ދިވެހިރާއްޖެއަށް ހެޔޮ ގޮތް އެދޭނީ ދިވެހި ރައްޔިތުން ކަމަށާއި، ދިވެހިރާއްޖެއަށް ހެޔޮ ގޮތް އެދިގެން، ކަނޑު ހުރަސްކޮށް އަންނާނެ ބަޔަކު ނޫޅޭނެ ކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، "ރައީސް ޔާމީން 2018" ކެމްޕެއިން ލީޑަރުން ތަމްރީންކުރުމުގެ މަހާސިންތާގެ ދެވަނަ ބުރު ނިންމުމުގެ ރަސްމިއްޔާތުގައި މިރޭ ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާގެ ވާހަކަފުޅުގައި، ދިވެހިރާއްޖޭގެ ކަންކަން ނިންމުމުގައި އަޅުގަނޑުމެން ބޭރު މީހުންނަށް ޖާގަދީގެންނުވާނެ ކަމަށާއި، ދިވެހިންގެ ކަންކަން ނިންމާނީ ދިވެހިން ކަމުގައި ވިދާޅުވިއެވެ.
މިރޭގެ ރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ދިވެހިރާއްޖެއަކީ ކުޑަ ޤައުމެއް ނަމަވެސް، ދިވެހިރާއްޖެއަކީ އުސޫލުތަކެއް ހިނގާ، ލިޔެވިފައިވާ ޤަނޫނު އަސާސީއެއް އޮތް ޤައުމެއްކަން ދުނިޔެއަށް ހާމަކޮށްދެއްވުމަކީ މި ސަރުކާރުން ވަރަށް ބޮޑު އަހަންމިއްޔަތެއް ދެއްވާ ކަމެއްކަމުގައި ވިދާޅުވިއެވެ. އަދި، އަޅުގަނޑުމެންގެ ޤައުމުގައިވެސް މިނިވަން މުސްތަޤިއްލު ޝަރުޢީ ނިޒާމެއް އެބައޮތް ކަމަށާއި، ޝަރުޢީ ނިޒާމް ހިނގާނީ ޝަރުޢީ ނިޒާމުގެ އުސޫލުތަކާ އެއްގޮތަށް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އަދި، ދިވެހިރާއްޖެއަކީ ކުޑަ ޤައުމަކަށްވާތީ، މި ޤައުމުގެ ހުރިހާ ކަމަކާ ބޭރު މީހުން ބެހެން އަޅުގަނޑުމެން ދައުވަތު ދިނުމަކީ މިކަން ވާންވީ އެންމެ ރަނގަޅު ގޮތްތޯ ރައީސުލްޖުމްހޫރިއްޔާ ސުވާލުކުރެއްވިއެވެ.
ރައްޔިތުންނަށް ޚިދުމަތްކުރަން ނުކުންނަ ބަޔަކު ނުކުންނަންވާނީ މިޤައުމުގައި ހުރި ބޮޑެތި އިޖްތިމާޢީ މައްސަލަތަކާއި، މުޖުތަމަޢަށް ދިމާވެފައިވާ އެކިއެކި ގޮންޖެހުންތަކަށް ޙައްލު ހޯދައިދޭން ކަމުގައި ބަޔާން ކުރައްވަމުން، އެޙައްލު ހޯދައިދިނުމަކީ އެފަރާތަކަށް އޮތް އެންމެ ވަރުގަދަ މަސްޢޫލިއްޔަތު ކަމުގައި ރައީސުލްޖުމްހޫރިއްޔާ ވިދާޅުވިއެވެ. މިގޮތުން، ރާއްޖޭގައި ހުރި މައްސަލަތައް ޙައްލު ކުރުމަކީ މި ސަރުކާރަށް މަތިވެފައި އޮތް މުހިންމު މަސްޢޫލިއްޔަތެއް ކަމުގައި އެމަނިކުފާނު ވިދާޅުވިއެވެ. އަދި، ރައީސުލްޖުމްހޫރިއްޔާގެ މަސްޢޫލިއްޔަތުތައް އަދާކުރެއްވުމުގައި ރާއްޖޭގައި ޤާއިމްވެފައިވާ އުސޫލުތައް ދޫކޮށްލައްވާފައި، އެއުސޫލުތަކުގެ ބޭރުން އެއްވެސް ކަމެއް އެމަނިކުފާނު ނުކުރައްވާނެ ކަމުގެ ޔަޤީންކަން ދެއްވިއެވެ.
މިރޭގެ ރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މި ސަރުކާރަށް އަމާޒުވަމުންދާ ފާޑުކިޔުންތަކާއެކުވެސް، މިސަރުކާރުން މަސައްކަތްކުރައްވަނީ ރައްޔިތުންނަށް ދިމާވެފައިވާ ދަތިތަކަށް ޙައްލު ހޯދައިދެއްވައި، ރައްޔިތުންނަށް ޚިދުމަތްކޮށްދެވޭނެ އިތުރު ފުރުޞަތުތަކެއް ހޯއްދަވަން ކަމުގައި ވިދާޅުވިއެވެ. އަދި، މި ޤައުމަށް ދިމާވެފައިވާ މައްސަލަތައް ޙައްލުކުރެއްވުމަށް ނުކުންނަވާއިރު ކޮންމެ ސަރުކާރަކުންވެސް، އެ މައްސަލަތައް ޙައްލުކުރެވޭނެފަދަ މެންޑޭޓެއް ހިފައިގެން ނުކުންނެވުމުގެ މުހިންމުކަން އެމަނިކުފާނު ފާހަގަކުރެއްވިއެވެ. މިރޮނގުން ވާހަކަފުޅު ކުރިއަށް ގެންދަވަމުން، މި ސަރުކާރުގެ އަމާޒުފުޅަކީ، ދިވެހި ރައްޔިތުންނަށް ޚިދުމަތް ދެއްވުމަށާއި، ދިވެހިރާއްޖޭގެ ޙާލަތު އިސްލާޙުކުރުން ކަމުގައިވެސް އެމަނިކުފާނު ވިދާޅުވިއެވެ.
"ރައީސް ޔާމީން 2018" ކެމްޕެއިން ލީޑަރުން ތަމްރީންކުރުމުގެ މަހާސިންތާގެ ދެވަނަ ބުރު ނިންމުމަށް މިރޭ ބޭއްވި ރަސްމިއްޔާތުގައި، ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމާއި، ރައީސުލްޖުމްހޫރިއްޔާގެ ނާއިބު އަޙްމަދު އަދީބު ޢަބްދުލްޣަފޫރު ބައިވެރިވެވަޑައިގެންނެވިއެވެ.
