލް.ގެ ފެރީގެ ޚިދުމަތް، މި އަންނަ އަހަރު ނިމޭއިރުގައި، އަޅުގަނޑު ވަޢުދުވީ ގޮތަށް، ރާއްޖޭގެ ހުރިހާ ރަށެއްގައި އާރު.ޓީ.އެލް. ދުއްވާނެ. ޚިދުމަތް ލިބޭނެ. ހުރިހާ އަތޮޅެއްގައި، ހުރިހާ އަތޮޅެއްގައި.

އާދެ، ހަމަ އެއާއެކީގައި މުސާރަ ބޮޑުކުރުން. އަޅުގަނޑު ވަޢުދުވީ ކަމެއް އެއީ. ހުރިހާ މަސައްކަތްތެރިންގެ މުސާރަ ބޮޑުކުރާނަމޭ. މި އަންނަ އަހަރު، ޕޭ ހާމަނައިޒް ކުރުމުގެ ނިޒާމުގެ ތެރެއިން، މި އަންނަ އަހަރު މުސާރަ ބޮޑުކުރާނަން، މިހާރު މުސާރަ ބޮޑުނުވެތިބި ސިވިލް ސަރވިސް ހުރިހާ މުވައްޒަފުންގެ. ހަމަ އެއާއެކީގައި، ޖުޑީޝަރީގައި މަސައްކަތްކުރާ ހުރިހާ މުވައްޒަފުންގެވެސް މި އަންނަ އަހަރު މުސާރަ ބޮޑުވާނެ. ދެން އަންނަ އަހަރު، 2026 ގައި، ބާކީތިބި ހުރިހާ މަސައްކަތްތެރިންގެ، ސަރުކާރުގައްޔާއި އަދި މިނިވަން މުއައްސަސާތަކާ، މި ހުރިހާ ތަނެއް ހިމެނޭހެން ދައުލަތުގެ ހުރިހާ މުއައްސަސާތަކެއްގެ މުސާރަ 2026 ގައި ބޮޑުކޮށް ނިމޭނެ. އެހެންވީމާ، ދެ އަހަރުގެ ތެރޭގައި އެކަން ވާނެ.

އާދެ، އަޅުގަނޑަށް އަންނަ ޝަކުވާއެއް. ދެން މިސްއަންޑަރސްޓޭންޑިންގއެއް ކަންނޭނގެ. ނޫނީވިއްޔާ ދޮގުހަދާ މީހުންގެ ދޮގުގެ ތެރޭގައި އަންނަ ކަމެއް. އަޅުގަނޑުމެން އުޅެނީ މި އަންނަ އަހަރު ޕެންޝަންވެސް ކަނޑާލާށޭ، ނޫން، އެއީ އެއްވެސް ގޮތަކަށް ޙަޤީޤީ ވާހަކައެއް ނޫން. 65 އަހަރު ވެގެން އެ ލިބޭ ޕެންޝަނެއް، އަޅުގަނޑުމެން އެއްވެސް މީހެއްގެ އުންޏެއް ނުކުރާނެ. ވަރަށްސާފު. އެހެންވީމާ، ދޮގުހަދަނީ ކޮންބައެއްކަން ސާފު ދޮގެއްތޯ މިހާރު.

އާދެ، އަޅުގަނޑުމެން މި ހުރިހާ ކަމެއްވެސް މި ކުރަނީ ހަމަ ފުރަތަމަ ދުވަހުވެސް އަޅުގަނޑު ދެންނެވި ގޮތަށް. އެއްވެސް ބަދަލެއްނެތި ދަމަހައްޓާނަން. އެއީ، އަޅުގަނޑު ދެންނެވި ވާހަކަތައް. ޢަދުލުވެރިވާނަން. ތިޔަބޭފުޅުންނަށް ފާހަގަވެވަޑައިގަންނަވާނެ، މި އަހަރު ނިމިގެން މިދިޔައީ، ސިޔާސީގޮތުން އެއްވެސް މީހަކަށް އަޅުގަނޑު އަދަބެއް ދީފިންތޯ؟ ނުދެން. ނުވެސްދޭނަން. އަޅުގަނޑަށް ވަރިހަމައޭ، ކިތަންމެވަރަކަށް ވާހަކަ ދެއްކެވިޔަސް. މައިކް ހިއްޕަވައިގެން ވިޔަސް، ޕޯޑިއަމްގައި ވިޔަސް، ސޯޝަލް މީޑިއާގައި ވިޔަސް، ޓީ.ވީ.ތަކުގައި ވިޔަސް ކުރިއަށް ވަޑައިގަންނަވަންވީ. އަޅުގަނޑު އަދަބެއް ނުދޭނަން. އެހެން ނަމަވެސް، ޤާނޫނާއި ގަވާއިދާ ޚިލާފަށް މީހަކު ކަމެއް ކޮށްފިއްޔާ، މިއީ ޤާނޫނުއަސާސީއެއް އޮތް ތަނެއް. ޤާނޫނުގެ ވެރިކަން ހިނގާ ތަނެއް. ޤާނޫނުގެ ވެރިކަން ކޮންމެ މީހެއްގެ މައްޗަށްވެސް ހިނގާނެ. އެކަން ހިނގާނެ.

