މޮބިޓެލް ސްރީލަންކާއާއި، ޔުނިވަރސިޓީ އޮފް ކޮލަމްބޯއާ ގުޅިގެން ވަތަނިއްޔާ ޓެލެކޮމް މޯލްޑިވްސްއިން ރާއްޖޭގައި މޯބައިލް ލަރނިންގ ނުވަތަ އެމް-ލާރނިންގ ޚިދުމަތް ދިނުން، ނައިބު ރައީސް ޑޮކްޓަރ މުޙަންމަދު ވަޙީދު މިއަދު އިފްތިތާޙް ކޮށްދެއްވައިފިއެވެ.
އެމް-ލާރނިންގއަކީ އެންމެފަހުގެ ޓެކްނޮލޮޖީގެ އެހީގައި ދަރިވަރުންގެ ބައިވެރިވުމާއެކު، ކޮންމެ ތަނެއްގައި ހުރެގެންވެސް އުނގެނުމުގެ މަގުފަހިކޮށްދޭ ޚިދްމަތެކެވެ. ވަތަނިއްތާ އެމް-ލާރނިން އިނިޝިއޭޓިވްގެ ސަބަބުން، ވަތަނިއްޔާ ބްރޯޑްބޭންޑް ކަނެކްޝަނެއް މެދުވެރިކޮށް، ދަރިވަރުންނަށް ކޮންމެ ތަނެއްގައިވެސް ވަރޗުއަލް ކްލާސްރޫމް މެދުވެރިވެގެން، ތަޢުލީމް އުނގެނުމުގެ ފުރަޞަތު ހުޅުވާލަދެއެވެ. ރާއްޖޭގައި ވަތަނިއްޔާގެ މޯބައިލް ބްރޯޑްބޭންޑްގެ ޚިދްމަތް ލިބޭ ކޮންމެ ތަނެއްގައި ހުރި މީހަކަށްވެސް ވަތަނިއްޔާ އެމް-ލާރނިންގގެ އެހީގައި ޔުނިވަރސިޓީ އޮފް ކޮލަމްބޯގެ ކޯސްތަކުގައި ބައިވެރިވެ، ކިޔެވުމުގެ މަގުފަހިކޮށްދެއެވެ.
ވަތަނިއްޔާގެ އެމް-ލާރނިންގ އިނިޝިއޭޓިވް އިފްތިތާޙް ކޮށްދެއްވުމުގެ ގޮތުން، މިއަދު ހަވީރު ހޮލިޑޭ އިން ހޮޓަލުގައި އޮތް ރަސްމިއްޔާތުގައި ވާހަކަފުޅު ދައްކަވަމުން، ސްރީލަންކާއަށް ގޮސް، ކޮލަމްބޯ ޔުނިވަރސިޓީގައި ތަޢްލީމު ހޯދުމުގެ ތަނަވަސްކަން ނެތް ވަރަށްގިނަ ދިވެހި ކުދިންނަށާއި، އެކި ސަބަބުތަކަށްޓަކައި ސްރީލަންކާއަށް ގޮސް ކިޔެވުމުގެ ފުރްޞަތު ލިބިފައިނުވާ ވަރަށްގިނަ ދިވެހިންނަށް، މި ޚިދްމަތަކީ ބޭނުންތެރި ޚިދްމަތަކަށް ވެގެންދާނެ ކަމުގައި ނައިބު ރައީސް ވިދާޅުވިއެވެ.
އަދި މިޚިދްމަތުގެ ސަބަބުން، ރާއްޖޭގެ ރަށްރަށުގައި ތިބި ވަރަށްގިނަ ކުދިންނަށާއި މީހުންނަށް، އެމީހުންގެ ރަށުގައި ތިބެގެން މަތީ ތަޢުލީމް ހޯދުމުގެ އިތުރު މަގުތައް ފަހިވެގެންދާނެ ކަމުގައި ނައިބު ރައީސް ވިދާޅުވިއެވެ.
މީގެއިތުރުން، ސަރުކާރުން މިފަދަ އިތުރު ޕްރޮގްރާމްތައް ތަޢްލީމީ އަދި ޞިއްޙީ ދާއިރާގައި ހިންގުމަށް ރާއްވަވަމުން ގެންދަވާ ކަމަށާއި، މިގޮތުން، 3ޖީ ޓެކްނޮލޮޖީއާއި، ބްރޯޑްބޭންޑް އިންޓަރނެޓް މެދުވެރިކޮށް، ޓެލެމެޑިސިންފަދަ އިތުރު ޕްރޮގްރާމްތައް ތަޢާރުފް ކުރެވިދާނެ ކަމުގައި ނައިބު ރައީސް ވިދާޅުވިއެވެ.
އެމް-ލާރނިންގގެ ޚިދުމަތަކީ، މޮބިޓެލް ސްރީލަންކާއާއި ޔުނިވަރސިޓީ އޮފް ކޮލަމްބޯ ގުޅިގެން، މިހާރުވެސް ސްރީލަންކާގައި ކާމިޔާބުކަމާއެކު ފޯރުވައިދެމުން ގެންދާ ޚިދްމަތެކެވެ.