އެހެންވީމާ، އަޅުގަނޑުމެން އަދަބުދޭނީކީ ސިޔާސީވެގެނެއް ނޫން. އެ އޮންނަ ނިޒާމުގެ ތެރެއިން. އަޅުގަނޑު ރިޔާސީ ކޮމިޝަނެއްވެސް ނަހަދަމެއް ނޫންތޯ. ކޮންމެ ސަރުކާރެއްގައިވެސް އާދަވެފައި އޮންނަ ކަމެއް، ރިޔާސީ ކޮމިޝަން ހެދުންވެސް. އަޅުގަނޑު ނުކުރަން އެކަމެއް. އަޅުގަނޑު ބޭނުންވަނީ ޤައުމަށް ހަމަޖެހުން އަންނަން. ބަދަލުހިފުމުގެ ރޫޙު މިތަނުން ނެތިގެންދާނެ. ބައެއް ބޭފުޅުން ބަދަލުހިފާހިތުން ހާދަ ވާހަކައެއް އެބަ ދައްކައޭ، ސޯޝަލް މީޑިއާގައްޔާއި ތަންތާނގައި. ބަދަލުހިފަން އެ ބޭފުޅުންނަށް ރައްޔިތުން ޗާންސް ނުދޭންވެގެން ނޫންތޯ، އަޅުގަނޑާ މިކަން ހަވާލުކޮށްގެން މިއުޅެނީ. އެހެންވީމާ، ދެން އަޅުގަނޑު ކުރާނެ ކަމެއް ނެތް. ރައްޔިތުން ވިދާޅުވި، ބަދަލުހިފާކަށް ބޭނުމެއް ނޫނޭ މި ޤައުމުގައި ދެން އިތުރަކަށް. އެހެންވީމާ، ބަދަލުހިފުމެއް ނެތް ދެން މި ޤައުމުގައި. ބަދަލުހިފަން ބޭނުންވާ ބޭފުޅުން، އެ ވިސްނުން ދޫކޮށްލައްވާ ދެން. އެހެންވީމާ، ބަދަލުހިފުމުގެ ރޫޙެއް ނޯންނާނެ. މިތާ އޮންނާނީ ހަމަޖެހުން. ސިޔާސީ ކުށްވެރިންނެއް ނުތިބޭނެ. ޢަދުލު އިންޞާފު ޤާއިމުވާނީ. ޝަރުޢީ ނިޒާމަކަށް ނުފޫޒެއް ނުފޯރުވާނެ.

އެއްވެސް ހާލެއްގައި، އަޅުގަނޑު މި ދަންނަވަނީ މިއަދާ ހަމަޔަށް އައިއިރު އެއްވެސް މީހަކު، އަޅުގަނޑު ޔަޤީނުންވެސް މި ދަންނަވަނީ އަޅުގަނޑަށް އެނގިގެނެއް، އަޅުގަނޑު މަގާމެއް ދީފައި ހުރި އެއްވެސް މީހަކު ސިޔާސީ ނުފޫޒެއް، ސިޔާސީގޮތުން، ނޫނީ އެހެން ގޮތަކުންވެސް ޝަރުޢީ ދާއިރާއަކަށް ނުފޫޒެއް ނުފޯރުވާ. ތިޔައިން އެއްވެސް ބޭފުޅަކު، މުޅި ރާއްޖޭގެ ރައްޔިތުން ގާތުން އަޅުގަނޑު އެދޭ ވާހަކައެއް މި ދަންނަވަނީ. އަޅުގަނޑު ޢައްޔަންކޮށްފައި ހުރި މީހެއް، ޝަރުޢީ ދާއިރާއަށް ނުފޫޒެއް ފޯރުވާކަމަށް އެއްވެސް ރައްޔިތަކަށް ފެނިވަޑައިގަންނަވަންޏާ، އަޅުގަނޑަށް އެކަން އަންގަވައިދެއްވާ. އެ މީހަކު ވަގުތުން ވަކިކުރާނަން. ކޮންމެ މީހެއްވިޔަސް ވަކިކުރާނަން. އެއީ، އަޅުގަނޑު ބޭނުމެއްނޫން، ޝަރުޢީ ދާއިރާއަކަށް މި ޤައުމުގައި ނުފޫޒު ފޯރުވާކަށް. އެކަން ނިމިއްޖެއޭ މި ޤައުމުގައި. 17 ނޮވެންބަރު 2023ގެ 5:03 ން ފެށިގެން މި ޤައުމުގެ ޝަރުޢީ ދާއިރާއަށް ނުފޫޒު ފޯރުވުން ނިމިއްޖެއޭ. އެކަން ކުރާކަށް ފުރުޞަތު ދޭކަށް ރައްޔިތުން ބޭނުމެއްނުވެއޭ. އެހެންވީމާ، އެކަމެއް ނުހިނގާނެ މި ޤައުމަކު ދެނެއް. އަޅުގަނޑު ވަޢުދުވީ ގޮތަށް ހާމަ ސަރުކާރެއް، ދެފުށް ފެންނަ ސަރުކާރެއް މިއީ ހަމަ ޙަޤީޤަތުގައިވެސް.

އާރު.ޓީ.އައި.ތައް ހުށަހަޅައިފި ވަރަށް ގިނަ ތަންތަނަށް. ރައީސް އޮފީހަށްވެސް. ރައީސް އޮފީހަށް ހުށަހެޅި އާރު.ޓީ.ތަކުގެ 91 ޕަސެންޓް އާރު.ޓީ.އައި. އަށް، އެއީ، މުއްދަތު ހަމަނުވެ ހުރި އެއްޗެހި އެބަހުރި، ޖަވާބުދޭން އަދި ވަގުތު ހުރި އެއްޗެހި. ދެން އެ އެއްޗެހި ނުލައިކަންނޭނގެ ކިޔަންވާނީވެސް. އެހެން ކަމަށްވަންޏާ، 100 ޕަސެންޓް އާރު.ޓީ.އައި.ތަކަށް ޖަވާބު ދެވިއްޖެ.
އެ އެއްޗެހި ލައިގެން ކިޔަންޏާ، 91 ޕަސެންޓް އާރު.ޓީ.އައި.ތަކަށް މިހާރު އެހެރީ ޖަވާބުދީފައި. އާރު.ޓީ.އައި. ގައިވެސް އަންނާނެ، ދެން އެކިކަހަލަ ކަންކަން އެބައާދޭ. އެހެންވިޔަސް، ހުރިހާ އެއްޗަކަށް ޖަވާބުދީފައި އެހެރީ.

ހަމަ އެއާއެކީގައި، އަޅުގަނޑުމެން ވާނީ "ސަރުކާރު ވެބްސައިޓް" ނަމުގައި ވެބްސައިޓެއް ޤާއިމުކޮށްފައި. ކެބިނެޓުގެ ނިންމުންތައް އިޢުލާނުކުރާ، ހާމަކުރާ ވެބްސައިޓެއްވެސް އޮންނާނެ. ހުރިހާ މިނިސްޓްރީއަކުން ކުރާ ހުރިހާ ކަމެއް، ކޮންމެ ދުވަހަކު އެ މިނިސްޓްރީއަކުން އެދަނީ އަޕްލޯޑް ކުރަމުން. ކޮންމެ މިނިސްޓްރީއަކުން އެބަ އަޕްލޯޑް ކުރޭ. މަޢުލޫމާތުގެ މުއްސަނދިކަން ދުވަހަކުވެސް ރާއްޖޭގައި ނުލިބޭވަރަށް އަޅުގަނޑުމެން މިދަނީ ދެމުން. ދުވަހަކުވެސް ނުލިބޭވަރަށް.

އަޅުގަނޑު ޖަވާބު ދިނުމަށްޓަކައި "ރައްޔިތުންގެ އަޑު"ގެ ނަމުގައި ޕޯޓަލްއެއް އުފެއްދިން. އޭގެތެރެއިން މިއަދާ ހަމަޔަށް އަޅުގަނޑާ ހަމަޔަށް އައީ 819 ސުވާލު. 819 ސުވާލު އައިސްގެން، 773 ސުވާލަށް ޖަވާބުދީފިން. ވަރަށް ތަފްޞީލުކޮށް. ބައެއް އެއްޗެހި ހުންނާނެ ދިގު މަޒުމޫނުން ޖަވާބުދީފައި. ޖަވާބުދީފައި ހުންނާނީ. ބާކީހުރި އެއްޗެހި ޕްރޮސެސް އެބަ ކުރެވޭ. އޭގެއިތުރަށް، މިނިސްޓަރުން، އެކި ވުޒާރާތަކުން 73 ނޫސްވެރިންގެ ބައްދަލުވުން، މިދިޔަ 52 ހަފްތާގައި ބާއްވައިފި. 73 ނޫސްވެރިންގެ ބައްދަލުވުން. މަޢުލޫމާތު ދެވިފައި ދޮގެއްތޯ ހުންނާނީ ފުދޭވަރަކަށް. 73 ނޫސްވެރިންގެ ބައްދަލުވުން ބާއްވައިފި. އޭގެއިތުރުން، 791 ފަހަރު، ވަޒީރުން އެކި މީޑިއާތަކަށް މަޢުލޫމާތު ދޭން ވަޑައިގަންނަވައިފި. 791 ފަހަރު.

އަޅުގަނޑުމެން ވާހަކަ ދައްކާނީ ނަތީޖާއިން. އަޅުގަނޑުމެން ދައްކާ ވާހަކަ ހުންނާނެ ވެރިފައި ކުރެވެން. އެހެންވީމާ، ދުވަހަކުވެސް މި ރާއްޖޭގައި މަޢުލޫމާތު ހާމަނުކުރާވަރަށް އަޅުގަނޑުމެން މިދަނީ މަޢުލޫމާތު ހާމަކުރަމުން. އަޅުގަނޑުމެންނަކީ ދެފުށް ފެންނަ ސަރުކާރެއް ހިންގާނެ ބައެއް. ހިންގަމުން މިދަނީ. އެގޮތަށް ކުރިއަށް އޮތްތާވެސް ހިންގާނީ އެހެން.

މިހާރު ހުށަހަޅާފައި އޮތް މީޑިއާ ބިލަކީ، އަޅުގަނޑު ގަބޫލުކުރާ ސިޔާސަތުތަކެއް ހުރި ބިލެއް ނޫން. އަޅުގަނޑެއް ނޫޅެން، މީޑިއާތައް ކޮންޓްރޯލް ކުރާހިތަކުންނެއް. އަޅުގަނޑު މިއީ މީޑިއާތައް ކޮންޓްރޯލް ކުރަން އުޅޭ މީހެއް ނޫން. އަޅުގަނޑު ބޭނުންވަނީ މިހާރަށްވުރެވެސް ބޮޑަށް މީޑިއާތަކަށް މިނިވަންކަން ދޭން އިނގޭތޯ. އެހެންވީމާ، އެގޮތަކަށް އަޅުގަނޑުމެންނެއް ނުކުރާނަން. އޭގެ ބަދަލުގައި، މީޑިއާތައް ބާރުވެރިކުރުވަން މަސައްކަތް ކުރަނީ. މީޑިއާތައް ބާރުވެރިކުރުވުމަށްޓަކައި ފުރަތަމަ ފަހަރަށް، މިފަހަރު މި ފާސްކުރެވޭ ބަޖެޓުގައި އޮންނާނެ، ދައުލަތުގެ ބަޖެޓުން މީޑިއާތަކަށް ފައިސާ ދޭން ހިމަނާފައި. ފުރަތަމަ ފަހަރަށް. ވަޢުދުވީ ގޮތަށް. ވަޢުދުވީ ގޮތަށް. އޭގެއިތުރަށް، މީޑިއާތަކަށް އޮފީސް ސްޕޭސް، ކުޑަ އަގެއްގައި ލިބޭގޮތަށް އަޅުގަނޑުމެން ވާނީ ވަޢުދުވެފައި. އެ ވަޢުދު ފުއްދުމަށްޓަކައި، ހުޅުމާލޭގައި އެސް.ޓީ.އޯ.އިން އަޅަން ފަށާފައި ހުރި އިމާރާތް އެހެރީ ސަރުކާރަށް ނަގާފައި. އެ އިމާރާތުގެ ބައެއް ފްލޯރތައް މި ކަނޑައަޅަނީ. މިހާރު ރާއްޖޭގައި ހިނގާ ހުރިހާ މީޑިއާތަކެއް، އެއީ، ވަކިވަރަކަށްވުރެ މުއްދަތު އިތުރުވެފައި، މި ދެންނެވީ ތަފްޞީލުތައް، ގަވާއިދެއް ހަދައިގެން ކެބިނެޓުން ފާސްކޮށްފައި، މިނިސްޓްރީން ކުރިއަށް ގެންދާނެ. އެ ޝަރުޠުތައް ހަމަވާ ހުރިހާ މީޑިއާތަކަށް އޮފީސް ސްޕޭސް އެތަނުން ލިބޭނެ. ޓީ.ވީ.ތަކަށް ޕްރޮޑަކްޝަން ސްޕޭސް ލިބޭނެ. މިހެންގޮސް މީޑިއާތަކަށް ބޭނުންވާ ޖާގައިގެ ވަސީލަތުގެ ތަކުލީފެއް ނުޖެހޭގޮތަށް، އެ ތަނުން ޖާގަ ލިބޭ ތަނެއް. މި އަންނަ އަހަރު ކުރީކޮޅު އަޅުގަނޑުމެން ޢަމަލީ މަސައްކަތް، އެތަނުގެ ފިނިޝިންގ ވާރކް ފަށަން މަސައްކަތް މި ކުރަނީ. އަހަރެއްހާ ދުވަސް ނަގާނެ ތަން ނިންމަން އެޓްލީސްޓް. އެހެންވީމާ، އުންމީދު މި ކުރެވެނީ، 2026 ފެށޭއިރުގައި، ކޮންމެ މީޑިއާއަކަށް އެތަނުން ޖާގަ ލިބޭނެއޭ. ވަރަށް ލުއި އަގެއްގައި. އެކަންވެސް އެވަނީ ހަމަޖެހިފައޭ.

އަޅުގަނޑު ދަންނަވާލަން ބޭނުންވާ ވާހަކައަކީ، މީޑިއާތަކުގެ ޒިންމާއެއްވެސް އެބައޮތޭ. މިއީ އިސްލާމް ޤައުމެއް. މީޑިއާތައްވެސް ހިންގަވަނީ އިސްލާމުން. ކީރިތި ޤުރްއާނުގައި، އިސްލާމްދީނުގައި ވަރަށް ސާފުކޮށް އެބައޮތް، ތެދު ހެދުމާބެހޭ ވާހަކަ. ތެދަކީ ތިމަންނާ ހިތަށްއަރާނެ ކަމެއްނޫން ކޮންމެހެން. ތެދަކީ، ހަމައެކަނި ތެދު ވާނީ ތެދަކަށް ވެގެން. އެހެންވީމާ، ތެދުބަހުން ތިޔަބޭފުޅުންވެސް މީޑިއާ ކުރިއަށް ގެންދަވާށޭ. އަޅުގަނޑަށް ވަރިހަމައޭ، ތެދު ވެއްޖިއްޔާ، ކޮންމެ އެއްޗެއްވެސް ހާމަކުރާށޭ. އެއީކީއެއް ސިޔާސީވެގެން، ސިޔާސީ ވެރިޔަކު ބުނެގެން، ނޫނީވިއްޔާ ތިމަންނަގެ އަމިއްލަ އެޖެންޑާއެއް އޮވެގެން ލިޔާ އެއްޗެއް ކޮންމެހެން ތެދަކަށް ނުވާނެއޭ. އެހެން ނަހައްދަވާށޭ. ތެދުބަހުން ލިޔުމުގެ ފުރިހަމަ މިނިވަންކަން މި ރާއްޖޭގައި، އިސްލާމްދީނާއި ޤާނޫނުއަސާސީއާ އެއްގޮތަށް ފުރިހަމަ މިނިވަންކަން ޙަޤީޤީ މާނައިގައި ހުރިހާ މީޑިއާތަކަށް އޮންނާނެ. އާދެ، އެހެންވީމާ، އެގޮތަށް އަޅުގަނޑުމެން ކަންތައްތައް މިގެންދަނީ.

ކުރިއަށް އޮތް އަހަރުގެ ތެރޭގައި ފެނިވަޑައިގަންނަވާނެ، މިގޮތަށް ކައުންސިލްތައްވެސް އަޅުގަނޑުމެން ލާމަރުކަޒީ ނިޒާމުގެތެރެއިން. މިދިޔަ އަހަރުގެ ތެރޭގައި އަޅުގަނޑު ބައްދަލުކުރިން، 169 ކައުންސިލާ. އަޅުގަނޑު ގޮސް ބައްދަލުކުރީ. ރައީސް އޮފީހަކަށް ނުގެންނަން. އަޅުގަނޑު 70 ރަށަށް ދަތުރުކޮށްފައި، 169 ކައުންސިލާ އަޅުގަނޑު ބައްދަލުކޮށްފިން. އަޅުގަނޑަކަށް ނޭނގެ، ކުރީގެ ރައީސުން އެކަން ކުރެއްވި ކަމެއް. އަޅުގަނޑު ކުރިން. އަޅުގަނޑު 169 ރަށަށް ގޮސްފިން. ދެން ވަގުތު ނުވެގެން، ބާކީއޮތް އަރިއަތޮޅުގެ ދެބުރިއާއި، މާލެއަތޮޅުގެ އުތުރުގެ ރަށްތަކަށް ނުދެވިގެން އަދި މިއުޅެނީ. އިރާދަކުރެއްވިއްޔާ، ވަރަށް އަވަހަށް ގޮސް ނިންމާލާނަން އެބައިވެސް. އެ ބައި ނިމިގެން، އަޅުގަނޑު ވަޢުދުވީ ގޮތަށް، އަޅުގަނޑު ދަތުރު ފަށާނަން، ހުރިހާ ރަށަކަށް ދިޔުމަށް. އަދި 70 ރަށަށް މި ދެވުނީ. ހުރިހާ ރަށަކަށް އަޅުގަނޑު ދަތުރުކުރާނަން މި އަންނަ އަހަރުގެ ތެރޭގައި. އިރާދަކުރެއްވިއްޔާ، ވަގުތުވީވަރަކުން ތާވަލު ބަހާލައިގެން ބަލާނަން އަހަރުތެރޭގައި ނިންމާލެވޭތޯ. މަސައްކަތް ކުރާނަން ނިންމާލެވޭތޯ. ނިންމާލާފައި، ދެން އަނެއްކާވެސް ތަރައްޤީގެ މަޝްރޫޢުތައް ކުރިއަށް ގޮސް ނިމެންވާއިރަށް، އަޅުގަނޑު އަނެއްކާވެސް ދެވަނަ ރައުންޑެއްގައި ދަތުރުކުރާގޮތަށް، ވަޢުދުވީ ގޮތަށް ކުރިއަށް ގެންދާނީ.

އާދެ، އެހެންވީމާ، ލާމަރުކަޒީ ނިޒާމުގެ ތެރެއިން، އަޅުގަނޑު ވަޢުދުވިން، ޑަބްލިޔޫ.ޑީ.ސީ.ތަކަށް، ޑަބްލިޔޫ.ޑީ.ސީ.ތަކުގެ މިހާރު ލިބޭ އެލަވަންސަކީ، އެ ބޭފުޅުންނަށް މުސާރައެއް ގޮތުގައި، އެ ސްޓޭޓަސް ލިބޭ، އެ ބޭފުޅުންނަށް ރޯދަމަހުގެ އެލަވަންސް ލިބޭގޮތަށް، ވިހެއުމުގެ ޗުއްޓީ ނެގޭގޮތަށް ޤާނޫނަށް ބަދަލުގެނައުމަށް. މިހާރު އެ ޤާނޫނުގެ މަސައްކަތް، އޭ.ޖީ. ފަށްޓަވައިފި. ވަރަށްގިނަ ޤާނޫނަށް ބަދަލުގެންނަންޖެހޭ މިކަން ކުރަން. އެ މަސައްކަތް ކުރަނީ. މަޖިލީހަށް ވަރަށް އަވަހަށް ފޮނުވޭތޯ ބަލާނަން. އިރާދަކުރެއްވިއްޔާ، ޑަބްލިޔޫ.ޑީ.ސީ.ތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް، އަޅުގަނޑު ވަޢުދުވީ ގޮތަށް އެކަން ކޮށްދޭނަން.

އާދެ، ނިންމާލަން މިހާރު މި ހިފަނީ. އާދެ، ނިންމާލަމުންވެސް އަޅުގަނޑު ދަންނަވަން ހުރި ބައެއް ކަންކަމަކީ، އަޅުގަނޑަށް އެންމެ މުހިންމީ، އަޅުގަނޑުމެންގެ މިނިވަންކަމާއި ސިޔާދަތު ޙިމާޔަތްކުރުމޭ. އަޅުގަނޑު ދެންނެވިން، އެންމެބޮޑު ވަޢުދަކީ، އަޅުގަނޑުމެންގެ މިނިވަންކަން ކަށަވަރު ކުރުމޭ. އަޅުގަނޑުމެންގެ މިނިވަންކަން ކަށަވަރުކޮށްގެން، ދެންހުރި ކަންކަމަށް ބަލާއިރުގައި، ދެވަނައަށް، ބޯހިޔާވަހިކަން އަޅުގަނޑު ވަޢުދުވީ.

އެހެންވީމާ، މިނިވަންކަން ކަށަވަރު ކުރުމަށްޓަކައި ފުރަތަމަ ދުވަހު މަސައްކަތް ފެށީ. ހުވާކޮށްގެން ގޮސް އެންމެ ފުރަތަމަ ބައްދަލުކުރި އެއް ބޭފުޅަކީ، އިންޑިއާގެ ފަރާތުން ވަޑައިގެންނެވި ބޭފުޅާ. ވަރަށް ޞުލްޙަވެރިކޮށް، އިންޑިއާ ސަރުކާރުގެ ފުރިހަމަ އެއްބާރުލުމާ އެކީގައި، ދެ ޤައުމުގެ ދޭތެރޭގައި އޮތް ގާތް ގުޅުމުގެ ތެރެއިން ރަޙްމަތްތެރިކަމާ އެކީގައި، ޑިޕްލޮމެޓިކް ރިވެތި އުޞޫލުތަކުން މަޝްވަރާ ކުރެވިގެން، ދިވެހި ރައްޔިތުންގެ ނިންމުމަށް އިޙްތިރާމު އަދާކުރުމުގެ ގޮތުން، އިންޑިއާ ސަރުކާރުން މިވަނީ މި ޤައުމުގައި ތިބި ހުރިހާ އިންޑިއާ ސިފައިން ގެންގޮސްފައި. މިތާކު ނުތިބޭނެ މިހާރު އިންޑިއާ ސިފައިންނެއް. އިންޑިއާ ސަރުކާރަށް ޝުކުރު ދަންނަވަން އެކަމަށް. ރައްޔިތުން ނިންމި ނިންމުން، އަޅުގަނޑު އިރާދަކުރެއްވީތީ، އަޅުގަނޑުމެން އެންމެންގެ އެއްބާރުލުމާ އެކީގައި، އެކަން އެވަނީ ކާމިޔާބު ކުރެވިފައި.

ހަމަ އެއާއެކީގައި، ކަނޑުއަޑީގެ މަޢުލޫމާތުތައް ހޯދުމަށް ހަދާފައި އޮތް ހައިޑްރޮގްރަފީ އެއްބަސްވުން، އަޅުގަނޑުމެން ނިންމި ގޮތަށް އެއޮތީ މުއްދަތު ހަމަވީމަ އާނުކޮށް. މިހާރަކު ނޯންނާނެ އެއްބަސްވުމެއް. އަޅުގަނޑުމެން ފަހުން މިކުރި ދަތުރުގައި މި ނިންމީ، ކެޕޭސިޓީ ބިލްޑް ކުރަން. އެވެސް އޮޅުވާލަން، ދޮގުހަދާ މީހުން މަސައްކަތްކުރޭ ނޫންތޯ. ދޮގުހަދާ މީހުން މި ބުނަނީ ކީކޭތޯ؟ އަޅުގަނޑު ގޮސްފައި އަނެއްކާ ސޮއިކޮށްފިއޭ، ހައިޑްރޮގްރަފީ އެއްބަސްވުން، އިންޑިއާ ސަރުކާރު ލައްވައި މަސައްކަތް ކުރުވާގޮތަށް އަނެއްކާ އެއްބަސްވެއްޖެއޭ. ދޮގުހަދާ މީހުންގެ ދޮގުތައް، ޙަޤީޤަތް އެނގުނީމަ ރައްޔިތުންނަށް ވަރަށް ސާފު އެބަވޭ. ކެޕޭސިޓީ އިތުރުކުރަން ނިންމީ. ދެން ނާންނާނެއޭ، އެ ޤައުމުގެ ސިފައިންނެއް މިކަން ކުރާކަށް. އަޅުގަނޑުމެންގެ ސިފައިންނޭ މިކަން ކުރާނީ. އެ ބޭފުޅުން ދޭނީ ޓްރޭނިންގ. އެ ބޭފުޅުން ދެއްވަންޏާ ދެއްވާނީ ވަސީލަތް. އެކަމަކު ދިވެހި ސިފައިން، ފަޚުރުވެރި ދިވެހި ސިފައިން، ދިވެހި ޤައުމުގެ ކަނޑުއަޑިއާއި މައްޗާއި، ހުރިހާ ތަނެއް ބަލަހައްޓާނީ.

އެހެންވީމާ، އެގޮތަށް މިދަނީ. އަޅުގަނޑުމެން ގެނައީ ޑްރޯންސް. ޔޫ.އޭ.ވީ. ގެނައީ ކީއްކުރަންތޯ؟ މި ޤައުމަކީ އެންމެބޮޑު އެއް އީ.އީ.ޒެޑް އޮތް ޤައުމު. ވަރަށްބޮޑު. މި ބޮޑު ބިޔަ އީ.އީ.ޒެޑް ބަލަހައްޓަން އަޅުގަނޑުމެން އެބަ ބޭނުންވޭ، ކޮންމެވެސްކަހަލަ މެކޭނިޒަމެއް. އެހެންވީމާ، ޒަމާނީ ފެސިލިޓީޒްއަށް ދާންޖެހޭނެ. ތުރުކީގެ ރައީސްގެ އެހީތެރިކަމާ އެކީގައި، އެ ޤައުމުން ވަރަށް ވަރަށް ރަނގަޅު ފުރުޞަތެއް އަޅުގަނޑުމެންނަށް ލިބިފައި މިއޮތީ. އެހެންވީމާ، އޭގެތެރެއިން އަޅުގަނޑުމެން މިވަނީ ޑްރޯންސް ގެނެސްގެން، އަޅުގަނޑުމެންގެ ޤައުމުގެ އީ.އީ.ޒެޑް ސަރަޙައްދު، މި ބޮޑު ކަނޑުގެ ސަރަޙައްދު ބެލެހެއްޓުމުގެ ޤާބިލްކަން ޤާއިމުކުރަން ފަށާފައި. މިހާރު ސިފައިން އެގެންދަނީ މަސައްކަތް ކުރަމުން.

އެހެންވީމާ، އަޅުގަނޑުމެންނަށް ލިބޭ ހިތްފަސޭހަކަމަކީ ކޮބައިތޯ؟ އަޅުގަނޑުމެންގެ އަމިއްލަ ސިފައިން، ތަމްރީނު ލިބިގެން، އަމިއްލަ ތަކެތީގައި، އަޅުގަނޑުމެންގެ އަމިއްލަ ސަރަޙައްދު ބަލަހައްޓާކަމުގެ ހިތްހަމަޖެހުން. މިއަށްވުރެ ބޮޑު ހިތްހަމަޖެހުމެއް ބޭނުންވޭތޯ. އަޅުގަނޑުމެންގެ ސަރަޙައްދު، އަޅުގަނޑުމެންގެ އިންފާރުގެ އެތެރެ މިހާރު އެބަ ބެލެހެއްޓެއޭ. ބަލަހައްޓަނީ ކޮންބައެއްހޭ. ދިވެހިންނޭ. ދިވެހި ސިފައިންނޭ. އަޅުގަނޑުމެން ވާހަކަ ދައްކާނީ ނަތީޖާއިން.

އާދެ، އެއީ ސިޔާދަތީ ރަތްރޮނގު އަޅުގަނޑުމެން ދަމާގޮތަކީ. އިރާދަކުރެއްވިއްޔާ އަޅުގަނޑުމެންނާ ގާތްވާނެ ހުރިހާ ޤައުމެއް. ހުރިހާ ޤައުމުތަކެއް ގާތްވާނެ. އަޅުގަނޑުމެން ބޭނުންވަނީ، ދިވެހީންނަށް ހެޔޮގޮތްވާން. ދިވެހީންނަށް ހެޔޮގޮތްވާ ކަމުގައިވަންޏާ، ދިވެހީންނަށް ބޭނުންވާ ކަންކަން ފުދޭ ކަމަށްވަންޏާ، އެ އޮންނަންޖެހޭ ދޭދޭ ގުޅުމާއި، ބައިނަލްއަޤްވާމީ ގުޅުންތަކަށް އިޙްތިރާމު އަދާކޮށް، ހުރިހާ ޤައުމަކާ އެކީގައި ގާތް ގުޅުން އަޅުގަނޑުމެން ބާއްވަމުން މިދަނީ. އެގޮތުން، ކައިރިއެއް، ދުރެއް އަޅުގަނޑުމެން ނުބަލަން. ކުޑައެއް، ބޮޑެއް ނުބަލަން. ކޮންމެ ޤައުމަކާ އެކީގައިވެސް، ދިވެހި ރައްޔިތުންނަށް ފައިދާވާ ކަމަށްވަންޏާ، އަޅުގަނޑުމެން އިސްލާމްދީނުގެ ހަމަތަކާއި އުޞޫލުތަކާ އެއްގޮތަށް، ދިވެހިރާއްޖޭގެ ޤާނޫނުއަސާސީއާ އެއްގޮތަށް، ކޮންމެ ޤައުމަކާ އެކީގައިވެސް އަޅުގަނޑުމެން ޚާރިޖީ ގުޅުން ބާއްވަމުން މިގެންދަނީ. 

އެހެންވީމާ، ފުރަތަމަވެސް އަޅުގަނޑު ކެމްޕެއިން ފަށަމުން، ލޯންޗްކުރި ރޭ ދެއްކި ވާހަކަ ނޫންތޯ މިތާ މި ގަޑީގައިވެސް މި ދައްކަނީ. ތަފާތެއް އެބައޮތްތޯ؟ ނެތް. އެގޮތަށް މިދަނީ. އެގޮތަށް ކުރިއަށް އޮތް ހަތަރު އަހަރުވެސް އިރާދަކުރެއްވިއްޔާ ދާނީ.

އާދެ، އެހެންވީމާ، މިގޮތަށް އަޅުގަނޑުމެން ކުރިއަށް ގެންދާނަން. އިރާދަކުރެއްވިއްޔާ، އަޅުގަނޑުމެންގެ ޤައުމަށް ވަރަށް ފާގަތި މުސްތަޤްބަލެއް، ރައްޔިތުންގެ ފުރިހަމަ އެއްބާރުލުމާ އެކީގައި ލިބިގެންދާނެ.

އާދެ، އަޅުގަނޑު ނިންމާލުމުގެ ކުރިންވެސް ޝުކުރު ދަންނަވާލަން ބޭނުންވޭ، ބައެއް ފަރާތްތަކަށް. ޚާއްޞަ ގޮތެއްގައި، ދިވެހި ލޮބުވެތި ރައްޔިތުންނަށް. ރައްޔިތުން އަޅުގަނޑުމެންނަށް، ސަރުކާރަށް ތިޔަ ދެއްވާ އެއްބާރުލެއްވުމަށްޓަކައި. ރައްޔިތުން އަޅުގަނޑަށް އަދި އަޅުގަނޑުމެންގެ ސަރުކާރަށް އިތުބާރުކުރައްވައި ތިޔަ ދެއްވާ އެއްބާރުލެއްވުން. އަދި އެއާއެކީގައި، މި މަސައްކަތްތައް ކުރުމުގައި އަޅުގަނޑުމެންނަށް އެހީތެރިކަން ދެއްވަނީ ސަރުކާރުގެ މުވައްޒަފުން. ސަރުކާރުގެ ވުޒާރާތަކާއި، ކުންފުނިތަކުގެ މުވައްޒަފުން. އަޅުގަނޑުމެންގެ ވެރިން، ސިޔާސީ ބޭފުޅުން، އިސްކޮށް ތިއްބެވި ބޭފުޅުން، މިނިސްޓަރުން، އެމް.ޑީޒުން އެ ކުރައްވާ ކަންކަމަށް އެއްބާރުލުން ދެއްވަނީ. އެހެންވީމާ، ހުރިހާ މުވައްޒަފުންނަށް ވަރަށް ބޮޑަށް ޝުކުރު ދަންނަވަން. ރެޔާއިދުވާލު، ރެޔާއިދުވާލު އެ ބޭފުޅުން މަސައްކަތް ކުރައްވަމުން ގެންދަވާ.

ރައްޔިތުންގެ މަޖިލީހުގެ ޢިއްޒަތްތެރި މެންބަރުން، އަޅުގަނޑުމެންގެ ބަދަހި ބިޔަ ޓީމު ތިޔަ ދެއްވާ އެއްބާރުލުމަށްޓަކައި އަޅުގަނޑުގެ ހިތުގެ ފުންމިނުން ވަރަށް އިޚްލާޞްތެރިކަމާ އެކީގައި، ތިޔަ ޢިއްޒަތްތެރި މަޖިލިސް މެންބަރުންނަށާއި، މަޖިލީހުގެ ރައީސަށާއި، ނައިބު ރައީސަށާއި، ޕީ.ޖީ. ލީޑަރަށާއި، ޢިއްޒަތްތެރި ހުރިހާ މަޖިލިސް މެންބަރުންނަށް ވަރަށް ބޮޑަށް ޝުކުރު ދަންނަވަން.

އާދެ، އިރާދަކުރެއްވިއްޔާ އަޅުގަނޑުމެން ކުރިއަށްދާނީ އެކުވެރިކަމާ އެކީގައި. ދިވެހި ޤައުމަށް އުފާފާގަތިކަން ގެނެސްދިނުމުގައި. އަޅުގަނޑުމެން ވީ ވަޢުދުތައް ފުއްދުމުގައި، އިޚްލާޞްތެރިކަމާއި ތެދުވެރިކަމާއި އަމާނާތްތެރިކަމާ އެކީގައި. ﷲ ގަންދީ އަޅުގަނޑު ކޮށްފައި ހުރި ހުވާގެމަތިން ކޮންމެ ސިކުންތަކު ހަނދާންކުރާ ހާލު، އިރާދަކުރެއްވިއްޔާ ރައްޔިތުންނަށްވީ ވަޢުދު ފުއްދުމުގައި އަޅުގަނޑު ދާނީ ތިޔަބޭފުޅުންގެ ފުރިހަމަ އެއްބާރުލުމާ އެކީގައި، ސާފުކަންމަތީގައި ކުރިއަށް. ވަރަށް ބޮޑަށް ޝުކުރިއްޔާ!